Zeova Beni ek Protez Bann Dimunn Ki Obeir Li

“Konsernan sa kikenn ki ekut mwa la, li pu res an sekirite, li pu viv trankil san ki li per maler vinn lor li.”—PROVERB 1:33.

1, 2. Kifer eski li inportan ki nu obeir Bondye? Donn enn legzanp.

DETRWA zoli ti pusin pe byin manze dan lerb san ki zot kone ki enn mangus pe get zot. Mama pul ki’nn truv sa, deswit kriye pu sinyal so bann ti pusin kont sa danze la, ek li uver so lezel an gran. Bann ti pul galupe vit-vit, ek zot vinn kasyet anba lezel zot mama. Mangus la pa’nn kapav atake, li’nn bizin ale.a Ki leson nu tire dan sa legzanp la? Lobeisans sov lavi!

² Se enn gran leson pu bann Kretyin zordi, parski Satan pe fer tu seki li kapav pu atak bann serviter Bondye. (Revelasyon 12:9, 12, 17) Seki li anvi se detrir nu bann bon relasyon avek Zeova ek fer nu perdi so faver ek lespwar pu viv pu tuletan. (1 Pyer 5:8) Me, si nu res pros avek Bondye ek nu pre pu swiv direksyon ki so Parol ek so lorganizasyon donn nu, nu kapav sir ki nu pu gayn so proteksyon. Enn ekrivin Psom ti dir: “Li pu protez twa avek so bann long plim ki li ena dan but so lezel, ek to pu al kasyet anba so lezel.”—Psom 91:4.

Ki’nn Ariv enn Nasyon Dezobeisan?

3. Parski nasyon Izrael finn kontiyne dezobeir Zeova, ki’nn ariv li?

³ Kan nasyon Izrael ti obeir Zeova, zot ti gayn so proteksyon. Me tro suvan zot finn kit zot Kreater ek zot finn al ador bann bondye an dibwa ek an ros, ‘ki pa servi nanyin ek ki pa kapav sov personn.’ (1 Samyel 12:21) Plizir syek apre ki li’nn rebele, nasyon Izrael ti’nn telman abandonn Zeova ki pa ti kapav fer nanyin pu redres li. Akoz sa, Zezi ti dir avek tristes: “Zerizalem, Zerizalem, lavil ki tuy bann profet ek ki avoy kut ros ziska tuy bann dimunn ki Bondye finn avoy kot zot. Komye fwa mo ti anvi rasanble zot bann zanfan ansam, parey kuma enn mama pul rasanble so bann ti pul ansam anba so lezel! Me zot pa’nn ule mo fer sa. Gete! Zot lakaz inn abandone.”—Matye 23:37, 38.

4. Kuma Zeova inn montre ki li’nn rezet nasyon Izrael an 70 N.L.?

⁴ Dan lane 70 N.L., Zeova finn montre par enn fason byin tris ki Li’nn rezet nasyon rebel Izrael. Sa lane la, bann larme Romin ti atak Zerizalem. Zot ti vini avek zot pavyon dekore avek zimaz enn leg, ki zot ti tini byin ot. Zot inn atak Zerizalem ek zot inn fer enn gran masak dan lavil. Sa lepok la, lavil ti ranpli avek bann dimunn ki ti vinn fet Pak Zwif. Purtan, malgre ki kantite sakrifis ki zot ti done, zot pa ti resi gayn faver Bondye. Sa fer rapel bann parol ki profet Samyel ti dir avek Sail, enn lerwa dezobeisan: “Eski Zeova kontan bann sakrifis zanimo parey kuma Li kontan ki nu obeir Li? Get sa, lobeisans pli inportan ki bann sakrifis ek ekute, pli inportan ki ofer lagres bann muton mal.”—1 Samyel 15:22.

5. Ki kalite lobeisans Zeova demande ek kuma nu kone ki li posib pu ena sa kalite lobeisans la?

⁵ Mem si Zeova kontiyn demann lobeisans, Li konn byin ki bann dimunn inparfe ena bann limit. (Psom 130:3, 4) Seki Li demann nu se servi Li avek enn leker sinser, avek enn lobeisans ki baze lor lafwa, avek lamur ek avek lakrint pu pa depler Li. (Deteronom 10:12, 13; Proverb 16:6; Izai 43:10; Mika 6:8; Romin 6:17) Sa kalite lobeisans la li posib. Nu truv sa dan legzanp ki bann serviter Zeova ki’nn viv avan lepok Zezi-Kris, inn done. Zot ti res fidel mem si zot ti bizin fer fas avek bann gran difikilte ek lamor. (Ebre 11:36, 37; 12:1) Sa bann serviter la finn vremem fer leker Zeova kontan! (Proverb 27:11) Ena lezot purtan, ki okumansman ti byin fidel, me ki apre pa’nn kontiyne obeir Li. Parmi, ena Lerwa Yeoas ki ti reyn dan lavil Zida.

