To Ena Valer pou Zeova!

1. Ki Zeova trouve dan sakenn parmi nou?

ZEOVA “kontan so pep.” (Ps. 149:4, NW) Sa panse-la vremem rekonfortan, pa vre! Zeova trouv nou bann zoli kalite, Li trouve ki kalite dimounn nou kapav vini, ek Li atir nou ver Li. Si nou res fidel ar Li, Li pou res pros ar nou pou touletan!​—Zan 6:44.

2. Kifer sertin trouv sa difisil pou krwar ki Zeova kontan zot?

² Kitfwa sertin kapav dir, ‘Mo kone ki Zeova kontan so pep, me kouma mo kapav sir ki Zeova kontan mwa personelman?’ Ki kitsoz kapav pous enn kikenn pou poz sa kestion-la? Oksanab ti bien soufer kan li ti tipti. Li dir: “Mo ti bien kontan kan mo ti pran batem ek mo ti fer pionie. Me 15 an plitar, bann move kitsoz ki ti ariv mwa kan mo ti enn zanfan, ti revinn dan mo lespri. Lerla, mo ti koumans panse ki mo ti perdi faver Zeova ek ki mo pa ti merit so lamour.” Yua, enn pionie ki ti gagn boukou problem kan li ti enn zanfan, dir: “Mo ti vwe mo lavi ar Zeova parski mo ti anvi fer so leker kontan. Me mo ti sir ki zame Li ti pou kapav kontan mwa.”

3. Ki nou pou examine dan sa lartik-la?

³ Parey kouma sa bann Kretien ki nou fek mansione la, to bien kontan Zeova, me kitfwa to ena bann dout ki Li kontan twa. Kifer to bizin sir ki Zeova vremem kontan twa? Ek ki kitsoz kapav ed twa kan to panse ki Zeova pa kontan twa? Anou reponn sa de kestion-la.

LI DANZERE KAN NOU DOUT LAMOUR ZEOVA

4. Kifer li danzere ki nou dout lamour ki Zeova ena pou nou?

⁴ Lamour se enn gran motivasion. Kifer nou dir sa? Parski, kan nou sir ki Zeova kontan nou, nou pou anvi servi Li avek tou nou leker, mem kan nou gagn bann difikilte. Parkont, si nou ena bann dout ki Zeova kontan nou, nou “pou ena enn tigit lafors mem.” (Prov. 24:10) Kan nou dekouraze ek ki nou nepli krwar ki Zeova kontan nou, nou pa pou kapav reziste kont bann latak Satan.​—Efe. 6:16.

5. Ki’nn ariv sertin frer ek ser ki ti dout lamour Zeova?

⁵ Sertin frer ek ser ti koumans panse ki Zeova pa kontan zot, ek sa finn afebli zot lafwa. Enn ansien ki apel James dir: “Mem si mo ti pe servi dan Betel ek dan enn lasanble ki koz enn lang etranze, mo ti pe demann mwa si Zeova vremem kontan tou seki mo ti pe fer. Enn moman, mo ti mem demann momem si Zeova ti pe ekout mo bann lapriyer.” Eva, enn serviter aplintan, dir: “Mo’nn konpran ki li danzere kan nou panse ki Zeova pa kontan nou, parski sa ena enn lefe lor nou servis pou Li. Sa kapav fer nou perdi nou motivasion pou fer bann kitsoz spiritiel ek perdi nou lazwa pou servi Zeova.” Michael, ki enn pionie permanan ek enn ansien, dir: “Si to pa krwar ki Zeova kontan twa, to pou elwagn twa ar Li.”

6. Ki nou bizin fer kan nou koumans ena bann dout lor lamour Zeova?

⁶ Sa bann lexanp-la montre nou ki li danzere ki nou panse ki Zeova pa kontan nou. Sa fason panse-la kapav afebli nou lafwa. Me ki nou bizin fer si nou koumans panse ki Zeova pa kontan nou? Deswit nou bizin rezet sa bann panse-la! Demann Zeova pou ed twa pou ranplas sa bann panse negatif la par ‘lape Bondie ki pou protez to leker ek to lespri.’ (Ps. 139:23; Fil. 4:6, 7, NW) Pa bliye osi ki to pa tousel. Ena boukou lezot frer ek ser ki pe bizin lit kont bann santiman negatif. Mem bann serviter Zeova dan lepase ti bizin lit kont sa bann santiman-la. Anou gete seki nou kapav aprann ar lexanp lapot Pol.

KI NOU KAPAV APRANN AR LEXANP LAPOT POL?

