Garde ‘l’amour ki ou ti ena au commencement’
“Contigne tini ferme seki to ena.”—RÉV. 3:11.
1, 2. Ki ou ti ressenti kan ou ti’nn sur ki seki ou ti pé aprann lor Jéhovah ti la verité?
ESKI ou rappel premier fois ki ou ti tann koz l’avenir extraordinaire ki Jéhovah offert bann dimoune obeissant? Si avant ou ti dan enn lot religion, ki ou ti ressenti kan, enn dimoune ti donne ou bann l’explication biblik lor bann projet Bondié, ou-soit kan li ti explik ou dan enn fason clair, bann l’enseignement ki ou ti trouve difficile pou comprend avant? Kitfois ou ti realisé ki bann dimoune ti’nn embete ou. Mais asterla, ou bien content ki ou finn konn la verité, pa vrai? Eski ou finn elevé par bann parent chretien? Eski ou rappel ki ou ti ressenti kan ou ti’nn sur ki seki ou ti pé aprann lor Jéhovah ti la verité ek kan ou ti’nn decide pou vive en accord avek seki ou ti pé aprann?—Rom. 12:2.
2 Beaucoup parmi ou bann frere ek soeur spirituel pou dire ou ki zot ti extra content, zot ti senti-zot proche ar Jéhovah, ek reconnaissant ki Li ti’nn attire zot vers Li. (Jean 6:44) Zot la joie ti pousse zot pou participe dan bann l’activité spirituel. Zot ti tellement content ki zot ti envie partage zot sentiment avek tou dimoune. Eski ou aussi ou finn faire sa l’experience-la?
3. Ki situation ti existé dan congregation Éphèse kan Jésus ti envoye zot enn message?
3 Kan Jésus ti koz avek bann chretien premier siecle ki ti dan congregation Éphèse, li ti koz lor ‘l’amour ki zot ti ena au commencement.’ Bann Éphésien ti ena beaucoup bon qualité, pourtant l’amour ki zot ti ena au commencement pou Jéhovah, ti’nn refroidi. Alors, Jésus ti dire zot: “Mo konn to bann action, la peine ki to donné ek to l’endurance, ek mo koné ki to pa kapav supporte bann mauvais dimoune, ek ki to’nn testé bann ki dire zot bann zapotre, mais ki pa bann zapotre, ek to finn trouvé ki zot bann menteur. To pé montré aussi l’endurance, ek to finn supporté a cause mo nom ek to pa finn fatigué. Pourtant, mo ena sa kont toi: c’est ki to’nn perdi l’amour ki to ti ena au commencement.”—Rév. 2:2-4.
4. Kifer message ki Jésus ti donne bann Éphésien li important zordi?
4 Conseil ki Jésus ti donné dan livre Révélation pou bann Éphésien ek lezot congregation, zot ti bien adapté ar bann condition ki ti existé pendant enn certain temps parmi bann chretien oint a partir 1914. (Rév. 1:10) Pourtant, li possible ki zordi aussi, certain chretien perdi “l’amour ki [zot] ti ena au commencement” pou Jéhovah ek pou la verité. Mazinn sa point-la ek guetté couma kan ou rappel ek medite lor seki ou’nn vive en tant ki chretien, ou pou kapav garde ek regagne l’amour ek zele ki ou ti ena au commencement pou Bondié ek pou la verité, ek ou pou kapav faire sa l’amour-la vinn pli fort.
Ki ti’nn convaink ou ki ou ti’nn trouve la verité?
5, 6. (a) Ki conviction chaque chretien bizin ena? (b) Ki ti convaink ou ki bann Témoins de Jéhovah enseigne la verité? (c) Ki kapav aide enn dimoune pou regagne l’amour ki li ti ena au commencement?
5 N’importe kisannla ki voué so la vie ar Jéhovah bizin avant, convaink li-mem ki “volonté Bondié, li bon, li acceptable ek li parfait.” (Rom. 12:1, 2) Enn kitsoz ki li bizin faire c’est aprann bann verité ki trouve dan la Bible. Kitfois seki convaink enn dimoune ki bann Témoins de Jéhovah enseigne la verité li kapav different avek seki convaink enn lot dimoune. Certain rappel ki seki ti faire zot change zot l’attitude c’est kan zot ti lire nom Bondié dan la Bible ou-soit kan zot ti comprend vrai-mem dan ki condition bann dimoune mort été. (Ps. 83:18; Eccl. 9:5, 10) Seki ti impressionne lezot c’est l’amour ki bann serviteur Jéhovah ena entre zot. (Jean 13:34, 35) Ena lezot encore ki ti reflechi lor seki sa vedir pa forme partie dan le monde. Zot ti’nn tire conclusion ki fodé pa ki bann vrai chretien prend part dan bann debat politik ou-soit dan bann la guerre ki n’importe ki pays faire.—Is. 2:4; Jean 6:15; 17:14-16.
