Aide bann ki’nn eloigné ar troupeau Bondié
“Vinn partage mo la joie, parski mo’nn trouve mo mouton ki ti perdi.”—LUC 15:6.
1. Couma Jésus ti montré ki li enn bon berger?
LA BIBLE appel sel Garson ki Jéhovah inn crée direct, “grand berger bann brebis.” (Héb. 13:20) La Bible ti annoncé ki li ti pou vinn lor la terre. Li ti montré aussi ki pa ti ena okenn Berger couma li ki ti faire tou pou rod ‘bann brebis ki ti’nn perdi’ dan Israël. (Mat. 2:1-6; 15:24) En plus, pareil couma enn vrai berger ki pré pou donne so la vie pou protege so bann mouton, Jésus ti donne so la vie en ranson pou bann dimoune ki couma bann brebis, ki montré ki zot digne pou profite so sacrifice.—Jean 10:11, 15; 1 Jean 2:1, 2.
2. Pou ki raison certain chretien finn vinn inactif ?
2 Malheureusement, certain ki ti parette apprecié sacrifice Jésus ek ti voué zot la vie ar Bondié, zordi zot nepli forme partie dan congregation. Kitfois decouragement, probleme la santé, ou-soit lezot kitsoz inn faire zot zele diminué ek inn faire zot vinn inactif. Mais, c’est selman kan zot forme partie dan troupeau Bondié ki zot kapav konn trankilité ek bonheur ki David ti mentionné dan Psaume 23. Par exemple, li ti chanté: “C’est Jéhovah ki mo Berger. Mo pa pou mank nanyin.” (Ps. 23:1) Bann ki forme partie dan troupeau Bondié pa mank nanyin lor plan spirituel, mais nou pa kapav dire mem zaffaire pou bann ki’nn eloigné ar sa troupeau-la. Kisannla kapav aide zot? Couma kapav aide zot? Oui, ki kapav faire pou aide zot retourne dan troupeau Bondié?
Kisannla kapav aidé?
3. Couma Jésus ti montré seki bizin faire pou sauve bann brebis ki’nn perdi dan troupeau Bondié?
3 Li important ki nou faire bann zeffort sincere pou sauve bann brebis ki’nn perdi dan troupeau Bondié. (Ps. 100:3) Jésus ti explik sa par enn l’exemple kan li ti dire: “Si enn certain missié ena cent mouton ek enn ladan eloigné ar troupeau, eski li pa pou laisse so quatre-vingt-dix-neuf mouton lor montagne pou al rod seki’nn eloigné-la? Ek si arrivé li trouve li, oui mo dire zot, li pou pli content pou li ki pou sa quatre-vingt-dix-neuf ki pa’nn eloigné-la. Pareil aussi, mo Papa ki dan le ciel pa envie ki enn sel parmi sa bann tipti-la mort.” (Mat. 18:12-14) Kisannla kapav aide bann dimoune ki couma bann mouton ki’nn eloigné ar troupeau Bondié?
4, 5. Ki l’attitude bann ancien bizin ena envers troupeau Bondié?
4 Si bann ancien envie aide bann brebis ki’nn perdi, zot bizin rappel ki troupeau Bondié c’est enn congregation bann dimoune ki finn voué zot la vie ar Jéhovah—oui, enn “troupeau” ki ena valeur ek ‘ki trouve dan la plaine Bondié.’ (Ps. 79:13) Sa bann brebis ki ena valeur-la zot bizin soin, sa vedir ki bann berger ki rempli ar l’amour bizin interessé personnellement ar zot. Kan zot faire bann visite pastoral ki amical kot zot, sa kapav faire zot beaucoup di-bien. Bann l’encouragement rempli ar l’amour ki enn berger donné, kapav fortifié zot lor plan spirituel ek augmente zot desir pou retourne dan troupeau Bondié.—1 Cor. 8:1.
5 Bann berger troupeau Bondié ena responsabilité pou rod bann brebis ki’nn perdi ek apré pou essaye aide zot. L’apotre Paul ti rappel bann ancien dan la ville Éphèse ki zot ti ena responsabilité pou prend soin troupeau Bondié pareil couma bann berger: “Veille bien lor zot-mem ek lor tou troupeau Bondié, parski l’esprit saint finn etabli zot couma bann surveillant parmi sa troupeau-la pou ki zot prend soin congregation Bondié ki Li’nn acheté avek di-sang so prop Garson.” (Actes 20:28) L’apotre Pierre aussi ti donne bann ancien ki ti oint sa conseil-la: “Prend soin troupeau Bondié ki lor zot charge, pa par obligation, mais volontairement, ni parski zot content enn profit malhonnete, mais parski zot ena sa desir-la, ni couma bann ki domine lor l’heritage Bondié, mais vinn bann l’exemple pou troupeau.”—1 Pierre 5:1-3.