7. Ki bann problem Pol ti ena?

⁷ Eski parfwa to santi ki to ena tro boukou responsabilite ek to trouv sa difisil pou asim zot? Si wi, to kapav konpran sitiasion lapot Pol. Pol ti bien trakase, pa zis pou enn lasanble me “pou tou bann lasanble.” (2 Kor. 11:23-28, NW) Eski to ena enn problem lasante ki pe fer twa perdi to lazwa? Pol ti ena ‘enn pikan dan so laser.’ Kitfwa sa ti enn problem lasante ek li ti anvi ki Zeova tir sa problem-la. (2 Kor. 12:7-10) Eski to dekouraze akoz to prop linperfeksion? Pol osi ti ena sa santiman-la. Li ti dir ki li ti “enn dimoun malere,” parski li ti bizin kontign fer zefor pou lit kont so prop linperfeksion.​—Rom. 7:21-24.

8. Ki kitsoz ti ed Pol pou fer fas ar so bann problem?

⁸ Mem si Pol ti bizin andir tou sa bann problem-la, li ti kontign servi Zeova. Kotsa Pol ti gagn lafors pou fer sa? Li ti ena enn lafwa solid dan laranson. Pol ti konn promes Zezi ki dir ki ‘tou dimoun ki ena lafwa dan Zezi kapav gagn lavi eternel.’ (Zan 3:16; Rom. 6:23) Pol ti ena lafwa dan laranson. Li ti sir ki Zeova vremem anvi pardonn bann ki repanti, mem si zot inn fer enn pese grav.​—Ps. 86:5.

9. Ki nou aprann ar bann parol ki trouv dan Galat 2:20?

⁹ Pol ti sir ki Bondie ti bien kontan li. Kifer? Parski li ti kone ki Zeova ti avoy Zezi pou ki li donn so lavi pou li. (Lir Galat 2:20.) Remark bann parol bien ankourazan ki ena alafin sa verse-la. Pol dir: “Garson Bondie . . . kontan mwa e finn donn so lavi pou mwa.” Mem si Pol ti fer boukou move kitsoz dan lepase, li pa ti panse ki Bondie pa ti pou kapav kontan li. Li pa ti pans koumsa: ‘Mo konpran kifer Zeova kontan mo bann frer ek ser, me eski Li vremem kapav kontan mwa?’ Pol ti dir bann Romin: “Letan nou ti ankor peser, Lekris finn mor pou nou.” (Rom. 5:8) Alor, nanye pa kapav anpes Bondie kontan nou!

10. Ki nou aprann dan Romin 8:38, 39?

¹⁰ Lir Romin 8:38, 39. Pol ti kone ki Bondie ena boukou lamour. Pol ti dir ki nanye pa “kapav separ nou ar lamour ki Bondie ena pou nou.” Pol ti kone ki Zeova ti montre boukou pasians anver nasion Izrael. Li ti kone osi kouma Zeova ti montre mizerikord anver li. Alor, dan enn sertenn fason, Pol ti pe dir, ‘Si Zeova inn avoy so prop Garson pou mor pou mwa, kifer mo bizin dout so lamour?’​—Rom. 8:32.

11. Mem si Pol ti fer bann pese ki mansione dan 1 Timote 1:12-15, kifer li ti sir ki Bondie ti kontan li?

¹¹ Lir 1 Timote 1:12-15. Kitfwa Pol ti santi li mal kan li ti pans lor bann kitsoz ki li ti fer dan lepase. Alor, sa pa etonn nou ki li ti apel limem “premie” dimounn ki ti fer pese! Avan ki Pol ti konn laverite, li ti persekit bann Kretien dan plizir lavil, li ti met sertin dan prizon, ek li ti soutenir desizion ki lakour ti pran pou touy sertin Kretien. (Zist. 26:10, 11) Esey mazine seki Pol ti resanti si li ti zwenn enn zenn Kretien ki ti perdi so bann paran akoz li? Pol ti vremem regret bann erer ki li ti fer, me li ti kone ki li pa ti kapav sanz seki ti arive. Li ti sir ki Zezi ti mor pou li, ek li ti dir: “Me par lagras Bondie mo finn vinn seki mo ete.” (1 Kor. 15:3, 10) Ki leson nou aprann? To bizin sir ki Zezi inn mor pou twa, ek ki gras-a sa, to kapav vinn kamarad Zeova. (Zist. 3:19) Seki inportan pou Bondie se seki nou fer asterla ek seki nou pou fer dan lavenir, pa bann erer ki nou’nn fer dan lepase, ki nou ti enn Temwin ouswa non.​—Iza. 1:18.

12. Kouma 1 Zan 3:19, 20 kapav ed nou kan nou panse ki nou pena valer ouswa ki nou pa merit lamour lezot?

¹² Kan to mazine ki Zezi inn mor pou to bann pese, kitfwa to kapav panse, ‘Mo pa merit sa kado-la.’ Kifer kitfwa to ena sa santiman-la? Nou leker inparfe kapav anbet nou, fer nou panse ki nou pena valer ek ki nou pa merit lamour lezot. (Lir 1 Zan 3:19, 20.) Dan sa bann moman-la, li bon ki nou rapel ki “Bondie pli gran ki nou leker.” Nou Papa Zeova pou kontign kontan nou ek pardonn nou, mem si nou nou panse ki Li pa kontan nou ek ki Li pa pou pardonn nou. To bizin konvink tomem ki Zeova kontan twa. Pou ki to kapav fer sa, to bizin etidie Labib regilierman, priye Li touletan, ek pas letan avek bann dimounn ki ador Zeova. Kifer li inportan ki to fer tousala?

