Kifer nou bizin suive “Christ”?
“Si kikenn envie suive moi, li bizin arrete vive pou li-mem . . . ek contigne suive moi.”—LUC 9:23.
1, 2. Kifer li important ki nou examine bann raison ki pousse nou pou suive “Christ”?
KI QUANTITÉ Jéhovah surement content kan Li trouve zot, bann nouveau ek zot, bann jeune parmi la foule so bann adorateur lor la terre! Pendant ki ou pé contigne etudié la Bible, assisté reunion regulierement ek augmente ou connaissance lor la verité biblik ki kapav sauve la vie, ou bizin prend compte sa l’invitation ki Jésus ti faire-la: “Si kikenn envie suive moi, li bizin arrete vive pou li-mem ek li prend so poteau souffrance jour apré jour ek contigne suive moi.” (Luc 9:23) Par sa bann parole-la, Jésus pé dire ki arrete vive pou ou-mem ek vinn so disciple c’est enn decision ki ou pou bizin prend. Alors, li important ki nou examiné pou ki raison nou bizin suive “Christ.”—Mat. 16:13-16.
2 Ki nou kapav dire lor certain parmi nou ki pé deja suive trace Jésus Christ? La Bible encourage nou pou “contigne faire li encore plus.” (1 Thess. 4:1, 2) Ki nou fek vinn dan la verité ou-soit depuis longtemps nou pé servi Jéhovah, kan nou reflechi lor bann raison ki nou ena pou suive Christ sa pou aide nou pou mette en pratik conseil ki Paul ti donné ek pou suive Christ encore plus dan nou la vie toulé-jour. Anou examine cinq raison kifer nou pou envie suive Christ.
Pou vinn pli proche ar Jéhovah
3. Cite deux fason couma nou kapav aprann konn Jéhovah.
3 Kan l’apotre Paul ti ‘debouté au milieu l’Aréopage’ pou koz ar bann Athénien, li ti dire: “[Bondié] finn etabli bann le temps fixé ek bann limite fixe kot bann dimoune pou resté, pou ki bannla rod Bondié, ek si zot arrivé tat-taté ek vrai-mem zot trouve Li, parski en realité, Li pa loin ar sakenn parmi nou.” (Actes 17:22, 26, 27) Nou kapav rod Bondié ek trouve Li vrai-mem. Par exemple, kan nou guette creation nou trouve bien bann qualité ek bann capacité ki Bondié ena. Kan nou prend le temps pou medite lor la creation, nou connaissance lor nou Createur augmente encore plus. (Rom. 1:20) Jéhovah inn aussi faire nou konn bann detail lor Li-mem dan la Bible, so Parole ki Li’nn faire ecrire. (2 Tim. 3:16, 17) Plus nou ‘medite lor tou so bann action’ ek ‘interesse-nou ar fason ki Li agir,’ plus nou kapav konn Jéhovah.—Ps. 77:12.
4. Couma kan nou suive Christ sa kapav aide nou pou vinn pli proche avek Jéhovah?
4 Enn bon fason ki nou kapav vinn encore pli proche ar Jéhovah c’est kan nou suive Christ. Mazinn enn coup la gloire ki Jésus ti ena kan li ti kot so Papa “avant ki le monde ti existé”! (Jean 17:5) Li-mem “commencement creation Bondié.” (Rév. 3:14) En tant ki “premier-né dan tou creation,” li’nn vive beaucoup le temps avek so Papa, Jéhovah. Pendant so la vie dan le ciel, Jésus pa ti zis passe le temps avek so Papa. Li ti compagnon personnel Bondié, li ti travail dan la joie ensam avek Bondié Tout-Puissant, ek pena personne ki pli proche avek Bondié ki Jésus. Jésus pa ti zis observe fason ki so Papa ti agir, ek prend compte So bann sentiment ek so bann qualité, mais li ti aussi absorbe ek mette en pratik tou seki li ti aprann ar so Papa. A cause sa, sa Garson obeissant-la ti vinn pareil couma so Papa—li ti tellement ressemblé so Papa ki la Bible decrire li couma “reflet Bondié ki invisible.” (Col. 1:15) Si nou suive Christ de pré, nou kapav ena bann relation pli proche avek Jéhovah.
