C’est asterla le temps ki Bondié finn surtout approuvé”
“Guetté! C’est asterla le temps ki Bondié finn surtout approuvé. Guetté! C’est asterla jour delivrance.”—2 COR. 6:2.
1. Kifer nou bizin koné ki kitsoz pli important nou bizin faire dan n’importe ki moment?
“POU tou kitsoz ena enn le temps fixé, oui enn le temps pou tou kitsoz ki arrivé lor la terre.” (Eccl. 3:1) Salomon ti pé ecrire lor l’importance pou bien koné dan ki lepok li pli bon pou faire n’importe ki travail ki vaut la peine, soit pou planté, pou voyagé, pou faire business, soit pou koz avek lezot. Selman, dan n’importe ki moment, nou bizin aussi koné ki travail ki pli important nou bizin faire. Sa vedir ki nou bizin konn bien nou bann priorité.
2. Kan Jésus ti preché, couma nou koné ki li ti bien conscient dan ki lepok li ti pé vive?
2 Kan Jésus ti lor la terre, li ti bien conscient dan ki lepok li ti pé vive ek seki li ti bizin faire. So bann priorité ti bien clair dan so l’esprit, li ti koné ki beaucoup prophetie messianik ki bann dimoune ti pé attann accompli depuis longtemps, ti pré pou realisé. (1 Pierre 1:11; Rév. 19:10) Li ti bizin montré ki li-mem sa Messie ki Bondié ti promette-la. Li ti bizin rann enn temoignage a fond lor bann verité en rapport avek Royaume Bondié ek rassemblé bann ki ti pou regne ensam avek li dan sa Royaume-la. Li ti bizin aussi fonde congregation chretien ki ti pou contigne travail predication ek l’enseignement partout lor la terre.—Marc 1:15.
3. Parski Jésus ti conscient ki li pa ti ena beaucoup le temps, ki l’effet sa ti ena lor so bann action?
3 Jésus ti conscient ki li pa ti ena beaucoup le temps, ek sa ti bien motive li pou faire volonté so Papa avek zele. Li ti dire so bann disciple: “Vrai-mem, recolte-la li grand, mais bann travailleur zot tigit. Alors, suppliye Maitre recolte pou Li envoye bann travailleur dan so recolte.” (Luc 10:2; Mal. 4:5, 6) Jésus ti choisir 12 parmi so bann disciple ek enn tipé apré, li ti choisir 70. Li ti donne zot bann instruction bien precis, ek li ti envoye zot pou preche sa message bien encourageant-la: “Royaume ki dan le ciel finn approché.” En seki concerne Jésus li-mem, nou kapav lire: “Kan [li] ti’nn fini donne bann instruction so douze disciple, li ti quitte sa place-la pou al enseigné ek preché dan zot bann la ville.”—Mat. 10:5-7; 11:1; Luc 10:1.
4. Dan ki fason Paul ti imite Jésus Christ?
4 Jésus ti enn modele parfait pou tou so bann disciple kan li ti montré-li zelé ek bien devoué dan so service. C’est seki l’apotre Paul ti montré kan li ti donne sa l’encouragement-la bann chretien dan so lepok: “Imite moi, pareil couma moi mo imite Christ.” (1 Cor. 11:1) Dan ki fason Paul ti imite Christ? Avant tou, li pa ti hesité pou faire tou seki li ti kapav pou preche la bonne nouvelle. Dan bann lettre ki Paul ti ecrire bann congregation, nou trouve bann l’expression couma par exemple: “Pa faire paresse dan zot travail,” “travail couma bann esclave pou Jéhovah,” “ena toujours beaucoup pou faire dan travail nou Seigneur,” ek “n’importe ki zot faire, faire sa avek tou zot nâme coumadir pou Jéhovah.” (Rom. 12:11; 1 Cor. 15:58; Col. 3:23) Paul jamais pa ti’nn blié seki ti arrivé lor chemin pou al Damas. Li pa ti blié aussi seki Jésus ti dire, ki surement Ananias ti repete li apré: “Sa zom-la li-mem vase ki mo’nn choisir pou porte mo nom devant bann nation ek aussi devant bann le roi ek bann Israélite.”—Actes 9:15; Rom. 1:1, 5; Gal. 1:16.
