Famille chretien​—“Prepare-zot”

“Prepare-zot, parski c’est dan enn l’heure ki zot pa attann, ki Fils de l’homme pé vini.”​—LUC 12:40.

1, 2. Kifer nou bizin prend serieux conseil ki Jésus ti donné pou ‘prepare-nou’?

“KAN Fils de l’homme pou vini dan so la gloire,” ek pou separe “bann dimoune entre zot,” ki pou arrive ou ek ou famille? (Mat. 25:31, 32) Sa pou arrive enn l’heure ki nou pa attann, alors, li vrai-mem bien important ki nou prend serieux conseil Jésus ki encourage nou pou ‘prepare-nou’!​—Luc 12:40.

² Dan lartik avant, nou ti examiné couma chaque membre la famille kapav aide toute la famille pou reste lor zot garde lor plan spirituel kan zot prend zot responsabilité avek serieux. Anou examine lezot fason ki nou kapav favorise bien-etre spirituel nou famille.

Garde zot lizié “simple”

3, 4. (a) Kont ki kitsoz bann famille chretien bizin reste lor zot garde? (b) Ki sa vedir garde nou lizié “simple”?

³ Pou bann famille kapav pré kan Christ pou vini, zot bizin faire attention pou pa laisse nanyin detourne zot ar bann kitsoz ki concerne vrai l’adoration. Zot bizin reste lor zot garde pou pa laisse nanyin distraire zot ek detourne zot. Beaucoup famille chretien inn tombe dan piege materialisme, alors, anou examine seki Jésus ti dire lor l’importance pou garde nou lizié “simple.” (Lire Matthieu 6:22, 23.) Pareil couma enn la lampe kapav eclaire nou chemin ek permette nou marché sans tombé, seki rente par ‘lizié symbolik nou leker’ kapav aide nou pou pa tombe dan peché.​—Éph. 1:18.

⁴ Pou ki nou kapav trouve bien, fodé ki nou lizié bon ek kapav concentré lor seki nou pé guetté. Li pareil aussi avek lizié symbolik nou leker. Kan nou lizié symbolik simple, sa vedir ki nou concentré lor enn sel kitsoz. Au lieu ki nou donne priorité bann kitsoz materiel ek nou trop tracasse-nou pou donne nou famille zis seki li bizin lor plan physik, nou garde nou lizié fixé lor bann kitsoz spirituel. (Mat. 6:33) Sa vedir ki nou satisfait avek seki Bondié donne nou ek nou mette so service en premier dan nou la vie.​—Héb. 13:5.

5. Couma enn tifi adolescent ti montré ki so “lizié” ti fixé lor service Bondié?

⁵ Bann parent kapav vrai-mem gagne bann bon resultat kan zot forme zot zenfant pou garde zot lizié simple! Anou prend l’exemple enn tifi adolescent ki reste en Éthiopie. Li ti travail tellement bien dan lekol ki, kan li ti fini tou so bann classe, li ti gagne enn la bourse pou contigne so l’etude. Mais, parski li ti garde so lizié fixé lor so service pou Jéhovah, li ti refuse sa la bourse-la. Enn tipé le temps apré, ti propose li enn travail kot li ti pou gagne 3,000 euro par mois​—apepré 118,000 roupie​—enn gros somme l’argent comparé avek seki bann dimoune gagné en moyenne dan so pays. Mais “lizié” sa tifi-la ti fixé lor service pionnier. Li pa ti bizin al demann so bann parent pou li refuse sa travail-la. Ki sentiment so bann parent ti ena kan zot ti aprann seki zot tifi ti faire? Zot ti bien content ek zot ti dire li ki quantité zot ti fiere!

6, 7. Lor ki danger nou bizin ‘garde nou lizié ouvert’?

⁶ Dan bann parole ki Jésus ti dire dan Matthieu 6:22, 23, nou comprend ki li ti averti nou kont enn desir pou gagne plus. Jésus pa ti servi mot “compliké” ki le contraire mot “simple,” mais li ti servi enn lot mot: “mauvais.” Enn ‘mauvais lizié’ attiré par bann mauvais kitsoz ek li envié lezot, setadir li ena enn l’envie exageré ou-soit enn desir pou gagne plus. (Mat. 6:23; note.) Ki Jéhovah pensé lor ena enn l’envie exageré ou-soit lor enn desir pou gagne plus? La Bible dire: “Fodé ki fornication ek l’impureté dan n’importe ki forme, ou-soit desir pou gagne plus [ou-soit, ”enn l’envie exageré“] pa mem mentionné parmi zot.”​—Éph. 5:3; note.

