Bann famille chretien, suive l’exemple Jésus!
“Christ . . . finn laisse enn modele pou zot, pou ki zot suive bien so trace.”—1 PIERRE 2:21.
1. (a) Ki role Garson Bondié ti ena dan creation? (b) Ki sentiment Jésus ti ena pou bann dimoune?
KAN Bondié ti faire le ciel ek la terre, so Garson premier-né ti travail ensam avek li “couma enn zouvrier qualifié.” Garson Bondié ti aussi coopere avek so Papa, Jéhovah, kan Li ti crée sa grand varieté zanimo ek plante ki ena lor la terre ek kan Li ti prepare Paradis pou ki bann dimoune ki Li ti crée dan so ressemblance, kapav resté. Garson Bondié, ki plitar ti appel Jésus, ti ena enn grand l’amour pou bann dimoune. La Bible dire: “Bann kitsoz avek ki [li] ti bien attaché, ti avek bann dimoune.”—Prov. 8:27-31; Gen. 1:26, 27.
2. (a) Ki Jéhovah inn donne bann dimoune imparfait pou aide zot? (b) Dan ki domaine la Bible donne bann dimoune enn direction?
2 Apré ki premier couple humain ti faire peché, li ti necessaire ki prend bann disposition pou sauve bann dimoune ki’nn faire peché ek sa ti vinn enn partie important dan projet Jéhovah. Jéhovah ti donne Christ en sacrifice pou ki sa delivrance-la vinn possible. (Rom. 5:8) En plus, Jéhovah ti donne so Parole, la Bible, ki guide bann dimoune pou zot kapav reussi zot la vie malgré zot l’imperfection. (Ps. 119:105) Dan so Parole, Jéhovah donne bann dimoune bann conseil pou ki zot famille reste solide ek heureux. Concernant mariage, livre Genèse dire ki enn zom bizin “attaché avek so madame ek zot pou bizin vinn enn sel la chair.”—Gen. 2:24.
3. (a) Ki Jésus ti enseigné lor mariage? (b) Ki nou pou examiné dan sa lartik-la?
3 Pendant so ministere lor la terre, Jésus ti montré ki mariage inn faire pou dure pou touletan, ek li ti enseigne bann principe concernant mariage. Si bann famille applik sa bann principe-la, sa pou aide zot pou evite ena bann l’attitude ek enn conduite ki pou menace zot mariage ou-soit bonheur zot famille. (Mat. 5:27-37; 7:12) Dan sa lartik-la, nou pou guetté couma bann l’enseignement Jésus ek l’exemple ki li’nn laissé kan li ti lor la terre kapav aide bann mari, bann femme, bann parent, ek bann zenfant pou vive heureux, ek amenn enn la vie ki donne zot satisfaction.
Couma enn mari chretien honore so femme
4. Ki point commun ena entre role Jésus ek role bann mari chretien?
4 Bondié inn etabli enn mari pou ki li chef dan so famille, pareil couma Jésus li Chef lor la congregation. L’apotre Paul ti dire: “Enn mari li chef so femme pareil couma Christ aussi li chef congregation; li-mem sauveur sa congregation-la. Mari, contigne content zot femme, pareil couma Christ aussi finn content la congregation ek finn donne so la vie pou sauve li.” (Éph. 5:23, 25) Oui, fason ki Jésus ti traite so bann disciple, c’est enn modele ki montré couma bann mari chretien bizin traite zot femme. Anou examiné dan ki fason Jésus ti servi l’autorité ki Bondié ti donne li.
5. Couma Jésus ti servi so l’autorité lor so bann disciple?
5 Jésus ti “ena enn caractere doux ek enn leker humble.” (Mat. 11:29) Li ti aussi enn zom ki ti prend bann decision. Jamais li ti neglige so bann responsabilité. (Marc 6:34; Jean 2:14-17) Li ti donne so bann disciple bann conseil avek bonté, mem plusieurs fois kan sa ti necessaire. (Mat. 20:21-28; Marc 9:33-37; Luc 22:24-27) Mais kan-mem, Jésus pa ti reproche so bann disciple, ni ti abaisse zot, ni li ti faire zot senti ki li pa ti content zot ou-soit ki zot pa ti kapav faire seki li ti pé enseigné. Au contraire, li ti felicite zot ek ti encourage zot pou faire seki droite. (Luc 10:17-21) Pena doute ki Jésus ti gagne respé so bann disciple parski li ti traite zot avek amour ek compassion!
