Vinn obeissant ek montré courage pareil couma Christ

“Prend courage! Mo finn gagne victoire lor le monde.”—JEAN 16:33.

1. Ziska ki point Jésus ti obeir Bondié?

JÉSUS CHRIST ti touletan faire volonté Bondié. Jamais sa ti traverse so l’esprit pou desobeir so Papa. (Jean 4:34; Héb. 7:26) Mais bann situation ki li ti koné lor la terre pa ti faire sa facile pou li obeir. Depuis commencement so ministere, bann l’ennemi Jésus, parmi ti ena Satan li-mem, ti essaye convaink li, force li, ou-soit piege li pou ki li abandonne so fidelité. (Mat. 4:1-11; Luc 20:20-25) Sa bann l’ennemi-la ti faire Jésus bien souffert lor plan mental, affectif, ek physik. Finalement, zot ti reussi touye li lor enn poteau souffrance. (Mat. 26:37, 38; Luc 22:44; Jean 19:1, 17, 18) Mem si li ti’nn gagne tou sa bann grand l’epreuve-la ek malgré enn grand souffrance, Jésus ti contigne “obeir ziska la mort.”—Lire Philippiens 2:8.

2, 3. Ki nou kapav aprann ar l’obeissance Jésus malgré ki li ti souffert?

² L’experience ki Jésus ti faire en tant ki enn humain lor la terre, ti enseigne li seki sa vedir obeir dan bann situation difficile ki jamais li pa ti’nn koné avant. (Héb. 5:8) Kitfois li ti parette ki pa ti ena nanyin encore ki Jésus ti pou kapav aprann lor so service pou Jéhovah. Apré tou, li ti’nn ena bann relation bien proche avek Jéhovah pendant enn longue periode le temps ek li ti “zouvrier qualifié” Bondié pendant creation. (Prov. 8:30) Mais kan, en tant ki enn humain li ti enduré avek la foi malgré bann souffrance, sa ti montré so l’integrité dan enn fason complet. Jésus, Garson Bondié, ti progressé pou vinn encore pli proche ar so Papa. Ki nou kapav aprann ar so l’experience?

³ Mem si Jésus ti enn zom parfait, li pa ti essaye reste obeissant par so prop la force. Li ti prié pou gagne l’aide Bondié pou li reste obeissant. (Lire Hébreux 5:7.) Pou nou kapav reste obeissant, nou aussi nou bizin ena l’humilité, ek prié regulierement pou gagne l’aide Bondié. Pou sa raison-la, l’apotre Paul ti donne sa conseil-la bann chretien: “Garde sa l’etat d’esprit ki Christ Jésus aussi ti ena-la,” li “ti abaisse li-mem, ek li ti obeir ziska la mort.” (Phil. 2:5-8) La vie ki Jésus ti amené ti prouvé ki li possible pou bann dimoune obeir mem si zot pé vive dan sa le monde mauvais-la. Li vrai ki Jésus ti parfait, mais ki nou kapav dire lor bann dimoune imparfait couma nou?

Obeir malgré nou l’imperfection

4. Ki sa vedir pou nou ki nou finn crée avek liberté pou choisir?

⁴ Bondié ti crée Adam ek Ève couma bann creature intelligent ki ti ena liberté pou choisir. Nou, en tant ki zot bann descendant, nou aussi nou ena liberté pou choisir. Ki sa vedir? Sa vedir ki nou kapav decidé pou faire seki bon ou-soit seki mauvais, setadir ki Bondié inn donne nou liberté pou choisir pou obeir ou-soit pou desobeir Li. Sa grand liberté-la donne nou aussi enn responsabilité, nou ena bann compte pou rendé. Oui, bann decision ki nou prend lor plan moral, kapav faire nou gagne la vie ou-soit la mort. Zot ena aussi enn l’effet lor bann dimoune ki proche ar nou.

5. Ki la lutte nou tou nou bizin amené, ek couma nou kapav reussi?

⁵ A cause nou l’imperfection, l’obeissance li pa enn kitsoz automatik pou nou. Li pa toujours facile pou obeir bann la loi Bondié. Paul ti faire face ar sa la lutte-la. Li ti ecrire: “Mo trouve enn lot la loi dan mo bann membre ki pé faire la guerre kont la loi mo l’esprit, ek ki pé faire moi vinn esclave la loi peché ki dan mo bann membre.” (Rom. 7:23) Bien sur, li pli facile pou obeir kan nou pena okenn sacrifice pou faire, kan nou pa souffert ni kan pena okenn desavantage. Mais couma nou reagir kan ena enn la lutte entre nou desir pou obeir, ek ‘desir nou la chair ek desir nou lizié’? Si nou ena sa bann mauvais desir-la, c’est a cause nou l’imperfection ek aussi l’influence “l’esprit le monde” ki tout autour nou, ek sa bann desir-la kapav ena enn grand l’influence lor nou. (1 Jean 2:16; 1 Cor. 2:12) Pou nou resisté kont zot, nou bizin ‘prepare nou leker’ avant ki nou dan enn situation difficile ou-soit ki nou tenté, ek nou bizin bien decidé pou obeir Jéhovah n’importe ki arrivé. (Ps. 78:8) Nou ena beaucoup l’exemple biblik bann dimoune ki finn reussi obeir parski zot ti prepare zot leker.—Ezra 7:10; Dan. 1:8.

