Bondie ‘So Lamour pou Touletan’

1-2. Ki sitiasion boukou Kretien pe fer fas azordi?

FER koumadir ena enn gro tanpet lor lamer. Bann gro-gro vag pe fwet enn bato ek li pe monte-desann lor sa bann gro vag-la. Bato-la pou al ninport kotsa bann vag pe amenn li, amwin ki zet enn lank dan lamer. Gras-a sa lank-la, bato-la pa pou derive ek li pou res stab pandan sa tanpet-la.

² Kan to gagn enn leprev, kitfwa to santi twa kouma sa bato ki pe monte-desann lor lamer la. To pena kontrol lor to bann santiman ek to mood sanze bien vit. Ena zour, to sir ki Zeova kontan twa ek ki Li pe soutenir twa, me ena zour, kitfwa to demann tomem si Li vremem trouv to sitiasion. (Ps. 10:1; 13:1) Enn kamarad kapav dir twa enn kitsoz ki ankourazan, ek to santi twa bien apre. (Prov. 17:17; 25:11) Me apre inpe letan, to rekoumans ena bann dout. Kitfwa to kapav mem panse ki to pena valer pou Zeova ek ki Li pa kontan twa. Kan to gagn enn leprev, kouma to kapav zet to lank ek res akrose ar Zeova, setadir kontign ena konfians ki Zeova kontan twa ek ki Li pe soutenir twa?

3. Kan Psom 31:7 ek 136:1 dir ki Zeova ena “lamour fidel,” ki savedir, ek kifer Zeova Li pli gran lexanp konsernan lamour fidel? (Get zimaz osi.)

³ Kan to gagn enn leprev, enn kitsoz ki kapav ed twa pou res stab ek pou res akrose ar Zeova, se ki to bizin rapel ki Li ena lamour fidel. (Lir Psom 31:7; 136:1.) Lexpresion “lamour fidel” vedir enn latasman profon ki enn kikenn ena pou so kamarad; sa latasman-la pa fini zame. Zeova pli gran lexanp konsernan lamour fidel. Labib dir ki Zeova ena “lamour fidel an-abondans.” (Ex. 34:6, 7) Labib dir osi ki Zeova so “lamour fidel li an-abondans anver tou bann ki priye [li].” (Ps. 86:5) Ki sa bann verse-la pe rod dir? Zeova zame pa pou abandonn so bann serviter ki fidel. Kan nou rapel ki Zeova Li fidel, sa kapav ed nou pou res stab ek akrose ar Li kan nou gagn bann leprev.—Ps. 23:4.

ZEOVA SO LAMOUR SE ENN LANSEGNMAN INPORTAN KI ENA DAN LABIB

4. Sit sertin lansegnman inportan ki ena dan Labib, ek explike kifer li bien difisil ki enn kikenn fer nou ena bann dout lor la.

⁴ Enn lot kitsoz ki kapav ed twa pou res stab ek akrose ar Zeova kan to gagn enn leprev, se ki to bizin rapel ki lamour Zeova se enn lansegnman inportan ki ena dan Labib. Ki to konpran par lexpresion “enn lansegnman inportan ki ena dan Labib”? Kitfwa to pans bann kitsoz ki to’nn aprann dan Labib ek ki form parti nou krwayans. Par exanp, to’nn aprann ki nom Bondie se Zeova, ki Zezi li “sel Garson” Bondie, ki pena nanye ki kontign viv apre lamor, ek ki bann dimounn pou viv pou touletan lor later ki pou vinn enn paradi. (Ps. 83:18; Ekle. 9:5; Zan 3:16; Rev. 21:3, 4) Apre ki to ti aksepte sa bann lansegnman-la, ti bien difisil pou ki enn kikenn fer twa ena bann dout lor la. Kifer? Parski to ti konpran ki sa bann lansegnman-la ti laverite. Aster-la, anou gete kouma kan nou rapel ki Zeova so lamour se enn lansegnman inportan ki ena dan Labib, sa ed nou pou nou pena okenn dout ki Zeova kontan nou ek ki Li pou soutenir nou.