6 Pou beaucoup dimoune, c’est kan zot inn aprann sa bann kitsoz-la ek lezot verité ki ena dan la Bible ki zot inn commence ena l’amour pou Bondié. Prend le temps pou reflechi lor seki ti’nn convaink ou ki ou ti’nn trouve la verité. Chaque dimoune different. Ou situation ek ou personnalité pa pareil couma lezot. Alors, bann raison ki’nn pousse ou au commencement pou content Jéhovah ek pou croire dan so bann promesse zot surement different avek seki’nn touche enn lot dimoune. Surement, sa bann raison-la zot encore toujours appliké pou ou pareil couma kan ou ti fek konn zot. La verité pa’nn changé. C’est a cause sa ki, si ou reexamine sa bann pensée-la ek bann sentiment ki ou ti ena, sa kapav faire ou regagne l’amour ki ou ti ena au commencement pou la verité.—Lire Psaume 119:151, 152; 143:5.
Faire l’amour ki ou ti ena au commencement vinn pli fort
7. Kifer nou bizin faire l’amour ki nou ti ena au commencement pou la verité vinn pli fort, ek couma nou kapav faire sa?
7 Kitfois finn ena beaucoup changement dan ou la vie depuis ki ou finn voué-ou pou servi Jéhovah. L’amour ki ou ti ena au commencement ti fort, mais avek le temps, ou ti bizin enn l’amour pli fort pou faire face ar bann nouveau difficulté ki ti testé ou la foi. Selman, Jéhovah ti soutenir ou. (1 Cor. 10:13) Alors, seki ou’nn vive pendant tou sa bann l’année-la ena beaucoup valeur pou ou. Zot inn aide ou pou faire l’amour ki ou ti ena au commencement vinn pli fort, ek zot enn lot moyen ki permette ou pou verifié par ou-mem ki volonté Bondié, li bon ek li acceptable.—Jos. 23:14; Ps. 34:8.
8. Couma Jéhovah ti presente-Li ar Moïse, ek couma bann Israélite ti arrivé konn Bondié pli bien?
8 Par exemple, anou examine situation bann Israélite kan Jéhovah ti dire ki Li ti ena projet pou delivré zot dan l’esclavage en Égypte. Kan Jéhovah ti presente-Li ar Moïse, Li ti dire sa bann parole-la: “Mo pou vinn seki mo pou vini.” (Ex. 3:7, 8, 13, 14) En realité, Jéhovah ti pé dire ki Li ti pou vinn seki ti necessaire ki Li vini pou delivré so peuple. Pendant bann l’evenement ki ti arrivé apré, ek dependant bann situation, bann Israélite ti trouve different l’aspect personnalité Jéhovah—enn Bondié Tout-Puissant, enn Juge, enn Chef, enn Liberateur, enn Guerrier ek enn Papa ki ti donne zot seki zot bizin.—Ex. 12:12; 13:21; 14:24-31; 16:4; Neh. 9:9-15.
9, 10. Ki qualité situation kapav aide enn dimoune pou konn Bondié, ek kifer li bon ki nou rappel bann situation ki nou’nn vive?
9 Ou situation different avek bann Israélite. Mais mem sa, surement ou’nn konn bann situation ki’nn convaink ou ki Bondié interessé personnellement ar ou ek sa inn fortifié ou la foi. Kitfois Jéhovah inn agir dan enn certaine fason envers ou pou montré ki Li enn Papa ki donne ou seki ou bizin, enn Consolateur, ou-soit enn Enseignant. (Lire Isaïe 30:20b, 21.) Ou-soit, kitfois ou finn trouvé couma dan enn fason bien clair Jéhovah inn reponn enn la priere ki ou’nn faire. Li possible aussi ki ou ti dan enn situation bien difficile, ek lerla enn frere ou-soit enn soeur inn vinn aide ou. Li kapav aussi ki pendant ou l’etude personnel ou finn trouve bann verset approprié ki’nn applik ar ou situation.
10 Si ou raconte sa bann l’experience-la lezot, li possible ki sa pa pou vrai-mem impressionne zot. Apré tou, sa bann kitsoz-la, c’est pa bann mirak! Mais pou ou, c’est bann kitsoz special. Oui, Jéhovah ti vinn seki Li ti bizin vini pou ou. Mazinn tou sa bann l’année ki ou’nn passé dan la verité-la. Eski ou kapav rappel couma plusieurs fois Jéhovah inn prend ou soin personnellement? Si oui, kan ou rappel sa bann l’evenement-la ek seki zot inn faire ou ressenti, sa kapav faire ou regagne mem l’amour pou Jéhovah ki seki ou ti ena dan sa lepok-la. Garde toujours sa bann l’experience-la dan ou leker. Medite lor la. Zot bann preuve ki Jéhovah interessé ar ou personnellement, ek personne pa pou kapav faire ou pense le contraire.