6. Kifer bann brebis Bondié bizin l’aide bann berger spirituel surtout zordi?
6 Bann ancien zordi bizin imite Jésus, “l’excellent berger.” (Jean 10:11) Jésus ti bien interessé ar bann brebis Bondié ek li ti montré l’importance pou prend zot soin kan li ti dire Simon Pierre ‘prend soin So bann ti brebis.’ (Lire Jean 21:15-17.) Bann brebis bizin sa qualité soin-la surtout zordi, parski Satan le Diable pé faire double zeffort pou pousse bann ki’nn voué ar Bondié, pou desobeir Li. Satan profite lor faiblesse bann serviteur Jéhovah ek li servi le monde pou essaye amenn zot pou faire peché. (1 Jean 2:15-17; 5:19) Bann chretien inactif zot pli exposé ar sa bann danger-la, alors sa bann chretien-la bizin l’aide pou zot kapav mette en pratik conseil pou “marche par l’esprit.” (Gal. 5:16-21, 25) Pou nou kapav aide sa bann chretien-la, nou bizin demann Bondié so direction, l’aide so l’esprit saint ek konn servi so Parole bien.—Prov. 3:5, 6; Luc 11:13; Héb. 4:12.
7. Kifer li important ki bann ancien prend soin bann brebis ki zot occupé?
7 En Israël longtemps, enn berger ti servi enn longue baton ki ti courbé enn coté pou guide so troupeau. Kan bann mouton ti rentré ou-soit ti sorti dan l’enclos, zot ti ‘passe enba sa baton-la’ ek coumsa berger-la ti kapav compte zot. (Lév. 27:32; Mika 2:12; 7:14) Enn berger chretien aussi bizin konn bien troupeau Bondié ek koné ki pé arrive chaque brebis ki Bondié inn confié li. (Compare avek Proverbes 27:23.) Alors, enn parmi bann kitsoz important ki college ancien discuté c’est couma pou prend soin troupeau Bondié. Sa implik faire bann l’arrangement pou aide bann brebis ki’nn eloigné ar l’organisation. Jéhovah Li-mem ti dire ki Li pou rod so bann brebis ek pou donne zot soin ki bizin. (Ézék. 34:11) Sa vedir ki Bondié content kan bann ancien faire zeffort pou aide bann brebis ki’nn eloigné pou retourne dan so troupeau.
8. Dan ki different fason bann ancien kapav donne bann brebis enn l’attention personnel?
8 Kan enn chretien malade lor plan physik ek enn ancien al visite li, sa kapav faire li bien content ek encourage li. Li pareil aussi kan enn brebis ki malade lor plan spirituel gagne enn l’attention personnel. Bann ancien kapav lire bann verset dan la Bible, reguette enn lartik, discute lor bann point important ki’nn dire dan reunion, prié avek sa inactif-la, etc. Zot kapav dire li ki bann membre congregation ti pou content ki li retourné ek recommence assisté bann reunion. (2 Cor. 1:3-7; Jacq. 5:13-15) Enn visite, enn coude telephone, ou-soit enn lettre kapav vrai-mem aide li! Kan bann ancien ki ena l’amour prend soin bann brebis ki’nn eloigné ar troupeau Bondié, sa kapav aussi augmente zot prop la joie.
Nou tou kapav aidé
9, 10. Kifer ou kapav dire ki c’est pa zis bann ancien ki bizin interessé ar enn brebis ki’nn eloigné ar troupeau Bondié?
9 Nou pé vive enn lepok critik ek tou dimoune bien occupé. Alors, li possible ki nou pa remarké ki enn frere ou-soit enn soeur pé eloigné tigit-tigit ar congregation. (Héb. 2:1) Pourtant, bann brebis Jéhovah ena valeur pou Li. Sakenn parmi zot ena valeur pareil couma chaque membre ena so l’importance dan lekor enn dimoune. Sa vedir ki nou tou nou bizin interesse-nou ar nou bann frere ek soeur ek vrai-mem prend soin sakenn nou camarade. (1 Cor. 12:25) Eski ou ena enn l’attitude coumsa?
