Jeune—Montré ki zot pé progressé

“Reflechi lor sa bann kitsoz-la; concentré-toi bien ladan, pou ki tou dimoune trouve bien to bann progré.”—1 TIM. 4:15.

1. Ki Bondié envie pou bann jeune?

“JEUNE, amusé pendant ki to encore jeune! Laisse to leker faire toi di-bien pendant to l’adolescence.” (Eccl. 11:9, Tanakh—Les Saintes Écritures, en anglais.) C’est seki le roi Salomon ki ti regne en Israël ti ecrire. Jéhovah, ki ti faire li ecrire sa bann parole-la, envie ki zot, bann jeune, zot heureux. En plus, Jéhovah envie ki zot contigne reste heureux mem apré ki zot finn vinn inpé pli agé. Selman, pendant zot jeunesse, souvent bann jeune faire bann erreur ki kapav affecté zot bonheur dan l’avenir. Mem Job, enn zom fidele, ti regretté parski li ti bizin supporte ‘consequence bann faute ki li’nn faire dan so jeunesse.’ (Job 13:26) Souvent, pendant so l’adolescence ek mem enn tipé apré, enn jeune chretien bizin prend bann decision bien important. Si li prend bann mauvais decision sa kapav faire li souffert beaucoup lor plan affectif ek crée bann probleme ki kapav affecté li toute longue so la vie apré.—Eccl. 11:10.

2. Couma la Bible kapav aide bann jeune pou evite faire bann erreur grave?

² Bann jeune bizin montré ki zot ena enn bon jugement. Prend par exemple conseil ki Paul ti donne bann Corinthien. Li ti ecrire: “Pa vinn bann ti-zenfant en seki concerne zot capacité pou comprend . . . Vinn bann adulte en seki concerne zot capacité pou comprend.” (1 Cor. 14:20) Si bann jeune prend compte sa conseil-la ek faire tou pou gagne capacité pou pensé ek pou raisonné couma bann adulte, sa pou aide zot pou evite faire bann erreur grave.

3. Ki ou kapav faire pou vinn enn chretien mur?

³ Si ou enn jeune, rappel ki ou bizin faire bann zeffort pou vinn enn chretien mur. Paul ti dire Timothée: “Pa laisse personne meprise to jeunesse. Au contraire, vinn enn l’exemple pou bann fidele, dan to bann parole, dan to conduite, dan l’amour, dan la foi ek dan pureté. . . . Contigne faire zeffort en rapport avek lecture en publik, ek aussi pou conseillé, encouragé ek enseigné. . . . Reflechi lor sa bann kitsoz-la; concentré-toi bien ladan, pou ki tou dimoune trouve bien to bann progré.” (1 Tim. 4:12-15) Bann jeune chretien bizin faire bann progré ek lezot dimoune bizin trouve sa.

Ki sa vedir progressé?

4. Pou nou faire bann progré spirituel, ki sa impliké?

⁴ Progressé c’est “avancé, changé pou vinn pli bon.” Paul ti pé encourage Timothée pou contigne faire zeffort pou li kapav progressé dan so bann parole, dan conduite, l’amour, la foi ek pureté, ek aussi dan fason ki li accompli so ministere. Li ti bizin faire zeffort pou donne enn bon l’exemple dan fason ki li vive. Sa vedir ki Timothée ti bizin contigne faire bann progré spirituel.

5, 6. (a) Kan eski bann dimoune ti commence trouve bann progré Timothée? (b) En rapport avek bann progré, couma bann jeune zordi kapav imite Timothée?

⁵ Kan Paul ti ecrire sa conseil-la entre l’an 61 ek l’an 64 nou lepok, Timothée ti deja enn ancien ki ti ena l’experience. Li pa ti pé zis commence faire bann progré spirituel. En l’an 49 ou-soit 50 nou lepok, kan Timothée ti ena apepré 20 an ou enn tipé plus, “bann frere dan Lystres ek dan Iconium ti rann enn bon temoignage lor li” parski zot ti observe so bann progré spirituel. (Actes 16:1-5) Sa lepok-la, Paul ti prend Timothée avek li pou enn voyage missionnaire. Apré ki li’nn trouve bann lezot progré Timothée pendant deux-trois mois, Paul ti envoye li Thessalonique pou li kapav console bann chretien dan sa la ville-la ek faire zot vinn ferme dan la verité. (Lire 1 Thessaloniciens 3:1-3, 6.) Li clair ki lezot dimoune ti commence trouve bann progré Timothée alors ki li ti encore jeune.

