“Contigne faire sa en mo memoire”
Nou pou commemore la mort Jésus Christ le 2 avril
1. Kifer le 2 avril 2007, li enn date important?
1 Le 2 avril 2007, bann million dimoune dan le monde entier pou rassemblé pou commemore la mort Jésus kan li ti offert so la-vie en sacrifice. Jésus ti mort parski li ti soutenir souveraineté so Papa ki dan le ciel. Kan li ti faire sa, li ti prouvé ki Satan le Diable ti enn menteur kan li ti dire ki bann dimoune servi Bondié zis par l’interet. (Job 2:1-5) Repas nou Seigneur rappel nou aussi ki, par so la-mort en tant ki enn humain parfait ek sans peché, Jésus inn “donne so la-vie couma enn ranson en echange pou beaucoup.” (Mat. 20:28) A cause sa, Jésus ti donne sa l’ordre-la so bann disciple: “Contigne faire sa en mo memoire.” (Luc 22:19) Oui, Bondié inn donne nou enn cadeau ki ena beaucoup valeur. Eski ou reconnaissance pou sa cadeau-la, inn pousse ou pou commence faire bann preparation pou commemore sa pli grand preuve l’amour-la?—Jean 3:16.
2. Couma nou kapav prepare nou leker pou Mémorial?
2 Prepare ou leker: Si nou reflechi lor bann l’evenement ki ti passé pendant bann dernier jour ki Jésus ti vive lor la terre, sa pou permette nou prepare nou leker pou celebré sa Mémorial-la. (Ezra 7:10) Pou aide nou dan sa domaine-la, enn program lecture la Bible special inn prevoir dan brochure Anou examine la Bible toulé-jour—2007 ek dan Calendrier 2007. Sa program lecture-la, li suive bien bann l’evenement ki ti arrivé dé-trois jour avant la mort Jésus. Dapré calendrier ki nou servi zordi, sa bann portion la Bible ki nou pou lire chaque jour-la corresponn avek jour kot sa bann l’evenement-la finn arrivé. Bann jour ek date ki ena dan bann recit la Bible zot basé lor calendrié juif, ki ti compte enn jour a partir enn coucher soleil ziska coucher soleil lendemain. Nou’nn prend en consideration sa difference-la kan nou’nn prevoir lecture la Bible pou Mémorial. Si nou ré-guette sa bann recit biblik-la dan nou lecture la Bible ek si nou medite dan la priere ki quantité l’amour Bondié li profond, nou pou kapav tire maximum profit ar Mémorial.
3. Couma nou kapav aide bann nouveau ki’nn vinn assisté Mémorial pou premier fois ek bann ki’nn vinn inactif pou tire profit ar sa l’evenement-la?
3 Invite lezot pou assisté Mémorial: Supplement Ministère du Royaume février ti annonce enn campagne special pou invite bann dimoune pou sa l’evenement important-la. Eski ou’nn organise-ou pou participe autant ki ou kapav dan sa campagne-la? Eski ou’nn faire enn la-liste bann dimoune ki ou envie invité, ek eski ou’nn fini commence contacté zot? Prend bann disposition pou vinn Mémorial assez boner pou ki ou kapav accueillir bann dimoune ki vini pou premier fois, surtout bann ki ou finn invité. Kitfois ou pou envie assize pré kot zot, ek faire sur ki zot ena enn la-bible ek enn cantik. Faire zot faire connaissance lezot membre dan congregation. Apré Mémorial, prend le temps pou reponn zot bann question. Invite zot pou assisté discours special ki pou ena le 15 avril. Bann ancien surtout pou faire sur ki bann inactif ki nepli associé avek la congregation, gagne enn l’invitation pou Mémorial ek discours special.
4. Couma nou kapav aide bann dimoune pou contigne faire bann progré spirituel apré Mémorial?
4 Aide bann ki vini pou premier fois ek bann inactif pou progressé: Frere ki faire discours pou Mémorial pou explik, sans rente dan trop detail, ki nou offert bann l’etude la Bible gratis, ek li pou encourage bann ki assisté Mémorial pou premier fois pou contigne aprann lor Jéhovah. Ou kapav servi bann parole ki li dire couma enn base pou offert plus l’aide spirituel bann dimoune ki ou’nn invité. Si zot pa pé etudié, faire tou seki ou kapav pou visite zot pli vite possible apré Mémorial ek montré zot couma enn l’etude la Bible deroulé. Pou ki zot kapav progressé lor plan spirituel, zot pou bizin aussi assisté bann reunion congregation. (Héb. 10:24, 25) Alors, encourage zot pou commence assisté bann reunion regulierement. Bann ancien bizin faire bann l’arrangement pou visite bann inactif ki’nn assisté Mémorial ek pou encourage zot pou reflechi plus lor bann pensée ki ti presenté pendant discours. Sa kapav encourage zot pou reprend zot bann activité dan congregation.
5. Kan nou medite lor Mémorial, ki l’effet sa kapav ena lor nou?
5 Mémorial li donne nou enn l’occasion pou medite bien lor seki Jéhovah ek Jésus finn faire pou nou. Sa meditation-la augmente nou l’amour pou zot ek li ena enn l’influence lor nou conduite. (2 Cor. 5:14, 15; 1 Jean 4:11) Inn arrive l’heure pou commence prepare nou-mem ek bann ki interessé pou sa l’evenement important kot nou ‘proclame la mort nou Seigneur.’—1 Cor. 11:26.