“Vinn bien zelé grace a l’esprit saint”
“Pa faire paresse dan zot travail. Vinn bien zelé grace a l’esprit saint. Travail couma bann esclave pou Jéhovah.”—ROM. 12:11.
1. Kifer bann Israélite ti faire bann sacrifice zanimo ek lezot offrande?
JÉHOVAH apprecié bann sacrifice ki so bann serviteur faire avek tou zot leker pou montré zot l’amour pou Li ek zot soumission ar so volonté. Dan le passé, Li ti accepté bann sacrifice zanimo ek lezot offrande. Bann Israélite ki ti rod gagne pardon pou zot peché ek ki ti envie remercié Bondié, ti faire sa bann sacrifice-la en accord avek la Loi mosaïk. Dan congregation chretien, Jéhovah pa demann nou pou offert sa bann mem qualité sacrifice-la. Mais dan lettre ki l’apotre Paul ti ecrire bann chretien dan la ville Rome, dan chapitre 12, li ti montré ki nou encore bizin offert bann sacrifice. Anou guetté dan ki sens.
Enn sacrifice ki vivant
2. En tant ki chretien, ki qualité la vie nou amené, ek ki sa impliké?
2 Lire Romains 12:1, 2. Dan commencement so lettre, Paul ti prouvé dan enn fason bien clair ki Bondié declare bann chretien juste, ki zot ti Juif ou-soit non-Juif, grace a zot la foi, pa a cause zot action. (Rom. 1:16; 3:20-24) Dan chapitre 12, Paul expliké ki bann chretien bizin montré zot reconnaissance kan zot amenn enn la vie sacrifice. Pou nou kapav faire sa, nou bizin renouvelé nou fason pensé. A cause l’imperfection ki nou finn herité, nou esclave “la loi peché ek la mort.” (Rom. 8:2) Alors, nou bizin transforme nou-mem, “[nou] bizin renouvelé dan la force ki motive [nou] l’esprit,” kan nou change net nou bann tendance. (Éph. 4:23) C’est selman grace a l’aide Bondié ek so l’esprit saint ki nou kapav faire sa qualité changement complet-la. Sa demann aussi ki nou faire bann grand zeffort kan nou servi nou “capacité pou raisonné.” Sa vedir ki nou faire tou seki nou kapav pou pa “faire pareil couma sa le monde-la,” kot ena bann principe moral ki’nn bien degradé, bann divertissement impur, ek enn fason pensée immoral.—Éph. 2:1-3.
3. Kifer nou participe dan bann activité spirituel?
3 Paul encourage nou aussi pou servi nou “capacité pou raisonné” pou nou kapav verifié par nou-mem “ki volonté Bondié, li bon, li acceptable ek li parfait.” Kifer nou lire la Bible toulé-jour, medite lor seki nou lire, prié, assisté reunion ek participe dan predication la bonne nouvelle lor Royaume Bondié? Eski c’est parski bann ancien dan congregation encourage nou pou faire sa? Li vrai ki nou reconnaissant pou bann rappel ki bann ancien donne nou lor la. Mais nou prend part dan bann activité spirituel parski l’esprit saint Bondié pousse-nou pou montré nou l’amour sincere pou Jéhovah. En plus, personnellement nou ena conviction ki, kan nou faire sa bann activité-la, c’est sa volonté ki Bondié ena pou nou. (Zek. 4:6; Éph. 5:10) Nou gagne enn grand la joie ek satisfaction kan nou realisé ki kan nou amenn nou la vie couma enn vrai chretien, sa kapav faire nou gagne faveur Bondié.
Bann don different
4, 5. Couma bann ancien bizin servi zot don?
4 Lire Romains 12:6-8, 11. Paul expliké ki “nou ena bann don different dapré faveur ki personne pa merité ki nou finn gagné.” Certain parmi sa bann don ki Paul mentionné-la, setadir pou encourage lezot ek pou dirigé, concerne surtout bann ancien, ki encouragé pou dirige “avek serieux.”