Examine ou-mem personnellement
11, 12. Pou ki raison kitfois l’amour ki enn chretien ena pou la verité inn refroidi, ek ki conseil Jésus ti donné?
11 Si ou pena mem l’amour pou Bondié ek pou la verité couma ou ti ena avant, c’est pa parski ena kitsoz ki finn changé avek Bondié. Jéhovah jamais pa changé. (Mal. 3:6; Jacq. 1:17) Li ti interessé avek ou dan sa lepok-la, ek Li encore interessé avek ou zordi. Alors, ki kapav inn changé dan ou relation avek Jéhovah? Eski li possible ki c’est parski ou senti ki ena plus pression lor ou ek ki ou plus tracassé ar bann probleme ki ena dan ou la vie? Kitfois dan le passé ou ti pé prié plus avek tou ou leker, ou ti plus serieux dan ou l’etude personnel, ek ou ti pé medite pli souvent. Eski ou ti plus zelé dan ou ministere ek eski ou ti pé assisté reunion pli regulierement ki zordi?—2 Cor. 13:5.
12 Kitfois ou pa pou remark sa bann tendance-la kan ou’nn fini examine ou-mem personnellement, mais si ou remarké ki’nn ena enn changement, pou ki raison sa inn arrivé? Eski li possible ki bann tracas normal, couma par exemple donne ou famille seki li bizin, prend soin ou la santé, ou-soit bann kitsoz coumsa, inn faire ou blié inpé ki jour Jéhovah bien pré? Jésus ti dire so bann zapotre: “Faire attention ar zot-mem, pangar zot leker vinn lourd parski zot trop mangé ek boire, ek a cause bann tracas ki ena dan la vie, ek ki enn sel coup sa jour-la vinn lor zot couma enn piege. Parski li pou vinn lor tou bann habitant partout lor la terre. Alors, reste lor zot garde, suppliyé touletan pou ki zot reussi sapé ar tou sa bann kitsoz ki bizin arrivé-la.”—Luc 21:34-36.
13. Ar ki kitsoz Jacques ti compare Parole Bondié?
13 Jacques ki ti inspiré pou ecrire enn livre la Bible ti encourage so bann frere pou examine zot-mem personnellement ek dan enn fason honnete avek l’aide Parole Bondié. Jacques ti ecrire: “Vinn bann dimoune ki mette la parole en pratik, ek pa bann ki zis tendé, ek ki embete-zot-mem par bann fausse raisonnement. Parski si enn kikenn zis tann la parole, ek li pa mette li en pratik, sa dimoune-la, li couma enn kikenn ki guette so figure dan la glace. Parski li guette li-mem, lerla li allé ek li blié desuite ki qualité dimoune li été. Mais, enn kikenn ki examine en profondeur la loi parfait, la loi ki donne la liberté, ek ki perseveré ladan, sa dimoune-la, parski li’nn vinn enn dimoune ki pa blié seki li’nn tendé, mais ki mette sa en pratik, li pou heureux kan li faire sa.”—Jacq. 1:22-25.
14, 15. (a) Couma la Bible kapav aide ou pou ameliore ou spiritualité? (b) Cite bann question lor ki ou kapav reflechi.
14 Enn dimoune kapav servi enn la glace pou guetté si tou bon dan so l’apparence. Par exemple, si enn missié trouvé ki so cravate en travers, li kapav dresse li droite. Si enn madame trouvé ki li pa bien coiffé, li kapav arrange so cheveux bien. Li pareil aussi pou nou, la Bible aide nou pou examine nou-mem. Kan nou compare nou-mem avek fason ki la Bible dire nou bizin été, alors nou pé servi li couma enn la glace. Mais ki serti nou guette-nou dan enn la glace si nou pa faire nanyin pou corrige enn defaut ki nou’nn trouvé? Nou pou montré ki nou sage si nou faire dapré seki nou trouvé dan “la loi parfait” Bondié, si nou vinn bann ki “mette . . . en pratik” sa la loi-la. Alors, n’importe kisannla ki remarké ki l’amour ki li ti ena au commencement pou Jéhovah ek pou la verité inn refroidi, li bon ki li reflechi lor sa bann question-la: ‘Ki bann pression mo pé gagné dan mo la vie, ek couma mo pé faire face ar sa zordi? Couma mo ti faire face ar sa dan le passé? Eski ena kitsoz ki’nn changé?’ Si apré ki ou’nn examine ou-mem, ou remarké ki ou ena bann faiblesse, pa faire coumadir ou pa’nn remark nanyin. Si ou ena bann changement pou faire, nou suppliye ou, pa tardé pou faire li.—Héb. 12:12, 13.