Enn Lerwa Ki’nn Gate par Bann Move Frekantasyon

6, 7. Ki kalite lerwa Yeoas ti ete kan Yeoyada ti vivan?

⁶ Lerwa Yeoas ti manke mor kan li ti ti-baba, parski ena dimunn ti rod asasinn li. Kan Yeoas ti gayn setan, avek kuraz Gran-Pret Yeoyada ti tir li dan plas kot ti kasyet li, ek li ti fer li vinn lerwa. Yeoyada, ki ti ena lakrint pu Bondye, ti kuma enn papa ek enn konseye pu Yeoas. Akoz sa, sa zenn lerwa la “finn kontiyn fer seki bon devan lizye Zeova pandan tu letan ki pret Yeoyada ti vivan.”—2 Kronik 22:10–23:1, 11; 24:1, 2.

⁷ Repar tanp Zeova, ti parmi enn bann bon travay ki Yeoas ti fer. Sa ti enn kitsoz ki ‘ti byin inportan pu li.’ Yeoas ti fer Gran-Pret Yeoyada rapel ki bizin ramas tax pu tanp, partu dan lavil Zida ek Zerizalem, parey kuma “Moiz ti donn lord.” Sa kas la ti servi pu pey bann travay reparasyon ki ti fer dan tanp. Nu truve ki Yeoyada ti’nn resi ankuraz sa zenn lerwa la, pu etidye ek pu obeir lalwa Bondye. Rezilta: Tu bann travay ki ti ena pu fer dan tanp, ek bann travay an rapor avek bann kitsoz ki ti servi dan tanp, ti’nn fer vit.—2 Kronik 24:4, 6, 13, 14; Deteronom 17:18.

8. (a) Ki kitsoz sirtu inn amenn Yeoas pu tonbe lor plan spirityel? (b) Dezobeisans sa lerwa la finn amenn li pu fer ki kitsoz alafin?

⁸ Malerezman, Yeoas pa’nn kontiyn obeir Zeova. Kifer? Parol Bondye dir nu: “Apre lamor Yeoyada, bann prins Zida inn vini, ek zot inn prostern devan lerwa. Sa lepok la, lerwa inn ekut zot. Ek tigit par tigit, zot inn aret al dan tanp Zeova, Bondye ki zot ban anset ti adore. Zot inn kumans servi bann poto sakre ek bann zidol. Akoz sa pese la, Zeova ti ankoler kont Zida ek Zerizalem.” Move linflyans ki bann prins Zida ti ena lor lerwa, ti amenn li usi pu pa ekut bann profet Bondye. Zekarya, garson Yeoyada, ti enn parmi sa bann profet la. Li ti kondann Yeoas ek lepep akoz zot dezobeisans. Me, olye ki li repanti, Yeoas inn donn lord pu tuy Zekarya, pu avoy li kut ros ziska li mor! Wi, Yeoas finn vinn enn dimunn san pitye ek dezobeisan parski li’nn les li inflyanse par bann move frekantasyon!—2 Kronik 24:17-22; 1 Korintyin 15:33.

9. Kuma seki finn ariv Yeoas ek so bann prins alafin, montre ki li byin pa bon kan dezobeir?

⁹ Parski zot finn abandonn Zeova, ki’nn ariv Yeoas ek so bann move prins ki li ti pe frekante? Labib dir nu ki enn larme Siryin ki ti ena “zis enn tigit zom, inn atak Zida ek inn tuy tu bann prins. Bann atakan la finn usi fors lerwa pu donn tu so dibyin ek tu lor ek larzan ki ti ena dan tanp. Mem si Yeoas pa’nn mor, li ti vinn enn dimunn feb ek malad. Enn tipe letan apre, sertin parmi so bann prop serviter inn fer enn konplo kont li ek zot inn asasinn li. (2 Kronik 24:23-25; 2 Lerwa 12:17, 18) Wi, sa bann parol ki Zeova ti dir Izrael la vremem finn arive: “Si to pa ekut lavwa Zeova to Bondye ek to pa obeir so bann komannman ek so bann lalwa, malediksyon pu vinn lor twa.”!—Deteronom 28:15.