Pou nou imite Jéhovah pli bien
5. Ki pou aide nou pou imite Jéhovah pli bien, ek kifer?
5 Nou finn ‘faire dan ressemblance Bondié,’ alors nou ena capacité pou reflete so bann qualité. (Gen. 1:26) L’apotre Paul ti encourage bann chretien pou “imite Bondié couma bann zenfant ki Li bien content.” (Éph. 5:1) Kan nou suive Christ, sa aide nou pou imite nou Papa ki dan le ciel, parski personne pa finn reflete pensée Bondié, so bann sentiment, so personnalité ek finn enseigne nou lor Li, pli bien ki Jésus. Kan Jésus ti lor la terre, li pa ti zis faire konn nom Jéhovah. Mais, li ti aussi faire konn personnalité sa Kikenn ki ena sa nom-la. (Lire Matthieu 11:27.) Jésus ti faire sa par so parole ek so action, par so l’enseignement ek so l’exemple.
6. Ki bann l’enseignement Jésus faire nou koné lor Jéhovah?
6 Par so l’enseignement, Jésus ti enseigne nou seki Bondié demann nou ek seki Li pensé lor so bann serviteur. (Mat. 22:36-40; Luc 12:6, 7; 15:4-7) Par exemple, apré ki li ti cite enn parmi les Dix Commandement—“fodé pa to commette l’adultere”—Jésus ti expliké couma Bondié considere seki passé dan leker enn dimoune bien avant ki li commette sa qualité action-la. Li ti dire: “Enn dimoune ki contigne guette enn femme ziska ki sa faire li gagne enn desir pou li, finn fini commette l’adultere avek li dan so leker.” (Ex. 20:14; Mat. 5:27, 28) Apré ki li ti dire couma bann Pharisien ti interprete enn parmi bann la Loi—“to bizin content to prochain ek ena la haine pou to l’ennemi”—Jésus ti faire nou koné seki Jéhovah pensé, li ti dire: “Contigne content zot bann l’ennemi ek prié pou bann ki persecute zot.” (Mat. 5:43, 44; Ex. 23:4; Lév. 19:18) Kan nou comprend bien fason ki Bondié pensé ek so sentiment ek seki Li demann nou, sa aide nou pou imite Li pli bien.
7, 8. Ki nou aprann lor Jéhovah ar l’exemple Jésus?
7 Par so l’exemple, Jésus ti aussi faire nou koné couma so Papa été. Kan nou lire dan bann l’Evangile ki Jésus ti ena compassion pou bann dimoune ki ti dan le besoin, couma li ti comprend bann ki ti souffert, couma li ti en colere kan so bann disciple ti empeche bann ti zenfant approche li, eski sa pa faire nou trouve bann mem sentiment ki Bondié aussi ena? (Marc 1:40-42; 10:13, 14; Jean 11:32-35) Maziné couma tou seki Jésus ti faire aide nou pou konn bien bann qualité principal ki Bondié ena. Eski bann mirak ki Jésus ti faire pa montré ki quantité pouvoir Bondié ti donne li? Pourtant, jamais li pa ti servi so pouvoir pou so prop l’avantage ou-soit pou faire lezot di-tort. (Luc 4:1-4) Kan li ti pousse bann marchand ki ti gourmand l’argent, sa ti montré bien ki quantité li content la justice! (Marc 11:15-17; Jean 2:13-16) So bann l’enseignement ek bann joli parole ki li ti dire pou touche leker bann dimoune, montré ki li ti ‘beaucoup pli sage ki Salomon.’ (Mat. 12:42) La Bible decrire bien l’amour ki Jésus ti montré kan li ti donne so la vie pou lezot. La Bible dire ki “personne pena enn pli grand l’amour ki sa.”—Jean 15:13.
8 Dan tou seki li ti dire ek faire, Garson Bondié ti represente Jéhovah dan enn fason tellement parfait, ki li ti kapav dire: “Enn kikenn ki finn trouve moi, finn trouve aussi mo Papa.” (Lire Jean 14:9-11.) Suive Christ c’est pareil couma suive Jéhovah.