10 Mem si c’est bann ancien ki ena responsabilité principal pou rod bann brebis ki’nn eloigné ar congregation ek pou aide zot, c’est pa zis zot tousel ki bizin interessé ar bannla. Lezot chretien kapav coopere ar sa bann ancien-la. Nou kapav ek nou bizin encourage ek soutenir lor plan spirituel bann frere ek soeur ki bizin l’aide pou zot retourne dan troupeau Bondié. Couma nou kapav donne sa l’aide-la?
11, 12. Ki privilege ou kapav gagné pou aide enn kikenn ki bizin enn l’aide spirituel?
11 Dan certain cas, bann ancien kapav faire l’arrangement pou ki bann proclamateur ki ena l’experience faire enn l’etude la Bible avek bann inactif ki demann l’aide. L’objectif sa l’etude-la c’est pou aide sa bann inactif-la pou redeveloppe “l’amour ki [zot] ti ena au commencement.” (Rév. 2:1, 4) Sa bann proclamateur-la kapav fortifié la foi sa bann inactif-la kan zot guette bann kitsoz ki’nn examiné dan reunion ki bannla inn raté pendant ki zot pa ti dan congregation.
12 Si bann ancien demann ou pou etudié avek enn frere ou-soit enn soeur ki bizin l’aide lor plan spirituel, prié pou gagne direction Jéhovah ek pou Li beni ou bann zeffort. Oui, “mette tou seki [ou] faire dan la main Jéhovah Li-mem ek [ou] bann plan pou realisé.” (Prov. 16:3) Medite lor bann texte la Bible ek bann point ki ou pou kapav servi dan l’etude pou fortifié la foi sa chretien ki bizin enn l’aide spirituel-la. Reflechi lor bon l’exemple ki l’apotre Paul inn laissé. (Lire Romains 1:11, 12.) Paul ti envie trouve bann chretien ki ti reste Rome pou li kapav transmette zot certain don spirituel pou ki sa faire zot vinn ferme lor plan spirituel. Li ti attann aussi avek impatience ki ena enn l’echange encouragement entre zot. Eski nou aussi nou pa bizin ena sa mem l’attitude-la kan nou faire zeffort pou aide bann ki’nn eloigné ar troupeau Bondié?
13. Lor ki kitsoz nou kapav kozé avek enn inactif ?
13 Pendant l’etude, ou kapav demann sa chretien inactif-la: “Couma to’nn konn la verité?” Aide li pou rappel la joie ki li ti ena dan le passé kan li ti pé servi Jéhovah, encourage li pou koz lor bann bon l’experience ki li’nn gagné dan reunion, dan predication ek dan bann l’assemblée. Koz lor bann bon moment ki kitfois zot finn passé ensam dan service Jéhovah. Koz aussi lor la joie ki ou ena pou vinn proche ar Jéhovah. (Jacq. 4:8) Exprime ou reconnaissance pou fason ki Bondié prend nou soin couma so peuple—surtout kan Li donne nou l’encouragement ek l’esperance dan nou bann l’epreuve.—Rom. 15:4; 2 Cor. 1:3, 4.
14, 15. Ki bann benediction ki bann inactif ti gagné avant, li bon nou faire zot rappel?
14 Li possible aussi ki sa pou faire sa chretien inactif-la di-bien si ou faire li rappel enn parmi bann benediction ki li ti gagné kan li ti encore pé frequente congregation. Par exemple, li ti ena la joie pou gagne plus connaissance lor Parole Bondié ek lor So projet. (Prov. 4:18) Kan li ‘ti marche par l’esprit,’ surement sa ti pli facile pou li pou resisté kont bann tentation pou faire peché. (Gal. 5:22-26) Lerla, enn bon conscience ti permette li pou prié Jéhovah ek pou ena ‘la paix ki Bondié donné ek ki pli grand ki tou pensée, ki protege nou leker ek nou l’esprit.’ (Phil. 4:6, 7) Garde sa bann point-la dan ou l’esprit, montré enn l’interet sincere, ek surtout avek amour encourage ou frere ou-soit ou soeur spirituel pou li retourne dan troupeau Bondié.—Lire Philippiens 2:4.
15 Supposé ki ou enn ancien ki pé faire enn visite pastoral. Kitfois ou pé encourage enn couple ki’nn vinn inactif pou reflechi lor lepok kan zot ti fek konn la verité ki ena dan Parole Bondié. Surement lerla zot ti trouve la verité vrai-mem extraordinaire, raisonnable, sa ti donne zot satisfaction, ek zot ti liberé lor plan spirituel! (Jean 8:32) Zot ti extra reconnaissant pou seki zot ti pé aprann lor Jéhovah, lor so l’amour ek lor so bann grand projet! (Compare avek Luc 24:32.) Faire zot rappel ki bann chretien baptisé kapav ena bann relation bien proche avek Jéhovah ek privilege extraordinaire pou faire la priere. Encourage sincerement bann inactif pou accepté encore enn fois “sa bon nouvelle ki rempli ar la gloire ki concerne nou Bondié heureux[-la],” setadir Jéhovah.—1 Tim. 1:11.
