To Kapav Sir ki Zeova Kontan Twa

1. Kifer to’nn donn to lavi Zeova? (Get zimaz osi.)

ESKI to ankor rapel sa zour ki to ti priye Zeova pou dir Li ki to pe donn Li to lavi? To ti pran sa desizion-la parski to ti aprann konn Li, ek to ti koumans kontan Li. To ti promet Li ki to ti pou met Li an premie dan to lavi, ek ki to ti pou kontign kontan Li avek tou to leker, tou to lavi, tou to lespri, ek tou to lafors. (Mark 12:30) Depi sa lepok-la, to lamour pou Li inn kontign grandi. Alor, si enn kikenn demann twa, “Eski to vremem sir ki to kontan Zeova?” San okenn ezitasion, sirman to pou dir li: “Mo kontan Li plis ki ninport kisann-la ek plis ki ninport ki kitsoz!”

2-3. Lor ki kitsoz Zeova anvi ki nou pena okenn dout, ek ki nou pou examine dan sa lartik-la? (Zeremi 31:3)

² Me fer koumadir enn kikenn demann twa, “Eski to sir ki Zeova kontan twa?” Ki to pou reponn li? Eski to pou ezite pou reponn, parski to panse ki to pa merite ki Zeova kontan twa? Enn ser ki’nn ena enn lanfans difisil ti ena sa santiman-la. Li dir: “Mo kone ki mo kontan Zeova. Mo pena okenn dout lor la. Selman, bien souvan mo demann momem si Zeova kontan mwa.” Kouma to kapav kone si Zeova vremem kontan twa?

³ Zeova vremem kontan twa, ek Li anvi ki to pena okenn dout lor la. (Lir Zeremi 31:3.) Se parski Li kontan twa ki Li’nn atir twa ver Li. Ek kan to’nn donn Li to lavi ek to’nn pran batem, Li’nn donn twa enn kado ki ena boukou valer: Li’nn donn twa so lamour fidel. Sa vedir ki Li kontan twa ek ki zame Li pa pou abandonn twa. Ek parski Zeova ena lamour fidel pou so bann serviter, Li konsider zot kouma so “dibien spesial.” (Mal. 3:17) Alor, to vremem spesial pou Li. Zeova anvi ki to ena mem santiman ki lapot Pol. Pol ti telman sir ki Zeova ti kontan li, ki li ti ekrir: “Mo sir ki ni lamor, ni lavi, ni bann anz, ni bann gouvernman, ni bann kitsoz ki ena aster-la, ni bann kitsoz ki pou ena apre, ni bann pwisans, ni oter, ni profonder, ni okenn lezot kreasion pa pou kapav separ nou ar lamour ki Bondie ena pou nou.” (Rom. 8:38, 39) Dan sa lartik-la, nou pou gete kifer nou bizin sir ki Zeova kontan nou, ek nou pou gete osi seki nou kapav fer pou ki nou vremem sir ki Li kontan nou.

KIFER NOU BIZIN SIR KI ZEOVA KONTAN NOU?

4. Kouma nou kapav “tini ferm kont bann manigans” Satan?

⁴ Kan nou sir ki Zeova kontan nou, sa ed nou pou “tini ferm kont bann manigans” Satan. (Efe. 6:11) Satan anvi ki to aret servi Zeova, ek li pou esey fer tou seki li kapav pou li reisi fer sa. Enn metod ki li servi, se li anvi fer nou krwar ki Zeova pa kontan nou. Me sa li bien fos! Labib konpar Satan ar enn lion. (1 Pier 5:8, 9) Bann lion atak bann zanimo ki feb ek ki pa kapav defann zotmem. Dan mem fason, Satan souvan atak nou kan nou feb, kan nou fatige, ouswa kan nou dekouraze akoz bann problem ki nou’nn gagne dan lepase, bann problem ki nou ena aster-la, ouswa parski nou per akoz bann kitsoz ki kapav arive dan lavenir. (Prov. 24:10) Satan anvi ki nou vinn telman feb ki nou aret servi Zeova. Me nou kapav “opoz [nou] ar Lediab” ek so bann manigans. Kouma? Se kan nou fer tou seki nou kapav pou nou vremem sir ki Zeova kontan nou.—Zak 4:7.