⁷ Kitfois li pli facile pou trouve sa defaut-la dan enn lot dimoune, ki nou remark sa dan nou-mem. Alors, li sage ki nou suive sa conseil ki Jésus ti donné-la: “Garde zot lizié ouvert, ek faire attention ar tou sorte qualité l’envie exageré.” (Luc 12:15) Pou nou faire sa, nou bizin examine nou-mem pou guetté lor ki kitsoz nou finn fixé nou leker. Bann famille chretien bizin bien reflechi lor quantité le temps ki zot passé ek l’argent ki zot depensé lor divertissement, detente, ek pou gagne bann kitsoz materiel.

8. Kan nou bizin acheté kitsoz, couma nou kapav montré ki nou ena sagesse?

⁸ Avant ou acheté enn kitsoz, fodé pa ou zis reflechi si ou ena assez kass pou acheté sa ou-soit non. Reflechi aussi lor sa bann question-la: ‘Eski mo pou ena le temps pou servi sa kitsoz-la regulierement ek garde li en bon etat? Comié le temps mo pou prend pou aprann servi li bien?’ Jeune, pa croire tou seki bann reclame ki ena dan le monde proposé, ek lerla zot demann zot parent bann kitsoz ki pa raisonnable, couma par exemple bann linge ek bann lezot kitsoz bon mark ki coute cher. Faire zeffort pou controle ou-mem. Demann ou-mem si sa kitsoz ki ou pé envie-la pou aide ou famille pou prepare-li lor plan spirituel. Ena la foi dan sa promesse Jéhovah-la: “Jamais mo pou quitte toi, ni mo pou abandonne toi.”​—Héb. 13:5.

Poursuive bann l’objectif spirituel

9. Kan enn famille fixé bann l’objectif spirituel, couma sa kapav aide li?

⁹ Enn lot fason ki bann membre enn famille kapav fortifié zot la foi ek faire zot part pou bien-etre spirituel tou zot famille, c’est kan zot fixé bann l’objectif spirituel ek faire bann zeffort pou realise zot. Sa kapav aide bann famille trouvé si zot pé progressé dan zot service pou Jéhovah ek aussi pou decidé ki l’activité ki bizin priorité dan zot la vie.​—Lire Philippiens 1:10.

10, 11. Ki bann l’objectif spirituel zot pé faire zeffort pou realisé en tant ki enn famille, ek ki bann l’objectif zot ti pou content fixé dan l’avenir?

¹⁰ Mem si enn famille fixé bann ti l’objectif raisonnable, ki chaque membre dan la famille kapav realisé, sa kapav amenn bann grand bienfait. Prend par exemple l’objectif pou faire texte du jour, toulé-jour. Commentaire ki bann membre la famille donné, kapav aide chef la famille pou koné ki quantité chaque membre so famille content Jéhovah ek content la verité. L’objectif pou lire la Bible regulierement ensam avek toute la famille, c’est enn bon moyen pou bann zenfant ameliore zot capacité pou lire ek aussi pou comprend la Bible. (Ps. 1:1, 2) Eski nou pa pou envie fixé l’objectif pou ameliore qualité nou bann la priere? Nou kapav aussi fixé l’objectif pou developpe pli bien bann qualité ki ena dan fruit l’esprit. (Gal. 5:22, 23) Eski nou kapav trouve bann fason pou montré ki nou comprend sentiment bann dimoune ki nou joinde dan predication? Kan nou tou dan la famille nou faire zeffort pou faire sa, sa kapav aide bann zenfant pou aprann ena compassion, ek zot ena plus chance pou developpe desir pou servi couma pionnier permanent ou-soit missionnaire.

¹¹ Kifer ou pa reflechi lor certain objectif ki ou ek ou famille kapav fixé? Eski ou famille kapav fixé l’objectif pou passe plus le temps dan ministere? Eski zot kapav travail pou surmonte la peur pou rann temoignage par telephone, lor chemin, ou-soit dan bann quartier commercial? Ki ou pensé lor al servi dan bann l’endroit kot bien bizin proclamateur? Eski enn membre la famille kapav aprann enn nouveau langue pou partage la bonne nouvelle avek bann dimoune ki sorti dan enn lot pays?

