Aide zot pou retourné sans tardé!
“Vers kisannla nou pou allé? C’est toi ki ena bann parole la vie eternel.”—JEAN 6:68.
1. Ki Pierre ti dire kan beaucoup disciple ti abandonne Jésus?
ENN fois, beaucoup disciple ki ti rejette enn parmi so bann l’enseignement, ti abandonne Jésus Christ. Lerla li ti demann so bann zapotre: “Eski zot envie allé zot aussi?” Pierre ti reponn: “Seigneur, vers kisannla nou pou allé? C’est toi ki ena bann parole la vie eternel.” (Jean 6:51-69) Pa ti ena okenn lezot place pou allé. Dan sa lepok-la, religion juif pa ti ena okenn “parole la vie eternel,” ek zordi nou pa trouve sa bann parole-la dan Babylone la Grande, l’empire mondial la fausse religion. Pou n’importe kisannla ki finn eloigné ar troupeau Bondié mais ki envie faire Jéhovah plaisir, “finn arrive ler pou zot levé dan zot sommeil” ek pou retourne dan troupeau Bondié.—Rom. 13:11.
2. Ki nou bizin rappel concernant bann kitsoz confidentiel ou-soit ki concerne enn comité judiciaire?
2 Jéhovah ti montré ki Li ti interessé ar bann brebis Israël ki ti’nn perdi. (Lire Ézékiel 34:15, 16.) Li pareil aussi zordi, bann ancien envie ek zot ena devoir pou aide bann brebis ki’nn eloigné ar troupeau Bondié. Si zot demann enn proclamateur pou etudié la Bible avek enn dimoune inactif ki’nn demann l’aide, ki proclamateur-la pou faire si li aprann ki sa dimoune-la inn faire enn peché grave? Au lieu ki li donne li bann conseil lor enn sujet ki concerne kitfois enn comité judiciaire, ou-soit ki confidentiel, proclamateur-la kapav dire li koz sa ar bann ancien. Si li pa faire sa, lerla proclamateur-la li-mem pou bizin faire bann ancien koné.—Lév. 5:1; Gal. 6:1.
3. Couma sa missié ki ti ena 100 mouton-la ti reagir kan li ti retrouve enn mouton ki ti’nn perdi?
3 Dan lartik avant, nou ti trouve l’exemple ki Jésus ti donné lor enn missié ki ti ena 100 mouton. Kan enn ladan ti perdi, missié-la ti quitte so 99 mouton pou al rod sa enn ki ti perdi-la. Missié-la ti vrai-mem content kan li ti retrouve li! (Luc 15:4-7) Nou aussi nou content kan enn inactif retourne dan troupeau Bondié. L’amour finn pousse bann ancien ek bann lezot membre congregation kitfois pou visite li. Zot aussi zot envie trouve sa dimoune-la retourne dan troupeau Bondié ek gagne so soutien, so protection ek so benediction. (Deut. 33:27; Ps. 91:14; Prov. 10:22) Si zot ena possibilité pou aide enn dimoune retourné, ki zot kapav faire?
4. Ki nou kapav comprend dan texte Galates 6:2, 5?
4 Pou encourage enn kikenn ki inactif retourné, kitfois zot kapav montré li avek amour ki Jéhovah content so bann brebis ek ki Li demann zot pou faire zis seki zot kapav, couma par exemple etudié la Bible, assisté reunion, ek preche la bonne nouvelle lor so Royaume. Li pou bon aussi ki zot lire Galates 6:2, 5 ek expliké ki bann chretien kapav aide sakenn zot camarade pou sarié zot fardeau, mais ki “sakenn pou sarié so prop charge,” setadir so bann responsabilité ki li ena devant Jéhovah. Personne pa kapav fidele envers Bondié dan nou place.
Eski zot inn eloigné a cause “bann tracas ki ena dan la vie”?
5, 6. (a) Kifer li important ki nou ecoute bien kan bann inactif devide zot leker? (b) Couma ou kapav aide bann inactif pou trouvé ki sa inn faire zot di-tort parski zot inn arrete frequente peuple Bondié?
5 Pou zot koné couma pou aide bann inactif, bann ancien ek lezot proclamateur ki mur bizin ecoute bien kan bannla devide zot leker. Supposé ki ou enn ancien ki pé visite enn couple ki pa vinn reunion parski “bann tracas ki ena dan la vie” inn faire zot vinn inactif. (Luc 21:34) Kitfois bann probleme l’argent ou-soit bann responsabilité familial ki finn augmenté inn faire zot tigit par tigit arrete zot bann l’activité spirituel. Li possible ki zot dire ou ki zot bizin faire enn pause. Mais ou kapav dire zot ki si zot reste dan zot coin zot tousel, sa pa pou aide zot. (Lire Proverbes 18:1.) Ou kapav aussi dire zot avek tact: “Eski zot pli heureux depuis ki zot inn arrete vinn reunion? Eski zot la vie famille pli heureux? Eski la joie Jéhovah li toujours zot forteresse?”—Neh. 8:10.
