Ki l’opinion Bondié lor lalkol?

NOU Createur, ki envie seki pli bon pou nou, pa interdit nou pou boire lalkol avek moderation.a Au contraire, Li finn donne bann dimoune “di-vin pou faire zot [content], de l’huile pou faire ki zot figure parette bien, ek di-pain pou donne zot la force.” (Psaume 104:15, Bible en français courant) Enn fois, Jésus ti contribué dan la joie enn mariage kan li ti faire de l’eau vinn “pli bon di-vin.”—Jean 2:3-10.

Li raisonnable pou pensé ki nou Createur konn exactement ki l’effet lalkol ena lor fonctionnement nou lekor ek nou cerveau. Dan la Bible, nou Papa ki dan le ciel ‘enseigne nou pou nou profit,’ ek dan enn fason ferme Li mette nou en garde kont bann la boisson ki ena lalkol. (Isaïe 48:17) Guette sa bann l’avertissement bien direct-la:

“Pa soule-zot ar di-vin, parski ena conduite immoral ladan.” (Éphésiens 5:18) “Bann soulard . . . [pa] pou herite Royaume Bondié.” (1 Corinthiens 6:9-11, TOB) Parole Bondié condamne “l’habitude pou boire ziska sou, bann fête kot pena okenn controle, ek bann lezot kitsoz ki pareil.”—Galates 5:19-21, Bible du Semeur.

Asterla, anou guette certain bann danger ki ena kan boire trop beaucoup lalkol.

Bann danger ki ena kan boire trop beaucoup

Mem si lalkol kapav faire inpé di-bien, ena bann ingredient assez fort ladan ki kapav affecté fason ki nou l’esprit ek nou lekor fonctionné. Boire trop beaucoup lalkol kapav faire nou gagne sa bann probleme-la:

Sa kapav fausse jugement enn dimoune ek li ‘nepli kapav pense couma bizin.’ (Proverbes 23:33, TEV) Allen, sa grand buveur ki’nn mentionné dan premier lartik-la, expliké: “L’alcoolisme li pa zis enn maladie ki affecté lekor; li enn maladie ki affecté aussi pensé ek l’attitude enn dimoune. Ou pa pense di-tort ki sa faire lor lezot.”

Sa kapav diminué capacité pou controle ou-mem. La Bible donne sa l’avertissement-la: “Di-vin ek di-vin doux, sa-mem ki enleve bann bon mobile.” (Hoshéa 4:11) Couma sa passé? Lalkol kapav trompe bann dimoune. Enba sa mauvais l’influence-la, bann pensée ek bann desir ki normalement nou pou rejeté, kapav commence parette acceptable—ou-soit-mem attirant. Nou determination pou reste attaché ar seki droite kapav affaibli. Tigit par tigit, lalkol kapav affaibli nou bann defense moral, ek lerla detruire nou lor plan spirituel.

John, par exemple, apré ki li ti laguerre avek so madame, li ti sorti kot li avek colere ek ti al dan enn bar. Li ti’nn fini boire deux-trois verre la boisson pou calmé li kan enn madame ti vinn koz avek li. Apré ki li ti boire encore deux-trois verre, John ti al avek sa madame-la ek ti commette l’adultere. Apré sa, John ti bien regretté, parski li ti faire enn kitsoz ki jamais li ti pou pense pou faire si so bann capacité pou controle li-mem pa ti’nn diminué par lalkol.

Sa kapav faire enn dimoune dire ek faire bann kitsoz sans okenn controle. La Bible pose sa bann question-la: “Pou kisannla bann discussion ek bann laguerre sans raison?” C’est “pou bann ki reste ziska tard, pou boire di-vin.” (Proverbes 23:29, 30, Bible du Semeur) Bann ki boire trop beaucoup kapav ‘croire ki zot au millieu la mer ek coumadir zot pé balancé la-haut lor lé-mat enn bateau.’ (Proverbes 23:34, BFC) Enn kikenn ki’nn boire trop beaucoup kapav levé ek dire: “Kitfois mo’nn blessé ek [mo’nn] gagne batté . . . sans ki mo’nn rann moi compte.”—Proverbes 23:35, BFC.

Boire trop beaucoup kapav gate la santé physik. “A la fin, [lalkol] mordé couma enn serpent, li piké couma enn vipere.” (Proverbes 23:32, Parole de Vie) Bann l’etude dan domaine medical confirme sagesse ki ena dan sa ancien proverbe-la. Si enn kikenn boire enn grand quantité lalkol, sa kapav vinn enn poison mortel. Li kapav gagne tou qualité cancer, enn hepatite ki ena rapport avek lalkol, cirrhose lé-foie, inflamation pancréas, niveau di-sucre dan lekor bien bas dan cas bann ki ena diabete, syndrome alcoolique foetal, setadir bann malformation ki enn ti-baba kapav gagné a cause lalkol, attak cerebral, ou-soit crise cardiaque—sa c’est zis deux-trois consequence ki enn dimoune kapav gagné. Ek mem si enn dimoune boire trop beaucoup zis enn sel fois, sa kapav faire li tombe dan coma ou-soit-mem mort. Mais selman, consequence pli grave ki enn dimoune kapav gagné kan li boire trop beaucoup, sa nou pa trouve li dan bann livre medical.

Pli grand danger. Mem si enn dimoune kapav pa sou, si li boire sans moderation sa expose li ar bann danger lor plan spirituel. La Bible dire dan enn fason clair: “Malheur pou bann ki leve boner gramatin pou rod bann la boisson ki faire zot sou, tellement zot reste la ziska la nuit tombé ki di-vin enflamme zot!” Kifer? Isaïe expliké ki bann consequence sa kapav ena lor plan spirituel si bann dimoune boire sans moderation: “Seki Jéhovah faire, zot pa guetté, ek travail so la main, zot pa’nn trouvé.”—Isaïe 5:11, 12.

Parole Bondié conseil nou pou pa ‘retrouve-nou parmi bann grand buveur di-vin.’ (Proverbes 23:20) Li averti bann femme agé pou pa vinn “esclave beaucoup di-vin.” (Tite 2:3) Kifer? Parski souvent sans ki zot rann zot compte—doucement-doucement—bann dimoune commence boire enn tipé lalkol en plus, pli souvent. Ek finalement, sa dimoune ki boire-la commence dire li-mem: “Kan eski mo pou levé? Mo pou bizin trouve encore kitsoz pou boire.” (Proverbes 23:35, Bible du Semeur) Si enn dimoune couma li levé li bizin commence so la journée avek enn verre lalkol pou remonte li apré ki li’nn boire trop beaucoup la veille, c’est ki li’nn arrive dan enn stade bien critik.

La Bible dire ki bann ki “boire enn quantité di-vin, . . . faire bann fête kot pena okenn controle, bann fête kot mette paryaz boire . . . pou rann compte ar sa kikenn ki’nn paré pou juge bann vivant ek bann mort-la.” (1 Pierre 4:3, 5) Ek concernant sa le temps critik kot nou pé vive-la, Jésus ti donne sa l’avertissement-la: “Faire attention ar zot-mem, pangar zot leker vinn lourd parski zot trop mangé ek boire, ek a cause bann tracas ki ena dan la vie, ek ki enn sel coup sa jour-la vinn lor zot couma enn piege.”—Luc 21:34, 35.

Alors, ki kitsoz bann dimoune ki boire sans moderation kapav faire pou empeche zot vinn ‘lourd parski zot trop boire’?

[Note]

[Zimage page 4, 5]

Kan enn dimoune boire trop beaucoup sa faire li gagne beaucoup probleme