Jésus ti oint par Jéhovah
9. Kan ek couma Jésus ti oint par Bondié?
9 Prend par exemple seki ti arrivé en automne l’an 29 nou lepok kan Jésus ki ti ena 30 an ti vinn vers Jean le Baptiste. “Apré ki li ti baptisé, desuite Jésus ti sorti dan de l’eau; ek, guetté! le ciel ti ouvert, ek li ti trouve l’esprit Bondié desann lor li dan forme enn colombe.” C’est lerla ki li ti vinn Christ ou-soit Messie. Kan sa ti arrivé, Jéhovah Li-mem ti faire koné ki Jésus ti so Oint, Li ti dire: “Li-mem mo Garson ki mo bien content ek ki mo finn approuvé.” (Mat. 3:13-17) Sa c’est vrai-mem enn bon raison ki nou ena pou nou envie suive Christ!
10, 11. (a) Cite bann fason ki la Bible servi titre “Christ” en rapport avek Jésus. (b) Kifer nou bizin faire sur ki nou pé suive Jésus Christ?
10 La Bible servi titre “Christ” en rapport avek Jésus dan different fason couma par exemple: Jésus Christ, Christ Jésus, ek Christ. Jésus li-mem ti servi pou premier fois l’expression “Jésus Christ”—so nom avek enn titre ki vinn apré. Dan enn la priere ki li ti faire ar so Papa, li ti dire: “Sa-mem ki vedir la vie eternel: zot bizin aprann konn toi, sel vrai Bondié, ek celui ki to finn envoyé, Jésus Christ.” (Jean 17:3) Sa l’expression-la attire l’attention lor sa kikenn ki Bondié ti’nn envoyé-la ek ki ti vinn so Oint. Kan titre “Christ” placé avant nom Jésus, couma dan “Christ Jésus,” lerla sa mette l’accent plus lor position Jésus ki lor Jésus li-mem. (2 Cor. 4:5) Kan la Bible servi mot “Christ” sans nom Jésus, c’est enn lot fason pou attire l’attention lor position Jésus en tant ki le Messie.—Actes 5:42.
11 N’importe couma la Bible servi titre “Christ” en rapport avek Jésus, li mette l’accent lor enn verité important: Mem si Garson Bondié inn vinn lor la terre en tant ki enn zom ek inn faire konn volonté so Papa, li pa ti zis enn dimoune ordinaire, ni zis enn simple prophete. Li ti sa Kikenn ki Jéhovah ti choisir-la, So Oint! Nou bizin faire sur ki nou pé suive li.
Jésus li sel chemin ki amenn nou vers delivrance
12. Ki bann parole Jésus ti dire Thomas ki ena l’importance pou nou?
12 Seki Jésus ti dire so bann zapotre ki ti fidele, zis deux-trois l’heure-temps avant li mort, donne nou enn lot raison important kifer nou bizin contigne suive le Messie. Pou reponn question ki Thomas ti pose li kan li ti dire ki li pou allé ek pou prepare enn place pou zot, Jésus ti reponn: “Mo-mem chemin, ek la verité ek la vie. Personne pa kapav vinn vers le Père sans passe par moi.” (Jean 14:1-6) Jésus ti pé koz ar so 11 zapotre fidele. Li ti promette zot enn place dan le ciel, mais so bann parole ena l’importance aussi pou bann ki ena l’espoir pou gagne la vie eternel lor la terre. (Rév. 7:9, 10; 21:1-4) Kifer nou dire sa?
13. Dan ki sens Jésus li “chemin”?
13 Jésus Christ li “chemin.” Sa vedir ki c’est zis par li tousel ki nou bizin passé pou approche ar Bondié. Sa li vrai en seki concerne la priere, parski c’est zis si nou prié par l’intermediaire Jésus ki nou kapav sur ki nou Papa dan le ciel pou donne nou seki nou demandé en accord avek So volonté. (Jean 15:16) Mais Jésus li “chemin” dan enn lot fason encore. A cause peché, bann dimoune inn eloigné ar Bondié. (Is. 59:2) Jésus ti donne “so la vie couma enn ranson en echange pou beaucoup.” (Mat. 20:28) Alors, la Bible expliké ki “di-sang Jésus . . . purifié nou ar tou peché.” (1 Jean 1:7) Coumsa Garson Bondié inn ouvert chemin pou ki nou kapav reconcilié avek Bondié. (Rom. 5:8-10) C’est kan nou ena la foi en Jésus ek nou obeir li ki nou pou kapav ena bann bon relation avek Bondié.—Jean 3:36.