5. Explike kouma enn kikenn kapav rezet bann fos lansegnman.

⁵ Kan to ti koumans etidie Labib, ki kitsoz ti ed twa pou rezet bann fos lansegnman? Kitfwa to ti konpar seki to relizion ti ansegn twa ar seki Labib ansegne. Anou pran enn lexanp. Fer koumadir avan to ti krwar ki Zezi li Bondie. Amezir ki to ti etidie Labib, kitfwa to ti demann tomem, ‘Eski sa lansegnman-la li vre?’ Apre ki to ti etidie seki Labib dir lor la, to ti konpran ki Zezi li pa Bondie. Lerla, olie ki to ti kontign swiv sa fos lansegnman-la, to’nn koumans krwar seki Labib dir lor la, setadir ki Zezi “li premie-ne dan tou kreasion,” li “sel Garson Bondie.” (Kol. 1:15; Zan 3:18) Li vre ki bann fos lansegnman se bann kitsoz ki difisil pou derasine. (2 Kor. 10:4, 5) Selman, apre ki to’nn aprann bann verite ki ena dan Labib, to’nn rezet net sa bann fos lansegnman-la ek to’nn aret krwar zot.—Fil. 3:13.

6. Kifer to kapav sir ki Zeova “so lamour fidel pou touletan”?

⁶ To kapav fer parey osi konsernan seki Labib ansegne lor Zeova so lamour. Kan to gagn enn leprev ek ki to koumans ena bann dout lor lamour ki Zeova ena pou twa, to kapav demann tomem, ‘Eski mo fason panse li bon?’ Apre sa, reflesi lor bann dout ki to ena lor Zeova so lamour, ek konpar sa ar bann parol ki trouv dan Psom 136:1—text prinsipal pou sa lartik-la. Kifer Zeova dir ki so lamour li “fidel”? Ek kifer ena lexpresion “so lamour fidel pou touletan,” 26 fwa dan sa psom-la? Sa montre ki lamour fidel ki Zeova ena pou so bann serviter, se enn lansegnman inportan ki ena dan Labib, parey kouma bann lezot lansegnman ki to’nn aksepte kan to’nn etidie Labib. Alor, si to panse ki to pena valer pou Zeova ouswa ki Li pa kontan twa, sa li fos! Rezet sa fason panse-la, parey kouma to ti pou rezet enn fos lansegnman!

7. Sit sertin verse ki kapav konvink twa ki Zeova vremem kontan twa.

⁷ Dan Labib, ena ankor boukou lezot prev ki montre ki Zeova kontan nou. Par exanp, Zezi ti dir so bann disip: “Zot ena plis valer ki boukou mwano.” (Mat. 10:31) Ek Zeova ti dir so pep: “Mo pou fortifie twa, wi, mo pou ed twa, mo pou vremem trap twa for avek mo lame drwat lazistis.” (Iza. 41:10) Sa de verse-la bien kler! Zezi pa’nn dir, ‘Kitfwa zot ena plis valer,’ ek Zeova pa’nn dir, ‘Kitfwa mo pou ed twa.’ Olie sa, Zezi ek Zeova inn dir: “Zot ena plis valer” ek “Mo pou ed twa.” Alor, kan to gagn enn leprev ek ki to ena bann dout lor lamour ki Zeova ena pou twa, bann verse koumsa pa pou zis ed twa pou ki to santi twa bien; zot kapav konvink twa ki Zeova vremem kontan twa. Sa bann verse-la pe dir laverite! Alor, si to priye Zeova konsernan bann dout ki to ena ek ki to reflesi bien lor sa bann verse-la, to pou ena mem santiman ki lapot Zan ki ti dir dan 1 Zan 4:16: “Nou finn aprann pou konn ek krwar dan lamour ki Bondie ena pou nou.”a

8. Si parfwa to ankor ena bann dout ki Zeova vremem kontan twa, ki to kapav fer?

⁸ Si parfwa to ankor ena bann dout ki Zeova vremem kontan twa, ki to kapav fer? Konpar sa santiman ki to ena la avek seki to kone lor Zeova. Bann santiman kapav sanze bien vit, me seki Labib ansegne lor lamour Zeova, li laverite. Alor, si to panse ki Zeova pa kontan twa, savedir ki to pa pe aksepte kalite prinsipal ki form parti so personalite, setadir so lamour.—1 Zan 4:8.