⁶ Ou jeune ki dan congregation, travail pou developpe bann qualité spirituel asterla-mem, pou ki lezot trouve ou bann progré dan fason ki ou vive la verité ek dan ou capacité pou enseigne la Bible. Depuis l’age 12 an, Jésus “ti pé contigne progressé dan sagesse.” (Luc 2:52) Alors, anou guetté couma lezot kapav trouvé ki ou finn progressé dan trois domaine: (1) kan ou gagne bann l’epreuve, (2) kan ou prepare-ou pou mariage, ek (3) kan ou faire zeffort pou vinn enn “bon ministre.”—1 Tim. 4:6.

Faire face ar bann l’epreuve avek “bon sens”

7. Couma bann l’epreuve kapav affecté bann jeune?

⁷ Carole, enn chretien ki ena 17 an ti dire: “Ti ena enn lepok kot mo ti tellement fatigué lor plan affectif, physik ek mental ki mo pa ti envie levé dan gramatin.”a Kifer li ti deprimé coumsa? Kan Carole ti ena dix an, so bann parent ti divorcé, ek li ti bizin vive avek so mama ki ti rejette bann principe moral ki ena dan la Bible. Pareil couma Carole, kitfois ou pé bizin faire face ar enn situation bien difficile ki pa trop sur pou amelioré.

8. Ar ki probleme Timothée ti bizin faire face?

⁸ Kan Timothée ti pé faire bann progré lor plan spirituel, li aussi li ti bizin faire face ar bann situation difficile. Par exemple, ‘souvent li ti malade’ parski li ti ena probleme l’estomac. (1 Tim. 5:23) Dan congregation Corinthe, ti ena bann probleme ki ti arrivé a cause certain ki ti mette en doute l’autorité l’apotre Paul. Alors, kan Paul ti envoye Timothée dan congregation Corinthe pou reglé sa bann probleme-la, li ti encourage la congregation pou coopere avek Timothée pou ki li “pena okenn la crainte” kan li pou parmi zot. (1 Cor. 4:17; 16:10, 11) Li parette ki Timothée ti timide.

9. Ki sa vedir ena bon sens, ek couma li different avek enn l’esprit capon?

⁹ Pou aide Timothée, plitar Paul ti dire: “Bondié pa finn donne nou enn l’esprit capon, mais enn l’esprit ki ena la force, l’amour ek bon sens.” (2 Tim. 1:7) Si nou ena “bon sens” nou kapav pensé ek raisonné dan enn bon fason. Sa vedir aussi ki nou pou trouve bann situation couma zot été—pa couma nou, nou ti pou envie zot été. Certain jeune ki pena maturité, manifesté enn l’esprit capon ek mentalement zot essaye sauve bann situation difficile. Couma? Zot passe beaucoup le temps pou dormi ou-soit pou guette television, zot drogué ou-soit tombe dan la boisson, zot touletan dan bann fête ou-soit zot commette l’immoralité sexuel. Bann chretien inn gagne l’ordre “pou rejette seki Bondié pa content ek bann desir sa le monde-la, ek vive avek bon sens ek justice ek l’attachement pou Bondié dan sa systeme-la.”—Tite 2:12.

10, 11. Couma bon sens kapav aide nou pou compte lor la force ki Bondié donné?

¹⁰ La Bible encourage bann “jeune gens, pou vinn bann dimoune ki ena bon sens.” (Tite 2:6) Si ou prend compte sa conseil-la sa vedir ki ou pou prié Bondié ek ou pou compte lor la force ki Li donné kan ou gagne probleme. (Lire 1 Pierre 4:7.) Lerla, ou pou developpe enn grand confiance dan “la force ki Bondié donné.”—1 Pierre 4:11.

¹¹ Bon sens ek la priere ti aide Carole dan so situation difficile. Li ti dire: “Enn kitsoz pli difficile ki mo’nn bizin faire dan mo la vie c’est prend enn position ferme kont la vie immoral ki mo mama ti pé amené. Mais la priere ti vrai-mem aide moi. Mo koné ki Jéhovah Li avek moi, alors mo nepli peur.” Rappel bien: bann l’epreuve kapav ameliore ou personnalité ek fortifié ou. (Ps. 105:17-19; Lam. 3:27) Dan n’importe ki situation ou été, jamais Bondié pou laisse ou tombé. Li pou “aide [ou].”—Is. 41:10.

