Jéhovah veille lor nou pou nou bien

“Lizié [Jéhovah] pé guette partout lor la terre pou montré so la force dan faveur bann dimoune ki ena enn leker complet envers Li.”—2 CHRON. 16:9.

1. Kifer Jéhovah examine nou?

JÉHOVAH Li enn Papa parfait. Li konn nou tellement bien ki Li mem konn “tendance [nou] bann pensée.” (1 Chron. 28:9) Selman, Li pa examine nou zis pou trouve nou bann defaut. (Ps. 11:4; 130:3) Au contraire, avek amour, Li envie protege nou ar n’importe ki kitsoz ki kapav mette en danger nou relation avek Li ek nou possibilité pou gagne la vie eternel.—Ps. 25:8-10, 12, 13.

2. Dan faveur kisannla Jéhovah montré so la force?

² Jéhovah Li tout-puissant ek Li trouve tou. A cause sa, Li kapav aide so bann serviteur ki fidele n’importe kan zot prié Li, ek Li kapav soutenir zot dan zot l’epreuve. Dan 2 Chroniques 16:9 nou lire: “Lizié [Jéhovah] pé guette partout lor la terre pou montré so la force dan faveur bann dimoune ki ena enn leker complet envers Li.” Remarké ki Bondié servi so la force dan faveur bann ki servi Li avek enn leker complet, enn leker ki ena bann mobile ki pur ek sincere. Li pa montré sa l’interet-la envers bann ki embete lezot ou-soit ki hypocrite.—Jos. 7:1, 20, 21, 25; Prov. 1:23-33.

Marche avek Bondié

3, 4. Ki sa vedir ‘marche avek Bondié,’ ek ki l’exemple biblik ki aide nou pou comprend sa?

³ Pou beaucoup dimoune, zot pa kapav maziné ki Createur l’univers permette bann dimoune pou marche avek Li dan enn sens spirituel. Pourtant, c’est exactement seki Jéhovah envie nou faire. Dan lepok biblik, Hénok ek Noé ‘ti marche avek Bondié.’ (Gen. 5:24; 6:9) Moïse “ti tini ferme, coumadir li ti pé trouve sa Kikenn ki invisible-la.” (Héb. 11:27) Avek humilité, le roi David ti marche a coté so Papa ki dan le ciel. Li ti dire: “Parski [Jéhovah] dan mo coté droite, nanyin pa pou kapav faire moi tombé.”—Ps. 16:8.

⁴ Bien sur, nou pa kapav vrai-mem attrape la main Jéhovah ek marche avek Li. Mais nou kapav faire sa dan enn sens symbolik. Couma? Psalmiste Asaph ti ecrire: “Mo avek toi touletan, to finn trap mo la main droite. To pou guide moi avek to conseil.” (Ps. 73:23, 24) Pou dire sa dan enn fason simple, nou marche avek Jéhovah kan nou touletan suive so bann conseil ki Li donne nou dan so Parole, la Bible, ek par “l’esclave fidele et avisé.”—Mat. 24:45; 2 Tim. 3:16.

5. Couma Jéhovah veille lor so bann serviteur fidele couma enn papa ki ena l’amour, ek ki sentiment nou bizin ena envers Li?

⁵ Jéhovah ena enn grand l’affection pou bann ki marche avek Li. A cause sa, Li veille lor zot couma enn bon papa, Li prend zot soin, Li protege zot, ek Li enseigne zot. Bondié dire: “Mo pou donne toi capacité pou comprend ek mo pou montré toi dan ki chemin to bizin marché. Mo pou donne toi conseil pendant ki mo garde enn lizié lor toi.” (Ps. 32:8) Demann ou-mem: ‘Eski mo mazinn mo-mem coumadir pé marche ensam avek Jéhovah, la main dan la main, en mem temps ki mo pé ecoute so sagesse ek senti ki Li pé veille lor moi avek amour? Mo conscient ki Li present ek ki Li pé guette moi; eski mo laisse sa influence mo bann pensée, mo parole ek mo action? Ek kan mo faire enn peché, eski mo considere Jéhovah couma enn Papa ki ena l’amour ek misericorde, ki envie aide bann dimoune ki repenti pou regagne bann bon relation avek Li, ek pa couma enn Bondié ki pa prend nou compte ek ki severe?’—Ps. 51:17.

