“Zot mo bann camarade”
“Zot mo bann camarade si zot faire seki mo donne zot l’ordre pou faire.”—JEAN 15:14.
1, 2. (a) Dan ki different l’environnement bann camarade Jésus ti sorti? (b) Kifer li bien important ki nou camarade ar Jésus?
BANN zom ki ti pé assize ensam avek Jésus dan enn la chambre la-haut, ti sorti dan different l’environnement. Pierre ek so frere André ti bann pecheur. Avant, Matthieu, ti enn kikenn ki ti ramasse taxe—enn travail ki bann Juif ti meprisé. Certain, couma Jacques ek Jean ti surement konn Jésus depuis zot tipti. Lezot, couma Nathanaël, kitfois finn konn li depuis selman deux-trois l’année. (Jean 1:43-50) Pourtant, tou bann ki ti la avek Jésus pendant sa la nuit special kot zot ti pé fête Pâque dan Jérusalem, ti sur ki Jésus ti Messie ki Bondié ti’nn promette, Garson Bondié ki vivant. (Jean 6:68, 69) Surement sa ti bien touche zot leker kan zot ti tann li dire zot: “Mo finn appel zot mo bann camarade, parski tou kitsoz ki mo’nn tendé ar mo Papa, mo finn faire zot konn sa.”—Jean 15:15.
2 Seki Jésus ti dire so bann zapotre fidele, applik ar tou bann chretien oint zordi, ek dan enn sens pli large, sa applik ar zot bann compagnon, bann membre “lezot brebis.” (Jean 10:16) N’importe dan ki culture ou-soit l’environnement nou sorti, nou kapav gagne privilege pou vinn bann camarade Jésus. Nou l’amitié avek li ena enn grand l’importance, parski kan nou camarade avek li, sa faire nou vinn camarade ar Jéhovah aussi. En realité, li impossible pou nou approche-nou ar Jéhovah sans ki nou approche-nou ar Christ avant. (Lire Jean 14:6, 21.) Alors, ki nou bizin faire pou vinn camarade ar Jésus ek pou reste so bann camarade? Avant ki nou examine sa sujet bien important-la, anou examine l’exemple ki Jésus inn donne nou kan li-mem li’nn montré ki li ti enn bon camarade ek anou guetté ki nou kapav aprann ar fason ki so bann disciple ti reagir ar so l’amitié.
Jésus donne nou l’exemple en rapport avek l’amitié
3. Ki reputation Jésus ti ena?
3 Salomon, ki ti enn le roi bien sage ti ecrire: “Enn dimoune riche gagne beaucoup camarade.” (Prov. 14:20) Sa remark-la faire enn bon resumé concernant tendance ki bann dimoune imparfait ena pou choisir zot camarade dependant lor seki zot kapav gagné, pa lor seki zot kapav donné. Jésus pa ti manifesté enn faiblesse coumsa. Li pa ti laisse-li influencé ni par richesse enn dimoune ni par so position social. Li vrai ki Jésus ti bien content enn jeune chef ki ti riche ek ti invite li pou vinn so disciple. Selman, Jésus ti dire sa missié-la pou vann seki li ti ena ek pou donne sa bann pauvre. (Marc 10:17-22; Luc 18:18, 23) Bann dimoune ti konn Jésus, pa pou so l’amitié avek bann dimoune riche ou-soit ki ti ena enn grand position, mais pou so l’amitié avek bann ti-dimoune ek bann ki lezot ti meprisé.—Mat. 11:19.
4. Kifer nou kapav dire ki bann camarade Jésus ti ena bann defaut?
4 Bien sur, bann camarade Jésus ti ena bann defaut. Enn fois Pierre pa ti reussi trouve bann kitsoz dan enn fason spirituel. (Mat. 16:21-23) Jacques ek Jean ti montré ki zot ti ena l’ambition dan zot leker kan zot ti demann Jésus bann grand-grand position dan so Royaume. Sa ti faire bann lezot zapotre bien en colere kan zot ti tann sa. Touletan bann zapotre ti laguerre pou koné kisannla ki pli grand. Pourtant, Jésus ti essaye corrige fason pensé so bann camarade avek patience ek li pa ti gagne nerf vite ar zot.—Mat. 20:20-28.
5, 6. (a) Kifer Jésus ti reste camarade ar la plupart so bann zapotre? (b) Kifer Jésus ti arrete so l’amitié ar Judas?