6 Si bann inactif reflechi lor sa bann question-la sa kapav aide zot pou trouvé ki, parski zot inn arrete frequente congregation, zot spiritualité ek zot la joie inn diminué. (Mat. 5:3; Héb. 10:24, 25) Ou kapav aussi aide zot pou reconette ki parski zot inn arrete preché, zot inn perdi zot la joie. (Mat. 28:19, 20) Alors, ki kitsoz sage zot kapav faire?
7. Ki nou kapav encourage bann ki’nn eloigné ar troupeau Bondié pou faire?
7 Jésus ti dire: “Faire attention ar zot-mem, pangar zot leker vinn lourd parski zot trop mangé ek boire, ek a cause bann tracas ki ena dan la vie . . . Alors, reste lor zot garde, suppliyé touletan pou ki zot reussi sapé ar tou sa bann kitsoz ki bizin arrivé-la.” (Luc 21:34-36) Ena certain ki finn eloigné ar troupeau Bondié mais ki envie regagne la joie ki zot ti ena avant. Nou kapav encourage zot pou prié pou gagne l’esprit saint ek l’aide Jéhovah ek pou agir en accord avek zot la priere.—Luc 11:13.
Eski enn dimoune ou-soit enn kitsoz inn faire zot tombé?
8, 9. Couma enn ancien kapav raisonne avek enn kikenn ki’nn tombé lor plan spirituel?
8 Parski bann dimoune zot imparfait, li arrivé ki ena bann conflit personnalité, ek sa kapav faire enn kikenn tombé lor plan spirituel. Certain finn tombé kan enn dimoune ki bien respecté dan congregation pa’nn agir en accord avek bann principe la Bible. Si enn inactif inn affecté a cause enn parmi sa bann kitsoz-la, sa ancien ki visite li-la kapav dire li ki Jéhovah Li, Li pa faire personne tombé. Alors, kifer enn kikenn bizin coupe tou relation avek Jéhovah ek avek So peuple? Au contraire, eski li pa bizin contigne servi Bondié ek ena confiance ki “Juge lor la terre entier” koné ki’nn arrivé ek ki Li pou reglé sa probleme-la couma bizin? (Gen. 18:25; Col. 3:23-25) Si enn dimoune sayé ek tombé vrai-mem, li pa pou’lé reste enba sans faire okenn zeffort pou levé.
9 Pou aide sa inactif-la lor plan spirituel, ancien-la kapav dire li aussi ki avek le temps, certain remarké ki zot nepli considere situation ki ti’nn faire zot tombé, aussi grave. En realité, li possible mem ki sa situation ki ti couma enn l’obstacle-la nepli existé. Si enn dimoune inn tombé lor plan spirituel parski li’nn gagne enn discipline, meditation ek la priere kapav aide li pou comprend ki li aussi li ti inpé en tort ek ki li pa ti bizin laisse sa discipline-la faire li tombé.—Ps. 119:165; Héb. 12:5-13.
Eski c’est enn l’enseignement biblik ki’nn faire zot tombé?
10, 11. Ki raisonnement nou kapav servi kan nou essaye aide enn kikenn ki pa comprend certain l’enseignement biblik couma nou?
10 Kitfois certain finn quitte troupeau Bondié parski zot pa ti d’accord avek certain l’enseignement biblik. Bann Israélite ki ti delivré dan l’esclavage en Égypte ‘ti blié seki Bondié ti faire’ pou zot ek “zot pa’nn attann so conseil.” (Ps. 106:13) Sa kapav faire sa inactif-la di-bien pou faire li rappel ki “l’esclave fidele et avisé” pé donne enn nourriture spirituel extra bon qualité. (Mat. 24:45) C’est coumsa ki li’nn konn la verité. Alors, kifer li pa decidé pou recommence marche dan la verité?—2 Jean 4.
11 Sa ancien ki pé faire zeffort pou aide enn dimoune ki finn eloigné ar troupeau Bondié-la kapav prend l’exemple bann disciple ki ti abandonne Jésus parski zot ti rejette enn parmi so bann l’enseignement. (Jean 6:53, 66) Kan zot ti coupe zot relation avek Christ ek avek so bann disciple fidele, zot ti perdi zot spiritualité ek zot la joie. Eski bann ki’nn arrete frequente congregation finn trouve enn lot place kot ena enn nourriture spirituel ki riche? Non, parski dan okenn lot place pena sa!