5. Kifer li inportan ki nou santi ki Zeova kontan nou ek ki nou ena valer pou Li?

⁵ Kan nou sir ki Zeova kontan nou, sa ed nou pou vinn pli pros ar Li. Zeova inn kree nou dan enn fason pou ki nou montre lamour anver lezot ek ki nou resanti lamour ki zot ena pou nou. Kan enn kikenn montre ki li kontan nou, sa motiv nou pou kontan li nou osi. Alor, plis nou santi ki Zeova kontan nou ek ki nou ena boukou valer pou Li, plis nou lamour pou Li pou ogmante. (1 Zan 4:19) Ek plis nou lamour pou Li ogmante, plis Li pou kontan nou ankor. Se akoz sa ki Labib dir: “Vinn pros ar Bondie, ek li pou vinn pros ar zot.” (Zak 4:8) Alor, ki nou bizin fer pou ki nou vremem sir ki Zeova kontan nou?

KI KITSOZ KAPAV ED NOU POU NOU VREMEM SIR KI ZEOVA KONTAN NOU?

6. Si to pa sir ki Zeova kontan twa, ki to bizin fer?

⁶ Kontign priye Zeova ek demann Li pou ed twa konpran kifer Li kontan twa. (Lik 18:1; Rom. 12:12) Priye Zeova, si bizin, plizir fwa par zour, ek demann Li pou ed twa trouv tomem parey kouma Li, Li trouv twa. Parfwa, akoz bann santiman negatif ki nou ena, nou kapav trouv sa difisil pou krwar ki Zeova kontan nou. Selman, fode pa nou bliye ki Zeova “pli gran ki nou leker.” (1 Zan 3:19, 20) Li konn twa pli bien ki to konn tomem, ek Li trouv bann zoli kalite ki to ena, mem si twa to pa trouv zot. (1 Sam. 16:7; 2 Kro. 6:30) Alor, fode pa to ezite pou “devid” to leker avek Li, ek pou demann Li pou ed twa konpran kifer Li kontan twa. (Ps. 62:8) Ek apre ki to’nn fini priye Li, li bien inportan ki to fer bann kitsoz ki nou pou gete dan bann prosin paragraf.

7-8. Kouma bann psom montre nou ki Zeova vremem kontan nou?

⁷ Fer konfians seki Zeova dir. Zeova inn servi so lespri sin pou fer bann dimounn ekrir Labib. Alor, nou kapav fer konfians seki sa bann dimounn-la inn ekrir lor Zeova. Dan enn so bann psom, David dekrir ki kantite Zeova gagn nou traka. Li dir: “Zeova pre ar bann dimounn ki zot leker inn kase; ek Li sov bann ki dekouraze.” (Ps. 34:18) Kan to santi twa dekouraze, kitfwa to panse ki personn pa konpran twa ouswa personn pa kapav ed twa. Me Zeova promet twa ki kan to santi twa koumsa, Li la pou ed twa parski Li trouve ki kantite to bizin so led. Dan enn lot psom, David ti dir: “Met mo larm dan to boutey an lapo.” (Ps. 56:8) Kan enn kikenn pe marse dan dezer, sak gout delo ki ena dan so boutey ena boukou valer. Dan mem fason, sak larm ki to verse ena boukou valer pou Zeova. Li rapel sak fwa ki to ti dan lapenn ek sak fwa ki to ti plore. Zeova trouve kan to santi twa tris ouswa kan to pe soufer. Li vremem gagn to traka, ek Li resanti to lapenn dan so leker. Dan Psom 139:3, David ti dir Zeova: “To konn bien tou seki mo fer.” Zeova trouv tou seki to fer, me Li konsantre Li plis lor bann bon kitsoz ki to fer. (Ebre 6:10) Kifer? Parski sak ti zefor ki to fer pou fer Li plezir, ena boukou valer pou Li.a

⁸ Dan enn sertenn fason, Zeova servi bann verse rekonfortan ki ena dan Labib pou dir twa: “Mo anvi ki to kone ki kantite mo kontan twa ek ki kantite mo gagn to traka.” Selman, kouma nou ti trouve avan, Satan anvi fer nou krwar ki Zeova pa kontan nou. Alor, si parfwa to ena bann dout ki Zeova kontan twa, pran letan pou reflesi ek pou demann tomem, ‘Kisann-la mo bizin krwar—“papa bann manter” ouswa “Bondie laverite”?’—Zan 8:44; Ps. 31:5.