5 C’est pa parski Jésus ti trop tolere zot, ou-soit parski li ti ferme lizié lor zot l’imperfection ki li ti contigne reste camarade avek sa bann dimoune imparfait-la. Au contraire, li ti choisir pou guette zot bann bon mobile ek zot bann bon qualité. Par exemple, Pierre, Jacques ek Jean ti dormi au lieu ki zot ti soutenir Jésus kan li ti pé passe par enn l’epreuve bien dur dan so la vie. Nou comprend ki Jésus ti decouragé par zot maniere faire. Mais kan-mem, li ti trouvé ki zot ti ena bann bon mobile, parski li ti dire: “Oui, l’esprit li fort, mais la chair li faible.”—Mat. 26:41.
6 Parkont, Jésus ti arrete so l’amitié avek Judas Iscariote. Mem si Judas ti faire semblant ki li ti camarade ar Jésus, Jésus ti remarké ki sa ancien camarade-la ti’nn laisse so leker vinn mauvais. Parski Judas ti’nn vinn camarade ar le monde, li ti’nn faire li-mem vinn l’ennemi Bondié. (Jacq. 4:4) C’est a cause sa ki Jésus ti’nn fini faire Judas allé kan Li ti confirme So l’amitié avek so 11 lezot fidele zapotre.—Jean 13:21-35.
7, 8. Couma Jésus ti montré so l’amour pou so bann camarade?
7 Jésus ti passe lor defaut so bann camarade ki ti fidele, ek li ti toujours faire kitsoz dan zot l’interet. Par exemple, li ti prié pou ki so Papa protege zot dan bann l’epreuve. (Lire Jean 17:11.) Jésus ti montré ki li ti prend compte bann limite ki zot ti ena lor plan physik. (Marc 6:30-32) Li pa ti zis interessé pou dire zot seki li ti pensé, mais li ti aussi envie tendé ek comprend seki zot ti pensé ek ressenti.—Mat. 16:13-16; 17:24-26.
8 Jésus ti vive ek ti mort pou so bann camarade. Li vrai ki Jésus ti koné ki li ti bizin donne so la vie en sacrifice en accord avek la loi Jéhovah ek pou respecté bann principe juste so Papa. (Mat. 26:27, 28; Héb. 9:22, 28) Mais Jésus ti donne so la vie pou montré so l’amour. Li ti dire: “Personne pena enn pli grand l’amour ki sa: ki enn kikenn donne so nâme pou so bann camarade.”—Jean 15:13.
Couma bann disciple ti reagir ar l’amitié Jésus?
9, 10. Couma bann dimoune ti reagir ar generosité Jésus?
9 Jésus ti genereux kan li ti donne so le temps, so l’affection ek so bann kitsoz materiel. A cause sa, bann dimoune ti senti-zot proche ar li ek zot aussi zot ti content pou donne li en retour. (Luc 8:1-3) Grace a so l’experience personnel, Jésus ti kapav dire: “Prend l’habitude donné, ek dimoune pou donne zot. Bann dimoune pou vide enn grand mesure dan zot poche devant, zot pou tasse mesure-la bien, zot pou sakouye li, ek li pou debordé. Parski c’est avek sa mesure ki zot mesuré-la, ki lezot pou mesure pou zot.”—Luc 6:38.
10 Bien sur, certain ti essaye faire camarade ar Jésus zis pou gagne kitsoz ar li. Sa bann fausse camarade-la ti abandonne Jésus kan zot ti mal comprend seki li ti dire. Au lieu ki zot ti faire Jésus confiance, desuite zot ti tire enn mauvais conclusion ek zot ti tourne zot lé-dos ar li. Parkont bann zapotre zot, zot ti fidele. Souvent zot l’amitié avek Jésus ti passe par bann test, mais zot ti faire tou seki zot ti kapav pou soutenir li dan bann bon ek bann mauvais moment. (Lire Jean 6:26, 56, 60, 66-68.) Pendant so dernier la nuit lor la terre en tant ki enn humain, Jésus ti dire ki quantité li ti content so bann camarade: “Mais zot, zot bann ki finn contigne reste avek moi dan mo bann l’epreuve.”—Luc 22:28.
11, 12. Couma Jésus ti réconfirme so l’amour pou so bann disciple, ek couma zot ti reagir?
11 Zis apré ki Jésus ti felicite so bann disciple parski zot ti fidele, sa bann mem zom-la ti abandonne li. Pou enn ti moment, zot ti laisse la peur pou bann zom vinn pli fort ki zot l’amour pou Christ. Encore enn fois, Jésus ti pardonne zot. Apré so la mort ek so resurrection, li ti apparette ar zot ek ti réconfirme so l’amitié pou zot. En plus, li ti donne zot enn mission sacré—pou faire bann disciple “parmi bann dimoune dan tou bann nation” ek pou vinn so bann temoin “ziska dan region pli loin lor la terre.” (Mat. 28:19; Actes 1:8) Couma bann disciple ti reagir?