Eski zot inn faire enn peché grave?
12, 13. Si enn kikenn ki finn eloigné ar troupeau Bondié reconette ki li’nn faire enn peché grave, couma nou kapav aide li?
12 Certain arrete preché ek assisté reunion parski zot inn faire enn peché grave. Kitfois zot peur pangar si zot confesse zot peché ar bann ancien, zot pou exclu dan congregation. Mais si zot inn arrete faire sa peché-la ek zot repenti avek tou zot leker, zot pa pou exclu. (2 Cor. 7:10, 11) Au contraire, la congregation pou accueil zot ek bann ancien pou donne zot l’aide spirituel ki zot bizin.
13 Si ou enn proclamateur mur ek bann ancien inn demann ou pou aide enn inactif, ki ou pou faire si inactif-la dire ou ki li’nn faire enn peché grave? Couma nou ti dire la-haut, au lieu ki ou implik-ou plus dan sa zaffaire-la, encourage li pou al guette bann ancien. Si li pa envie, ou pou montré ki ou envie ki nom Jéhovah ek la congregation reste touletan pur kan ou agir en accord avek bann instruction biblik concernant sa zaffaire-la. (Lire Lévitique 5:1.) Bann ancien pou koné couma pou aide n’importe kisannla ki envie retourné ek ki envie vive en accord avek volonté Bondié. Kitfois sa dimoune-la pou bizin gagne enn certaine discipline avek amour. (Héb. 12:7-11) Si dimoune-la reconette ki li’nn faire peché kont Bondié, ki li’nn arrete faire sa peché-la, ek ki li vrai-mem repenti, bann ancien pou aide li, ek li pou kapav gagne pardon Jéhovah.—Is. 1:18; 55:7; Jacq. 5:13-16.
Ti ena la joie kan enn garson ti retourné
14. Dan ou prop mot, raconte l’exemple fils prodigue.
14 Kan enn kikenn pé aide enn brebis ki’nn eloigné ar troupeau Bondié, li kapav koz lor l’exemple ki Jésus ti donné ek ki trouve dan Luc 15:11-24. Dan sa parabole-la, enn jeune homme gaspille so l’heritage kan li amenn enn mauvais la vie. Mais finalement, li arrivé degoute sa mauvais la vie-la. So l’estomac vide, so famille mank li, alors li decide pou retourne so lakaz! Kan li encore loin, so papa trouve li, li galopé pou vinn joinde so garson, li tombe dan so le bras, ek embrasse li avek l’affection. Sa papa-la extra content! Kan enn inactif reflechi lor sa l’exemple-la, sa kapav pousse li pou retourne dan troupeau Bondié. Sa le monde-la pré pou detruire, alors li bizin ‘retourne lakaz’ sans tardé.
15. Kifer certain eloigné tigit par tigit ar congregation?
15 La plupart ki eloigné ar congregation zot pa allé pareil couma fils prodigue. Certain commence eloigné tigit par tigit, pareil couma enn bateau ki pa attaché ek ki commence eloigné doucement-doucement ar la terre. Ena lezot ki tellement abatte par bann probleme ki ena dan la vie ki zot neglige bann kitsoz spirituel. Ena lezot encore ki soké par l’attitude enn chretien, ou-soit ki quitte congregation parski zot pa d’accord avek enn certain l’enseignement biblik. Certain parmi inn eloigné parski zot inn ena enn conduite ki pa en accord avek la Bible. Selman, bann point ki finn presenté en rapport avek sakenn sa bann situation-la, kapav permette ou aide bann ki finn eloigné ar troupeau Bondié pou sa bann raison ki nou finn cité-la ou-soit pou lezot raison encore. Sa kapav aide zot pou retourné avant ki li trop tard.
“Bienvenue lakaz, mo garson!”
16-18. (a) Couma enn ancien inn aide enn frere ki ti inactif pendant plusieurs l’année? (b) Kifer sa frere-la ti vinn inactif, ki l’aide li ti gagné, ek ki l’accueil li ti gagné dan congregation?
16 Enn ancien dire: “College ancien dan nou congregation faire beaucoup zeffort pou visite bann inactif. Mo rappel enn frere avek ki mo ti faire l’etude ek mo ti faire li konn la verité. Li ti inactif pendant 25 an ek li ti pé passe par enn moment bien difficile. Alors, mo ti explik li couma si li mette en pratik bann principe la Bible, sa kapav aide li. Apré enn certain temps, li ti recommence vinn la Salle du Royaume ek ti accepté enn l’etude la Bible pou aide li vinn pli ferme dan so decision pou retourne dan troupeau Bondié.”