“Le temps ki Bondié finn surtout approuvé”
5. Ki ti pousse Paul pou accompli so ministere avek zele?
5 Kan nou lire livre Actes, nou trouve bien couma Paul ti manifesté courage ek zele pou accompli so ministere. (Actes 13:9, 10; 17:16, 17; 18:5) Paul ti reconette ki li ti pé vive enn lepok bien important. Li ti dire: “Guetté! C’est asterla le temps ki Bondié finn surtout approuvé. Guetté! C’est asterla jour delivrance.” (2 Cor. 6:2) L’année 537 avant nou lepok ti enn le temps approuvé pou bann ki ti exilé dan Babylone pou retourne dan zot pays. (Is. 49:8, 9) Mais dan 2 Corinthiens 6:2, ki Paul ti pé rod dire? Kan nou lire contexte sa verset-la, sa aide nou pou comprend seki Paul ti pé pensé.
6, 7. Ki grand privilege bann chretien oint inn gagné zordi, ek kisannla pé travail ensam avek zot?
6 Enn tipé avant dan so lettre, Paul ti koz lor enn grand privilege ki li ek bann lezot chretien oint ti gagné. (Lire 2 Corinthiens 5:18-20.) Li ti expliké ki Bondié ti’nn appel zot dan enn but precis, pou faire “enn ministere reconciliation,” pou suppliye bann dimoune pou “reconcilié-zot avek Bondié.” Sa vedir ki zot ti kapav retabli zot l’amitié ou-soit zot l’accorité avek Bondié.
7 Depuis rebellion ki ti ena dan jardin Éden, tou bann dimoune finn eloigné ar Jéhovah. (Rom. 3:10, 23) Sa situation-la finn plonge bann dimoune en general dan enn noirté spirituel, ek sa finn amenn souffrance ek la mort. Paul ti ecrire: “Nou koné ki ziska zordi creation entier pé contigne plaigné ensam ek souffert ensam.” (Rom. 8:22) Mais Bondié finn prend bann disposition pou encourage, avredir pou “suppliye,” bann dimoune pou retourné, setadir pou reconcilié avek Li. Sa c’est ministere ki Paul ek bann lezot chretien oint ti gagné dan sa lepok-la. Sa ‘le temps ki Bondié ti approuvé-la’ ti kapav vinn enn “jour delivrance” pou bann ki ti ena la foi en Jésus. Tou bann chretien oint ek zot bann compagnon, “bann lezot brebis,” ki pé travail ensam avek zot, pé contigne invite bann dimoune pou profite sa ‘le temps ki Bondié finn approuvé-la.’—Jean 10:16.
8. Kifer sa l’invitation pou reconcilié avek Bondié-la li extraordinaire?
8 Sa l’invitation pou reconcilié avek Bondié-la li extraordinaire. Kifer? Parski mem si Bondié pa responsable si bann dimoune finn perdi zot bann bon relation avek Li a cause rebellion ki ti ena dan jardin Éden, Li finn faire premier pas pou retabli bann bon relation avek zot. (1 Jean 4:10, 19) Ki Bondié ti faire? Paul ti reponn: “Bondié, par moyen Christ ti pé reconcilié enn le monde avek Li-mem, Li pa ti prend compte zot peché, ek Li ti confié nou parole reconciliation.”—2 Cor. 5:19; Is. 55:6.
9. Ki Paul ti faire pou montré ki li ti apprecié misericorde Bondié?
9 Kan Jéhovah ti donne la ranson, Li ti permette ki bann ki ena la foi gagne pardon zot peché ek retabli zot l’amitié ou-soit zot l’accorité avek Li. En plus, Li ti envoye so bann representant pou suppliye bann dimoune partout pou faire la paix avek Li pendant ki zot encore kapav faire sa. (Lire 1 Timothée 2:3-6.) Paul ti comprend volonté Bondié ek li ti koné dan ki lepok li ti pé vive, alors, li ti travail dur pou consacré li-mem dan “ministere reconciliation.” Volonté Jéhovah pa’nn changé. Li encore toujours ena sa-mem volonté-la dan nou lepok. Kan Paul ti dire ki “c’est asterla le temps ki Bondié finn surtout approuvé” ek ki “c’est asterla jour delivrance,” sa encore appliké zordi. Oui vrai-mem, Jéhovah Li enn Bondié ki ena misericorde ek compassion!—Ex. 34:6, 7.
Pa “mank so but”
10. Ki “jour delivrance” ti representé pou bann chretien oint, dan le passé ek dan nou lepok?
10 Bann premier dimoune ki ti profite sa faveur ki personne pa merité-la, ti bann ki “en union avek Christ.” (2 Cor. 5:17, 18) Pou zot, ‘sa jour delivrance-la’ ti commencé la Pentecôte l’an 33 nou lepok. Depuis sa jour-la, Bondié finn confié sa bann chretien-la enn travail: preche “parole reconciliation.” Dan nou lepok, le reste bann chretien oint encore pé faire ‘sa ministere reconciliation-la.’ Zot koné ki sa quatre ange ki l’apotre Jean ti trouvé dan enn vision prophetik-la, pé “tini bien fort quatre di-vent la terre, pou ki okenn di-vent pa soufflé lor la terre.” Sa vedir ki c’est toujours enn “jour delivrance” ek enn “le temps ki Bondié finn surtout approuvé.” (Rév. 7:1-3) Pou sa raison-la, depuis commencement 20eme siecle, le reste bann chretien oint finn consacré zot-mem avek zele dan “ministere reconciliation” dan bann region pli loin lor la terre.