6, 7. Donne enn l’exemple pou montré couma l’etude personnel kapav aide nou pou prend bann bon decision.

⁶ Enn fason couma nou kapav prepare nou leker c’est kan nou etudié la Bible ek bann publication biblik avek serieux. Maziné ki ou dan sa situation-la: Faire coumadir c’est la soirée kot ou ena ou l’etude personnel. Ou finn fek prié pou gagne l’esprit saint Jéhovah pou aide ou pou applik seki ou aprann dan so Parole. Ou ti decidé ki lendemain apré-midi ou pou guette enn film lor television. Ou finn tann bann bon kitsoz lor sa film-la, mais ou koné aussi ki ena bann scene immoral ek violent ladan.

⁷ Ou medite lor conseil ki Paul donné dan Éphésiens 5:3: “Fodé ki fornication ek l’impureté dan n’importe ki forme, ou-soit desir pou gagne plus, pa mem mentionné parmi zot; c’est coumsa ki sa bizin été pou bann dimoune saint.” Ou rappel aussi conseil ki Paul donné dan Philippiens 4:8. (Lire.) Pendant ki ou medite lor sa conseil inspiré-la, ou demann ou-mem: ‘Si par expré mo expose mo leker ek mo l’esprit ar sa qualité programme-la, eski mo pé suive l’exemple Jésus ek mo pé obeir Bondié couma bizin?’ Ki ou pou faire? Eski malgré tou, ou pou guette film-la?

8. Kifer li pou dangereux si nou baisse nou garde ek nou pa obeir bann principe moral ek spirituel?

⁸ Li pou dangereux si nou baisse nou garde ek nou pa obeir bann principe moral ek spirituel. Kitfois nou pensé ki nou assez fort pou resisté kont l’effet ki bann mauvais frequentation kapav ena lor nou, parmi ena bann frequentation dan forme bann divertissement violent ek immoral. Au lieu ki nou pense coumsa, nou bizin protege nou-mem ek nou bann zenfant kont l’influence Satan ki kapav gate nou spiritualité. Bann dimoune ki servi ordinateur faire bann grand zeffort pou protege li kont bann virus parski sa kapav detruire tou bann kitsoz ki zot inn gardé, dereglé, ek mem prend controle ordinateur-la ek servi li pou attak lezot ordinateur. Si bann dimoune prend sa quantité precaution-la avek bann ordinateur, eski nou, nou pou faire moins attention ek nou pa pou protege-nou kont bann “manigance” Satan?—Éph. 6:11, note.

9. Kifer toulé-jour nou bizin bien decidé pou obeir Jéhovah?

⁹ Preské toulé-jour, dan enn certaine fason, nou bizin choisir si nou pou faire kitsoz dan fason ki Jéhovah content ou-soit non. Pou nou gagne la vie sauve, nou bizin obeir Bondié ek vive en accord avek so bann principe ki juste. Kan nou suive l’exemple Christ ek nou disposé pou obeir mem “ziska la mort,” nou montré ki nou ena enn vrai la foi. Jéhovah pou recompense nou conduite fidele. Jésus ti faire sa promesse-la: “Seki enduré ziska la fin, li-mem ki pou sapé.” (Mat. 24:13) Li clair ki sa demann nou pou developpe enn vrai courage, pareil couma Jésus ti manifesté.—Ps. 31:24.

Jésus—Pli grand l’exemple courage

10. Ki qualité pression kapav ena lor nou, ek couma nou bizin reagir?

¹⁰ Entouré couma nou été par l’attitude ek conduite bann dimoune dan sa le monde-la, nou bizin courage pou pa laisse zot contamine nou. En tant ki chretien, nou gagne bann pression lor plan moral, social, financier, ek religieux, ek sa kapav faire nou desobeir bann principe Jéhovah. Beaucoup bizin faire face ar l’opposition zot famille. Dan certain pays, ena lekol ek l’université ki insisté beaucoup lor theorie l’evolution dan zot l’enseignement, ek beaucoup dimoune pé accepté doctrine ki enseigné ki Bondié pa existé. Devant sa bann pression-la, nou pa kapav faire coumadir nou pa trouve sa ek pa faire nanyin. Nou bizin faire kitsoz pou nou kapav resisté ek protege nou-mem. L’exemple Jésus montré nou couma nou kapav reussi.