17 Kifer sa frere-la ti vinn inactif ? Li reconette: “Mo ti commence prend compte bann kitsoz dan le monde plus ki bann kitsoz spirituel. Lerla, mo ti arrete etudié, preché ek assisté reunion. Sans ki mo ti rann moi compte, mo ti’nn commence arrete frequente congregation. Mais l’interet personnel ek sincere ki sa ancien-la ti ena pou moi, ti aide moi pou retourné.” Probleme sa frere-la ti’nn commence diminué apré ki li ti accepté enn l’etude la Bible. Li dire: “Mo ti realisé ki seki ti manké dan mo la vie c’est l’amour ek direction Jéhovah ek so l’organisation.”
18 Ki l’accueil sa frere-la ti gagné dan congregation? Li dire: “Mo ti ena sentiment ki mo ti pareil couma fils prodigue ki Jésus Christ ti kozé. Par exemple, enn parmi bann soeur agé ki ti la ena 30 an ek ki encore toujours pé servi Jéhovah fidelement ti dire moi: ‘Bienvenue lakaz, mo garson!’ Sa ti bien touche mo leker. Mo ti realisé ki kan mo’nn retourne dan congregation, coumadir mo ti’nn retourne lakaz. Ek mo ti pou content dire ki quantité mo bien reconnaissant pou l’amour, l’affection, patience ek l’interet ki sa ancien-la ek zot tou dan congregation ti manifesté envers moi. Zot l’amour pou Jéhovah ek pou zot prochain inn vrai-mem aide moi pou retourne dan troupeau Bondié.”
Encourage zot pou agir sans tardé!
19, 20. Couma ou kapav encourage bann inactif pou retourne dan troupeau Bondié sans tardé, ek couma ou kapav montré zot ki Bondié pa attann ki nou donne Li plus ki seki nou kapav?
19 Nou pé vive dan dernier jour, ek la fin sa le monde-la pé kosté. Alors, encourage bann inactif pou assisté reunion. Encourage zot pou faire sa desuite. Faire zot rappel ki Satan pé essaye detruire zot relation avek Bondié, ek li pé faire zot croire ki zot pou soulagé ar bann probleme ki zot gagné dan zot la vie si zot abandonne vrai l’adoration. Ou kapav donne zot l’assurance ki c’est zis kan zot suive Jésus avek fidelité ki zot pou kapav gagne enn vrai reconfort dan zot la vie.—Lire Matthieu 11:28-30.
20 Rappel bann inactif ki Bondié attann ki nou faire seki nou kapav. Kan certain ti critik Marie, soeur Lazare, parski li ti verse enn de l’huile ki ti coute bien cher lor la tête Jésus, Jésus ti dire: “Laisse li trankil. . . . Li’nn faire seki li’nn kapav.” (Marc 14:6-8) Jésus ti loué enn veuve ki ti misere ki ti faire zis enn ti contribution dan temple. Li aussi li ti faire seki li ti kapav. (Luc 21:1-4) La plupart parmi nou kapav assisté reunion ek participe dan predication. Avek l’aide Jéhovah, beaucoup parmi bann ki inactif zordi pou kapav faire pareil zot aussi.
21, 22. Ki l’assurance ou kapav donne bann ki retourne vers Jéhovah?
21 Si enn brebis ki finn eloigné ar congregation peur pou faire face ar bann lezot membre congregation, ou kapav rappel li la joie ki ti ena kan fils prodigue ti retourne kot li. Ena mem la joie kan bann inactif retourne dan congregation. Encourage zot pou agir asterla-mem pou oppose-zot ar Satan le Diable ek pou vinn proche ar Bondié.—Jacq. 4:7, 8.
22 Bann ki retourne vers Jéhovah kapav attann pou gagne enn bon l’accueil dan congregation. (Lam. 3:40) Surement sa bann inactif-la ti ena enn grand la joie kan zot ti pé servi Bondié dan le passé. Dan l’avenir ena beaucoup lezot benediction ki pé attann bann ki retourne dan troupeau Bondié sans tardé!
Couma ou pou reponn?
• Couma ou kapav aide enn chretien ki finn tombé ek ki’nn vinn inactif ?
• Ki raisonnement kapav aide enn kikenn ki finn quitte troupeau Bondié parski li ena enn l’opinion different lor enn l’enseignement biblik?
• Couma ou kapav aide enn kikenn ki hesité pou retourne dan congregation?
[Zimage page 23]
Kan zot reflechi lor l’exemple fils prodigue, sa kapav pousse certain inactif pou retourne dan troupeau Bondié