5 Paul dire ki bann ancien bizin montré sa mem serieux-la kan zot enseigné ek accompli “enn ministere.” Contexte sa verset-la montré ki kitfois ici Paul ti pé faire reference ar “enn ministere” ki bann ancien ti faire dan congregation, ki li appel “enn sel lekor.” (Rom. 12:4, 5) Sa ministere-la li pareil avek seki mentionné dan Actes 6:4, kot bann zapotre dire: “Nou bizin consacré-nou pou la priere ek pou ministere ki concerne la parole.” Ki sa ministere-la impliké? Bann ancien servi zot bann don pou fortifié bann membre congregation. Zot montré ki zot “applik-[zot] ar sa ministere-la” avek serieux kan zot faire zeffort pou donne congregation enn direction ek bann conseil ki sorti dan Parole Bondié. Pou zot arrivé faire sa, zot prié kan zot etudié, kan zot faire bann recherche, kan zot enseigné, ek par travail ki zot faire couma bann berger spirituel. Bann ancien bizin servi zot bann don avek serieux ek prend soin bann brebis “avek la joie.”—Rom. 12:7, 8; 1 Pierre 5:1-3.
6. Couma nou kapav suive conseil ki trouve dan Romains 12:11, verset-clé nou lartik?
6 Pli loin Paul dire: “Pa faire paresse dan zot travail. Vinn bien zelé grace a l’esprit saint. Travail couma bann esclave pou Jéhovah.” Si nou remarké ki nou ena enn tendance pou vinn paresse dan nou ministere, kitfois nou bizin réguette nou bann l’habitude pou etudié ek nou bizin prié Jéhovah avek plus sentiment ek pli souvent pou Li donne nou so l’esprit saint ki kapav aide nou pou combatte tendance pou vinn tiede, ek pou renouvelé nou zele. (Luc 11:9, 13; Rév. 2:4; 3:14, 15, 19) L’esprit saint ti donne bann premier chretien la force pou koz lor “bann kitsoz extraordinaire lor Bondié.” (Actes 2:4, 11) Li pareil aussi zordi, l’esprit saint kapav pousse nou pou nou vinn zelé dan nou ministere, oui, pou nou “vinn zelé grace a l’esprit saint.”
L’humilité ek modestie
7. Kifer nou bizin servi avek humilité ek modestie?
7 Lire Romains 12:3, 16. Bann don ki nou kapav ena, nou ena sa grace a ‘faveur ki personne pa merité,’ ki Jéhovah inn donne nou. Paul dire dan enn lot lettre ki li ti ecrire: “C’est Bondié ki’nn donne nou, nou capacité.” (2 Cor. 3:5) Alors, fodé pa ki nou glorifié nou-mem. Nou bizin reconette avek humilité ki tou seki nou reussi faire, c’est grace a benediction Bondié, pa a cause nou prop capacité. (1 Cor. 3:6, 7) En accord avek sa, Paul dire: “Mo dire sakenn parmi zot, fodé pa li pense plus ki bizin lor li-mem.” Li normal ki nou ena enn certain respé pou nou-mem ek nou trouve la joie ek satisfaction dan nou service pou Jéhovah. Selman, kan nou modeste, setadir kan nou reconette nou limite, sa pou empeche nou pou vinn teti ek ena trop confiance en nou-mem. Au contraire, nou pou envie “pense dan enn fason ki montré ki [nou] ena enn bon jugement.”
8. Couma nou kapav evité ki nou considere nou-mem couma bann dimoune ‘ki trop malin’?
8 Li pou bien bete si nou faire vantard lor seki nou finn reussi faire. C’est “Bondié ki faire poussé.” (1 Cor. 3:7) Paul dire ki Bondié inn donne chaque membre congregation enn certaine “quantité la foi.” Au lieu ki nou senti-nou superieur, nou bizin apprecié seki lezot pé faire dapré quantité la foi ki zot ena. Pli loin Paul dire: “Ena mem pensée sakenn pou so camarade.” Dan enn lot lettre ki li ti ecrire, Paul dire nou pa faire “nanyin avek l’idée pou leve la guerre ni pou mette [nou]-mem en avant, mais avek enn l’esprit l’humilité, considere lezot couma pli superieur ki [nou].” (Phil. 2:3) Sa demann enn vrai l’humilité ek enn grand zeffort pou reconette ki sakenn parmi nou bann frere ek soeur li superieur ar nou dan certaine fason. L’humilité pou empeche enn chretien pou pensé ‘ki li trop malin.’ Li vrai ki bann privilege special dan congregation kapav attire l’attention lor certain, mais nou tou nou pou trouve enn grand la joie kan nou faire “bann kitsoz ki humble,” ki souvent lezot pa remarké.—1 Pierre 5:5.