9. Ki promes Zeova fer ar bann ki kontan Li? (Exod 20:5, 6)

⁹ Reflesi lor seki Zeova resanti pou bann dimounn ki kontan Li. Anou reflesi lor seki Zeova ti dir Moiz ek bann Izraelit. (Lir Exod 20:5, 6.) Zeova promet ki Li pou kontign montre lamour fidel anver bann ki kontan Li. Ek parski Zeova Li fidel, nou kapav sir ki zame Li pou aret kontan enn kikenn ki kontan Li. (Ne. 1:5) Alor, si parfwa to panse ki Zeova pa kontan twa, demann tomem, ‘Eski mwa mo kontan Zeova?’ Apre sa, reflesi lor la: Si twa to kontan Zeova ek to pe fer to maximum pou servi Li, Li pena okenn rezon pou pa kontan twa. (Dan. 9:4; 1 Kor. 8:3) Alor, si twa to sir ki to kontan Zeova, fode pa ki to dout so lamour pou twa. To kapav sir ki Li pou touletan kontan twa ek ki zame Li pa pou abandonn twa.

10-11. Kouma Zeova anvi ki to konsider laranson? (Galat 2:20)

¹⁰ Reflesi lor laranson. Zeova inn donn bann imin pli gran kado ki ena; Li’nn avoy so Garson, Zezi, lor later pou ki li donn so lavi pou nou. (Zan 3:16) Me eski Zeova so Garson inn mor pou twa personelman? Wi! Anou gete seki nou kapav aprann ar lexanp lapot Pol. Pol ti fer bann pese bien grav avan ki li ti vinn enn Kretien. Ek apre ki li ti vinn enn Kretien, li ti bizin kontign lit kont so bann febles. (Rom. 7:24, 25; 1 Tim. 1:12-14) Pourtan, li ti sir ki Zeova ti donn laranson pou li osi. Zeova ti servi so lespri sin pou fer Pol ekrir bann parol ki trouv dan Galat 2:20. (Lir.) Ek tou seki’nn ekrir dan Labib, “finn ekrir pou ansegn nou.” (Rom. 15:4) Bann parol ki Zeova ti fer Pol ekrir montre seki Zeova anvi to panse lor laranson. Li anvi ki to konsider laranson kouma enn kado ki Li’nn fer twa personelman. Kan to pran letan pou reflesi lor valer ki sa kado-la ena ek lor kouma Zeova inn donn sa pou twa personelman, to pa pou ena okenn dout ki Li kontan twa.

¹¹ Nou vremem rekonesan anver Zeova, parski Li’nn avoy Zezi lor later pou donn so lavi pou nou. Me enn lot rezon kifer Zezi inn vinn lor later, se pou ansegn bann dimounn laverite lor Zeova. (Zan 18:37) Ek enn verite ki Zezi inn ansegn nou lor Zeova, se ki Zeova bien kontan so bann zanfan.

ZEZI INN MONTRE NOU KI KANTITE ZEOVA KONTAN NOU

12. Kifer nou kapav krwar tou seki Zezi inn dir lor Zeova?

¹² Kan Zezi ti lor later, Li ti kontan explik bann dimounn kouma Zeova ete. (Lik 10:22) Nou kapav krwar tou seki Zezi inn dir lor Zeova. Kifer? Parski pandan plizir milyar lane, Zezi inn res avek Zeova dan lesiel. (Kol. 1:15) Zezi kone ki kantite so Papa kontan li, ek li’nn osi trouve ki kantite so Papa kontan bann anz ki fidel ek osi so bann garson ek so bann tifi ki lor later ek ki fidel anver Li. Kouma Zezi ti ed bann dimounn pou konpran ki Zeova vremem kontan zot?

13. Kouma Zezi anvi ki nou trouv Zeova?

¹³ Zezi anvi ki nou trouv Zeova parey kouma li li trouv Li. Dan bann Levanzil, Zezi apel Zeova “Papa” plis ki 160 fwa. Ek kan li ti koz avek so bann disip, li ti servi bann lexpresion kouma “zot Papa” ouswa “zot Papa ki dan lesiel.” (Mat. 5:16; 6:26) Not pou letid pou Matie 5:16 dir: “Avan ki Zezi vinn lor later, bann serviter Zeova ti servi bann gran-gran tit pou dekrir ek pou koz lor Zeova, kouma par exanp, ‘Tou Pwisan,’ ‘Bondie ki Pli Lao,’ ek ‘Gran Kreater.’ Me Zezi souvan ti apel Zeova, nou ‘Papa.’ Sa lexpresion-la montre ki Zeova anvi ki so bann serviter santi zot pros ar Li, parey kouma enn zanfan ki santi li bien pros ar so papa ki bien kontan li.” Alor, li kler ki Zezi anvi ki nou trouv Zeova parey kouma li li trouv Li, setadir kouma enn bon Papa ki bien kontan so bann zanfan. Aster-la, anou get de lexanp kot Zezi servi lexpresion “Papa” pou koz lor Zeova.

