Jésus—Enn modele parfait pou suive

ESKI ou ti pou content vinn pli bon ek vive pli heureux? L’apotre Pierre explik nou couma nou kapav faire sa. Li dire: “Christ . . . finn souffert pou zot, ek li finn laisse enn modele pou zot, pou ki zot suive bien so trace.” (1 Pierre 2:21) Oui, nou kapav aprann beaucoup ar Jésus, parski li ti amenn enn la vie extraordinaire. Kan nou aprann konn Jésus ek nou suive so l’exemple, nou pou kapav vinn pli bon ek vive pli heureux. Anou examine pli bien certain bann qualité ki sa grand personnage-la ti ena ek guetté couma nou kapav tire profit ar so l’exemple.

Jésus ti amenn enn la vie equilibré. Mem si Jésus ti dire ki li pena “okenn place pou pose so la tête,” li pa ti prive-li net ni li pa ti encourage lezot pou faire pareil. (Matthieu 8:20) Jésus ti assisté bann banquet. (Luc 5:29) Premier mirak ki li ti faire ki la Bible raconté—li ti change de l’eau en enn bon di-vin dan enn mariage—montré ki li pa ti enn dimoune ki pa ti content frequente lezot ou-soit ki ti prive li-net. (Jean 2:1-11) Mais Jésus ti dire dan enn fason bien clair seki ti pli important pou li. Li ti dire: “Faire volonté Celui ki’nn envoye moi ek fini so travail, c’est coumadir enn mangé pou moi.”—Jean 4:34.

□ Eski ou’nn examine ou la vie pou guetté couma ou kapav trouve enn l’equilibre entre bann l’objectif materialiste ek spirituel?

Jésus ti abordable. La Bible presente Jésus couma enn kikenn ki ti amical ek abordable. Li pa ti en colere kan bann dimoune ti vinn guette li avek bann probleme ou-soit bann question ki difficile. Enn fois kan enn la foule ti pé entoure li, enn madame ki ti malade depuis douze an ti touche so linge. Sa madame-la ti pé atann pou gagne enn soulagement. Jésus pa ti repousse li parski li ti’nn faire enn kitsoz ki lezot ti pensé li pa gagne droit faire. Jésus ti dire li avek bonté: “Mo tifi, to la foi finn gueri toi.” (Marc 5:25-34) Bann zenfant aussi ti senti-zot a l’aise avek Jésus; zot pa ti peur ki Jésus ti pou ignore zot. (Marc 10:13-16) Li ti ena bann conversation bien franc ek amical avek so bann disciple. Zot pa ti hesité pou vinn proche ar li.—Marc 6:30-32.

□ Eski lezot kapav aborde ou facilement pou koz avek ou?

Li ti enn kikenn ki ti bien comprend la peine lezot ek li ti ena compassion. Enn parmi bann grand qualité ki Jésus ti ena c’est so capacité pou ressenti la peine ki lezot ena ek pou aide zot. L’apotre Jean raconté seki ti arrivé kan Jésus ti trouve Marie pé ploré a cause so frere Lazare ti mort. Jésus “ti pousse enn soupir en li-mem ek li ti troublé” ek li “pa ti kapav tini, so larme ti coulé.” Bann dimoune ki ti pé observé ti kapav trouvé facilement ki quantité l’affection Jésus ti ena pou sa famille-la, enn l’affection ki li pa ti honté pou montré en publik. Ek li ti montré ki quantité compassion li ti ena, kan li ti ressuscite so camarade!—Jean 11:33-44.

Dan enn lot l’occasion, enn missié ki ti gagne la lepre—enn maladie degoutant ki ti oblige li reste separé ar lezot—ti suppliye Jésus: “Seigneur, si vrai-mem to envie, to kapav faire moi vinn pur.” Reaction ki Jésus ti ena ti bien touchant: “Li ti envoye so la main, li ti touche li, ek li ti dire: ‘Mo envie. Vinn pur.’ ” (Matthieu 8:2, 3) Jésus pa ti gueri bann dimoune zis pou realise bann prophetie. Li ti envie souye bann larme dan zot lizié. Dan tou seki li ti faire, li ti laisse-li guidé par sa bann parole ki bann dimoune bien rappel-la: “Pareil couma zot envie bann dimoune faire pou zot, zot aussi faire pareil pou bannla.”—Luc 6:31.