Nou l’unité dan congregation
9. Kifer Paul compare bann chretien oint ar bann membre enn lekor?
9 Lire Romains 12:4, 5, 9, 10. Paul compare bann chretien oint ar bann membre enn lekor ki servi dan l’unité ek ki dirigé par la Tête, setadir Christ. (Col. 1:18) Li rappel bann chretien oint ki enn lekor ena plusieurs membre ki ena different fonction, ek ki zot, “mem si [zot] beaucoup, [zot] forme enn sel lekor dan l’unité avek Christ.” Avek mem pensée, Paul ti donne sa l’encouragement-la bann chretien oint dan la ville Éphèse: “Anou grandi par l’amour dan tou kitsoz en sa kikenn ki nou chef-la, setadir Christ. Par li, lekor-la net, d’accord ek uni ensam ek cooperé grace a tou bann joint ki donne seki bizin, dapré fonctionnement chaque membre, dan quantité ki bizin, ki permette lekor-la grandi pou ki li fortifié li-mem dan l’amour.”—Éph. 4:15, 16.
10. Ki l’autorité bann “lezot brebis” bizin accepté?
10 Mem si bann “lezot brebis” pa forme partie dan lekor Christ kot ena plusieurs membre, zot kapav aprann beaucoup ar sa l’exemple-la. (Jean 10:16) Paul dire ki Jéhovah inn “soumette tou kitsoz enba lipié [Christ] ek Li ti faire li vinn chef lor tou kitsoz pou la congregation.” (Éph. 1:22) Zordi, bann lezot brebis forme partie parmi “tou kitsoz” ki Jéhovah inn placé enba direction so Garson. Zot forme aussi partie parmi bann “di-bien” ki Christ inn confié “l’esclave fidele et avisé.” (Mat. 24:45-47) Alors, bann chretien ki ena l’esperance pou vive lor la terre bizin accepté Christ couma zot Chef ek soumette ar l’esclave fidele et avisé ek so College central ek ar bann zom ki’nn etabli couma bann surveillant dan congregation. (Héb. 13:7, 17) Sa favorise l’unité dan congregation.
11. Lor ki nou l’unité basé, ek ki lot conseil Paul ti donné?
11 Sa qualité l’unité-la li basé lor l’amour, ki “enn kitsoz parfait ki soude nou tou ensam.” (Col. 3:14) Dan Romains chapitre 12, Paul mette l’accent lor la kan li dire ki “fodé pa ki [nou] l’amour hypocrite” ek ki “dan l’amour fraternel,” nou bizin ena “enn grand l’affection sakenn pou [nou] camarade.” Sa faire nou ena respé sakenn pou nou camarade. L’apotre Paul dire: “Zot bizin toujours premier pou honore sakenn so camarade.” Bien sur, fodé pa nou faire confusion entre l’amour ek enn sentiment exageré. Nou bizin faire tou seki nou kapav pou garde congregation pur. Kan Paul donne conseil lor l’amour, li ajouté: “Ena degout pou seki mauvais, reste attaché ar seki bon.”
L’hospitalité
12. Ki l’exemple bann chretien dan ancien la ville Macédoine inn donne nou lor l’hospitalité?
12 Lire Romains 12:13. Nou l’amour pou nou bann frere ek soeur pou pousse nou pou “partage avek bann saint dapré seki zot bizin” ek dapré nou possibilité. Mem si nou pena beaucoup kitsoz lor plan materiel, nou kapav partage seki nou ena. Kan Paul ti ecrire lor bann chretien dan Macédoine, li ti dire: “Pendant enn grand l’epreuve ek dan bann souffrance, la joie ki zot ti ena en abondance ti faire zot vinn beaucoup pli genereux mem si zot ti bien misere. Mo temoigné ki zot ti faire dapré seki zot moyen ti permette zot, oui, mem plus ki seki zot moyen ti permette zot pou faire, alors ki par zot-mem zot ti contigne suppliye nou ek insisté pou gagne privilege pou donne avek tou zot leker ek pou participe dan ministere pou bann saint [dan Judée].” (2 Cor. 8:2-4) Oui, mem si zot ti misere, bann chretien dan Macédoine ti bien genereux. Zot ti considere sa couma enn privilege pou partage avek zot bann frere ki ti bizin l’aide dan Judée.
13. Ki sa vedir “contigne montré l’hospitalité”?
13 L’expression grec ki’nn traduire par phrase “contigne montré l’hospitalité,” implik prend l’initiative. La Bible de Jérusalem inn traduire sa l’expression-la par “rod bann l’occasion pou montré l’hospitalité.” Parfois, nou montré l’hospitalité kan nou invite enn kikenn pou enn repas, ek kan nou faire sa par amour, li vrai-mem enn bon kitsoz. Mais si nou prend l’initiative, nou pou trouvé ki ena beaucoup lezot fason kot nou kapav montré l’hospitalité. Par exemple, si nou situation pa permette nou pou invite lezot pou enn repas, nou kapav invite zot pou boire enn tasse café, di-thé, ou-soit lezot kitsoz, sa aussi c’est enn fason kot nou montré l’hospitalité.