Enn Sekreter Ki Finn Sape Parski Li’nn Obeir

10, 11. (a) Kifer eski li bon ki nu reflesi lor konsey ki Zeova ti donn Baruk? (b) Ki konsey Zeova ti donn Baruk?

¹⁰ Eski parfwa u santi u dekuraze parski zis enn tigit dimunn ki u zwenn dan predikasyon ki ekute? Eski parfwa u anvye larises ek fason viv sertin dimunn ki rod profit tu seki lavi kapav ofer zot? Si wi, reflesi byin lor legzanp Baruk, sekreter Zeremi, ek lor bann bon konsey ki Zeova ti donn li.

¹¹ Baruk ti pe ekrir enn profesi, kan Zeova inn turn so latansyon lor li. Kifer? Parski Baruk ti pe kumans pleyne lor so sityasyon. Li ti anvi gayn kitsoz pli bon ki so privilez spesyal ki li ti ena pu servi Bondye. Kan Zeova inn remarke ki latitid Baruk inn sanze, Li’nn donn li bann konsey byin kler ek direk. Li’nn dir li: “To pe kontiyn rod bann gran-gran kitsoz pu twa. Aret rod sa, parski mo pe amenn enn gran maler lor tu dimunn, . . . me twa, rekonpans ki to pu gayne, mo pu sov to lavi partu kot to pu kapav ale.”—Zeremi 36:4; 45:5.

12. Kifer nu bizin evit rod bann “gran-gran kitsoz” pu nu dan sa lemond la?

¹² Baruk ti enn bon dimunn ek ansam avek Zeremi, li’nn res fidel anver Zeova ek li’nn servi Li avek kuraz. Kan u lir bann parol ki Zeova ti dir Baruk, eski u santi ki kantite Zeova ti trakase pu li? Zordi usi parey, Zeova byin trakase pu bann dimunn ki tante pu al rod pli gran kitsoz dan sa lemond la. Erezman, parey kuma Baruk, buku parmi sa bann dimunn la inn fer bann sanzman neseser grasa led ki bann frer spirityel inn donn zot. (Lik 15:4-7) Wi, li bon ki nu tu konpran ki pena lavenir pu bann dimunn ki rod gran-gran kitsoz dan sa lemond la! Pa zis parski sa bann dimunn la pa ere, me seki pir, seki zot pu mor kan Bondye pu detrir sa lemond la ek so bann move dezir.—Matye 6:19, 20; 1 Zan 2:15-17.

13. Ki legzanp Baruk anseyn nu?

¹³ Legzanp Baruk montre usi ki nu bizin konn abes nu ek aksepte bann konsey. Remarke ki Zeova pa ti koz direk ar Baruk kan Li ti konsey li, me Li ti servi Zeremi pu fer sa. Sirman ki Baruk ti byin konn bann defo ki Zeremi ti ena. (Zeremi 45:1, 2) Purtan, Baruk finn konn abes li, ek li ti realize ki se Zeova anrealite ki ti pe donn li sa bann konsey la. (2 Kronik 26:3, 4, 16; Proverb 18:12; 19:20) Donk, si ‘avan ki nu rann nu kont, nu komet enn fot’ ek ki nu gayn bann konsey baze lor Labib, anu imit Baruk. Parey kuma li, anu montre ki nu’nn vinn enn adilt lor plan spirityel, ki nu ena enn bon zizman ek ki nu kapav abes nu.—Galat 6:1.

14. Kifer eski li bon ki nu obeir bann zom ki diriz nu?

¹⁴ Kan nu abes nu, sa ed usi bann ki donn nu konsey. Ebre 13:17 dir: “Obeir bann ki pe diriz zot ek sumet ar zot, parski bannla pe vey lor zot kuma bann ki pu rann kont. Les zot fer sa avek lazwa ek san pleyne, sinon zotmem ki pu perdi apre.” Parmi bann travay ki bann ansyin fer, zot konsey zot bann frer ek ser. Sa li pa tuzur fasil. Suvan zot bizin priye Zeova avek tu zot leker pu Li donn zot kuraz, ek sazes, ek bann mo ki bizin pu fer sa. Donk, anu “apresye sa bann frer la.”—1 Korintyin 16:18.

15. (a) Kuma Zeremi inn montre ki li ti ena konfyans an Baruk? (b) Ki rekonpans Baruk inn gayne parski li’nn obeir?