Contigne montré l’amour envers zot
16. Cite enn l’exemple pou montré ki bann zeffort ki nou faire pou aide enn inactif lor plan spirituel zot vrai-mem marché.
16 Eski sa bann suggestion ki nou finn examiné-la vrai-mem marché? Oui. Par exemple, enn jeune ki ti vinn enn proclamateur l’age 12 an, ti vinn inactif kan li ti ena 15 an. Selman, plitar li ti revinn actif, ek sa faire plus ki 30 an ki li dan service a plein temps. Si li’nn revinn actif c’est surtout grace a l’aide ki enn ancien ti donne li. Li vrai-mem bien reconnaissant pou sa l’aide-la!
17, 18. Ki bann qualité ki pou necessaire kan ou pé aide enn kikenn ki’nn eloigné ar troupeau Bondié?
17 C’est l’amour ki pousse bann chretien pou aide bann inactif pou retourne dan congregation. Jésus ti dire so bann disciple: “Mo pé donne zot enn nouveau commandement: zot bizin content zot camarade. Pareil couma mo finn content zot, zot aussi, zot bizin content zot camarade. Par sa tou dimoune pou koné ki zot mo bann disciple, si zot ena l’amour entre zot.” (Jean 13:34, 35) Oui, c’est l’amour ki permette bann dimoune reconette kisannla ki bann vrai chretien. Eski nou pa bizin manifesté sa l’amour-la envers bann chretien baptisé ki kitfois inn vinn inactif ? Oui, nou bizin faire sa! Mais, kan nou aide bann inactif nou bizin manifesté lezot qualité spirituel aussi.
18 Si ou bizin aide enn kikenn ki’nn eloigné ar troupeau Bondié, ki bann qualité kitfois ou pou bizin manifesté? A part l’amour, ou pou bizin kitfois manifesté compassion, bonté, douceur ek patience. Dependant lor bann situation, li possible aussi ki ou pou bizin pardonné. Paul ti ecrire: “Mette lor zot enn grand compassion, bonté, l’humilité, douceur ek patience. Contigne supporte sakenn so camarade, ek si kikenn ena enn kitsoz kont enn lot, li bizin pardonne li avek tou so leker. Pareil couma Jéhovah inn pardonne zot avek tou so leker, faire pareil zot aussi. Mais, en plus, couvert-zot avek l’amour, parski li enn kitsoz parfait ki soude nou tou ensam.”—Col. 3:12-14.
19. Kifer li vaut la peine pou faire bann zeffort pou aide bann brebis pou retourne dan troupeau Bondié?
19 Dan prochain lartik, nou pou examine bann raison kifer certain eloigné ar troupeau Bondié. Nou pou trouvé aussi couma bann ki retourné kapav attann ki lezot chretien accueil zot. A mesure ki ou etudié sa prochain lartik-la ek reflechi lor seki ou’nn etudié asterla dan sa lartik-la, ou kapav sur ki n’importe ki zeffort ou faire pou aide bann brebis pou retourne vers troupeau Bondié, sa vaut la peine. Dan sa le monde-la, beaucoup dimoune passe tou zot la vie pou essaye vinn riche, mais enn la vie tousel ena beaucoup plus valeur ki tou l’argent ki ena dan sa le monde-la. Jésus ti montré sa dan l’exemple ki li ti donné lor enn mouton ki ti perdi. (Mat. 18:12-14) Rappel toujours sa point-la a mesure ki ou faire bann zeffort sincere sans tardé pou aide bann brebis ki ena valeur devant lizié Jéhovah ek ki’nn eloigné, pou zot retourne dan so troupeau.
Couma ou pou reponn?
• Ki responsabilité bann berger spirituel ena concernant bann brebis ki’nn eloigné ar troupeau Bondié?
• Couma ou kapav aide bann ki’nn arrete frequente congregation?
• Ki bann qualité ou pou bizin manifesté pou aide bann ki’nn eloigné ar troupeau Bondié?
[Zimage page 17]
Avek amour, bann berger spirituel faire zeffort pou aide bann ki’nn eloigné ar troupeau Bondié