Pa blié bann ki inactif
1. Kifer nou bizin faire kitsoz pou encourage bann ki’nn vinn inactif?
1 Eski ou konn enn kikenn ki’nn vinn inactif? Kitfois sa dimoune-la inn arrete assisté bann reunion ek li’nn refroidi. Li possible ki ou’nn joinde enn inactif kan ou pé preché porte-en-porte. Fodé pa nou blié ki sa dimoune-la encore toujours nou frere spirituel. Nou envie montré ki nou encore content li ek ki nou envie aide li pou retourne dan la congregation ek vers ‘berger ek surveillant nou nâme.’—1 Pierre 2:25.
2. Couma nou kapav encourage enn dimoune inactif?
2 Montré ki ou interessé avek zot: Enn ti coute telephone ou-soit enn ti visite kapav donne enn dimoune ki’nn vinn inactif l’assurance ki nou pa finn blié li. Ki nou kapav dire? Nou kapav encourage li zis si nou faire li koné ki nou ti pé pense li. Garde nou conversation positif ek encourageant. (Phil. 4:8) Nou kapav mentionne enn point ki nou’nn apprecié dan enn dernier reunion. Nou kapav aussi invite li pou enn prochain reunion ou-soit l’assemblée ek offert pou garde so place ou-soit pou passe prend li.
3. Couma eski enn soeur ti ré-vinn actif?
3 Kan li ti pé preché dan so territoire, enn proclamatrice ti joinde enn soeur ki ti’nn inactif pendant plus ki 20 an. Mem si sa soeur-la pa ti disposé pou accepté enn l’etude, sa proclamatrice-la ti contigne visite li ek ti amenn bann nouveau periodik pou li. Apré l’assemblée district, proclamatrice-la ti partage avek sa soeur inactif-la certain point interessant ki ti mentionné dan l’assemblée. Finalement sa soeur-la ti ré-vinn actif.
4. Couma eski nou bizin traite enn dimoune inactif ki recommence assisté reunion?
4 Kan enn dimoune retourné: Kan enn dimoune inactif recommence assisté reunion, couma eski nou bizin traite li? Eh bien, couma eski Jésus ti traite so bann disciple apré ki zot ti’nn abandonne li pou inpé lé-temps? Li ti appel zot so “bann frere” ek li ti montré ki li ti ena confiance dan zot. Li ti mem donne zot enn mission important. (Mat. 28:10, 18, 19) Enn tipé apré sa, zot ti actif dan predication la bonne nouvelle, zot ti pé preché “sans arreté.”—Actes 5:42.
5. Dan ki circonstance nou bizin koz avek bann ancien concernant enn dimoune inactif?
5 Avant ki nou propose l’etude enn dimoune ki’nn vinn inactif ou-soit avant nou invite enn kikenn ki’nn vinn inactif pendant longtemps, pou accompagne nou dan predication, nou bizin rod conseil avek bann ancien. Si nou joinde enn kikenn ki inactif dan nou territoire, nou bizin faire bann ancien koné pou ki zot kapav offert li l’aide ki necessaire.
6. Ki la joie nou kapav gagné kan nou aide bann ki inactif?
6 La Bible montré nou bien clair ki zis bann ki termine zot lé-course ki pou sapé. (Mat. 24:13) Alors, prend compte bann ki kitfois finn tombé ou-soit finn refroidi. Kan nou montré enn l’interet sincere pou zot, nou reflete l’amour ki Jéhovah ena. Si nou faire sa, nou pou gagne la joie pou trouve zot reprend zot service sacré ensam avek nou.—Luc 15:4-10.