6. (a) Ki enn mari kapav aprann ar fason ki Jésus ti traite so bann disciple? (b) Ki l’encouragement Pierre ti donne bann mari?
6 L’exemple Jésus enseigne bann mari, ki l’autorité ki enn chretien ena, c’est pa enn position ki permette li faire dominere. Au contraire, li bizin traite so femme avek respé ek montré enn l’amour ki pousse li pou faire sacrifice. L’apotre Pierre ti encourage bann mari pou imite l’amour ki Jésus ti manifesté kan zot “aussi pareil” zot reste avek zot femme ek “donne zot l’honneur.” (Lire 1 Pierre 3:7.) Alors couma enn mari kapav servi l’autorité ki Bondié inn donne li ek en mem temps traite so femme couma enn kikenn ki merite l’honneur?
7. Dan ki fason enn mari kapav honore so femme? Donne enn l’exemple.
7 Enn fason ki enn mari kapav honore so femme c’est kan li prend en consideration so l’opinion ek so sentiment avant li prend bann decision ki concerne la famille. Kitfois bizin prend enn decision concernant enn demenagement, ou-soit enn changement travail. Ou-soit sa kapav concerne bann kitsoz dan zot la vie toulé-jour couma par exemple, kot-sa zot pou al passe vacance ou-soit ki changement bizin faire dan budget pou ki la famille kapav faire face ar la vie ki pé vinn pli cher. Parski sa ena enn l’effet lor la famille, li pou bon ki enn mari demann l’opinion so femme, lerla sa kapav aide li prend enn decision equilibré, ki rempli ar l’amour ek coumsa li pou pli facile pou so femme soutenir li. (Prov. 15:22) Bann mari chretien ki honore zot femme pa gagne zis l’amour ek respé zot femme mais, seki pli important, zot gagne faveur Jéhovah.—Éph. 5:28, 29.
Couma enn femme montré enn profond respé pou so mari
8. Kifer nou bizin evité suive l’exemple Ève?
8 En seki concerne soumission ar l’autorité, Jésus inn laisse enn modele parfait pou bann femme chretien. Ti ena vrai-mem enn grand difference entre fason ki Jésus ti considere l’autorité ek l’attitude ki premier femme ti ena! Ève pa’nn laisse enn bon l’exemple pou bann femme suive. Li ti ena enn chef ki Bondié Li-mem ti etabli ek a travers sa chef-la, Jéhovah ti donne bann instruction. Pourtant, Ève pa ti respecté sa l’arrangement-la. Li pa ti obeir bann instruction ki Adam ti donne li. (Gen. 2:16, 17; 3:3; 1 Cor. 11:3) Li vrai ki enn kikenn ti embete Ève, mais selman, li ti bizin al guette so mari ek demann li si li bon pou croire sa la voix ki ti dire li seki “Bondié koné[-la].” Au contraire, li’nn ena toupé pou donne bann instruction so mari.—Gen. 3:5, 6; 1 Tim. 2:14.
9. Ki l’exemple en rapport avek soumission Jésus donne nou?
9 Parkont Jésus li, li ti donne enn l’exemple parfait en rapport avek soumission ar so Chef. So l’attitude ek fason ki li ti vive montré ki li “pa ti pense pou prend place Bondié, setadir pou vinn egal ar Bondié.” Au contraire, “li ti laisse tou, li ti prend forme enn esclave.” (Phil. 2:5-7) Zordi, en tant ki enn le Roi ki pé dirigé, Jésus garde mem l’attitude. Dan tou kitsoz, li soumette avek humilité ar so Papa ek li soutenir So l’autorité.—Mat. 20:23; Jean 5:30; 1 Cor. 15:28.