14. (a) Dan mot grec ki’nn traduire par “hospitalité,” ki deux mot ena? (b) Dan predication, couma nou kapav montré nou l’interet pou bann etranger?
14 L’hospitalité implik fason ki nou trouve bann kitsoz. Dan mot grec ki’nn traduire par “hospitalité” ena deux mot ki vedir “l’amour” ek “etranger.” Ki l’attitude nou ena envers bann dimoune ki nou pa koné, ou-soit bann etranger? Certain chretien faire zeffort pou aprann enn lot langue pou zot kapav preche la bonne nouvelle avek bann etranger ki’nn vinn reste dan territoire zot congregation. Nou kapav vrai-mem considere sa bann chretien-la couma bann dimoune ki montré l’hospitalité. Bien sur, situation beaucoup parmi nou pa permette nou pou aprann enn lot langue. Mais kan-mem, nou tou nou kapav aide bann etranger kan nou servi bien nou brochure Une bonne nouvelle pour des gens de toutes nations, kot ena enn message biblik dan beaucoup langue. Eski ou finn gagne bann bon resultat kan ou finn servi sa brochure-la dan territoire?
Partage sentiment lezot
15. Couma Jésus ti donne l’exemple en rapport avek conseil ki trouve dan Romains 12:15?
15 Lire Romains 12:15. Par sa deux-trois mot-la nou kapav faire enn resumé lor conseil ki Paul donné dan sa verset-la: Konn mette-nou dan place lezot. Nou bizin aprann pou comprend ek mem pou partage sentiment enn lot dimoune, pou partage so la joie ou-soit so chagrin. Si nou zelé grace a l’esprit saint, lezot pou trouvé ki nou ena la joie ou-soit compassion pou zot. Par exemple, kan 70 disciple ti fini preché ek ti retourné avek la joie, zot ti raconte Jésus bann bon resultat ki zot ti gagné, lerla, Jésus li-mem “ti rempli ar la joie dan l’esprit saint.” (Luc 10:17-21) Li ti partage zot la joie. De lot coté, kan so camarade Lazare ti mort, Jésus ‘ti ploré avek bann dimoune ki ti ploré.’—Jean 11:32-35.
16. Couma nou kapav montré ki nou konn mette-nou dan place lezot, ek kisannla surtout bizin faire sa?
16 Nou envie suive l’exemple Jésus ek konn mette-nou dan place lezot. Kan enn frere ou-soit enn soeur li heureux, nou envie partage so la joie. Li pareil aussi kan nou bann frere ek soeur dan la peine, nou bizin partage zot douleur ek zot la peine. Souvent, nou kapav soulage beaucoup nou bann frere ek soeur ki pé souffert lor plan affectif si nou prend le temps pou ecoute zot ek pou mette-nou dan zot place. Ek li possible ki parfois nou tellement touché, ki nou montré nou bann sentiment sincere par nou larme. (1 Pierre 1:22) Bann ancien surtout bizin suive conseil ki Paul donné pou montré zot sympathie.
17. Ki nou finn aprann ziska ler dan Romains chapitre 12, ek ki nou pou examiné dan prochain lartik?
17 Bann verset ki nou finn examiné ziska ler dan Romains chapitre 12 finn donne nou bann conseil ki nou kapav mette en pratik dan nou la vie personnel en tant ki chretien, ek dan nou relation avek nou bann frere. Dan prochain lartik, nou pou examine le reste verset sa chapitre-la. Nou pou trouvé couma nou bizin considere ek agir avek bann dimoune ki en dehors congregation, parmi ena bann dimoune ki opposé ar nou ek ki persecute nou.
Revision
• Couma nou montré ki nou “zelé grace a l’esprit saint”?
• Kifer nou bizin servi Bondié avek humilité ek modestie?
• Dan ki fason nou kapav mette nou dan place lezot ek montré compassion envers nou bann frere ek soeur?
[Zimage lor page 12]
Kifer nou participe dan sa bann activité spirituel-la?
[Zimage lor page 14]
Couma sakenn parmi nou kapav aide bann etranger pou aprann lor Royaume Bondié?