6. Ki l’avantage Jéhovah ena lor enn parent humain?

⁶ Parfois, Jéhovah kapav aide nou avant-mem ki nou al faire enn mauvais kitsoz. Par exemple, nou koné ki nou leker ena tendance pou agir couma enn traitre ek Jéhovah kapav remarké ki sa leker-la pé commence ena enn desir pou bann kitsoz ki pa bon. (Jér. 17:9) Dan enn situation coumsa, Li kapav mem agir pli vite ki bann parent humain, parski so “regard couma bann rayon la lumiere,” ek sa regard-la ena pouvoir pou guette au fond nou-mem, pou examine bann pensée pli profond ki nou kapav ena. (Ps. 11:4; 139:4; Jér. 17:10) Anou examine fason ki Bondié ti reagir dan enn situation ki ti’nn developpé dan la vie Barouk, secretaire personnel ek bon camarade prophete Jérémie.

Enn vrai Papa pou Barouk

7, 8. (a) Kisannla Barouk ti été, ek kitfois ki bann desir ki pa bon ti’nn commence developpé dan so leker? (b) Couma Jéhovah pareil couma enn papa ti montré ki Li ti interessé ar Barouk?

⁷ Barouk ti enn scribe professionnel. Li ti servi avek fidelité a coté Jérémie dan enn mission ki ti vinn difficile. Zot ti bizin annonce bann jugement Jéhovah ar nation Juda. (Jér. 1:18, 19) Ti’nn arrive enn moment kot Barouk, ki kitfois ti sorti dan enn grand famille, ti commence rod “bann grand kitsoz” pou li-mem. Kitfois li ti commence developpe bann l’ambition personnel ou-soit enn desir pou gagne bann kitsoz materiel. Mais n’importe seki ti passé, Jéhovah ti trouve sa bann pensée dangereux-la pé commence developpé dan leker Barouk. Jéhovah ti agir sans tardé ek a travers Jérémie Li ti dire Barouk: “To’nn dire: ‘Malheur lor moi asterla, parski Jéhovah finn ajoute tristesse ar mo douleur! Mo’nn fatigué plaigné, ek mo pa’nn trouve okenn place kot ena trankilité.’ ” Lerla Bondié ti dire li: “To pé contigne rod bann grand kitsoz pou to-mem. Arrete rodé.”—Jér. 45:1-5.

⁸ Mem si Jéhovah ti ferme, c’est pa la colere ki faire Li reagir, mais couma enn papa, Li ti interessé avek Barouk. Bondié ti trouvé ki, mem si Barouk ti ena bann desir ki ti kapav dangereux pou so spiritualité, li pa ti ena enn mauvais leker. Jéhovah ti koné aussi ki Jérusalem ek Juda ti pré pou detruire, ek Li pa ti envie ki Barouk tombé zis dan sa moment critik-la. Alors, pou faire so serviteur retourne dan la realité, Bondié ti rappel li ki Li ti pé “amenn enn malheur lor tou dimoune.” Li ti ajouté ki si Barouk ti agir avek sagesse, li ti pou reste vivant. (Jér. 45:5) Coumadir Bondié ti pé dire Barouk: ‘Guette la realité en face, Barouk. Pa blié seki pou arrive Juda ek Jérusalem bientot a cause zot peché. Reste fidele ek to pou vive! Mo pou protege toi.’ Surement bann parole Jéhovah ti touche leker Barouk, parski li ti change so fason pensé ek li ti sapé kan Jérusalem ti detruire 17 an plitar.

9. Couma ou pou reponn bann question ki’nn posé dan paragraphe?

⁹ Pendant ki ou medite lor sa recit concernant Barouk-la, reflechi lor sa bann question ek verset ki suive-la: Ki nou aprann lor Jéhovah ek lor so bann sentiment envers so bann serviteur par fason ki Li’nn inn agir avek Barouk? (Lire Hébreux 12:9.) Alors ki nou pé vive enn lepok critik, ki nou kapav aprann ar conseil ki Bondié ti donne Barouk ek ar fason ki Barouk ti reagir ar sa conseil-la? (Lire Luc 21:34-36.) Pareil couma Jérémie, couma bann ancien kapav reflete l’interet ki Jéhovah ena pou So bann serviteur?—Lire Galates 6:1.

Garson Bondié reflete l’amour so Papa

10. Ki pouvoir Jésus inn gagné pou prend so responsabilité couma Chef congregation chretien?

¹⁰ Dan lepok avant bann chretien, Jéhovah ti montré so l’amour pou so peuple par so bann prophete ek par lezot serviteur fidele. Zordi, nou trouve sa mem l’amour-la manifesté surtout par Jésus Christ, Chef congregation chretien. (Éph. 1:22, 23) C’est pou sa ki livre Révélation decrire Jésus couma enn l’agneau ki ena “sept lizié, bann lizié ki represente sa sept l’esprit Bondié ki finn envoyé partout lor la terre-la.” (Rév. 5:6) Oui, Jésus inn gagne l’esprit saint Bondié en abondance, ek sa permette li pou ena enn discernement parfait. Li aussi li trouve seki nou été endan, ek li konn tou seki passé.

