Manifesté bann bon maniere en tant ki ministre Bondié

“Imite Bondié.”—ÉPH. 5:1.

1, 2. (a) Kifer li important ki nou ena bann bon maniere? (b) Ki nou pou examiné dan sa lartik-la?

CONCERNANT bann bon maniere, enn ecrivain ki appel Sue Fox ti ecrire: “Pena vacance en seki concerne bann bon maniere. Bann bon maniere zot approprié partout ek touletan.” Kan bann dimoune prend l’habitude pou montré bon maniere, bann probleme avek lezot diminué ek souvent disparette. Mais le contraire aussi vrai. Kan nou pena bann bon maniere envers lezot sa crée la guerre, la colere ek chagrin.

² La congregation li enn place kot en general zot tou zot ena bann bon maniere. Mais kan-mem, nou bizin faire attention pou pa adopté bann mauvais maniere ki bien populaire dan le monde zordi. Anou guetté couma kan nou applik bann principe biblik en rapport avek bann bon maniere, sa kapav protege nou dan sa domaine-la ek attire bann dimoune vers vrai l’adoration. Pou nou comprend ki sa impliké pou manifesté bann bon maniere, anou examine l’exemple Jéhovah ek so Garson.

Jéhovah ek so Garson—Bann bon l’exemple dan sa domaine-la

3. En rapport avek bann bon maniere, ki l’exemple Jéhovah inn donne nou?

³ Jéhovah donne nou enn l’exemple parfait en rapport avek bann bon maniere. Malgré so grand position en tant ki Souverain l’univers, Jéhovah traite bann dimoune avek enn grand bonté ek respé. Kan Li ti koz avek Abraham ek Moïse, Jéhovah ti servi enn mot hébreux ki souvent finn traduire par “s’il te plait.” (Gen. 13:14; Ex. 4:6) Kan so bann serviteur faire bann peché, Jéhovah manifesté “misericorde ek compassion, [Li] pa en colere vite ek [Li] ena l’amour fidele ek fidelité en abondance.” (Ps. 86:15) Li bien different ar certain dimoune ki explosé ar colere kan lezot pa faire seki zot attann.

4. Couma nou kapav imite Jéhovah kan lezot koz ar nou?

⁴ Nou trouvé ki Bondié ena bann bon maniere aussi dan fason ki Li ecoute bann dimoune. Kan Abraham ti pose Li bann question concernant bann habitant Sodome, avek patience Jéhovah ti reponn chaque question. (Gen. 18:23-32) Li ti prend tracas Abraham en consideration ek Li pa ti donne Abraham l’impression ki li ti pé faire Li perdi So le temps. Jéhovah ecoute la priere so bann serviteur ek supplication bann dimoune ki’nn faire peché mais ki repenti. (Lire Psaume 51:11, 17.) Eski nou pa bizin imite Jéhovah ek ecouté kan lezot koz ar nou?

5. Couma kan nou imite bann bon maniere ki Jésus ti manifesté sa kapav ameliore nou relation avek lezot?

⁵ Jésus Christ ti aprann beaucoup kitsoz ar so Papa, parmi ti ena bann bon maniere. Mem si parfois so ministere ti prend beaucoup so le temps ek so l’energie, Jésus ti touletan ena patience ek li ti bon. Bann lepreux, bann aveugle ki ti obligé demann charité pou vive, ek lezot ki ti dan difficulté, ti trouvé ki Jésus ti disposé pou aide zot. Li pa ti ignore zot, mem si zot ti vinn guette li sans ki zot ti faire li koné avant. Souvent li ti arrete seki li ti pé faire pou aide enn dimoune ki ti dan probleme. Jésus ti ena enn grand consideration pou bann dimoune ki ti ena la foi en li. (Marc 5:30-34; Luc 18:35-41) En tant ki chretien, nou suive l’exemple Jésus kan nou montré-nou bon envers lezot ek kan nou pré pou aide zot. Bann membre nou famille, nou bann voisin, ek lezot dimoune remark sa qualité conduite-la. En plus, sa glorifié Jéhovah ek faire nou heureux.

