Couma garde enn bon l’attitude lor lalkol

TONY, ki nou ti faire mention dan premier lartik, ti kapav profite enn la vie bien different—si selman li ti admette ki li ti ena enn probleme avek lalkol. Mais selman, parski li ti parette kapav boire beaucoup lalkol sans ki li ressenti okenn kitsoz, li ti croire ki li ti pé controle so la vie. Kifer eski jugement ki li ti faire lor li-mem ti mauvais?

So jugement ti faussé parski li ti boire trop beaucoup lalkol. Mem si Tony ti realise sa ou-soit non, sa l’organe ki ti controle so bann condition physik, mental, ek emotionnel-la, setadir so cerveau, pa ti pé fonctionne bien a cause trop beaucoup lalkol. Plus li ti boire, moins so cerveau ti kapav evalué dan enn fason exact dan ki condition li ti été.

Enn deuxieme raison kifer Tony pa ti kapav analyse li-mem, c’est parski li ti bien envie garde so bann l’habitude boire. Allen, ki’nn faire mention dan bann lartik avant, au commencement ti refuse admette ki ti li ena enn probleme avek lalkol. Li reconette: “Mo ti cachiette mo la boisson, ek mo ti trouve bann excuse ek mo ti convaink mo-mem ki mo probleme lalkol pa ti grave sa quantité-la. Mo ti ena enn sel l’objectif—protege mo l’habitude pou boire.” Mem si lezot ti kapav trouvé ki lalkol ti pé commence controle la vie Tony ek Allen, toulé-deux ti pé contigne dire zot-mem ki tou ti normal. Zot ti bizin prend bann action pou ena controle lor quantité lalkol ki zot ti pé boire. Mais ki bann action zot ti bizin prend?

Faire kitsoz!

Beaucoup dimoune ki finn arrete boire beaucoup lalkol finn faire bann kitsoz ki en accord avek sa bann parole Jésus-la: “Alors, si to lizié droite faire toi tombé, rass li ek jette li loin ar toi. Parski li pli bon pou toi ki to perdi enn sel membre to lekor ki jette tou to lekor dan la géhenne.”—Matthieu 5:29.

Bien-sur, Jésus pa ti pé encourage enn dimoune pou faire li-mem di-mal. Au contraire, dan enn sens symbolik li ti pé montré ki nou bizin disposé pou tire dan nou la vie tou kitsoz ki kapav faire nou di-tort lor plan spirituel. Li vrai ki sa bann action ki nou pou prend-la kapav faire nou souffert beaucoup lor plan physik ek emotionnel, mais li pou protege nou kont bann pensé ek bann situation ki kapav pousse nou pou boire trop beaucoup. Alors, si lezot inn faire ou remarké ki ou consommation lalkol pé vinn trop beaucoup, faire bann demarche necessaire pou controle li.a Si ou trouvé ki ou pa pé kapav controle quantité lalkol ki ou pé boire, prend determination pou arrete li net. Mem si sa faire ou souffert, li pa pou pli dur ki enn la vie ki’nn detruire net.

Mem si ou pa enn alkolik, eski ou ena tendance pou boire trop beaucoup? Si oui, ki bann demarche pratik ou kapav faire pou aide ou garde enn bon l’attitude lor lalkol?

Kot pou gagne l’aide

1. Ena la foi dan pouvoir la priere; prié souvent ek avek tou ou leker. La Bible donne sa conseil-la tou bann ki envie faire Jéhovah plaisir: “Dan tou kitsoz, par la priere, supplication avek bann remerciement, demann Bondié seki zot bizin; ek la paix Bondié ki depasse tou pensée, pou protege zot leker ek zot l’esprit, par moyen Christ Jésus.” (Philippiens 4:6, 7) Pou ki kitsoz ou kapav prié pou gagne sa la paix l’esprit-la?

Ou bizin honnete avek ou-mem ek admette ki ou ena enn probleme avek lalkol, enn probleme ki ou-mem ou bizin reglé. Dire Bondié seki ou pense pou faire concernant sa probleme-la ek Li pou beni bann zeffort ki ou pé faire pou ki ou trouve enn soulagement ek evite bann probleme pli grave. “Kikenn ki cachiette so bann peché pa pou reussi, mais si li confesse ek arrete faire sa bann peché-la, li pou gagne misericorde.” (Proverbes 28:13) Jésus ti dire aussi ki nou kapav faire sa la priere-la: “Pa mette nou devant tentation, mais delivré nou ar sa kikenn ki mauvais-la.” (Matthieu 6:13; note) Alors, couma ou kapav agir en accord avek sa bann la priere-la, ek kot-sa ou kapav trouve bann reponse pou ou bann supplication?

2. Gagne la force dan Parole Bondié. “Parole Bondié, li vivant ek li puissant . . . ek li kapav decouvert bann pensée ek bann l’intention ki ena dan leker.” (Hébreux 4:12) Beaucoup, ki enn lepok ti bann grand buveur, finn gagne l’aide kan zot finn lire ek medite lor bann verset la Bible chaque jour. Enn psalmiste ki ti ena la crainte pou Bondié ti ecrire: “Heureux sa kikenn ki pa finn marche dan conseil bann mauvais dimoune-la. . . . Mais so plaisir li dan la loi Jéhovah, ek dan so la loi, li lire doucement la-nuit li-jour. . . . Tou seki li faire pou reussi.”—Psaumes 1:1-3.