□ Eski ou montré par ou bann action ki ou ena compassion pou bann dimoune ki dan bann situation difficile?

Jésus ti comprend lezot ek li ti ena enn bon jugement. Mem si jamais li pa’nn faire okenn peché, Jésus pa ti attann ki lezot bizin parfait ek jamais li ti montré ki li pli superieur ki lezot. Li pa ti agir sans ki li comprend bien enn situation. Enn fois, enn madame “ki bann dimoune dan la ville ti koné couma enn dimoune ki ti faire peché” ti montré so la foi ek so reconnaissance kan li ti lave lipié Jésus avek so bann larme. Jésus ti laisse li faire sa, seki ti etonne sa kikenn ki ti organise sa repas-la ek ki ti juge sa madame-la dan enn fason bien dur. Jésus pa ti condamne sa madame-la pou so bann peché parski li ti comprend ki li ti sincere. Li ti dire plutot: “To la foi finn sauve toi; retourne en paix.” Fason ki Jésus ti reagir envers li ti surement pousse sa madame-la pou abandonne so ancien fason vive.—Luc 7:37-50.

□ Eski bann dimoune konn ou couma enn kikenn ki pa hesité pou felicite lezot ek ki pa condamne desuite lezot?

Li pa ti faire preference ek li ti ena respé pou lezot. Kitfois parski zot ti ena bann personnalité ki ti al bien ensam ek ki kitfois zot ti famille, Jésus ti ena enn l’affection special pou so disciple Jean.a Mais, li pa ti faire okenn preference pou li ou-soit li ti donne li plus faveur ki lezot disciple. (Jean 13:23) Avredir, kan Jean ek so frere Jacques ti demann Jésus pou gagne bann meilleur place dan Royaume Bondié, Jésus ti dire: “C’est pa moi ki decidé kisannla pou assize dan mo coté gauche ou-soit dan mo coté droite.”—Marc 10:35-40.

Jésus ti toujours ena respé pou lezot. Kan li ti lor la terre li pa ti ena bann prejugé lor lezot, pareil couma bann dimoune ki ti vive dan so lepok ek ki, en general ti considere bann madame couma pli inferieur ki bann zom. Pourtant, Jésus ti donne bann madame dignité ki zot merité. Par exemple, premier fois ki li ti presente-li couma Messie, li ti faire sa avek enn madame, pa enn Juive mais enn Samaritaine, ki bann Juif en general ti meprisé. (Jean 4:7-26) Ek c’est ar bann madame ki Jésus ti apparette en premier apré so resurrection. Oui, li’nn faire zot sa l’honneur-la!—Matthieu 28:9, 10.

□ Eski ou montré ki ou pa faire preference dan ou bann rapport avek bann dimoune enn lot race, sexe, langue, ou-soit nationalité?

Jésus ti bien rempli so role en tant ki garson ek frere. Apparemment Joseph, papa adoptif Jésus, ti mort kan Jésus ti encore jeune. Kitfois Jésus ti travail couma charpentier pou donne so mama ek so bann frere ek soeur ki ti pli tipti, tou seki zot bizin. (Marc 6:3) Dan bann dernier moment so la vie, Jésus ti confié so disciple Jean responsabilité pou occupe so mama.—Jean 19:26, 27.

□ Eski ou kapav imite Jésus kan ou occupe ou bann responsabilité familial pareil couma li ti faire?

Jésus ti enn vrai camarade. Jésus ti enn camarade extraordinaire. Couma? Li pa ti rejette so bann camarade zis a cause bannla ti faire bann erreur, kitfois mem plusieurs fois zot finn faire mem erreur. So bann disciple pa ti touletan faire seki li ti envie zot faire. Mais li ti montré ki li ti zot camarade kan li ti concentré lor zot bann bon qualité plutot ki li doute zot bann mobile. (Marc 9:33-35; Luc 22:24-27) Jésus pa ti force so bann disciple pou pense pareil couma li, mais li ti invite zot pou senti-zot libre pou dire seki zot pensé.—Matthieu 16:13-15.

Mais surtout, Jésus ti content so bann camarade. (Jean 13:1) Ziska ki point? Li ti dire: “Personne pena enn pli grand l’amour ki sa: ki enn kikenn donne so nâme pou so bann camarade.” (Jean 15:13) Eski enn kikenn kapav donne so bann camarade enn kitsoz ki ena beaucoup plus valeur ki so prop la vie?