11. Kan nou medite lor l’exemple Jésus, couma sa kapav donne nou plus courage?

¹¹ Jésus ti dire so bann disciple: “Dan le monde, zot pé gagne bann l’epreuve, mais prend courage! Mo finn gagne victoire lor le monde.” (Jean 16:33) Jamais li ti cedé devant l’influence sa le monde-la. Jamais li ti laisse le monde faire li arrete so mission pou preché ou-soit faire li baisse so niveau concernant so l’adoration ek enn bon conduite. Nou aussi nou bizin faire pareil. Dan enn la priere, Jésus ti dire lor so bann disciple: “Zot pa faire partie dan le monde, pareil couma moi mo pa faire partie dan le monde.” (Jean 17:16) Kan nou etudié lor l’exemple courage ki Christ inn donne nou ek nou medite lor la, sa kapav donne nou courage necessaire pou reste separé ar le monde.

Aprann ar Jésus couma gagne courage

12-14. Donne bann l’exemple couma Jésus ti manifesté courage.

¹² Jésus ti montré enn grand courage toute longue so ministere. Li ti servi l’autorité ki li ti ena en tant ki Garson Bondié, li pa ti peur pou “rente dan temple ek li ti pousse tou bann ki ti pé vendé ek acheté dan temple, ek li ti devire enba-la-haut la table bann ki ti pé change l’argent, ek banc bann ki ti pé vann pigeon.” (Mat. 21:12) Kan bann soldat ti vinn arrete Jésus dernier la nuit ki li ti passé lor la terre, avek courage, li ti avance devant pou protege so bann disciple, li ti dire: “Si c’est moi ki zot pé rodé, laisse sa bannla allé.” (Jean 18:8) Inpé plitar, li ti dire Pierre ramasse so l’epée, coumsa li ti montré ki li pa ti mette so confiance dan bann zarme ki ena lor sa la terre-la, mais en Jéhovah.—Jean 18:11.

¹³ Avek courage Jésus ti denonce bann fausse enseignant ki ti pé vive dan so lepok ek ki pa ti ena l’amour, li ti denonce aussi zot bann fausse l’enseignement. Li ti dire zot: “Malheur lor zot, bann scribe ek Pharisien hypocrite! Parski zot ferme royaume ki dan le ciel devant bann zom.” Jésus ti dire zot aussi: “Zot finn neglige bann kitsoz ki pli important dan la Loi, setadir, la justice, misericorde ek fidelité. . . . Zot purifié en dehors bann coupe ek bann plat, mais endan zot rempli ar bann kitsoz kokin ek bann l’excès.” (Mat. 23:13, 23, 25) Bann disciple Jésus ti pou bizin ena mem courage parski bann fausse chef religieux ti pou aussi persecute zot ek touye certain parmi zot.—Mat. 23:34; 24:9.

¹⁴ Jésus ti ena courage mem kont bann demon. Enn fois, li ti en face ar enn missié ki ti possedé par bann demon. Sa missié-la ti tellement fort ki personne pa ti kapav attache li avek enn la chaine. Sans okenn la crainte, Jésus ti pousse tou sa bann demon ki ti pé controle sa missié-la. (Marc 5:1-13) Zordi, Bondié pa finn donne bann chretien pouvoir pou faire bann mirak coumsa. Mais, kan nou preché ek enseigné, nou aussi nou bizin faire enn la guerre spirituel kont Satan, sa kikenn ki “finn aveuglé l’esprit bann ki pa’lé croire[-la].” (2 Cor. 4:4) Pareil couma Jésus, nou pa servi “bann zarme ki dimoune servi, mais nou, nou bann zarme zot puissant grace a Bondié ek zot detruire bann kitsoz ki’nn bien enraciné,” setadir bann l’enseignement religieux ki fausse ek ki’nn bien enraciné. (2 Cor. 10:4) Kan nou servi sa bann zarme-la, nou aprann beaucoup ar l’exemple Jésus.