11, 12. Dan commencement 20eme siecle, couma bann chretien oint ti montré ki zot ti conscient dan ki lepok zot ti pé vive? (Guette zimage dan page 23.)
11 Par exemple, pareil couma nou kapav lire dan livre Les Témoins de Jéhovah : Prédicateurs du Royaume de Dieu, kan 20eme siecle ti pré, “C. T. Russell ek so bann associé ti ena enn grand conviction ki zot ti pé vive dan enn lepok recolte ek ki bann dimoune ti bien bizin tann la verité ki ti pou delivré zot.” Ki zot ti faire? Parski zot ti realisé ki zot ti pé vive enn “le temps ki Bondié finn surtout approuvé,” sa bann frere-la pa ti contente-zot zis pou invite bann dimoune pou vinn assisté bann reunion religieux. C’est sa-mem ki clergé la chretienté ti pé faire depuis longtemps. Parkont, bann chretien oint zot, zot ti commence rod bann lezot fason pratik pou preche la bonne nouvelle partout. Parmi bann kitsoz ki zot ti faire, zot ti servi bien bann dernier technologie pou faire zot travail progressé.
12 Pou zot preche la bonne nouvelle lor Royaume Bondié partout, sa ti groupe ministre bien zelé-la ti servi bann tract, bann periodik ek bann livre. Zot ti aussi ecrire bann discours ek bann lartik ek zot ti distribué sa pou ki imprime zot dan plusieurs millier la gazette. Zot ti passe bann programme biblik lor bann radio national ek international. Avant mem ki cinema ti faire bann film avek son pou publik, zot ti produire ek zot ti servi bann zimage ki bougé ek zot ti passe sa ensam avek bann son ki ti’nn enregistré. Ki resultat zot ti gagné parski zot ti contigne manifesté enn zele coumsa? Zordi, ena apepré sept million dimoune ki finn accepté message pou “reconcilié-zot avek Bondié,” ek zot aussi zot annonce sa message-la. Oui, sa bann serviteur Jéhovah dan le passé-la ti bann bon l’exemple dan fason ki zot ti montré zot zele malgré ki zot ti tigit ek zot pa ti ena assez l’experience.
13. Ki projet Bondié nou bizin prend serieux?
13 Kan Paul ti dire: “C’est asterla le temps ki Bondié finn surtout approuvé,” sa bann parole-la toujours vrai. Nou ki finn goute faveur Jéhovah, faveur ki personne pa merité, nou bien reconnaissant ki nou finn gagne possibilité pou tann ek pou accepté message pou reconcilié-nou avek Bondié. Au lieu ki nou trop satisfait ar nou-mem, nou prend bann parole Paul serieux: “Nou aussi suppliye zot pou pa accepté faveur ki Bondié donné ek ki personne pa merité, pou apré mank so but.” (2 Cor. 6:1) But sa faveur-la c’est pou “reconcilié enn le monde avek Li-mem” par moyen Christ.—2 Cor. 5:19.
14. Ki developpement positif pé arrivé dan beaucoup pays?
14 Majorité dimoune ki finn aveuglé par Satan, encore eloigné ar Bondié ek zot pa konn but faveur Bondié ki personne pa merité. (2 Cor. 4:3, 4; 1 Jean 5:19) Selman, bann condition dan le monde ki pé vinn pli pire finn pousse beaucoup dimoune pou accepté nou message kan nou finn montré zot ki c’est parski bann dimoune eloigné ar Bondié ki ena le mal ek souffrance lor la terre. Mem dan bann pays kot la plupart dimoune ti indifferent envers nou predication, asterla, beaucoup pé accepté la bonne nouvelle ek zot pé faire kitsoz pou reconcilié-zot avek Bondié. Alors, eski nou comprend ki nou pé vive enn lepok kot nou bizin ena plus zele pou faire konn partout sa supplication-la: “Reconcilié-zot avek Bondié”?