Prepare-ou pou enn mariage reussi

12. Kifer enn chretien ki envie marié bizin applik principe ki trouve dan Proverbes 20:25?

¹² Certain jeune adulte finn pressé pou marié, zot ti croire ki sa ti pou reglé zot probleme, kitfois zot pa ti heureux, zot ti tousel, zot ti agacé ou-soit zot ti ena lezot probleme encore dan lakaz. Selman, bann voeu ki faire kan marié, c’est enn kitsoz bien serieux. Certain dan lepok biblik ti faire bann voeu ar Bondié sans ki zot ti reflechi bien seki sa ti impliké. (Lire Proverbes 20:25.) Parfois, bann jeune adulte pa vrai-mem reflechi lor bann responsabilité ki ena apré mariage. Plitar, zot realisé ki mariage implik beaucoup plus ki seki zot ti pensé.

13. Ki bann question bann ki pé pense pou frequenté bizin examiné ek ki bon conseil zot kapav gagné?

¹³ Alors, avant ou decide pou frequenté, demann ou-mem: ‘Kifer mo envie marié? Ki mo attann ar mariage? Eski sa dimoune avek ki mo pou marié-la inn faire pou moi? Eski mo vrai-mem preparé pou prend bann responsabilité dan mariage?’ Pou aide ou pou examine avek discernement sa sujet-la, “l’esclave fidele et avisé” inn publié bann lartik bien precis lor-la.b (Mat. 24:45-47) Considere sa bann lartik-la couma bann conseil ki Jéhovah pé donne ou. Examine bien seki zot dire ek mette en pratik seki ou aprann. Jamais pa laisse ou-mem vinn “couma enn cheval ou-soit enn bourrik ki pena l’intelligence.” (Ps. 32:8, 9) Vinn enn adulte en seki concerne ou capacité pou comprend bann responsabilité ki impliké dan mariage. Si ou pensé ki ou’nn paré pou frequenté pou ou marié, rappel toujours ki ou bizin “enn l’exemple . . . dan pureté.”—1 Tim. 4:12.

14. Couma maturité spirituel kapav aide ou si ou marié?

¹⁴ Maturité spirituel faire bann conjoint reussi zot mariage mem apré. Enn chretien ki’nn gagne maturité spirituel faire zeffort pou gagne “enn developpement complet pareil couma Christ.” (Éph. 4:11-14) Li travail dur pou developpe personnalité chretien. En tant ki nou l’Exemple, “Christ pa finn faire li-mem plaisir.” (Rom. 15:3) Kan toulé-deux conjoint contigne rod l’avantage zot camarade ek pa zot prop l’avantage, pou ena la paix ek securité dan zot famille. (1 Cor. 10:24) Enn mari pou montré l’amour ki pa egoïste envers so famille, ek enn femme pou bien decidé pou soumette ar so mari pareil couma Jésus été ar so Chef.—1 Cor. 11:3; Éph. 5:25.

“Accompli to ministere a fond”

15, 16. Couma tou dimoune kapav trouve bann progré ki ou faire dan ministere?

¹⁵ Paul ti attire l’attention lor mission bien important ki Timothée ti ena, kan li ti dire li: “Mo donne toi l’ordre devant Bondié ek devant Christ Jésus, . . . preche la parole, pa arrete faire li.” Li ti ajouté: “Faire travail enn evangelisateur, accompli to ministere a fond.” (2 Tim. 4:1, 2, 5) Pou accompli sa mission-la, Timothée ti bizin “nourri[-li] ar bann parole la foi.”—Lire 1 Timothée 4:6.

¹⁶ Couma ou kapav “nourri[-ou] ar bann parole la foi”? Paul ti ecrire: “Contigne faire zeffort en rapport avek lecture en publik, ek aussi pou conseillé, encouragé ek enseigné. Reflechi lor sa bann kitsoz-la; concentré-toi bien ladan.” (1 Tim. 4:13, 15) Pou nou progressé nou bizin ena enn l’etude personnel bien serieux. L’expression “concentré-toi bien” donne l’idée ki nou bizin plonge-nou net dan enn l’activité. Couma ou bann l’habitude pou etudié été? Eski ou absorbé ar “bann kitsoz profond ki concerne Bondié”? (1 Cor. 2:10) Ou-soit eski ou faire zis enn tigit zeffort mem? Kan ou medite lor seki ou etudié sa pou motive ou.—Lire Proverbes 2:1-5.

