Couma nou kapav aide bann ki assisté Mémorial?
1. Ki grand temoignage pou donné le 22 mars 2008?
1 Le 22 mars 2008, plusieurs million dimoune lor la terre pou gagne enn grand temoignage. Bann ki pou assisté Mémorial pou tann koz lor sa grand l’amour ki Jéhovah inn manifesté kan Li’nn donne enn ranson pou l’humanité. (Jean 3:16) Zot pou aprann lor Royaume Bondié ek couma Jéhovah pou servi sa pou accompli so volonté pou la terre entier. (Mat. 6:9, 10) Par zot-mem zot pou trouve l’amour ek l’unité peuple Bondié ek zot pou konn sa l’hospitalité ki nou ena-la.—Ps. 133:1.
2. Couma nou kapav aide bann etudiant la Bible ki vinn Mémorial?
2 Bann etudiant: Dan l’assistance pou ena certain ki’nn fek commence etudié la Bible avek nou. Presente zot avek bann frere ek soeur. Donne zot enn ti l’explication lor bann reunion ki ena chaque semaine, ek faire zot faire enn ti visite dan la Salle du Royaume. Pendant so discours, l’orateur pou encourage sa bann dimoune-la pou contigne faire bann progré spirituel. Ou kapav servi so bann commentaire pou encourage ou bann etudiant.
3. Ki nou kapav faire pou encourage bann proclamateur inactif ki vinn Mémorial?
3 Bann inactif: Parmi bann ki pou vini, pou ena bann proclamateur inactif. Prend l’initiative pou accueillir zot avek amour. Evite pose bann question personnel ou-soit dire bann kitsoz ki kapav embarrasse zot. Enn tipé apré Mémorial, bann ancien bizin visite bann inactif ki’nn vinn Mémorial pou felicite zot pou zeffort ki zot finn faire pou vini, ek pou invite zot avek amour pou vinn prochain reunion.
4. Couma sakenn parmi nou kapav aide bann visiteur?
4 Bann visiteur: Certain parmi bann ki vini kapav bann dimoune ki nou koné ou-soit bann membre nou famille ki nou finn invité personnellement. Lezot kapav finn gagne invitation pendant campagne. Si ou trouve bann dimoune ki ou pa koné, prend l’initiative pou presente ou-mem ek souhaite zot la bienvenue. Kitfois jamais zot pa finn assisté enn nou bann reunion avant. Kan ou koz ar zot ou pou kapav koné couma pou joinde zot. Grace a enn visite ou-soit par enn ti coute telephone deux-trois jour apré Mémorial, ou pou kapav essaye encourage dimoune-la pou aprann plus, ek pou offert li enn l’etude la Bible.
5. Ki kitsoz nou kapav dire pou commence enn l’etude la Bible?
5 Ou kapav servi seki pou dire dan discours Mémorial pou presente livre Ki la Bible enseigné? dan enn nouvelle visite. Par exemple, l’orateur ki pou faire discours Mémorial pou lire Isaïe 65:21-23. Kan ou faire visite, ou kapav koz lor discours-la ek ou kapav dire: “Laisse mo montré ou bann lezot benediction ki ou kapav gagné grace a la ranson.” Apré sa, montré page 4-5 dan livre Ki la Bible enseigné? Ou-soit ou kapav dire: “Beaucoup demann-zot kan zot pou trouve prophetie Isaïe realisé.” Apré, lire paragraphe 1-3 dan chapitre 9. Enn lot fason pou offert enn l’etude la Bible, c’est pou mentionne seki l’orateur finn dire dan so discours, apré presente livre Ki la Bible enseigné? ek montré couma enn l’etude deroulé.
6. Ki bann l’occasion nou ena pendant ki nou obeir commandement Jésus pou commemore so la-mort?
6 Anou rod tou bann l’occasion pou aide bann etudiant la Bible, bann proclamateur inactif, ek bann visiteur ki pou assisté Mémorial. (Luc 22:19) Pena doute ki Jéhovah pou beni nou alors ki nou augmente nou service pou Royaume Bondié.