REFLESI BIEN LOR “LAFEKSION” KI ZEOVA ENA POU TWA

9-10. Kan Zezi ti dir, “Mo Papa limem ena lafeksion pou zot,” lor ki kitsoz li ti pe koze? (Zan 16:26, 27) (Get zimaz osi.)

⁹ Nou kapav aprann plis lor Zeova so lamour kan nou reflesi lor seki Zezi ti dir so bann disip. Li ti dir zot: “Mo Papa limem ena lafeksion pou zot.” (Lir Zan 16:26, 27.) Kifer Zezi ti dir zot sa? Eski li ti dir zot sa zis pou ankouraz zot? Non. Kontex sa bann verse-la montre ki li ti pe koz lor lapriyer.

¹⁰ Zezi ti fek dir so bann disip ki zot ti bizin priye lor so nom, me pa priye li. (Zan 16:23, 24) Se enn kitsoz inportan ki zot ti bizin konpran. Kifer? Parski apre rezireksion Zezi, kitfwa so bann disip ti pou anvi priye li. Bann disip ti konn Zezi ek li ti zot kamarad. Ek akoz sa, zot ti kapav panse ki parski Zezi ti kontan zot boukou, kitfwa li ti pou anvi ekout zot bann lapriyer ek demann so Papa pou ed zot. Selman, Zezi ti dir zot kifer fode pa zot pans koumsa. Li ti dir zot: “Mo Papa limem ena lafeksion pou zot.” Sa verse-la ansegn nou enn kitsoz inportan lor lapriyer. Gras-a to letid Labib, to’nn aprann konn Zezi ek to kontan li. (Zan 14:21) Selman, parey kouma bann Kretien dan premie siek, kan to priye Zeova to kapav sir ki Li pou ekout twa. Kifer? Parski to kone ki Zeova “limem ena lafeksion pou [twa].” Alor, sak fwa ki to priye Zeova, to montre ki to ena lafwa ek ki to sir ki Li ena lafeksion pou twa.—1 Zan 5:14.

ESEY KONPRAN KIFER TO ENA BANN DOUT

11. Kifer Satan pou bien kontan si nou dout lamour ki Zeova ena pou nou?

¹¹ Ki kitsoz kapav fer nou dout lamour ki Zeova ena pou nou? Sirman to pou dir ki se Satan, ek sa li pa fos. Satan “pe rod devor” nou, ek li anvi ki nou dout lamour ki Zeova ena pou nou. (1 Pier 5:8) Mem si Zeova kontan nou ek ki Li’nn donn laranson, Satan anvi fer nou krwar ki nou telman inparfe ki nou pa merite gagn bann bienfe gras-a laranson. (Ebre 2:9) Me kisann-la ki kontan kan nou dout lamour ki Zeova ena pou nou? Se Satan. Ek kisann-la ki kontan kan nou dekouraze ek ki nou aret servi Zeova? Se Satan. Satan anvi fer nou krwar ki Zeova pa kontan nou, ek sa li pa vre. Zeova kontan nou, me se Satan ki Li pa kontan. Selman, enn parmi “bann manigans” ki Satan servi, se ki li esey fer nou krwar ki Zeova pa kontan nou ek ki Li’nn rezet nou. (Efe. 6:11) Kan nou konpran bien seki Satan pe esey fer, nou pou plis determine pou “opoz [nou] ar Lediab.”—Zak 4:7.