11. Ki role Christ ena, ek couma so l’attitude envers nou reflete l’attitude so Papa?

¹¹ Mais pareil couma Jéhovah, Jésus li pa enn la police dan le ciel ki pé veille tou seki nou faire. Li examine nou couma enn papa ki content nou. Enn parmi bann titre ki Jésus ena c’est “Papa eternel,” ek sa rappel nou role ki li pou ena pou donne la vie eternel tou bann ki ena la foi en li. (Is. 9:6) En plus, en tant ki Chef la congregation, Jésus Christ kapav servi bann chretien ki mur lor plan spirituel ek ki ena desir pou faire plus, surtout bann ancien, pou encourage ek conseil bann ki bizin l’aide.—1 Thess. 5:14; 2 Tim. 4:1, 2.

12. (a) Ki bann lettre ki ti envoyé dan sept congregation l’ouest l’Asie montré lor Jésus? (b) Couma bann ancien reflete mem l’attitude ki Jésus envers troupeau Bondié?

¹² Jésus Christ interesse-li beaucoup ar troupeau Bondié. Nou trouve sa dan bann lettre ki li ti envoye bann ancien sept congregation dan l’ouest l’Asie. (Rév. 2:1–3:22) Dan sa bann lettre-la, li ti montré ki li pa ti zis konn seki ti pé passé dan chaque congregation, mais aussi ki quantité li ti interessé ar so bann disciple. Mem kitsoz pé arrivé encore plus zordi parski vision ki ena dan livre Révélation pé realisé pendant “jour du Seigneur.”a (Rév. 1:10) Souvent, Christ montré so l’amour a travers bann ancien, ki servi couma bann berger spirituel dan congregation. Li kapav pousse sa “bann zom [ki] couma bann don[-la]” pou donne reconfort, l’encouragement, ou-soit conseil kan bizin. (Éph. 4:8; Actes 20:28; lire Isaïe 32:1, 2.) Eski ou considere zot zeffort couma enn preuve ki Jésus Christ interessé ar ou personnellement?

L’aide dan bon moment

13-15. Couma Bondié kapav decide pou reponn nou la priere? Donne bann l’exemple.

¹³ Eski ou’nn deja prié avek tou ou leker pou gagne l’aide, ek ou’nn gagne enn reponse pou ou la priere kan enn chretien mur inn vinn rann ou enn visite ki’nn encourage ou? (Jacq. 5:14-16) Ou-soit, kitfois ou’nn gagne l’aide a travers enn discours ki’nn faire dan reunion ou-soit par enn kitsoz ki ou’nn lire dan enn nou bann publication. Souvent Jéhovah reponn nou la priere dan sa bann fason-la. Par exemple, kan enn ancien ti fini faire enn discours, enn soeur ti al guette li. Deux-trois semaine avant, sa soeur-la ti’nn victime enn grand l’injustice. Au lieu ki li ti plaigné a cause sa l’injustice-la, li ti dire sa ancien-la ki quantité li ti reconnaissant pou bann pensée biblik ki ti ena dan so discours. Sa bann point-la ti applik ar so situation ek ti encourage li beaucoup. Li ti vrai-mem bien content ki li ti’nn assisté sa reunion-la!

¹⁴ En rapport avek l’aide ki nou gagné a travers la priere, anou considere seki ti arrive trois prisonnier ki ti gagne la verité ek ki ti vinn bann proclamateur non-baptisé alors ki zot ti dan prison. A cause enn l’evenement bien violent ki ti’nn arrivé dan prison, ti ena plus restriction lor tou bann prisonnier. Sa ti faire bann prisonnier-la protesté. Bann prisonnier ti decidé ki apré ti-dejeuner lendemain gramatin, zot pa ti pou retourne zot l’assiette, pou montré ki zot pa ti content ditou. Sa trois proclamateur non-baptisé-la ti dan enn situation difficile. Si zot ti rebellé zot aussi, zot ti pou desobeir l’ordre ki Jéhovah inn donné dan Romains 13:1. Si zot pa ti rebellé, zot ti pou kapav attann ki bann lezot prisonnier ki ti en colere, vinn faire zot payé.

¹⁵ Li pa ti possible ki zot koz sakenn avek zot camarade, alors, sa trois zom-la ti prié Jéhovah pou gagne la sagesse. Lendemain gramatin, toulé-trois inn remarké ki zot inn trouve mem solution—zot ti choisir pou pa prend ti-dejeuner. Kan plitar bann garde ti vinn reprend bann l’assiette, toulé-trois zom pa ti ena nanyin pou retourné. Ki quantité zot ti content ki sa kikenn ki “ecoute la priere[-la]” pa ti loin ar zot!—Ps. 65:2.