12. Ki bann chef famille kapav faire pou aide zot famille progressé lor plan spirituel?

¹² En tant ki enn chef famille, rod bann domaine kot ou famille kapav progressé lor plan spirituel. Apré, pou reussi realise sa, fixé bann l’objectif precis. Bann l’objectif ki ou fixé en tant ki enn famille bizin raisonnable ek fodé ki zot tou kapav realise sa, dapré zot situation ek zot capacité. (Prov. 13:12) Bien sur, sa prend le temps pou realise enn l’objectif ki vaut la peine. Alors, prend sa le temps ki ou passé pou guette television-la ek servi sa pou realise bann l’objectif spirituel. (Éph. 5:15, 16) Travail dur pou realise bann l’objectif ki ou’nn fixé pou ou famille. (Gal. 6:9) Kan enn famille faire zeffort pou realise bann l’objectif spirituel, ‘tou dimoune pou trouve bien zot bann progré.’​—1 Tim. 4:15.

Garde enn soirée pou l’etude familial

13. Ki changement finn ena dan programme reunion ki faire chaque semaine, ek lor ki bann question nou bizin reflechi?

¹³ Finn prend enn bon disposition pou aide bann famille pou “prepare-zot” kan Fils de l’homme vini. C’est changement important ki finn ena depuis le 1^er janvier 2009, dan programme reunion ki nou faire chaque semaine. Nou nepli bizin joinde ensam enn lot jour dan la semaine pou assisté reunion ki ti appel l’etude de livre. Asterla, faire sa reunion-la mem jour ki Lekol ministere theocratik ek reunion service. Finn faire sa changement-la pou donne bann famille chretien l’occasion pou fortifié zot spiritualité kan zot reserve enn soirée precis chaque semaine pou l’etude familial. Sa faire inpé le temps depuis ki finn ena sa changement-la, alors nou kapav demann nou-mem: ‘Eski mo pé servi sa le temps-la pou faire l’etude familial ou-soit l’etude personnel? Eski mo finn reussi realise l’objectif sa disposition-la?’

14. (a) Kan pou garde enn soirée pou l’etude familial ou-soit personnel, ki nou l’objectif principal? (b) Kifer li bien important ki nou reserve enn soirée pou etudié?

¹⁴ L’objectif principal pou garde enn soirée pou l’etude familial ou-soit personnel c’est pou vinn pli proche ar Bondié. (Jacq. 4:8) Kan nou passe le temps pou etudié la Bible regulierement ek nou augmente nou connaissance lor nou Createur, nou relation avek Li vinn pli fort. Plus nou vinn proche ar Jéhovah, plus sa pou pousse-nou pou content Li ‘avek tou nou leker, nou nâme, nou l’esprit ek nou la force.’ (Marc 12:30) Pena doute, nou ena enn grand desir pou obeir Bondié ek imite Li. (Éph. 5:1) Alors, kan nou reserve regulierement enn soirée pou nou l’etude familial, c’est enn kitsoz bien important ki pou aide tou bann membre nou famille pou “prepare-zot” lor plan spirituel pendant ki nou pé attann “grand tribulation” ki finn annoncé. (Mat. 24:21) C’est enn kitsoz bien important pou nou gagne la vie sauve.

15. Ki l’effet l’etude familial kapav ena lor sentiment ki bann membre la famille ena sakenn pou so camarade?

¹⁵ Sa disposition pou ena enn l’etude familial-la ena aussi enn lot objectif​—aide chaque membre la famille pou vinn pli proche sakenn ar so camarade. Kan zot passe le temps ensam pou koz lor bann kitsoz spirituel chaque semaine, sa ena enn grand l’effet lor sentiment ki chaque membre la famille ena pou so camarade. Bann conjoint vrai-mem vinn pli proche kan sakenn tann so camarade dire so la joie pou decouvert enn verité interessant dan la Bible! (Lire Ecclésiaste 4:12.) Bann parent ek bann zenfant ki etudié ensam ena plus chance pou uni dan l’amour, sa ‘kitsoz parfait ki soude zot ensam-la.’​—Col. 3:14.