Allen, ki grace a so l’etude la Bible avek bann Témoins de Jéhovah ti gagne courage pou arrete boire beaucoup, dire: “Mo sur ki si la Bible ek bann principe la Bible pa ti aide moi pou arrete boire, mo ti pou’nn fini mort.”

3. Developpe maitrise de soi. La Bible dire ki dan congregation chretien, bann ki enn lepok ti bann grand buveur, ti’nn purifié “avek l’esprit nou Bondié.” (1 Corinthiens 6:9-11) Couma? Enn fason, c’est ki zot ti gagne l’aide ki bizin pou zot abandonne bann paryaz boire ek bann fête kot pena okenn controle ek pou manifesté maitrise de soi, enn qualité ki nou kapav developpé grace a l’esprit saint Bondié. “Pa soule-zot ar di-vin, parski ena conduite immoral ladan, mais contigne rempli-zot avek l’esprit.” (Éphésiens 5:18; Galates 5:21-23) Jésus Christ ti promette ki “nou Papa ki dan le ciel [ti] pou donne encore plus l’esprit saint bann ki demann Li.” Alors “contigne demandé, ek zot pou gagné.”—Luc 11:9, 13.

Bann ki envie adore Jéhovah dan enn fason ki Li accepté, kapav developpe maitrise de soi kan zot lire ek etudié la Bible ek kan zot prié souvent ek avek zot leker. Au lieu ki zot tombe dan decouragement, ena confiance dan sa promesse ki trouve dan Parole Bondié-la: “Sa kikenn ki pé semé pou l’esprit, pou recolté ar l’esprit la vie eternel. Fodé pa nou renoncé pou faire seki bien, parski kan ler arrivé, nou pou recolté si nou pa laisse la fatigue gagne nou.”—Galates 6:8, 9.

4. Choisir bann bon camarade. “Enn kikenn ki marche avek bann dimoune ki ena la sagesse pou gagne la sagesse, mais enn kikenn ki gagne zaffaire avek bann dimoune bete, sa pou fini mal pou li.” (Proverbes 13:20) Faire ou bann camarade koné ki ou bien determiné pou controle quantité lalkol ki ou boire. Mais selman, Parole Bondié ti predire ki kan ou arrete ‘boire enn quantité di-vin, faire bann fête kot pena okenn controle, ek bann fête kot mette paryaz boire,’ certain ou bann camarade ki ou ti ena avant pou ‘etonné ek pou contigne koz en mal lor ou.’ (1 Pierre 4:3, 4) Ou bizin disposé pou arrete frequente bann ki affaibli ou determination pou controle quantité lalkol ki ou boire.

5. Fixé bann limite bien precis. “Arrete faire pareil couma sa le monde-la, mais transforme zot, ek renouvelé zot fason pensé. Coumsa zot pou kapav verifié par zot-mem ki volonté Bondié, li bon, li acceptable ek li parfait.” (Romains 12:2) Si ou laisse bann principe Parole Bondié aide ou pou fixé ou bann prop limite, au lieu ki ou laisse ou bann camarade ou-soit “sa le monde-la” faire sa, ou pou kapav amenn enn la vie ki Bondié pou accepté. Mais couma ou kapav determiné ki ou limite?

Si enn certaine quantité lalkol fausse ou jugement ek affaibli ou capacité pou raisonné, sa vedir ki li trop beaucoup pou ou. Alors, si ou choisir pou boire, li pa sage pou mette enn limite bien vague ki trouve entre pa boire di-tou ek boire ziska sou. Si ou pa accepté la realité, sa kapav fausse jugement honnete ki ou kapav faire lor quantité lalkol ki ou boire. Fixé ou-mem enn limite bien clair, enn limite ki tombe bien dan categorie boire avek moderation—enn limite ki pou permette ou evite tou risk boire trop beaucoup.

6. Konn dire non. “Ki zot Oui vedir Oui, zot Non, Non.” (Matthieu 5:37) Aprann refuse avek gentillesse enn dimoune ki ena bann bon l’intention, mais ki pa konn ou situation ek ki pé insisté pou ki ou boire. “Fodé ki zot parole faire toujours plaisir pou tendé, assaisonné ar di-sel, pou ki zot koné couma pou reponn chaque dimoune.”—Colossiens 4:6.

7. Rod l’aide. Rod l’aide avek ou bann camarade ki kapav fortifié ou determination pou controle quantité lalkol ki ou boire ek ki kapav donne ou enn soutien spirituel. “Deux pli bon ki enn, parski zot gagne enn bon recompense pou travail dur ki zot faire. Parski si enn ladan tombé, lot-la kapav leve so camarade.” (Ecclésiaste 4:9, 10; Jacques 5:14, 16) Institut américain de prévention de l’abus d’alcool et de l’alcoolisme donne sa conseil ki inpé pareil-la: “Diminué ou la boisson parfois kapav difficile. Demann ou famille ek ou bann camarade pou aide ou arrive ziska l’objectif ki ou’nn fixé.”

