L’etude la Bible en famille bien important pou survive!

MAZINÉ couma “la guerre grand jour Bondié, sa Kikenn Tout-Puissant-la” pou faire peur! (Rév. 16:14) Par bann l’exemple bien clair, prophete Mika ti ecrire: “Bann montagne pou fonn . . . , ek bann la plaine pou fann, pareil couma la cire a cause difé, pareil couma kan pé verse de l’eau lor enn la pente.” (Mika 1:4) Ki mauvais consequence sa pou ena lor bann ki pa pé servi Jéhovah? Parole Bondié dire: “Bann dimoune ki Jéhovah pou touyé sa jour-la, pou depuis enn boute la terre ziska lot boute.”—Jér. 25:33.

A cause sa bann l’avertissement-la, bann chef famille—beaucoup parmi zot ki pé elevé zot zenfant tousel—pou faire bien pou demann zot-mem concernant zot bann zenfant ki ena l’age pou comprend: ‘Eski zot pou sapé kan Har-Maguédôn arrivé?’ La Bible donne l’assurance ki si zot ena enn bon relation avek Jéhovah, dapré seki zot l’age permette zot ena zot pou sapé kan sa arrivé.—Mat. 24:21.

L’importance pou ena enn moment pou l’etude la Bible en famille

En tant ki parent, faire sur ki ou faire tou seki ou kapav pou elevé ou bann zenfant “dan discipline ek dan bann l’avertissement Jéhovah.” (Éph. 6:4) Etudié la Bible avek ou bann zenfant, c’est enn kitsoz bien-bien important. Nou envie ki nou bann jeune ressemblé bann chretien ki ti reste dan la ville Philippes, ki Paul ti felicité parski zot ti obeir Jéhovah avek tou zot leker. Li ti ecrire: “Bann ki mo bien content, pareil couma zot finn toujours obeir, pa zis pendant mo presence, mais asterla, encore pli bien pendant mo l’absence, contigne travail pou zot delivrance avek la crainte ek tremblement.”—Phil. 2:12.

Eski ou bann zenfant obeir bann la loi Jéhovah kan ou pa avek zot? Couma zot agir kan zot dan lekol? Couma ou kapav aide ou bann zenfant pou gagne conviction ki bann la loi Jéhovah zot sage pou ki zot laisse sa guide zot mem kan ou pa la?

L’etude la Bible en famille kapav joué enn grand role pou fortifié la foi ou zenfant pou li obeir Jéhovah mem kan ou pa la. Alors, anou guette trois point important ki pou faire ou l’etude la Bible en famille reussi.

L’etude-la bizin regulier

La Bible montré nou ki bann ange zot invité pou vinn devant Bondié dan enn ler precis. (Job 1:6) Faire pareil avek ou bann zenfant. Fixé enn jour ek enn ler pou faire l’etude la Bible en famille, ek apré respecté sa jour-la ek sa ler-la. En plus, fini reserve enn lot moment precis pou faire l’etude la Bible en famille si jamais arrive enn l’evenement ki ou pa’nn attann sa jour kot ti bizin faire l’etude-la.

A mesure ki bann mois passé, pa developpe l’attitude pou faire l’etude la Bible en famille enn fois le temps. Rappel, ki ou bann zenfant, zot bann etudiant la Bible pli important ki ou ena. Pourtant, Satan envie faire zot vinn so bann victime. (1 Pierre 5:8) Si enn soir, au lieu ki ou faire ou l’etude la Bible en famille ki ena enn grand valeur, ou guette television ou-soit faire bann lezot kitsoz moins important, Satan pou’nn gagne enn victoire.—Éph. 5:15, 16; 6:12; Phil. 1:10.

L’etude-la bizin pratik

L’etude la Bible en famille bizin plus ki zis aprann bann l’information. Faire zeffort pou faire li vinn pratik. Couma? De temps en temps, choisir bann sujet ki ena enn rapport avek bann situation ki ou zenfant pou faire face dan bann jour ou-soit bann semaine ki pou vini. Par exemple, kifer ou pa faire bann ti demonstration pou prepare zot pou predication? Bann jeune content faire bann kitsoz dan ki zot doué. Kan zot pratik bann presentation ek kan zot pense lor fason ki kapav surmonte bann objection, sa pou aide zot pou ena plus confiance kan zot participe dan different l’aspect nou ministere.—2 Tim. 2:15.

Ou kapav faire aussi bann demonstration ki pou aide ou bann zenfant faire face ar pression bann camarade. Ou kapav servi bann l’information ki ena dan chapitre 15, dan livre Les jeunes s’interrogent — Réponses pratiques, volume 2, couma enn base pou faire bann discussion en famille. L’encadré “ Contre la pression du groupe ” ki trouve lor page 132 ek 133 donne bann suggestion ek donne ou zenfant aussi bann l’occasion pou prepare bann reponse ki li pou a l’aise pou reponn. Enn note ki trouve enba lor page 133 donne sa l’encouragement-la bann jeune: “Entraine-ou avek ou papa, ou mama ou-soit enn camarade ki mur.” Kifer de temps en temps ou pa faire bann repetition coumsa dan ou l’etude la Bible en famille?

L’etude la Bible en familial donne bann parent l’occasion pou mette l’accent lor bann bienfait ki zot zenfant kapav gagné si zot ena bann l’objectif spirituel. En rapport avek sa, dan livre Les jeunes s’interrogent, volume 2, ena bann bon renseignement lor la dan chapitre 38, ki ena titre “ Que vais-je faire de ma vie ? ” Kan ou pé examine sa chapitre-la, aide ou zenfant pou comprend ki pli bon choix ki enn dimoune kapav faire, c’est mette service pou Jéhovah en premier dan so la vie. Aide ou zenfant developpe desir pou vinn pionnier, servi dan Béthel, assisté Lekol formation ministeriel, ou-soit faire lezot forme service a plein temps.

