2 Gagne enn connaissance exact lor Bondié

“Sa-mem ki vedir la vie eternel: zot bizin aprann konn toi, sel vrai Bondié.”—Jean 17:3.

KIFER LI DIFFICILE? Certain dire ki Bondié pa existé. Lezot pensé ki Bondié Li pa enn personne, mais zis enn la force ki bien puissant. Bann ki croire ki Li enn personne réel, zot enseigne bann doctrine lor Li ek lor bann qualité ki Li manifesté mais chaque doctrine enseigne different kitsoz.

COUMA OU KAPAV SURMONTE SA DIFFICULTÉ-LA? Enn fason pou gagne la connaissance lor Bondié c’est kan nou observe bann kitsoz ki Li’nn faire. L’apotre Paul ti dire: “Nou trouve [Bondié] so bann qualité invisible dan enn fason clair depuis creation le monde, parski nou kapav trouve zot a travers bann kitsoz ki Li’nn faire, mem, so puissance eternel ek so nature en tant ki Bondié.” (Romains 1:20) Kan ou observe bien la creation, ou kapav aprann beaucoup lor sagesse ek lor puissance nou Createur.—Psaume 104:24; Isaïe 40:26.

Mais, pou gagne enn connaissance exact lor personnalité Bondié, chaque dimoune bizin lire Parole Bondié, la Bible, ek examine seki ena ladan par li-mem. Pa laisse lezot decidé ki ou bizin pensé sans ki ou reagir. Plutot, suive conseil la Bible ki dire: “Arrete faire pareil couma sa le monde-la, mais transforme zot, ek renouvelé zot fason pensé. Coumsa zot pou kapav verifié par zot-mem ki volonté Bondié, li bon, li acceptable ek li parfait.” (Romains 12:2) Par exemple, guette sa bann verité ki la Bible faire nou koné lor Bondié-la.

Bondié ena enn nom personnel. Au commencement, kan ti ecrire la Bible, nom personnel Bondié ti mentionné plusieurs millier fois. Beaucoup traduction la Bible faire mention sa nom-la dan Psaume 83:19, ki dire: “Pou ki zot koné ki to nom, ki to tousel Jéhovah, to Pli Grand lor la terre entier.”—Crampon (1905), Psaume 83:18 dan Traduction du monde nouveau.

Jéhovah ena bann sentiment ek fason ki bann dimoune agir affecté Li. Apré ki Jéhovah ti libere nation Israël ki ti bann esclave dan l’Égypte, parfois zot pa ti prend compte so bann bon conseil. A cause zot rebellion zot ti “faire Li la peine.” Zot fason agir ti “mem faire Saint Israël la peine.”—Psaume 78:40, 41.

Jéhovah interessé ar sakenn parmi nou. Kan li ti pé koz avek so bann disciple, Jésus ti dire: “Eski pa vann deux moineau pou enn piece l’argent ki ena enn tigit valeur? Pourtant, pa mem enn sel pou tombe enba sans ki zot Papa koné. Mais, Li finn mem compte tou bann cheveux lor zot, zot la tête. Alors, pa peur: zot vaut plus ki beaucoup moineau.”—Matthieu 10:29-31.

Bondié pa donne enn race ou-soit enn culture plus faveur ki enn lot. L’apotre Paul ti dire bann grec ki ti reste Athènes ki “avek enn sel zom, [Bondié inn] faire tou bann peuple, pou zot reste partout lor la terre.” Li ti dire aussi ki Bondié “pa loin ar sakenn parmi nou.” (Actes 17:26, 27) L’apotre Pierre ti dire: “Bondié pa faire preference, mais dan n’importe ki nation, dimoune ki ena la crainte pou Li ek ki pratik la justice, Bondié accepté li.”—Actes 10:34, 35.

KI BENEDICTION OU POU GAGNÉ? Certain ena “enn zele pou Bondié, mais pa dapré connaissance exact.” (Romains 10:2) Si ou konn seki la Bible enseigné vrai-mem lor Bondié, lezot pa pou kapav embete ou ek ou pou “vinn proche ar Bondié.”—Jacques 4:8.

Pou gagne plus renseignement, guette chapitre 1, “La verité lor Bondié,” dan livre Ki la Bible enseigné vrai-mem?a

[Note]

[Zimage page 6]

Enn fason pou gagne connaissance lor Bondié c’est kan nou observe bann kitsoz ki Li’nn faire