15 Sa qualité meditation-la kapav aussi aide ou pou fixé bann l’objectif raisonnable pou ou progressé lor plan spirituel. L’apotre Paul ti donne Timothée, so compagnon service ki ti pli jeune, bann conseil pou ameliore so ministere. Li ti dire li: “Reflechi lor sa bann kitsoz-la; concentré-toi bien ladan, pou ki tou dimoune trouve bien to bann progré.” Nou aussi nou bizin reflechi avek l’aide Parole Bondié ki bann progré nou kapav faire.—1 Tim. 4:15.
16. Ar ki danger ou bizin faire attention kan ou examine ou-mem avek l’aide la Bible?
16 Kan ou examine ou-mem personnellement dan enn fason honnete, sa kapav faire ou trouve certain faiblesse. Mais pa laisse sa decourage ou. Apré tou, kan nou examine nou-mem, nou l’objectif c’est pou guetté dan ki domaine nou kapav ameliore nou. Bien sur, Satan envie ki enn chretien pensé ki li pena okenn valeur a cause so bann defaut. En realité, certain inn deja faire croire ki Bondié meprise tou bann zeffort ki bann dimoune faire pou servi Li. (Job 15:15, 16; 22:3) Mais c’est enn kitsoz ki fausse ki Jésus ti dementi; pou Bondié, sakenn parmi nou ena valeur. (Lire Matthieu 10:29-31.) Avredir, kan nou konn nou bann defaut, sa bizin pousse nou pou ameliore nou-mem avek l’aide Jéhovah. (2 Cor. 12:7-10) Si ou pa kapav faire beaucoup a cause maladie ou-soit l’age, alors fixé bann l’objectif ki raisonnable, mais pa abandonné ni laisse ou l’amour refroidi.
Nou ena beaucoup raison pou reconnaissant
17, 18. Ki bienfait ou gagné kan ou faire l’amour ki ou ti ena au commencement vinn pli fort?
17 Ou pou tire beaucoup bienfait si ou contigne faire l’amour ki ou ti ena au commencement vinn pli fort. Ou kapav augmente ou connaissance lor Bondié ek ou reconnaissance pou so direction ki Li donné avek amour. (Lire Proverbes 2:1-9; 3:5, 6.) Enn psalmiste ti dire: “Ena enn grand recompense kan garde [bann la loi Jéhovah].” “Nou kapav ena confiance dan rappel Jéhovah, li faire enn dimoune ki pena l’experience gagne la sagesse.” En plus, “heureux bann ki sans defaut dan zot fason vive, bann ki pé marche dan la loi Jéhovah.”—Ps. 19:7, 11; 119:1.
18 Surement ou pou d’accord ki ou ena beaucoup raison pou ou reconnaissant. Ou comprend signification bann l’evenement ki pé arrivé dan le monde. Ou pé tire profit ar tou bann disposition spirituel ki Bondié pé prend pou so peuple zordi. Pena doute ki ou bien reconnaissant aussi ki Jéhovah inn attire ou dan so l’organisation mondial ek inn donne ou privilege pou vinn enn parmi so bann Témoins. Compte tou sa bann benediction ki ou’nn gagné-la! Si ou ti bizin faire enn la liste, surement li ti pou longue. Si souvent ou reflechi lor sa bann benediction-la, sa pou aide ou pou applik sa conseil-la: “Contigne tini ferme seki to ena.”—Rév. 3:11.
19. A part medite lor ou relation avek Bondié, ki li bien important ou faire pou garde enn bon spiritualité?
19 Medite lor fason ki ou la foi inn augmenté avek le temps, c’est zis enn moyen pou tini ferme seki ou ena. Regulierement sa periodik-la inn attire l’attention lor lezot kitsoz important ki kapav aide nou pou garde enn bon spiritualité. Parmi ena la priere, assisté ek participé dan bann reunion, ek participe avek zele dan predication. Sa bann kitsoz-la kapav aide ou pou regagne l’amour ki ou ti ena au commencement ek pou contigne faire sa l’amour-la vinn pli fort.—Éph. 5:10; 1 Pierre 3:15; Jude 20, 21.
Couma ou pou reponn?
• Couma bann raison ki finn faire ou content Jéhovah kapav encourage ou zordi?
• Ki ou kapav sur kan ou reflechi lor seki ou’nn vive pendant tou sa bann l’année-la?
• Kifer ou bizin examine l’amour ki ou ena pou Bondié?
[Zimage lor page 29]
Ki kitsoz ki finn attire ou dan la verité ek finn convaink ou?
[Zimage lor page 31]
Eski ou trouve bann kitsoz lor ou-mem ki ou bizin corrigé?