10. Couma enn femme kapav soutenir l’autorité so mari?
10 Enn femme chretien bizin imite Jésus ek li kapav faire sa kan li soutenir l’autorité so mari. (Lire 1 Pierre 2:21; 3:1, 2.) Anou prend enn situation kot li ena enn l’occasion pou faire sa. So garson demann li si li kapav faire enn certaine l’activité, ek li bizin permission so parent pou sa. Mais so bann parent pa finn koz lor la avant, alors li pou bon ki mama-la demann so garson: “Eski to’nn demann to papa?” Si garson-la pa’nn faire sa, li bizin koz sa avek so mari avant li prend enn decision. En plus, fodé pa enn femme chretien contredire so mari ou-soit mette en doute l’opinion so mari devant zot bann zenfant. Si li pa d’accord avek so mari lor enn kitsoz, li pou koz avek li en privé.—Éph. 6:4.
L’exemple Jésus pou bann parent
11. Ki l’exemple Jésus inn donne bann parent?
11 Mem si Jésus pa ti marié ek pa ti ena zenfant, li enn bon l’exemple pou bann parent chretien. Couma? Par so parole ek so l’exemple, li ti enseigne so bann disciple avek amour ek patience. Li ti montré zot couma zot kapav rempli mission ki li ti donne zot. (Luc 8:1) L’attitude Jésus ek fason ki li ti traite so bann disciple ti montré zot couma zot ti bizin traite sakenn zot camarade.—Lire Jean 13:14-17.
12, 13. Ki bann parent bizin faire si zot envie elevé bann zenfant ki ena la crainte pou Bondié?
12 Bann zenfant ena tendance pou imite zot parent, soit en bien soit en mal. Alors, parent, demann zot-mem: ‘Ki nou pé enseigne nou bann zenfant par nou l’exemple concernant quantité le temps ki nou passé devant television ek dan bann divertissement enn coté, ek lot coté, concernant le temps ki nou passé pou etudié la Bible ek pou preché? Ki vrai-mem priorité nou famille? Eski fason ki nou pé amenn nou la vie ek bann decision ki nou prend, montré nou bann zenfant ki vrai l’adoration enn priorité dan nou la vie?’ La loi Bondié bizin d’abord dan leker bann parent zot-mem si zot envie elevé bann zenfant ki ena la crainte pou Bondié.—Deut. 6:6.
13 Si bann parent faire zeffort pou applik bann principe la Bible dan zot la vie toulé-jour, zot zenfant pou remark sa. Seki bann parent pou dire ek pou enseigné, pou ena poids. Mais, si bann zenfant trouvé ki zot parent pa suive bann regle ki bann parent-la-mem inn fixé, zot kapav pensé ki finalement bann principe la Bible pa vrai-mem important ek pratik. Lerla, bann zenfant pou ena plus tendance pou cedé devant bann pression sa le monde-la.
14, 15. Ki bann principe bann parent bizin developpé dan leker zot zenfant, ek dan ki fason zot kapav faire sa?
14 Bann parent comprend ki elevé enn zenfant c’est pa zis donne li seki li bizin lor plan materiel. Alors, li pa pou sage ditou pou enseigne enn zenfant pou poursuive bann l’objectif ki pou donne li zis bann l’avantage lor plan materiel. (Eccl. 7:12) Jésus ti enseigne so bann disciple pou mette bann kitsoz spirituel en premier dan zot la vie. (Mat. 6:33) Sa vedir ki pou imite Jésus, bann parent chretien bizin faire zeffort pou developpe dan leker zot zenfant enn desir pou poursuive bann l’objectif spirituel.
15 Enn fason ki bann parent kapav faire sa c’est kan zot crée bann l’occasion pou zot zenfant frequente bann ki dan service a plein temps. Maziné ki quantité sa kapav encourage bann adolescent pou faire connaissance bann pionnier ou-soit surveillant circonscription ek so femme. Kan bann missionnaire, bann Béthélite, ou-soit bann ki dan construction visite la famille, zot kapav koz avek enthousiasme lor la joie ki zot gagné pou servi Jéhovah. Pena doute ki sa bann visiteur-la pou ena bann l’experience interessant pou raconté. Zot l’esprit sacrifice pou kapav aide beaucoup zot bann zenfant pou prend bann bon decision, pou fixé bann bon l’objectif dan service Bondié ek pou gagne enn formation approprié dan lekol ki pou aide zot dan service a plein temps.
Bann zenfant—Ki pou aide zot pou suive l’exemple Jésus?