14. Kouma Zezi inn montre ki sakenn parmi nou ena boukou valer pou nou Papa Zeova? (Matie 10:29-31) (Get zimaz osi.)

¹⁴ Premie lexanp ki nou pou gete, se seki Zezi ti dir dan Matie 10:29-31. (Lir.) Bann mwano, se bann ti zwazo ki zame pa pou kontan ouswa ador Zeova. Pourtan, sak mwano ena boukou valer pou nou Papa Zeova, ek Li mem kone kan enn tom anba. Si pou Zeova enn ti zwazo ena otan valer, nou kapav sir ki Li kontan nou ankor plis, parski nou nou kontan Li ek nou pe ador Li! Dan verse 30, kan li dir ki Zeova “mem kone ki kantite brin seve ena lor [nou] latet,” enn not pou letid dir: “Si Zeova konn bann ti detay koumsa, nou kapav sir ki Li vremem interese ar sak disip Zezi.” Tousala montre ki Zezi anvi ki nou sir ki sakenn parmi nou ena boukou valer pou nou Papa Zeova.

15. Dan bann parol ki trouv dan Zan 6:44, ki nou aprann lor nou Papa Zeova?

¹⁵ Anou get enn deziem lexanp kot Zezi ti servi lexpresion “Papa.” (Lir Zan 6:44.) Se to Papa Zeova ki’nn atir twa ver Li pou ki to kapav aprann konn Li ek kontan Li. Kifer Li’nn atir twa ver Li? Parski Li’nn trouve ki to ena bann zoli kalite. (Zist. 13:48) Kan Zezi ti dir bann parol ki trouv dan Zan 6:44, kitfwa li ti pe pans bann parol ki ena dan Zeremi 31:3, bann parol nou text prinsipal pou sa lartik-la. Dan sa verse-la, Zeova ti dir so bann serviter: “Mo’nn atir twa ver mwa avek mo lamour fidel [ouswa, inn kontign montre lamour fidel anver twa].” (Zer. 31:3, not; konpar ar Oze 11:4.) Sa montre ki to Papa Zeova kontign trouv seki ena debon dan twa, mem si twa to pa trouve.

16. (a) Ki Zezi inn ansegn nou, ek kifer nou bizin fer li konfians? (b) Pou ki to sir ki Zeova Limem meyer Papa ki to kapav ena, ki to bizin fer? (Get lankadre “Zeova Limem Meyer Papa ki To Kapav Ena.”)

¹⁶ Zezi inn ansegn twa ki Zeova, Li pa zis so Papa, me Li to Papa osi. Zezi anvi ki to sir ki Zeova kontan twa ek ki Li gagn to traka. Alor, si parfwa to ena bann dout ki Zeova kontan twa, rapel seki Zezi ti dir ek fer li konfians, parski li touletan koz laverite ek se li ki konn nou Papa pli bien.—1 Pier 2:22.

FER TOU SEKI TO KAPAV POU TO VREMEM SIR KI ZEOVA KONTAN TWA

17. Kifer nou bizin kontign fer tou seki nou kapav pou ki nou pena okenn dout ki Zeova kontan nou?

¹⁷ Nou bizin kontign fer tou seki nou kapav pou ki nou pena okenn dout ki Zeova kontan nou. Pa bliye ki Satan pe fer tou seki li kapav pou anpes nou servi Zeova. Li anvi afebli nou lor plan spiritiel, ek pou li fer sa, li pou kontign fer nou krwar ki Zeova pa kontan nou. Fode zame ki nou krwar li!—Zob 27:5.

18. Ki to bizin fer pou ki to vremem sir ki Zeova kontan twa?

¹⁸ Dan sa lartik-la, to’nn trouve seki to bizin fer pou ki to vremem sir ki Zeova kontan twa. To bizin priye Li ek demann Li pou ed twa trouv bann zoli kalite ki Li, Li trouve ar twa. Pran letan pou reflesi lor bann verse Labib ki montre kouma to Papa Zeova gagn traka bann ki kontan Li. Fode pa to bliye ki Zeova pou touletan kontan bann ki kontan Li. Pa bliye osi ki Zeova inn donn lavi so Garson pou twa personelman. Ek kan Zezi dir ki Zeova Li to Papa, fer li konfians. Lerla, si enn kikenn demann twa: “Eski to sir ki Zeova kontan twa?” Ar tou to leker to pou kapav dir li: “Wi, Li kontan mwa! Ek toulezour mo fer tou seki mo kapav pou montre Li, ki mwa osi mo kontan Li!”