15. Lor ki kitsoz courage Jésus ti basé?

¹⁵ Si Jésus ti ena courage, c’est pa parski li pa ti peur nanyin, non, so courage ti basé lor la foi. Nou aussi nou courage bizin basé lor la foi. (Marc 4:40) Couma nou kapav gagne vrai la foi? Encore enn fois, l’exemple Jésus aide nou. Jésus ti ena enn connaissance profond lor bann l’Ecriture sacré ek enn grand confiance en zot. Zarme ki Jésus ti servi pa ti enn vrai l’epée, mais l’epée l’esprit, setadir Parole Bondié. Plusieurs fois, pou appuye so bann l’enseignement, li ti faire reference ar bann l’Ecriture sacré. Souvent li ti commence so bann parole par: “Finn ecrire,” setadir, seki finn ecrire dan Parole Bondié.a

16. Couma nou kapav gagne enn pli grand la foi?

¹⁶ Tou bann disciple Jésus pou gagne bann l’epreuve. Pou nou developpe enn la foi ki pou aide nou faire face ar sa, nou bizin lire ek etudié la Bible toulé-jour ek assisté bann reunion, faire bann verité lor ki nou la foi basé, rente dan nou l’esprit. (Rom. 10:17) Nou bizin aussi medité, setadir reflechi en profondeur, lor seki nou aprann, laisse sa influence nou leker. Zis enn la foi ki vivant kapav pousse nou pou faire bann action avek courage. (Jacq. 2:17) Nou bizin prié pou gagne l’esprit saint parski la foi forme partie dan fruit l’esprit saint.—Gal. 5:22.

17, 18. Couma enn jeune soeur ti montré courage dan lekol?

¹⁷ Enn jeune soeur ki appel Kitty ti faire l’experience couma vrai la foi donne courage. Depuis jeune, li ti koné ki fodé pa ki li “honté a cause la bonne nouvelle” kan li dan lekol, ek li ti vrai-mem envie rann enn bon temoignage so bann camarade lekol. (Rom. 1:16) Chaque l’année, li ti bien decidé pou preche la bonne nouvelle ar lezot, mais li ti hesité parski li ti mank courage. Plusieurs l’année apré, li ti change lekol. Li ti dire: “Sa fois-la, mo pou rattrape bann l’occasion ki mo finn laisse passé.” Kitty ti prié pou gagne courage ek tact pareil couma Christ ti ena, ek aussi pou gagne enn bon l’occasion pou rann temoignage.

¹⁸ Premier jour lekol, chaque zeleve ti bizin presente-li-mem, enn par enn. Plusieurs ti mentionne zot religion ek ti ajouté ki zot pa vrai-mem pratik zot religion. Kitty ti realisé ki sa c’est l’occasion ki li ti mentionné dan so la priere. Kan so tour ti arrivé, li ti dire avek l’assurance: “Mo enn Témoin de Jéhovah, ek seki guide moi lor plan spirituel ek moral c’est la Bible.” A mesure li ti contigne kozé, certain zeleve ti guette zot camarade ek ti faire enn sourire fichant pou montré ki zot ti pensé ki seki li ti pé dire ti bien bete. Mais ti ena lezot ki ti bien ecouté ek plitar ti pose li question. Professeur Kitty ti mem dire ki Kitty li enn bon l’exemple enn kikenn ki defann so bann croyance. Kitty bien content ki li finn kapav imite courage ki Jésus ti ena.

Montré la foi ek courage pareil couma Christ

19. (a) Ki sa impliké pou ena enn vrai la foi? (b) Couma nou kapav faire Jéhovah plaisir?

¹⁹ Bann zapotre aussi ti trouvé ki bann action ki zot ti faire avek courage ti bizin basé lor la foi. Zot ti suppliye Jésus: “Donne nou plus la foi.” (Lire Luc 17:5, 6.) Ena vrai la foi c’est plus ki zis croire ki Bondié existé. Ena vrai la foi vedir developpe enn relation profond ek bien proche avek Jéhovah, pareil couma relation ki ena entre enn ti zenfant avek enn bon papa ki content li. Salomon ti inspiré pou ecrire: “Mo garson, si to leker inn vinn sage, mo leker aussi pou content. Ek mo lé-rein pou dan la joie kan to la levre pou dire bann kitsoz ki droite.” (Prov. 23:15, 16) Dan mem fason, nou courage pou obeir bann principe ki juste, faire Jéhovah plaisir, ek kan nou konn sa, sa augmente nou courage. Alors, anou toujours imite l’exemple Jésus kan, avek courage, nou defann la justice!

[Note]

Eski ou kapav expliké?

• Ki pou aide nou reste obeissant malgré nou l’imperfection?

• Lor ki kitsoz vrai la foi basé, ek couma sa kapav aide nou pou ena courage?

• Ki resultat nou pou gagné si nou obeissant ek nou montré mem courage ki Christ?

[Zimage lor page 16]

Eski ou pé ‘prepare ou leker’ pou resisté bann tentation?

[Zimage lor page 18]

Pareil couma Jésus, nou kapav montré ki nou ena enn courage ki basé lor la foi