16. Couma Jésus ti honore so bann parent lor la terre ek so Papa dan le ciel?
16 Bann zenfant, Jésus inn laisse enn bon l’exemple pou zot aussi. Joseph ek Marie ti bizin prend Jésus soin, ek li ti obeir zot. (Lire Luc 2:51.) Li ti reconette ki, malgré ki zot ti imparfait, Bondié ti donne zot responsabilité pou occupe li. A cause sa, Jésus ti bizin honore zot. (Deut. 5:16; Mat. 15:4) Kan Jésus ti vinn pli grand, li ti touletan faire bann kitsoz ki ti faire plaisir so Papa dan le ciel. Sa vedir ki li ti resisté pou pa tombe dan bann tentation. (Mat. 4:1-10) Zot bann jeune, surement parfois zot tenté pou desobeir zot parent. Alors, ki kapav aide zot pou suive l’exemple Jésus?
17, 18. (a) Ki qualité pression bann jeune gagné dan lekol? (b) Ki bann jeune kapav rappel pou aide zot pou supporte bann l’epreuve?
17 Surement ki la plupart ou bann camarade lekol pena okenn respé pou bann principe la Bible. Zot kapav essaye mette pression lor ou pou participe dan bann l’activité ki pa bon ek si ou refusé, zot sikann ou. Eski ou bann camarade donne ou bann nom pou sikann ou parski ou refuse pou participe avek zot dan certain l’activité? Si oui, couma ou reagir? Ou koné ki si ou laisse zot faire pression lor ou ek suive la foule, ou pa pou faire plaisir ou parent ek Jéhovah. Ki pou arrive ou si ou suive ou bann camarade lekol? Kitfois ou finn fixé certain l’objectif, couma par exemple faire pionnier, ou-soit vinn enn assistant ministeriel, al servi dan enn territoire kot bizin plus proclamateur, ou-soit vinn enn Béthélite. Si ou al avek ou bann camarade eski sa pou aide ou pou realise sa bann l’objectif-la?
18 Ou ki enn jeune dan congregation, eski li arrivé ki ou trouve-ou dan bann situation ki testé ou la foi? Couma ou reagir? Pense ou modele, Jésus. Li ti refuse pou tombe dan bann tentation ek li ti tini ferme pou faire seki li ti koné droite. Si ou rappel sa, sa pou donne ou la force pou dire ou bann camarade bien franc ki ou pa envie al avek zot pou faire enn kitsoz ki ou koné pa bon. Pareil couma Jésus, garde ou l’esprit fixé lor la joie ki ou pou gagné parski ou’nn obeir Jéhovah ek ou’nn consacré ou la vie pou servi Li.—Héb. 12:2.
La clé pou ena enn la vie famille ki heureux
19. Ki qualité conduite ki faire nou trouve vrai bonheur?
19 Jéhovah ek Jésus Christ envie seki pli bon pou bann dimoune. Mem si nou imparfait, nou kapav heureux. (Is. 48:17, 18; Mat. 5:3) Jésus ti enseigne bann verité biblik ki permette bann dimoune pou vive heureux, mais pa zis sa tousel ki li ti enseigne so bann disciple. Li ti aussi enseigne pli bon fason ki ena pou vive. En plus, li’nn laisse enn bon l’exemple kan li ti amenn enn la vie equilibré ek li ti ena enn l’attitude equilibré. Nou tou, n’importe ki role nou ena dan nou famille, nou kapav gagne bann bienfait si nou suive so l’exemple. Alors, mari, femme, parent, ek zenfant, suive l’exemple Jésus! Suive bann l’enseignement Jésus ek imite so l’exemple, sa-mem la clé pou ena enn la vie famille ki heureux ek ki donne satisfaction.
Couma ou pou reponn?
• Couma bann mari bizin servi l’autorité ki Bondié inn donne zot?
• Couma enn femme kapav imite l’exemple Jésus?
• Ki bann parent kapav aprann ar fason ki Jésus ti traite so bann disciple?
• Ki bann jeune kapav aprann ar l’exemple Jésus?
[Zimage lor page 13]
Avant li prend enn decision ki concerne la famille, ki enn mari ki ena l’amour pou faire?
[Zimage lor page 14]
Ki situation donne enn femme l’occasion pou soutenir l’autorité so mari?
[Zimage lor page 15]
Bann zenfant imite bann bon l’habitude zot parent