15. Au lieu ki nou preche enn message zis pou faire bann dimoune senti-zot bien, ki nou envie bann dimoune partout koné?
15 Nou travail c’est pa zis pou dire bann dimoune ki si zot tourne-zot vers Bondié, Li pou aide zot pou reglé zot bann probleme ek ki zot pou senti-zot pli bien. C’est sa-mem ki beaucoup pé rodé kan zot al l’eglise, ek bann chef religieux bien envie realise sa desir-la. (2 Tim. 4:3, 4) C’est pa l’objectif nou ministere. La bonne nouvelle ki nou preché c’est ki Jéhovah, par amour, disposé pou pardonne peché bann dimoune par moyen Christ. Coumsa, bann dimoune kapav sorti dan sa situation kot zot eloigné ar Bondié-la ek reconcilié-zot avek Li. (Rom. 5:10; 8:32) Mais selman, sa “le temps ki Bondié finn surtout approuvé[-la],” pré pou fini.
“Vinn bien zelé grace a l’esprit saint”
16. Ki ti aide Paul pou manifesté courage ek zele?
16 Alors, couma eski nou kapav developpe ek garde nou zele pou vrai l’adoration? Kitfois certain zot timide ou-soit zot pa trop content kozé ek li possible ki zot trouve sa difficile pou dire seki zot ressenti ou-soit pou faire camarade. Selman, li bon ki nou rappel ki zele, li pa zis ki nou montré enn certain l’emotion ou-soit enn certain l’enthousiasme; ni li depann lor personnalité enn dimoune. Paul ti faire remarké couma nou kapav developpe ek garde nou zele, kan li ti donne sa conseil-la bann chretien dan so lepok: “Vinn bien zelé grace a l’esprit saint.” (Rom. 12:11) L’esprit saint Jéhovah ti joué enn grand role dan courage ek l’endurance ki Paul ti ena pou preche la bonne nouvelle. Depuis lepok ki Jésus ti appel li ziska so dernier l’emprisonnement ek so la mort couma enn martyre dan Rome—enn periode plus ki 30 an—zele ki Paul ti ena pa ti diminué. Li ti touletan compte lor Bondié, ki par so l’esprit saint ti donne Paul la force ki li ti bizin. Li ti dire: “Pou tou kitsoz mo ena courage grace a celui ki donne moi la force.” (Phil. 4:13) Oui, nou kapav tire enn grand profit si nou examine so l’exemple!
17. Couma nou kapav “vinn bien zelé grace a l’esprit saint”?
17 Dan Romain 12:11, l’apotre Paul ti servi enn mot grec ki vedir dan enn fason litteral “bouilli.” (Nouveau Testament interlinéaire grec/français, M. Carrez.) Pou ki enn bouilloire de l’eau contigne bouilli, bizin contigne ena enn la source chaleur enba bouilloire-la. Li pareil aussi pou nou, pou ki nou “vinn bien zelé grace a l’esprit saint,” nou bizin l’esprit saint Bondié touletan. Fason ki nou kapav gagne sa l’esprit-la c’est kan nou profite bien tou bann disposition ki Jéhovah prend pou fortifié nou lor plan spirituel. Sa vedir ki nou bizin prend serieux nou l’etude la Bible dan la famille ek bann reunion ki ena congregation. Nou faire sa kan nou regulier dan nou l’etude personnel ek familial, kan nou prié ek nou assisté reunion regulierement avek bann lezot chretien. Sa bann disposition-la pou aide nou pou “vinn bien zelé grace a l’esprit saint,” pareil couma difé faire enn bouilloire de l’eau contigne bouilli.—Lire Actes 4:20; 18:25.
18. En tant ki bann chretien baptisé, lor ki l’objectif nou bizin fixé nou l’esprit?
18 Enn chretien baptisé c’est enn kikenn ki fixé tou so l’esprit lor enn l’objectif ek li pa laisse nanyin distraire-li ou-soit decourage-li pou poursuive sa l’objectif-la. En tant ki chretien, nou l’objectif c’est pou faire tou seki Jéhovah envie nou faire, pareil couma Jésus ti faire. (Héb. 10:7) Zordi, volonté Jéhovah c’est ki pli beaucoup dimoune possible reconcilié avek Li. Alors, pareil couma Jésus ek Paul, anou accompli avek zele sa travail pli important ek urgent ki nou ena pou faire zordi-la.
Eski ou rappel?
• Ki été “ministere reconciliation” ki Paul ek lezot chretien oint ti gagné?
• Couma le reste bann chretien oint ti bien servi “le temps ki Bondié finn surtout approuvé”?
• Couma bann ministre chretien kapav “vinn bien zelé grace a l’esprit saint”?
[Zimage page 20]
Jamais Paul pa ti blié seki ti arrivé lor chemin pou al Damas