12 Bann disciple ti faire tou seki zot ti kapav pou preche message lor Royaume Bondié. Avek l’aide l’esprit saint Jéhovah, zot pa ti tardé pou rempli Jérusalem ar zot l’enseignement. (Actes 5:27-29) Mem kan zot bann l’ennemi ti menace pou touye zot, sa pa ti empeche zot pou obeir commandement ki Jésus ti donne zot setadir pou faire bann disciple. Zis deux-trois dizaine l’année apré ki zot ti gagne l’ordre pou faire bann disciple, l’apotre Paul ti kapav ecrire ki la bonne nouvelle ti’nn preché “dan tou creation ki trouve enba le ciel.” (Col. 1:23) Oui, sa bann disciple-la ti montré ki zot ti apprecié l’amitié ki zot ti ena avek Jésus!
13. Dan ki fason bann disciple Jésus ti laisse so bann l’enseignement influence zot?
13 Bann ki ti vinn bann disciple ti aussi laisse bann l’enseignement Jésus influence zot la vie personnel. Beaucoup ti bizin faire bann grand changement dan zot conduite ek zot personnalité. Certain nouveau disciple avant ti bann homosexuel, ti commette l’adultere, ti bann soulard ou-soit bann voleur. (1 Cor. 6:9-11) Bann ki ti ena prejugé envers bann dimoune enn lot race, ti bizin change zot l’attitude. (Actes 10:25-28) Kan-mem sa, zot ti obeir Jésus. Zot ti rejette zot vié personnalité ek ti mette enn nouveau personnalité lor zot. (Éph. 4:20-24) Zot ti gagne enn connaissance lor “pensée Christ,” ek zot ti comprend ek imite so fason pensée ek so fason agir.—1 Cor. 2:16.
L’amitié avek Christ zordi
14. Ki Jésus ti promette pou faire pendant “conclusion sa systeme-la”?
14 Beaucoup parmi sa bann chretien premier siecle-la ti’nn konn Jésus personnellement ou-soit ti’nn trouve li apré so resurrection. Nou, nou pa finn gagne sa privilege-la. Alors, couma nou kapav vinn bann camarade Christ? Enn fason c’est kan nou obeir direction ki l’esclave fidele et avisé donne nou. Sa l’esclave-la c’est bann frere oint Jésus ki encore vivant lor la terre. Jésus ti promette ki pendant “conclusion sa systeme-la,” li ti pou etabli sa l’esclave-la lor “tou so bann di-bien.” (Mat. 24:3, 45-47) Zordi, majorité dimoune ki rod vinn camarade ar Christ pa membre sa groupe l’esclave-la. Couma eski fason ki zot reagir ar direction ki zot gagné ar sa l’esclave-la influence zot l’amitié avek Christ?
15. Ki montré si enn dimoune pou parmi bann mouton ou-soit bann cabri?
15 Lire Matthieu 25:31-40. Jésus ti appel bann ki ti pou forme partie dan groupe l’esclave fidele, so bann frere. Dan l’exemple lor separation bann mouton ek bann cabri, Jésus ti faire nou bien comprend ki, fason ki nou traite so bann frere, li considere sa coumadir nou pé traite li personnellement. En realité, li ti dire ki enn kitsoz important ki ti pou montré difference entre enn mouton ek enn cabri c’est fason ki enn dimoune traite mem “pli tipti parmi [so] bann frere.” Alors, c’est surtout kan zot soutenir l’esclave fidele ki bann dimoune ki ena l’esperance pou vive lor la terre montré ki zot envie vinn camarade ar Christ.
16, 17. Couma nou kapav montré nou l’amitié envers bann frere Christ?
16 Si ou ena l’espoir pou vive lor la terre enba direction Royaume Bondié, couma ou kapav montré ou l’amitié envers bann frere Christ? Anou examine zis trois fason. Premierement, kan ou participe dan travail predication avek tou ou leker. Christ ti donne l’ordre so bann frere pou preche la bonne nouvelle dan le monde entier. (Mat. 24:14) Selman, bann frere Christ ki encore lor la terre zordi ti pou gagne beaucoup difficulté pou accompli sa travail ki ti’nn donne zot-la sans l’aide bann membre lezot brebis. En realité, chaque fois ki bann membre lezot brebis participe dan travail predication, zot aide bann frere Christ pou rempli zot mission sacré. Jésus Christ ek l’esclave fidele et avisé bien apprecié sa action ki zot faire pou montré zot l’amitié-la.