14. Couma Jésus li “la verité”?
14 Jésus li “la verité” pa zis parski li ti toujours enseigne ek vive en accord avek la verité, mais aussi parski tou bann prophetie ki’nn ecrire lor le Messie—ena enn quantité—finn realisé lor li. L’apotre Paul ti ecrire: “N’importe ki quantité promesse ki Bondié inn faire, zot inn vinn Oui par so moyen.” (2 Cor. 1:20) Mem “enn l’ombrage bann bon kitsoz ki pou vini” ki ti ena dan la Loi mosaïk ti realisé en Christ Jésus. (Héb. 10:1; Col. 2:17) C’est lor Jésus ki tou bann prophetie kozé, ek zot aide nou pou comprend role important ki li ena dan realisation projet Bondié. (Rév. 19:10) Pou nou profite projet ki Bondié ena pou nou, nou bizin suive le Messie.
15. Dan ki sens Jésus li “la vie”?
15 Jésus li “la vie” parski li finn acheté l’humanité avek so di-sang, ek la vie eternel c’est enn don ki Bondié donné “par Christ Jésus nou Seigneur.” (Rom. 6:23) Jésus li aussi “la vie” pou bann ki finn mort. (Jean 5:28, 29) En plus, mazinn seki li pou faire en tant ki Grand Pretre pendant so Regne mille an. Pou so bann sujet ki pou vive lor la terre, li pou faire zot gagne enn delivrance eternel ar peché ek la mort!—Héb. 9:11, 12, 28.
16. Ki raison nou ena pou suive Jésus?
16 Alors seki Jésus ti dire Thomas ena enn grand signification pou nou. Jésus li chemin, la verité ek la vie. Li-mem ki Bondié inn envoyé dan le monde pou ki, par li, le monde sauvé. (Jean 3:17) Personne pa al vers le Père si pa passe par Jésus. La Bible bien clair kan li dire: “Okenn lot dimoune pa kapav amenn delivrance, parski lor la terre pena okenn lot nom ki bann zom finn gagné, ki pou faire nou gagne la vie sauve.” (Actes 4:12) Alors, n’importe ki nou l’origine ou-soit seki nou ti croire avant, li sage ki nou croire en Jésus, suive li ek lerla sa pou amenn nou vers la vie.—Jean 20:31.
Nou’nn gagne l’ordre pou ecoute Christ
17. Kifer li important ki nou ecoute Garson Bondié?
17 Pierre, Jean ek Jacques ti temoin transfiguration. Kan sa ti arrivé, zot ti tann enn la voix sorti dan le ciel dire: “Li-mem mo Garson, li-mem ki mo finn choisir. Ecoute li.” (Luc 9:28, 29, 35) Li bien important ki nou obeir l’ordre pou ecoute le Messie.—Lire Actes 3:22, 23.
18. Couma nou kapav ecoute Jésus Christ?
18 Pou nou ecoute Jésus nou bizin ‘fixé nou lizié lor li, reflechi bien lor so exemple.’ (Héb. 12:2, 3) Alors, li pou bon ki nou “porte enn l’attention plus ki normal ar bann kitsoz” ki nou lire lor li dan la Bible ek dan bann publication ki nou gagné avek “l’esclave fidele et avisé,” ek aussi seki nou tendé lor li dan reunion. (Héb. 2:1; Mat. 24:45) En tant ki nou Grand Berger, anou faire tou pou ecoute Jésus ek suive li.—Jean 10:27.
19. Ki pou aide nou pou contigne suive Christ?
19 Eski li possible pou contigne suive Christ malgré n’importe ki difficulté ki nou gagné? Oui nou pou kapav, a condition ki nou “contigne reste attaché ar modele bann bon parole” kan nou mette en pratik seki nou aprann “avek la foi ek l’amour ki concerne Christ Jésus.”—2 Tim. 1:13.
Ki ou finn aprann?
• Kifer si nou suive “Christ” sa kapav faire nou vinn pli proche ar Jéhovah?
• Kifer kan nou imite Jésus c’est pareil coumadir nou pé imite Jéhovah?
• Dan ki sens Jésus li “chemin, ek la verité ek la vie”?
• Kifer nou bizin ecoute sa kikenn ki Jéhovah inn oint-la?
[Zimage lor page 28]
Bann l’enseignement Jésus reflete bann pensée extraordinaire Jéhovah
[Zimage lor page 29]
Nou bizin suive avek fidelité sa kikenn ki Jéhovah inn oint-la
[Zimage lor page 31]
Jéhovah ti dire: “Li-mem mo Garson . . . ecoute li.”