6. Ki l’exemple Jésus inn laissé dan fason ki li ti montré respé envers lezot?

⁶ Jésus ti aussi montré ki li ti respecté bann dimoune kan li ti appel zot par zot nom. Eski bann chef religieux juif ti respecté dignité bann dimoune dan sa fason-la? Non. Zot ti considere bann dimoune ki pa ti konn la Loi couma “bann dimoune maudit” ek c’est coumsa ki zot ti traite bannla. (Jean 7:49) Mais Garson Bondié li, li pa ti agir coumsa. Marthe, Marie, Zachée ek beaucoup lezot dimoune ti tann Jésus appel zot par zot nom. (Luc 10:41, 42; 19:5) Mem si bann serviteur Jéhovah bizin respecté bann coutume ek bann situation local dan fason ki zot koz avek bann dimoune zordi, zot faire en sorte ki touletan zot montré-zot amical envers lezot.a Zot pa laisse bann difference social ki ena entre zot diminué respé ki zot compagnon chretien ek lezot merité.—Lire Jacques 2:1-4.

7. Couma bann principe la Bible aide nou pou ena bann bon maniere avek bann dimoune dan n’importe ki l’endroit?

⁷ Bondié ek so Garson traite bann dimoune dan tou nation ek n’importe ki race avek dignité, ek sa montré ki zot ena respé pou sa bann dimoune-la. Sa attire aussi bann dimoune ki bien disposé vers la verité. Bien sur, bann bon maniere zot different dependant bann l’endroit. A cause sa, nou pa suive enn serie regle bien severe dan sa domaine-la. Au contraire, nou laisse bann principe la Bible aide nou pou nou kapav adapté nou pou ki nou montré respé envers bann dimoune, partout. Anou guetté couma kan nou ena bann bon maniere avek bann dimoune, sa kapav faire nou gagne bann pli bon resultat dan nou ministere.

Dire bann dimoune bonjour ek koz ar zot

8, 9. (a) Ki l’habitude lezot kapav considere couma bann mauvais maniere? (b) Kifer nou bizin laisse bann parole Jésus ki mentionné dan Matthieu 5:47 influence fason ki nou traite lezot?

⁸ Zordi, dan beaucoup l’endroit, bann dimoune bien pressé ek zot la vie bien mouvementé. A cause sa, souvent li kapav arrivé ki deux dimoune croise zot camarade sans ki zot dire “bonjour” ou-soit “ki maniere?” Bien sur, lor enn trottoir ki rempli ar dimoune, nou pa attann ki enn kikenn koz ar tou dimoune ki passé. Selman, dan beaucoup lezot situation, li approprié ek li mem bon ki nou dire bonjour lezot. Eski ou ena l’habitude pou dire bonjour bann dimoune ki ou joinde? Ou-soit eski souvent ou croise enn dimoune sans ki ou faire enn sourire ou-soit sans ki ou dire enn ti parole agreable? Sans ki li rann-li compte, enn dimoune kapav developpe enn l’habitude ki en realité enn mauvais maniere.

⁹ Jésus ti donne nou enn rappel kan li ti dire: “Si zot dire bonjour zis zot bann frere, ki kitsoz extraordinaire zot pé faire? Eski bann dimoune dan bann nation pa faire pareil zot aussi?” (Mat. 5:47) En rapport avek sa, Donald Weiss, enn conseiller dan communication, ti ecrire: “Bann dimoune offensé kan lezot passe pré kot zot sans prend zot compte. Ou pa kapav trouve okenn bon excuse pou soulage bann ki ou finn ignoré. Solution-la li simple: Dire bann dimoune bonjour ek koz ar zot.” Si nou pa indifferent ou-soit froid dan nou relation avek lezot, nou pou gagne bann bon resultat.