17 Enn deuxieme fason ki bann membre lezot brebis kapav aide bann frere Christ c’est kan zot soutenir travail predication lor plan materiel. Jésus ti encourage so bann disciple pou servi “bann richesse injuste” pou faire bann camarade. (Luc 16:9) Sa pa vedir ki nou kapav acheté l’amitié Jésus ou-soit Jéhovah. Au contraire, kan nou servi nou bann kitsoz materiel pou soutenir l’interet Royaume Bondié, nou montré nou l’amitié ek nou l’amour, pa zis par bann parole, mais “par bann action ek la verité.” (1 Jean 3:16-18) Nou donne sa soutien materiel-la kan nou participe dan predication, kan nou faire bann contribution avek nou l’argent pou bann construction ek l’entretien nou bann la salle kot nou faire reunion ou-soit l’assemblée, ek kan nou faire bann contribution pou travail predication dan le monde entier. Ki nou donne beaucoup ou-soit tigit, pena doute ki Jéhovah ek Jésus apprecié kan nou donne avek la joie.—2 Cor. 9:7.
18. Kifer nou bizin obeir direction biblik ki bann ancien donne nou?
18 Enn troisieme fason ki nou tou nou kapav montré ki nou camarade avek Christ c’est kan nou cooperé ar direction ki nou gagné avek bann ancien dan congregation. Sa bann zom-la zot etabli par l’esprit saint enba direction Christ. (Éph. 5:23) L’apotre Paul ti ecrire: “Obeir bann ki pé dirige zot ek soumette ar zot.” (Héb. 13:17) Parfois, li kapav arrivé ki nou trouve sa difficile pou obeir direction biblik ki bann ancien dan congregation donne nou. Surement nou konn zot bann defaut, ek a cause sa, nou kapav trouve difficile pou accepté zot conseil. Kan-mem, Christ, Chef congregation, content pou servi sa bann zom imparfait-la. Alors, fason ki nou reagir ar zot l’autorité ena enn l’influence direct lor nou l’amitié avek Christ. Kan nou passe lor defaut bann ancien ek suive zot direction avek plaisir, nou montré nou l’amour pou Christ.
Ki coté nou kapav trouve bann bon camarade
19, 20. Ki nou kapav trouvé dan congregation, ek ki nou pou examiné dan prochain lartik?
19 Jésus contigne prend nou soin pa zis a travers bann ancien ki rempli ar l’amour ek ki veille lor nou, mais aussi kan li donne nou bann mama, bann frere ek bann soeur spirituel dan congregation. (Lire Marc 10:29, 30.) Kan ou ti fek commence frequente l’organisation Jéhovah, couma ou bann famille ti reagir? Nou esperé ki zot ti soutenir ou bann zeffort pou vinn proche ar Bondié ek ar Christ. Mais Jésus ti averti nou ki parfois “bann l’ennemi enn zom pou sorti dan so prop famille.” (Mat. 10:36) Sa encourage nou pou koné ki dan congregation, nou kapav trouve bann dimoune ki pou attaché ar nou plus ki enn prop frere!—Prov. 18:24.
20 Kan nou guette bann salutation personnel ki Paul ti faire a la fin lettre ki li ti ecrire bann chretien dan Rome, nou trouvé ki li ti’nn faire beaucoup bon camarade. (Rom. 16:8-16) L’apotre Jean ti termine so troisieme lettre avek sa bann parole-la: “Faire compliment mo bann camarade, sakenn par so nom.” (3 Jean 14) Li clair ki li aussi li ti ena beaucoup bon camarade. Couma nou kapav imite l’exemple Jésus ek bann premier disciple kan nou faire bann bon camarade avek nou bann frere ek soeur spirituel ek kan nou entretenir sa l’amitié-la? Dan prochain lartik nou pou examine reponse sa question-la.
Couma ou pou reponn?
• Ki l’exemple Jésus inn donne nou concernant vrai l’amitié?
• Couma bann disciple ti reagir ar l’amitié Jésus?
• Couma nou kapav montré ki nou bann camarade Christ?
[Zimage lor page 21]
Jésus ti interessé pou koné seki so bann camarade ti pensé ek seki zot ti ressenti
[Zimage lor page 23]
Couma nou kapav montré ki nou envie vinn camarade avek Christ?