Guette l’avenir avek confiance

16. Couma predication montré ki Jéhovah interessé ar bann dimoune ki couma bann brebis?

¹⁶ Predication ki pé faire dan le monde entier, c’est enn lot preuve ki Jéhovah interessé ar bann dimoune sincere, n’importe ki coté zot resté. (Gen. 18:25) Souvent, Jéhovah servi bann ange pou dirige so bann serviteur vers bann dimoune ki couma bann brebis—mem si zot reste dan bann l’endroit kot pankor preche la bonne nouvelle. (Rév. 14:6, 7) Par exemple, Bondié ti servi enn ange pou dirige Philippe, enn chretien ki ti annonce l’evangile dan premier siecle, pou al joinde enn fonctionnaire Éthiopien ek pou explik li bann l’Ecriture sacré. Ki resultat sa ti ena? Sa missié-la ti accepté la bonne nouvelle ek ti prend bapteme pou vinn enn disciple Jésus.b—Jean 10:14; Actes 8:26-39.

17. Kifer fodé pa nou trop tracassé concernant l’avenir?

¹⁷ Alors ki la fin sa le monde-la pé kosté, “bann douleur” ki ti annoncé, pou contigné. (Mat. 24:8) Par exemple, prix mangé kapav augmenté beaucoup parski pli beaucoup dimoune pé demann mangé, ou-soit parski climat pé pli deterioré, ou-soit aussi parski l’economie pa stable. Li possible ki li pé vinn pli difficile pou gagne travail, ek bann patron pé faire plus pression lor bann travailleur pou zot travail pli beaucoup. N’importe ki arrivé, tou bann ki garde bann kitsoz spirituel dan premier place ek garde zot ‘lizié simple’ pa bizin tracassé plus ki bizin. Zot koné ki Bondié content zot ek pou prend zot soin. (Mat. 6:22-34) Anou guetté par exemple, couma Jéhovah ti donne Jérémie seki li ti bizin kan Jérusalem ti pré pou detruire en 607 avant nou lepok.

18. Couma Jéhovah ti montré so l’amour pou Jérémie kan bann Babylonien ti encerclé Jérusalem?

¹⁸ Kan bann Babylonien ti encerclé Jérusalem ek ti pré pou detruire la ville, Jérémie ti emprisonné dan la Cour la Garde. Couma li ti pou faire pou gagne mangé? Si li ti libre, li ti pou kapav al rod so mangé li-mem. Mais la, li ti depann net lor bann dimoune ki ti autour li, ek la plupart ti ena la haine pou li! Selman, Jérémie pa ti mette so confiance dan bann dimoune mais dan Bondié, ki ti promette pou prend li soin. Eski Jéhovah ti tini so promesse? Oui! Li ti veillé ki toulé-jour Jérémie gagne “enn di-pain rond . . . ziska ki ti nepli ena di-pain dan la ville.” (Jér. 37:21) Jérémie, Barouk, Ébed-Mélek ek lezot dimoune, ti reussi sapé pendant sa periode kot ti ena la famine, maladie ek la mort-la.—Jér. 38:2; 39:15-18.

19. N’importe ki l’avenir reservé, ki determination nou bizin ena?

¹⁹ Oui, “lizié Jéhovah lor bann dimoune droite, ek so zoreille ecoute zot bann supplication.” (1 Pierre 3:12) Eski ou content ki ou Papa ki dan le ciel veille lor ou? Eski ou senti-ou en securité parski ou koné ki so lizié lor ou pou ou prop di-bien? Alors, prend determination pou contigne marche avek Bondié—n’importe ki kapav arrivé dan l’avenir. Nou kapav sur ki pareil couma enn papa, Jéhovah pou contigne veille lor so bann serviteur fidele.—Ps. 32:8; lire Isaïe 41:13.

[Note]

Eski ou kapav expliké?

• Couma nou kapav montré ki nou pé ‘marche avek Bondié’?

• Couma Jéhovah ti montré so l’amour pou Barouk?

• En tant ki Chef congregation, couma Jésus reflete bann qualité so Papa?

• Couma nou kapav montré nou confiance dan Bondié dan sa lepok critik-la?

[Zimage page 13]

Pareil couma Jérémie ti agir avek Barouk, zordi bann ancien imite l’interet ki Jéhovah ena pou nou

[Zimage page 15]

Couma Jéhovah kapav aide nou dan bon moment?