10. Couma bann bon maniere kapav aide nou pou gagne bann pli bon resultat dan nou ministere? (Guette l’encadré “Commence par enn joli sourire.”)

¹⁰ Anou prend l’exemple Tom ek Carol, enn couple chretien ki vive dan enn grand la ville en Amérique du Nord. Pou zot, ena bann bon conversation avek zot bann voisin, sa forme partie dan zot ministere. Couma zot faire sa? Tom faire reference ar Jacques 3:18 ek li dire: “Nou essaye montré-nou amical avek bann dimoune ek garde la paix avek zot. Nou koz ar bann dimoune ki nou trouve devant zot lakaz ek avek bann ki travail dan l’endroit. Nou faire enn sourire ek nou dire zot bonjour. Nou koz lor seki interesse zot—zot zenfant, zot li-chien, zot lakaz, zot travail. Avek le temps, zot considere nou couma zot camarade.” Carol ajouté: “Enn lot fois, nou donne zot nou nom ek nou demann zot couma zot appelé. Nou faire zot koné seki nou faire dan l’endroit, mais nou garde nou conversation bien courte. Finalement, nou kapav donne zot temoignage.” Tom ek Carol finn gagne confiance la plupart zot voisin. Beaucoup finn accepté bann publication biblik ek certain finn envie konn plus lor la verité.

Montré bon maniere dan bann situation difficile

11, 12. Kifer nou bizin attann ki bann dimoune pa bien recevoir nou kan nou preche la bonne nouvelle, ek couma nou bizin reagir?

¹¹ Parfois, bann dimoune mal recevoir nou kan nou preche la bonne nouvelle. Sa pa etonne nou parski Jésus ti donne sa l’avertissement-la so bann disciple: “Si bannla finn persecute moi, bannla pou persecute zot aussi.” (Jean 15:20) Mais si nou rann la pareil kan bann dimoune faire nou bann remark desagreable, sa pa pou produire bann bon resultat. Couma nou bizin reagir? L’apotre Pierre ti ecrire: “Dan zot leker, donne Christ la gloire couma zot Seigneur, toujours pré pou defann-zot devant tou dimoune ki demann zot kifer zot ena sa l’esperance-la, mais faire li avek douceur ek enn grand respé.” (1 Pierre 3:15) Kan nou montré bann bon maniere, setadir kan nou reponn avek douceur ek respé, sa kapav faire bann dimoune ki insulté nou change zot l’attitude envers nou message.—Tite 2:7, 8.

¹² Eski nou kapav prepare-nou pou faire face ar bann remark desagreable, dan enn fason ki faire Bondié plaisir? Oui. Paul ti donne sa conseil-la: “Fodé ki zot parole faire toujours plaisir pou tendé, assaisonné ar di-sel, pou ki zot koné couma pou reponn chaque dimoune.” (Col. 4:6) Si nou prend l’habitude pou ena bann bon maniere ar bann membre nou famille, bann camarade lekol, bann collegue travail, bann membre la congregation, ek bann dimoune dan nou l’endroit, nou pou pli kapav reagir couma enn vrai chretien bizin reagir, kan bann dimoune bouffonne nou ek insulté nou.—Lire Romains 12:17-21.

13. Donne enn l’exemple pou montré couma bann bon maniere kapav change l’attitude bann dimoune ki opposé ar nou.

¹³ Kan nou montré bon maniere dan bann situation difficile, sa kapav amenn bann bon resultat. Par exemple dan Japon, enn missié ek so camarade ki ti vinn rann li enn visite, ti bouffonne enn Témoin ti pé preche avek zot. Frere-la ti quitte zot mais li ti garde toujours bann bon maniere. Pendant ki li ti pé contigne preché dan territoire, li ti remarké ki camarade sa missié-la ti pé observe li de loin. Kan frere-la ti approche li, missié-la ti dire li: “Mo bien chagrin seki finn passé. Mais mo finn remarké ki ou finn garde ou sourire mem si nou finn koz brite ar ou. Ki mo bizin faire pou vinn coumsa?” Sa missié-la ti’nn perdi so travail ek so mama ti’nn fek mort, a cause sa li ti pensé ki jamais li ti pou kapav heureux encore. Frere-la ti propose li enn l’etude la Bible, ek li ti accepté. Li pa ti tardé pou etudié deux fois par semaine.

