Eski Ou Kapav Preché dan Tantot?
1. Dapré enn livre, ki ler l’apotre Paul ti preché lakaz-lakaz?
1 Dapré livre La Vie Toulé-jour dan Lepok Biblik (en anglais), l’apotre Paul ti habitué preché lakaz-lakaz “depuis 4 heure tantot ziska tard dan la nuit.” Nou pa koné si Paul vrai-mem ti preché dan sa ler-la, mais nou koné ki Paul ti disposé pou “faire tou kitsoz a cause la bonne nouvelle.” (1 Cor. 9:19-23) Alors, sa implik ki Paul ti organise-li pou preché lakaz-lakaz dan ler ki li ti pou zwenn maximum dimoune.
2. Kifer li enn bon ler pou preché dan tantot?
2 Dan beaucoup l’endroit, bann proclamateur habitué preche lakaz-lakaz dan gramatin pendant la semaine. Selman, eski c’est toujours pli bon moment pou faire sa dan ou l’endroit? Guette seki enn pionnier dire concernant so territoire: “Bien tigit dimoune kot zot pendant la journée. Mais la plupart kot zot dan tantot.” Preché dan tantot kapav pli bon l’occasion pou rann temoignage surtout ar bann missié. Bann dimoune souvent pli relax ek disposé pou kozé. Si dan ou territoire li pli bon pou preché dan tantot, bann ancien bizin organise bann reunion predication dan sa ler-la.
3. Couma nou kapav montré ki nou ena discernement kan nou pé preché dan tantot?
3 Servi Discernement: Kan pé preché dan tantot, li important ki nou ena discernement. Par exemple, si ou tape la porte enn dimoune dan enn mauvais ler, kitfois kan li pé mangé, li pli bon ki ou propose pou passé dan enn lot moment. Si pé faire noir, deboute dan enn place kot dimoune-la kapav trouve ou, ek pa tardé pou dire li kisannla ou été ek kifer ou devant so la porte. Li sage aussi ki ou travail deux par deux ou-soit ki le reste groupe pa al trop loin, ek reste dan bann chemin bien eclairé kot ou pa tousel. Pa tape la porte trop tard kot ou kapav derange enn dimoune ki pé al dormi. (2 Cor. 6:3) Si li dangereux pou preche dan enn territoire kan fini faire noir, faire territoire-la enn tigit pli boner.—Prov. 22:3.
4. Ki bann benediction nou gagné kan nou preché dan tantot?
4 Bann Benediction: Nou gagne plus la joie kan nou reussi zwenn bann dimoune dan predication. Ek plus nou reussi rann temoignage, plus nou gagne l’occasion pou aide lezot gagne la vie sauve ek “gagne enn connaissance exact lor la verité.” (1 Tim. 2:3, 4) Eski ou kapav adapté ou programme pou ki ou preché dan tantot?