Mais faire attention: Certain parent ki ena bann bon l’intention zot tellement mette l’accent lor seki zot envie zot zenfant vini, ki parfois zot blié pou trouve seki li pé faire deja. Oui, li bon ki ou encourage ou zenfant pou ena bann bon l’objectif couma servi dan Béthel ek faire service missionnaire. Mais kan ou faire sa, faire attention ki seki ou, ou pé attann li faire, pa enerve li ou-soit decourage li. (Col. 3:21) Rappel toujours ki ou zenfant bizin arrivé content Jéhovah parski li, li envie—pa parski ou envie. (Mat. 22:37) Alors rod bann bon kitsoz ki li faire ek felicite li, ek resisté kont tendance pou trouve zis seki li pa pé faire. Aide ou zenfant pou developpe so reconnaissance pou tou seki Jéhovah finn faire. Ek apré laisse so leker reagir ar bonté Jéhovah.

Faire l’etude-la vinn agreable

Enn troisieme kitsoz ki pou faire l’etude la Bible en famille reussi, c’est faire li vinn agreable. Couma ou kapav faire sa? Kitfois ena jour la famille kapav ecoute enn drame audio ou-soit guette enn video ki bann Témoins de Jéhovah inn produire ek discute lor la. Ou-soit zot kapav lire enn portion la Bible ensam, kot chaque membre la famille prend role enn personnage.

Ena different lartik dan nou bann periodik, La Tour de garde ek Réveillez-vous !, ki nou kapav servi pou ena bann bon discussion en famille. Par exemple ou kapav servi bann renseignement ki ena lor page 31 dan chaque Réveillez-vous !, ki ena titre “ Que répondriez-vous ? ” Dan l’edition publik La Tour de Garde en français, enn mois lartik “ Pour nos jeunes lecteurs ” apparette ek lot mois nou gagne lartik “ Enseignez vos enfants ” ki publié pou bann zenfant ki pli jeune.

Si ou bann zenfant adolescent, surement ou pou bien interessé avek lartik: “ Les jeunes s’interrogent ” dan Réveillez-vous ! ek aussi ar livre Les jeunes s’interrogent, volume 2. Kan ou pé servi sa livre-la, pa neglige pou guette l’encadré “ Qu’en pensez-vous? ” a la fin chaque chapitre. Sa l’encadré-la li plus ki enn revision. Ou kapav servi bann question ki ena dan sa l’encadré-la pou faire bann discussion en famille.

Mais faire attention, fodé pa ki l’etude la Bible en famille vinn enn moment kot ou pou faire l’enquete avek ou zenfant. Par exemple, pa essaye force ou zenfant pou lire fort seki li finn ecrire lor bann page ki ena titre “ Mon journal ” ou-soit dan lezot partie sa livre-la kot demann zenfant-la pou ecrire so bann pensée personnel. Dan partie “ Un mot aux parents, ” sa livre-la dire dan page 3: “Pou ki ou adolescent disposé pou ecrire franc seki li ena dan so leker, ou bizin accepté ki li pa montré ou sa. Plitar, kitfois li pou pli disposé pou dire ou seki li finn ecrire.”

Si ou faire en sorte ki ou l’etude la Bible en famille li regulier, pratik, ek agreable, Jéhovah pou beni ou bann zeffort. Sa moment special ki ou pou passé en famille-la pou aide la famille pou reste fort lor plan spirituel.

[L’encadré lor page 31]

Servi ou imagination

“Kan nou ti etudié avek nou bann jeune tifi, mo mari ek moi nou ti examine bann sujet ki ti pou faire dan reunion ek apré, nou ti demann nou bann tifi pou faire enn dessin ki ti resume sa leson-la. Parfois, nou ti joué bann scene ki ena dan la Bible ou-soit nou ti pratik bann presentation pou predication. Nou ti faire toujours enn l’etude ki ti adapté avek zot l’age, ki ti interessant, positif ek ki ti faire zot plaisir.”—J.M., États-Unis.

“Pou aide mo l’etude so garson pou bien comprend ki zeffort bann dimoune ti bizin faire pou servi enn rouleau dan lepok biblik, nou ti imprime livre Isaïe apré ki nou ti tire tou bann numero chapitre ek verset. Apré nou ti colle tou bann page-la ensam pou ki a la fin zot vinn enn sel longue page. Dan chaque boute, nou ti mette enn tube. Apré, sa garson-la ti essaye faire seki Jésus ti faire kan li ti dan synagogue dan Nazareth. Recit ki trouve dan Luc 4:16-21 raconté ki Jésus ‘ti ouvert rouleau [Isaïe] ek li ti trouve’ passage ki li ti pé rodé. (Is. 61:1, 2) Mais selman, kan sa garson-la ti essaye faire pareil, li ti trouve sa difficile pou trouve Isaïe 61 dan sa longue rouleau kot pa ti ena ni numero chapitre ni numero verset. Garson-la ti tellement impressionné par maniere ki Jésus ti konn servi bann rouleau, ki li ti dire: ‘Jésus-la ti extra sa!’ ”—Y.T., Japon.

[Zimage lor page 30]

Bann demonstration kapav aide ou bann zenfant pou faire face avek bann pression camarade

[Zimage lor page 31]

Faire zeffort pou ki l’etude la Bible en famille vinn agreable