Pli bon fason pou developpe bann bon maniere

14, 15. Couma bann serviteur Jéhovah dan lepok biblik ti forme zot zenfant?

¹⁴ Bann parent ki ti servi Bondié dan lepok biblik ti assure-zot ki zot zenfant aprann bann principe de base lor bann bon maniere dan zot lakaz. Considere par exemple couma Abraham ek Isaac ti ena bann bon maniere kan zot ti koz sakenn ar so camarade dan Genèse 22:7. Dan cas Joseph aussi nou trouvé ki li ti gagne enn bon formation ar so bann parent. Kan li ti dan prison, li ti ena bann bon maniere mem envers bann lezot prisonnier. (Gen. 40:8, 14) Bann parole ki li ti dire Pharaon montré ki li ti’nn aprann couma bizin koz ar enn dimoune ki ena enn grand position.—Gen. 41:16, 33, 34.

¹⁵ Dan Dix Commandement ki bann Israélite ti gagné, ti ena sa commandement-la: “Honore to papa ek to mama pou ki to bann jour vinn beaucoup dan pays ki Jéhovah to Bondié pé donne toi.” (Ex. 20:12) Enn fason ki bann zenfant ti honore zot parent c’est kan zot ti ena bann bon maniere kot zot. Tifi Yiphtah ti montré enn grand respé pou so papa kan li ti soumette ar voeu ki so papa ti faire, mem dan enn situation bien difficile.—Juges 11:35-40.

16-18. (a) Couma nou kapav enseigne bann zenfant bann bon maniere? (b) Ki bann bienfait nou gagné kan nou enseigne bann zenfant bann bon maniere?

¹⁶ Fodé pa nou sous-estime l’importance pou forme nou bann zenfant pou zot montré bann bon maniere. Pou ki bann jeune vinn bann adulte ki bien adapté ar lezot, zot bizin aprann couma bizin dire bonjour bann visiteur, couma zot bizin reponn kan zot prend telephone, ek couma zot bizin comporte-zot kan zot mangé a table avek lezot. Bizin aide zot pou comprend kifer zot bizin tini la porte kan lezot passé, montré-zot bon envers bann agé ek bann malade, ek aide bann dimoune ki pé sarié bann kitsoz lourd. Zot bizin comprend l’importance pou dire dan enn fason sincere: “S’il vous plait,” “merci,” “pa de quoi,” “eski mo kapav aide ou?,” ek “excuse moi.”

¹⁷ Li pa difficile pou forme bann zenfant pou zot ena bann bon maniere. Pli bon fason c’est kan nou-mem nou donne zot l’exemple. Kurt, ki ena 25 an dire couma li ek so trois frere ti aprann pou ena bann bon maniere: “Nou ti trouvé ek nou ti tendé couma mama ek papa ti koz sakenn ar so camarade avek bonté ek ti traite lezot avek patience ek consideration. Dan la Salle du Royaume, avant ek apré bann reunion, papa ti amenn moi avek li pou al koz ar bann frere ek soeur agé. Mo ti tendé couma li ti dire zot bonjour ek mo ti trouvé couma li ti ena respé pou zot.” Kurt ajouté: “Avek le temps, mo finn gagne so bann bon maniere. Ena bann bon maniere envers bann dimoune inn vinn enn kitsoz automatik pou moi. Mo nepli faire sa par obligation, mais mo faire sa parski mo envie.”