¹⁵ Nu kone ki Baruk finn sanz so latitid, parski Zeremi apre inn demann li pu fer enn kitsoz ki pa fasil, setadir, al dan tanp ek lir for sa mem mesaz zizman ki Zeremi ti fer li ekrir la. Eski Baruk ti obeir? Wi, li’nn fer “tu seki profet Zeremi ti donn li lord pu fer.” Li’nn mem lir sa mem mesaz la avek bann prins Zerizalem. Sirman li ti bizin ena buku kuraz pu fer sa. (Zeremi 36:1-6, 8, 14, 15) Kan bann Babilonyin inn detrir lavil Zerizalem 18 an apre, mazine ki kantite Baruk ti rekonesan ki li finn sape. Li pa’nn mor parski li ti obeir Zeova ek parski li ti’nn aret rod bann gran kitsoz pu limem!—Zeremi 39:1, 2, 11, 12; 43:6.

Lobeisans Inn Sap Lavi Sertin, kan Larme Inn Antur enn Lavil

16. Kuma eski Zeova finn montre ki Li ti ena pitye pu bann Zwif dan Zerizalem an 607 A.N.L.?

¹⁶ Kan Zerizalem ti detrir an 607 A.N.L., Zeova ti montre ki Li ti ena pitye pu bann ki ti obeir Li. Kan larme Babilonyin ti antur Zerizalem, Zeova ti dir bann Zwif: “Mo pe met devan zot de semin: lavi ek lamor. Bann seki res dan lavil, pu mor par lepe ek par lafaminn ek par maladi; me seki sorti an deor lavil ek rann limem ar bann [Babilonyin], li, li pu viv ek li pu gayn so lavi sov.” (Zeremi 21:8, 9) Mem si bann abitan lavil Zerizalem ti merit lamor, dan sa dernye moman kritik la, Zeova ti ena pitye pu bann ki ti obeir Li.b

17. (a) Zeremi ti bizin al dir bann Zwif pu ‘rann zotmem ar bann [Babilonyin]’. Sit de fason kuma dan sa sityasyon la, so lobeisans finn teste? (b) Zeremi inn montre so kuraz kan li’nn obeir Zeova. Kuma sa legzanp la kapav ed nu?

¹⁷ Kan Zeremi ti demann bann Zwif pu rann zotmem, sa inn teste usi so lobeisans. Kifer? Parski li ti ena enn gran lestim pu non Bondye. Li pa ti anvi ki bann lennmi mepriz sa non la, ek dir ki se grasa zot bann zidol san lavi ki zot pu resi gayn laviktwar. (Zeremi 50:2, 11; Lamantasyon 2:16) An plis kan li ti dir bann Zwif rann zotmem ar zot bann lennmi, Zeremi ti kone ki li ti pe riske so lavi. Bannla ti kapav panse ki li ti enn tret ek li ti pe rebele kont so prop guvernman. Me li pa’nn les laper fer li rekile.Okontrer, li finn obeir Zeova ek li finn anons so mesaz. (Zeremi 38:4, 17, 18) Parey kuma Zeremi, nu’si nu bizin anons enn mesaz ki buku dimunn pa apresye. Zezi usi ti anons sa mesaz la akoz sa ki buku dimunn ti mepriz li. (Izai 53:3; Matye 24:9) Donk, fode pa nu ‘tranble devan dimunn,’ me, kuma Zeremi, nu bizin obeir Zeova avek kuraz ek ena enn konfyans total an Li.—Proverb 29:25.

Lobeisans kan Gog Pu Atake

18. Kuma lobeisans bann serviter Zeova pu teste dan lavenir?

¹⁸ Byinto lemond move ki Satan pe dirize pu detrir dan enn ‘gran detres’ ki zame pa finn ena avan. (Matye 24:21) Pena dut ki avan ek pandan sa peryod la, lobeisans ek lafwa bann serviter Bondye pu pas dan bann leprev. Par egzanp, Labib dir nu ki Satan, ki apel usi “Gog ki sorti dan peyi Magog,” pu fer enn gran latak kont pep Bondye. Li pu prepar “enn gran larme . . . , ki kuma bann nyaz ki kuver enn peyi.” (Ezekyel 38:2, 14-16) Konpare ar zot bann lennmi, bann serviter Bondye pu pli tigit, ek zot pa pu ena okenn mwayin pu defann zot. Me zot pu al rod proteksyon ‘anba lezel’ Zeova ek Li pu protez bann ki obeir Li.