LETID LABIB, LAPRIYER, EK BANN KAMARAD FIDEL KAPAV ED TWA

13. Kouma sa kapav ed nou kan nou etidie Parol Bondie? (Get osi lankadre “Kouma Parol Bondie Inn Ed Zot.”)

¹³ Etidie Parol Bondie sak zour, ek lerla to pou trouv pli bien bann zoli kalite ki Zeova ena. To pou konpran ki kantite Li kontan twa. Kan to medit lor Labib toulezour, sa pou ed twa pou reflesi pli bien, ek pou met bann kitsoz an-ord dan to lespri ek dan to leker. (2 Tim. 3:16) Enn ansien ki apel Kevin ti ena bann santiman negatif lor limem. Li dir: “Kan mo’nn lir Psom 103 ek mo’nn medit lor la, sa finn ed mwa pou koriz mo fason panse ek pou konpran seki Zeova vremem panse lor mwa.” Eva, ki nou ti mansione avan, dir: “Alafin lazourne, mo pran letan pou reflesi lor seki Zeova panse. Sa donn mwa lape ek sa ogmant mo lafwa.”

14. Kouma lapriyer kapav ed nou?

¹⁴ Priye touletan. (1 Tes. 5:17) Si to anvi vinn kamarad avek enn kikenn, to bizin koz avek li souvan ek dir li seki to resanti. Li parey si nou anvi ena enn bon lamitie avek Zeova. Kan nou dir Li seki nou resanti, seki nou panse, ek seki pe trakas nou, nou montre ki nou ena konfians an Li ek ki nou kone ki Li kontan nou. (Ps. 94:17-19; 1 Zan 5:14, 15) Yua, ki nou ti mansione avan, dir: “Kan mo priye, mo pa zis dir Zeova seki’nn ariv mwa dan lazourne. Mo ouver mo leker ar Zeova ek mo dir Li seki mo resanti. Avek letan, mo’nn koumans trouv Zeova kouma enn Papa ki vremem kontan so bann zanfan, pa kouma patron enn gran konpagni.”​—Get lankadre “Eski To’nn Lir Li?”

15. Kouma Zeova montre ki Li interese ar nou?

¹⁵ Pas letan avek bann kamarad ki fidel. Bann bon kamarad, zot enn kado Zeova. (Zak 1:17) Dan lasanble, nou ena bann frer ek ser ki “montre [zot] lamour touletan,” ek sa montre ki Zeova interese ar nou. (Prov. 17:17) Dan let ki Pol ti ekrir bann Kolosien, li ti mansionn nom sertin Kretien ki ti soutenir li, ek li ti dir ki zot ti enn “konsolasion.” (Kol. 4:10, 11) Mem Zezi ti bizin soutien so bann kamarad, ki zot bann anz ouswa bann imin, ek li ti bien apresie zot led.​—Lik 22:28, 43.

16. Kouma bann kamarad fidel kapav ed nou pou vinn pli pros ar Zeova?

¹⁶ Eski to rod ek aksepte led to bann frer ek ser dan lasanble? Kan nou koz lor nou bann problem avek enn kikenn ki ena matirite, sa pa vedir ki nou feb. Okontrer, sa kapav protez nou. James, ki nou ti mansione avan, dir: “Bann lamitie ki mo finn ena avek bann Kretien ki ena matirite finn ed mwa boukou. Kan mo ena bann panse negatif, sa bann kamarad-la ekout mwa avek pasians ek zot rapel mwa ki zot kontan mwa. Gras-a zot, mo trouve ki Zeova gagn mo traka ek ki Li kontan mwa personelman.” Li vremem inportan ki nou devlop bann bon lamitie avek nou bann frer ek ser!

RES DAN LAMOUR ZEOVA

17-18. Kisannla nou bizin ekoute, ek kifer?

¹⁷ Satan anvi ki nou aret fer zefor pou fer seki bon. Li anvi fer nou krwar ki Zeova pa kontan nou, ek ki nou pa merite ki Li sap nou. Me kouma nou finn examine, tou sa bann lide-la fos.

¹⁸ Zeova kontan twa. To ena boukou valer pou Li. Si to obeir Li, to pou “res dan so lamour” pou touletan, parey kouma Zezi. (Zan 15:10) Alor, pa krwar ni Satan, ni to leker ki esey kondann twa. Okontrer, ekout Zeova, ki trouv seki bon dan sakenn parmi nou. To kapav sir ki Zeova “kontan so pep,” ek ki Li kontan twa personelman!