¹⁸ Si bann parent enseigne zot zenfant bann bon maniere, couma sa bann zenfant-la pou vini? Zot pou kapav faire camarade ek garde la paix avek lezot. Zot pou bien preparé pou travail avek zot patron ek bann lezot employé. En plus, bann zenfant ki ena bann bon maniere ek ki juste pou faire zot parent content ek satisfait.—Lire Proverbes 23:24, 25.

Bann bon maniere faire ki nou different

19, 20. Kifer nou bizin bien decidé pou imite nou Bondié ek so Garson?

¹⁹ Paul ti ecrire: “Imite Bondié couma bann zenfant ki Li bien content.” (Éph. 5:1) Pou imite Jéhovah ek so Garson, nou bizin applik bann principe biblik couma seki nou finn examiné dan sa lartik-la. Si nou faire sa, nou pou evite faire semblant ki nou ena bann bon maniere zis pou gagne faveur enn kikenn ki ena enn grand position ou-soit pou gagne enn l’avantage materiel.—Jude 16.

²⁰ Dan bann dernier jour so mauvais regne, Satan bien decidé pou efface tou bann principe ki Jéhovah inn etabli en rapport avek bann bon maniere. Mais Satan le Diable pa pou reussi faire bann bon maniere ki bann vrai chretien ena, disparette. Sakenn parmi nou, anou bien decidé pou suive l’exemple nou Bondié ek so Garson ki ena bann bon maniere. Lerla, nou parole ek nou conduite pou touletan different avek comportement bann dimoune ki choisir pou pa manifesté bann bon maniere. Nou pou honore nom Jéhovah ek nou pou attire bann dimoune sincere vers vrai l’adoration.

[Note]

Eski ou rappel?

• Ki nou aprann lor Jéhovah ek so Garson concernant bann bon maniere?

• Kifer kan nou dire enn bonjour amical bann dimoune, sa ena enn bon l’effet lor nou reputation en tant ki chretien?

• Couma bann bon maniere aide nou pou ena enn ministere productif ?

• Couma bann parent kapav enseigne zot bann zenfant bann bon maniere?

[L’encadré page 30]

Commence par enn joli sourire

Beaucoup dimoune hesité pou commence enn conversation avek enn kikenn ki zot pa koné. Mais parski zot ena l’amour pou Bondié ek pou zot prochain, bann Témoins de Jéhovah zot, zot faire zeffort pou aprann ena bann conversation avek lezot pou ki zot kapav partage bann verité biblik avek zot. Ki kapav aide ou pou ameliore-ou dan sa domaine-la?

Ena enn bon principe ki trouve dan Philippiens 2:4 ek ki dire: “Pa guette zis zot prop zaffaire dan zot prop l’interet, mais guette aussi pou lezot ek prend compte zot l’interet.” Pense sa bann parole-la ek mazinn sa situation-la: ou en face ar enn dimoune ki jamais ou pa finn joinde avant. Pou sa dimoune-la, ou enn etranger. Couma ou pou kapav mette li a l’aise? Enn joli sourire ek enn bonjour amical kapav aide ou. Ki ou kapav faire encore?

Kitfois, kan ou finn essaye commence enn conversation avek enn dimoune, ou finn faire li arrete pense seki li ti pé pensé. Si ou essaye faire li koz avek ou lor seki ou, ou pé pensé sans ki ou prend compte seki li ti pé pensé, kitfois li pa pou reagir dan enn bon fason. Alors, si ou kapav discerné seki li ti pé pensé, kifer ou pa servi sa pou commence enn conversation avek li? C’est seki Jésus ti faire kan li ti joinde enn madame pré kot enn puit dan la ville Samarie. (Jean 4:7-26) Sa madame-la ti bizin al cherche de l’eau ek c’est sa ki ti occupe so l’esprit. Alors Jésus ti koz lor la avant, ek apré li pa’nn tardé pou faire conversation-la vinn spirituel ek bien animé.

[Zimage page 29]

Kan nou amical ar bann dimoune sa kapav permette nou pou rann zot enn bon temoignage

[Zimage page 31]

Li touletan bon ki nou ena bon maniere