12-13. Akoz nou inparfe ek ki nou fer pese, kouma sa kapav fer nou ena bann dout lor lamour ki Zeova ena pou nou?

¹² Enn lot kitsoz ki kapav fer nou ena bann dout lor lamour ki Zeova ena pou nou, se ki nou inparfe ek ki nou fer pese. (Ps. 51:5; Rom. 5:12) Akoz pese, bann dimounn nepli ena enn bon lamitie ar Bondie. Pese inn osi ena enn move lefe lor nou fason panse, lor nou santiman, ek lor nou lasante.

¹³ Akoz pese, nou santi nou koupab, nou trakase, nou perdi konfians an nou-mem, ek nou gagn onte. Nou ena sa bann santiman-la kan nou fer enn pese. Nou ena sa bann santiman-la osi parski nou konsian ki nou inparfe; nou konsian ki se pa koumsa ki Zeova ti kree bann imin. (Rom. 8:20, 21) Parey kouma enn loto ki pa fonksionn bien kan so larou plat, akoz nou inparfe, nou pa reisi servi san poursan nou bann kapasite. Nou pa reisi fonksionn kouma Zeova inn kree nou. Akoz sa, li kapav arive ki parfwa nou ena bann dout ki Zeova kontan nou. Ek kan sa arive, nou bizin rapel ki Zeova Li enn “Bondie ki gran ek inpresionan, ki . . . montre so lamour fidel anver bann ki kontan Li ek obeir so bann komannman.”—Ne. 1:5.

14. Kan nou reflesi lor laranson, kouma sa kapav ed nou pou nou sir ki Zeova kontan nou? (Romin 5:8) (Get osi lankadre “Fer Atansion ar ‘Pouvwar ki Pese Ena pou Anbet Dimounn.’”)

¹⁴ Parfwa, nou kapav panse ki nou pa merite ki Zeova kontan nou. Me avredir, nou vremem pa merite ki Li kontan nou. Se akoz sa ki so lamour pou nou li bien spesial! Pena nanye ki nou kapav fer pou ki nou merite ki Zeova kontan nou. Kanmem sa, Zeova inn donn laranson pou pardonn nou bann pese, ek Li’nn fer sa parski Li kontan nou. (1 Zan 4:10) Fode pa nou bliye osi ki Zezi inn vinn lor later pou sov bann dimounn ki fer pese, pa bann dimounn ki parfe. (Lir Romin 5:8.) Personn pa kapav fer nanye dan enn fason parfe, ek Zeova pa demann nou pou fer sa. Alor, kan nou konpran ki parski nou inparfe sa kapav fer nou ena bann dout ki Zeova vremem kontan nou, nou pou fer plis zefor ankor pou lit kont sa santiman-la.—Rom. 7:24, 25.

ANOU KONTIGN RES FIDEL

15-16. Si nou res fidel ar Zeova, ki kitsoz nou kapav sir, ek kifer? (2 Samiel 22:26)

¹⁵ Zeova anvi ki nou “res atase ar Li.” (Det. 30:19, 20) Se meyer swa ki nou kapav fer! Ek si nou fer sa, nou kapav sir ki Li pou res fidel anver nou. (Lir 2 Samiel 22:26.) Tanki nou res fidel ar Zeova, nou kapav sir ki Li pou ed nou pou andir ninport ki sitiasion ki nou gagne.

¹⁶ Dan sa lartik-la, nou’nn trouv boukou rezon pou nou res stab ek akrose ar Zeova kan nou gagn bann leprev. Nou kone ki Zeova kontan nou ek ki Li pou soutenir nou. Se seki Labib ansegn nou. Ek si nou ena bann dout lor lamour ki Zeova ena pou nou, nou bizin reflesi lor seki nou kone lor lamour Zeova, olie ki nou res konsantre lor seki nou nou resanti. Alor, anou kontign ena konfians dan sa lansegnman inportan la: Zeova “so lamour fidel pou touletan.”