17, 18. (a) Ki bann capacité ou bizin faire zeffort pou developpé? (b) Si ou developpe mem l’attitude ki Timothée, couma sa pou aide ou dan ou ministere?

¹⁷ Enn jeune pionnier ki appel Michelle ti dire: “Pou mo kapav bien efficace dan mo ministere, mo ena enn bon programme l’etude personnel, ek mo assisté reunion regulierement. A cause sa, mo pé touletan progressé lor plan spirituel.” Kan ou faire service pionnier, sa pou vrai-mem aide ou pou ameliore fason ki ou servi la Bible dan ou ministere ek ou pou progressé lor plan spirituel. Faire zeffort pou lire bien ek pou donne bann bon commentaire dan reunion. En tant ki enn jeune ki mur lor plan spirituel, ou pou envie prepare bann bon devoir dan Lekol ministere theocratik ek servi bien bann reference lor ki ou devoir basé ek pa ajoute bann l’idée ki pa necessaire.

¹⁸ “Faire travail enn evangelisateur” vedir ki ou pou faire ou ministere vinn plus efficace ek ou pou aide lezot pou zot gagne la vie sauve. Ou pou bizin developpe “l’art pou enseigné.” (2 Tim. 4:2) Kan ou faire bann l’arrangement pou preche avek bann ki ena l’experience dan sa l’activité-la, ou pou kapav aprann par fason ki zot enseigné, pareil couma Timothée ti aprann kan li ti accompagne Paul dan so ministere. (1 Cor. 4:17) Paul ti faire reference ar bann dimoune ki li ti aidé, li ti dire ki li pa ti zis partage la bonne nouvelle avek zot mais ki li ti aussi donne so “prop nâme” setadir servi so prop la vie pou aide zot, parski li ti bien content zot. (1 Thess. 2:8) Pou ou kapav suive l’exemple Paul dan ou ministere, ou bizin ena mem l’attitude ki Timothée, ki ti vrai-mem prend compte lezot ek ‘ti travail couma enn esclave pou faire la bonne nouvelle progressé.’ (Lire Philippiens 2:19-23.) Eski ou aussi ou montré mem l’esprit sacrifice dan ou ministere?

Ou pou gagne enn grand satisfaction si ou faire progré

19, 20. Kifer ou gagne la joie kan ou faire bann progré lor plan spirituel?

¹⁹ Faire bann progré lor plan spirituel demann beaucoup zeffort. Mais si avek patience ou developpe ou bann capacité pou enseigné, avek le temps ou pou ena privilege pou “faire beaucoup dimoune vinn riche” lor plan spirituel, ek zot pou vinn ou “la joie ou-soit [ou] couronne ki faire [ou] fiere.” (2 Cor. 6:10; 1 Thess. 2:19) Fred ki dan service a plein temps ti dire: “Zordi plus ki avant, mo consacré mo le temps pou aide lezot. Li tellement vrai ki ena plus bonheur pou donné ki pou recevoir.”

²⁰ Enn jeune pionnier ki appel Daphné koz lor la joie ek satisfaction ki li’nn gagné kan li’nn progressé lor plan spirituel. Li ti dire: “Mo’nn vinn pli proche avek Jéhovah a mesure ki mo ti commence aprann plus lor Li. Kan ou faire tou seki ou kapav pou faire Jéhovah plaisir, ou senti-ou tellement bien—ou vrai-mem satisfait!” Mem si bann dimoune pa touletan trouve ou bann progré spirituel, mais Jéhovah Li, touletan Li trouve seki ou faire ek sa ena valeur pou Li. (Héb. 4:13) Pena okenn doute ki zot, bann jeune chretien, zot kapav donne la gloire ek l’honneur nou Papa ki dan le ciel. Contigne faire so leker content a mesure ki bann dimoune trouve ou bann progré.—Prov. 27:11.

[Note]

Ki ou finn aprann?

• Pou faire bann progré lor plan spirituel, ki sa impliké?

• Couma ou kapav faire bann progré ki tou dimoune trouvé . . .

kan ou gagne bann l’epreuve?

kan ou prepare-ou pou mariage?

dan ministere?

[Zimage lor page 18]

La priere kapav aide ou pou faire face ar bann l’epreuve

[Zimage lor page 20]

Couma bann jeune proclamateur kapav developpe bann methode efficace pou enseigné?