□ Eski ou reste enn camarade mem kan lezot faire ou en colere ou-soit offense ou?

Li ti ena courage ek li ti agir couma enn zom. Jésus pa ti pareil ditou ar fason ki certain artiste represente li, setadir enn kikenn ki frele-frele ki zis accepté tou kitsoz sans dire nanyin. Bann Evangile presente li couma enn zom fort rempli ar l’energie. Deux fois, Jésus ti pousse bann marchand, avek zot bann marchandise, en dehors temple. (Marc 11:15-17; Jean 2:14-17) Kan enn la foule ti vinn arrete “Jésus ki sorti Nazareth,” avek courage li ti avancé pou faire bannla koné kisannla li été ek pou protege so bann disciple. Li ti dire dan enn ton ferme: “Mo-mem sa. Alors, si c’est moi ki zot pé rodé, laisse sa bannla allé.” (Jean 18:4-9) Li pa etonnant ki kan Ponce Pilate ti trouve courage ki Jésus ti ena mem kan ti’nn arrete li ek ti pé maltraite li, Pilate ti dire: “Guetté! Ala zom-la!”—Jean 19:4, 5.

□ Eski ou agir avek determination ek courage kan ou trouvé ki ou bizin faire?

C’est sa bann qualité extraordinaire-la ek lezot encore ki faire ki Jésus li enn modele parfait pou nou. Si nou laisse so conduite ena enn l’influence lor nou, nou pou vinn bann dimoune ki pli bon ek pli heureux. A cause sa-mem l’apotre Pierre ti encourage bann chretien pou suive bien bann trace Jésus. Eski ou essaye suive bien bann trace Jésus pli bien ki ou kapav?

Li plus ki enn modele pou nou suive

Mais, Jésus ti plus ki enn modele pou nou suive. Li ti dire: “Mo-mem chemin, ek la verité ek la vie. Personne pa kapav vinn vers mo Papa sans passe par moi.” (Jean 14:6) Jésus inn faire nou konn la verité lor Bondié, seki finn donne nou possibilité pou vinn proche ar Li. Mais en plus, li finn aussi donne bann ki fidele enn moyen pou gagne la vie pou touletan.—Jean 3:16.

Concernant raison pou kifer li ti vinn lor la terre, Jésus ti dire: “Fils de l’homme inn vini, pa pou faire lezot servi li, mais pou li servi lezot ek pou donne so la vie couma enn ranson en echange pou beaucoup.” (Matthieu 20:28) Kan Jésus finn donne so la vie en sacrifice, li’nn pose fondation pou ki bann dimoune kapav gagne la vie pou touletan. Ki sakenn parmi nou bizin faire pou profite sa disposition-la? Jésus ti dire: “Sa-mem ki vedir la vie eternel: zot bizin aprann konn toi, sel vrai Bondié, ek celui ki to finn envoyé, Jésus Christ.”—Jean 17:3.

Oui, aprann konn Jésus, imite so fason vive, ek ena la foi dan so sacrifice, c’est bann condition ki necessaire pou gagne la vie pou touletan. Nou encourage ou pou etudié la Bible, ki donne sa connaissance-la, ek pou faire tou pou mette en pratik seki ou aprann, pareil couma Jésus ti faire.b

La vie Jésus ki enn bon l’exemple pou nou, enseigne nou ki qualité dimoune nou bizin été. So la vie ki li finn donne en sacrifice kapav libere nou ar peché ek ar so salaire, setadir la mort. (Romains 6:23) Sans sa grand l’influence ki Jésus ena-la, nou ti pou dan enn situation bien triste! Jamais pa laisse bann lezot kitsoz ek bann tracas ki ena dan la vie empeche ou pou examine ek suive bien l’exemple sa pli grand dimoune ki finn vive-la—Jésus Christ.

[Note]

[L’encadré lor page 7]

◼ Jésus pa ti faire preference ek li ti ena respé pou lezot

◼ Li ti enn vrai camarade ziska la fin

◼ Li ti ena courage

Eski ou essaye suive bann trace Jésus pli bien ki ou kapav?

[Zimage lor page 5]

Jésus ti amenn enn la vie equilibré . . .

abordable . . .

ti ena compassion