16. Raconté couma trois soeur spirituel pé gagne bann bienfait ar enn soirée ki zot inn reservé pou etudié la Bible.

¹⁶ Anou guetté couma trois soeur spirituel pé gagne bann bienfait ar disposition pou reserve enn soirée pou etudié la Bible? Mem si entre zot pa ti ena bann lien familial, sa trois soeur veuve ki ti agé-la ti reste dan mem la ville ek zot ti bann bon camarade pendant plusieurs l’année. Zot ti envie passe plus le temps ensam ek en mem temps, zot ti envie faire enn kitsoz spirituel au lieu ki zot zis joinde pou kozé. Alors zot ti decidé pou reserve enn soirée pou joinde ek etudié la Bible. Zot ti commence etudié livre ‘Rends pleinement témoignage au sujet du Royaume de Dieu.’ Enn parmi zot dire: “Nou ti tellement apprecié sa le temps ki nou ti passé ensam-la ki souvent nou l’etude ti dure plus ki enn heure temps. Nou ti essaye maziné dan ki situation nou bann frere dan premier siecle ti été, ek nou ti dire sakenn nou camarade seki nou ti pou faire dan bann situation coumsa. Lerla, nou ti essaye mette en pratik dan nou ministere bann point ki nou ti aprann dan nou l’etude. Sa ti faire nou gagne plus la joie ek bann pli bon resultat kan nou ti preche Royaume Bondié ek kan nou ti faire bann disciple.” En plus ki sa disposition-la ti fortifié zot lor plan spirituel, sa ti faire sa trois bon camarade-la vinn encore pli proche entre zot. Zot dire: “Nou vrai-mem bien content sa disposition-la.”

17. Ki bann kitsoz enn famille kapav faire pou ki zot l’etude familial marche bien?

¹⁷ Mais ou, ki bienfait ou pé gagné ar sa soirée ki ou finn reservé pou l’etude familial ou-soit personnel-la? Si nou faire sa enn fois le temps, sa disposition-la pa pou realise bann l’objectif ki li ena. Chaque membre la famille bizin pré kan ler ki’nn fixé pou l’etude inn arrivé. Fodé pa laisse bann kitsoz sans importance empeche nou faire nou l’etude. En plus, seki ou choisir pou etudié bizin pratik pou ou famille. Ki ou kapav faire pou ki sa l’etude-la agreable? Servi bann methode ki efficace pou enseigné, ek garde enn l’atmosphere kot ena respé ek ki calme.​—Jacq. 3:18.a

‘Reste lor zot garde’ ek “prepare-zot”

18, 19. Nou koné ki Fils de l’homme pré pou vini. Couma sa bizin ena enn l’effet lor ou ek lor ou famille?

¹⁸ Bann condition mondial ki pé deterioré ek ki ena dan nou lepok, montré dan enn fason bien clair ki depuis 1914, mauvais le monde Satan inn rente dan so bann dernier jour. Sa faire nou comprend ki Har–Maguédôn bien pré. Bientot, pou arrive ler pou Fils de l’homme vinn faire jugement Jéhovah lor bann mauvais dimoune. (Ps. 37:10; Prov. 2:21, 22) Eski sa connaissance-la pa bizin ena enn l’effet lor ou ek lor ou famille?

¹⁹ Eski ou pé suive conseil Jésus pou garde ou lizié “simple”? Alors ki bann dimoune dan sa le monde-la kitfois pé galope derriere la richesse, la gloire, ek pouvoir, eski ou famille pé faire tou pou poursuive bann l’objectif spirituel? Eski sa disposition pou reserve enn soirée pou l’etude familial ou-soit l’etude personnel-la pé marche bien dan ou cas? Eski ou pé reussi realise bann l’objectif sa l’etude-la? Pareil couma nou ti trouvé dan lartik avant, eski chaque membre la famille, mari, femme ou-soit zenfant, pé prend responsabilité biblik ki Jéhovah inn donne li, ek coumsa aide tou so famille pou ‘reste lor so garde’? (1 Thess. 5:6) Si oui, zot pé “prepare-zot” pou jour ki Fils de l’homme vini.

[Note]

Ki ou finn aprann?

• Expliké couma bann famille chretien kapav “prepare-zot” kan . . .

zot ena enn lizié “simple.”

zot fixé bann l’objectif spirituel ek faire zeffort pou realise zot.

zot garde enn soirée pou l’etude familial.