Temoignage par telephone kapav bien efficace
1. Kifer nou kapav considere temoignage par telephone couma enn moyen important pou accompli nou ministere?
1 Kifer nou bizin reflechi lor possibilité pou servi telephone pou rann temoignage dan nou ministere? Parski c’est enn lot fason pou aide bann dimoune gagne enn connaissance exact pou zot kapav sauvé. (2 Pierre 3:9) Mem si nou methode principal pou donne temoignage lor bon nouvelle Royaume Bondié c’est par predication porte en porte, nou envie profite bann lezot methode pou joinde bann dimoune ki nou pa kapav joinde kot zot.—Mat. 24:14; Luc 10:1-7; Rév. 14:6.
2. Couma organise temoignage par telephone?
2 Enn temoignage organisé: Pareil couma predication porte en porte, temoignage par telephone aussi ena enn territoire pou sa. Enn proclamateur tousel ou-soit enn ti groupe deux ou-soit trois proclamateur kapav faire sa. Kan zot rann temoignage par telephone, zot bizin dan enn l’endroit trankil, kot nanyin pa pou derange zot, ni distraire zot. Beaucoup finn trouve sa bon pou assize devant enn la table kot ena bann kitsoz ki zot servi normalement kan zot preché porte en porte.
3. Ki kitsoz fodé pa blié kan nou donne temoignage par telephone?
3 Couma faire: Kan nou donne temoignage par telephone, nou presentation bizin couma enn conversation. Bann ki fek commence donne temoignage par telephone kapav lire enn presentation, sans donne l’impression ki li pé lire sa. Nou kapav servi bann entrée en matiere ki ena dan livre Comment raisonner, dan Ministere du Royaume ek tract Eski ou ti pou content konn la verité? Kan ou faire ou presentation, choisir enn theme, enn question, ek prepare-ou pou lire bann verset ki reponn question-la. En general ou pou offert mem publication ki ena dan l’offre du mois. Rappel sa: Relax ek pa koz vite. Ena bann bon maniere, patience, ek montré-ou amical, parski bann dimoune kapav ressenti sa par telephone. Ecoute dimoune-la kan li kozé, ek remercié li pou seki li dire. Pa mentionne possibilité pou faire bann donation, parski certain kapav prend sa coumadir ou pé faire enn la quete par telephone.
4. Ki kitsoz temoignage par telephone permette nou faire?
4 Li kapav arrivé ki dimoune avek ki ou pé kozé, li handicapé ou-soit malade, ou-soit c’est enn dimoune ki ena enn programme travail ki pa permette bann proclamateur joinde li pendant predication porte en porte. Ena lezot ki reste dan bann residence privé kot nou pa kapav rentré sans permission. Alors, pou ki nou kapav accompli nou ministere a fond, anou servi sa methode efficace-la pou donne temoignage par telephone.