19, 20. (a) Kifer eski li ti inportan ki bann Izraelit obeir kan zot ti pre kot Lamer Ruz? (b) Kan nu reflesi avek led lapriyer lor seki’nn arive kot Lamer Ruz, kuma sa kapav ed nu zordi?

¹⁹ Sa sityasyon la rapel nu seki ti arive kan bann Izraelit ti sorti Lezip. Zeova ti avoy dis maler ki ti fer bann gran dega dan Lezip. Apre sa Li’nn kondir so pep ver peyi ki li ti promet zot. Me olye ki Li fer zot pas par enn semin pli kurt, Li’nn fer zot desann par semin ki pas par Lamer Ruz. La, li ti pu fasil pu zot lennmi atak zot parski manyer zot ti pe deplase ti paret danzere. Si u ti la sa lepok la, eski u ti pu obeir Zeova ek swiv direksyon ki Li ti done par Moiz? Eski u ti pu ena konfyans ek pran semin ki pas par Lamer Ruz, alor ki u kone ki peyi ki Bondye ti promet, ti dan enn lot direksyon?—Egzod 14:1-4.

²⁰ Kan nu lir Egzod sapit 14, nu truve kuma Zeova inn delivre so pep dan enn fason extraordiner. Kan nu pran letan pu etidye ek pu medit lor bann zistwar kumsa, sa kapav fer nu lafwa vinn pli for. (2 Pyer 2:9) Enn lafwa solid pu fer nu vinn pli for pu obeir Zeova, mem si seki Li demann nu fer paret kontrer ar seki bann dimunn panse bon. (Proverb 3:5, 6) Donk demann umem, ‘Eski mo pe fer bann gran zefor pu fer mo lafwa vinn pli for par enn letid Labib serye, lapriyer, meditasyon ek kan mo asiste tu bann reynion?’—Ebre 10:24, 25; 12:1-3.

Lobeisans Fer Nu Gayn Lespwar

21. Ki benediksyon bann ki obeir Zeova pu gayne zordi ek dan lavenir?

²¹ Bann seki ena labitid pu obeir Zeova dan zot lavi kapav truve asterla mem kuma Proverb 1:33 pe realize. Sa tex la dir: “Konsernan sa kikenn ki ekut mwa la, li pu res an sekirite, li pu viv trankil san ki li per maler vinn lor li.” Sa bann parol la pu realize enn fason extraordiner pandan zur vanzans Zeova! An realite, Zezi ti dir so bann disip: “Kan sa bann kitsoz la kumans arive, redres zot ek lev zot latet parski zot delivrans pe koste.” (Lik 21:28) Wi, zis bann ki obeir Bondye, ki pu swiv sa bann parol la avek konfyans.—Matye 7:21.

22. (a) Kifer pep Zeova kapav ena konfyans? (b) Ki nu pu diskite dan lot lartik?

²² Enn lot rezon kifer nu kapav ena konfyans, se “parski Suverin Senyer Zeova pa pu fer naryin san ki Li revel so sekre ar so bann profet.” (Amos 3:7) Zordi, Zeova pa koz ar bann dimunn kuma Li ti fer avan avek bann profet; me Li’nn demann enn grup dimunn fidel, ki Labib apel enn esklav fidel, pu nuri so pep lor plan spirityel. (Matye 24:45-47) Li byin inportan alor ki nu obeir sa “esklav” la. Dan lot lartik, nu pu truve ki, kan nu obeir sa esklav la, sa montre latitid ki nu ena anver Zezi, met sa esklav la. Se Limem ki “tu bann pep pu obeir.”—Zenez 49:10.

[Not anba paz]

Eski U Rapel?

• Ki ti ariv bann Izraelit kan zot ti kontiyne dezobeir?

• Kuma lerwa Yeoas finn inflyanse par so bann frekantasyon kan li ti ankor byin zenn ek usi apre?

• Ki leson nu aprann par legzanp Baruk?

• Alor ki lafin pre, kifer bann serviter Zeova pena okenn rezon pu per?

[Zimaz lor paz 23]

Kan Yeoyada ti gid li, zenn lerwa Yeoas ti obeir Zeova.

[Zimaz lor paz 25]

Se bann move frekantasyon Yeoas ki’nn fer li tuy profet Bondye

[Zimaz lor paz 26]

Eski u ti pu obeir Zeova ek truve kuma li’nn servi so pwisans extraordiner pu delivre so pep?