8. Pa abandonné. “Vinn bann dimoune ki mette la parole en pratik, ek pa bann ki zis tendé, ek ki embete-zot-mem par bann fausse raisonnement. Mais, enn kikenn ki examine en profondeur la loi parfait, la loi ki donne la liberté, ek ki perseveré ladan, sa dimoune-la, parski li’nn vinn enn dimoune ki pa blié seki li’nn tendé, mais ki mette sa en pratik, li pou heureux kan li faire sa.”—Jacques 1:22, 25.

Liberé ar l’esclavage lalkol

Pa tou dimoune ki boire beaucoup ki vinn alkolik. Mais certain commence boire tellement beaucoup—ou-soit tellement souvent—ki zot nepli kapav sans passe lalkol. Kan enn dimoune vinn esclave lalkol li pa zis depann physiquement mais aussi mentalement lor la, a cause sa, sa bann dimoune-la kitfois bizin plus ki zot prop volonté ek enn l’aide spirituel pou arrete boire. Allen rappel: “Kan mo ti pé arrete boire, sa souffrance physik-la ti bien dur parski mo lekor ti pé rod sa lalkol-la. C’est lerla ki mo ti rann moi compte ki en plus l’aide spirituel ki mo ti pé gagné, mo ti bizin enn traitement medical.”

Beaucoup buveur bizin bann traitement medical pou donne zot la force dan zot la lutte spirituel pou arrete boire ek pou pa touche lalkol ditou.b Certain bizin al reste l’hopital pou faire face ar bann symptome bien grave ki zot inn gagné a cause zot inn arrete boire ou-soit zot bizin prend bann medecine pou diminué zot l’envie bien fort pou lalkol ek pa boire pou enn longue periode le temps. Garson Bondié ki ti faire bann mirak ti faire sa remark-la: “C’est pa bann ki fort ki bizin docteur, mais bann ki malade.”—Marc 2:17.

Bann bienfait kan suive conseil Bondié

Bann conseil bien sage ki la Bible donné lor lalkol sorti kot vrai Bondié ki envie seki pli bon pou nou—pa zis pou faire nou plaisir asterla mais aussi pou touletan. Vingt-quatre an apré ki Allen inn arrete boire, li rappel: “Sa ti extraordinaire pou koné ki mo ti kapav vinn different, pou aprann ki Jéhovah ti envie aide moi pou mo kapav corrige mo la vie, ki Li . . . ” Allen faire enn pause parski sa bann souvenir-la trop fort, ek li tini so larme. “Umm, pou koné ki Jéhovah comprend ek interessé ek donne l’aide ki bizin—sa ti incroyable.”

Alors, si lalkol pé controle ou la vie; ki ou pé mal servi li ou-soit ou esclave lalkol, fodé pa ki ou baisse lé-bras trop vite ou-soit ou pensé ki pena okenn l’espoir. Allen ek beaucoup lezot encore, avant ti dan mem situation ki ou été zordi ek zot finn soit diminué quantité lalkol ki zot ti pé boire ou-soit inn arrete boire lalkol net. Zot pena okenn regret; ou aussi ou pa pou regretté.

Ki ou choisir pou boire avek moderation ou-soit pou nepli boire di-tou, suive conseil ki Bondié donné avek amour: “Ah si selman to ti prend compte mo bann commandement! Lerla to la paix ti pou vinn pareil couma enn la riviere, ek to la justice pareil couma bann vague la mer.”—Isaïe 48:18.

[Notes]

[L’encadré page 8]

Eski lalkol pé controle mo la vie?

Ou kapav demann ou-mem:

• Eski mo boire plus lalkol ki avant?

• Eski mo boire pli souvent ki avant?

• Eski mo boire bann la boisson pli fort?

• Eski mo boire lalkol pou lutté kont stress ou-soit pou blié mo bann probleme?

• Eski enn camarade ou-soit enn membre mo famille inn dire moi ki li pé tracassé ar quantité lalkol ki mo boire?

• Eski lalkol inn faire moi gagne probleme dan lakaz, dan travail, ou-soit kan mo pé voyagé?

• Eski mo trouve sa dur pou pa boire lalkol pendant enn semaine?

• Eski mo senti-moi gené kan lezot pa boire?

• Eski mo cachiette lezot concernant quantité lalkol ki mo boire?

Si ou reponn oui pou enn ou-soit pou plusieurs sa bann question-la, kitfois ou bizin faire bann demarche pou controle quantité la boisson ki ou boire.

[L’encadré page 9]

Couma nou kapav prend bann bon decision

Avant ou boire lalkol, demann ou-mem:

• Eski li bon ki mo boire lalkol, ou-soit fodé pa mo boire?

Conseil: Enn kikenn ki pa kapav controle quantité li boire, fodé pa li boire.

• Ki quantité mo bizin boire?

Conseil: Decidé ki quantité ou pou boire avant ki lalkol fausse ou jugement.

• Kan eski mo pou boire?

Conseil: Pa avant ki ou conduire ou-soit faire bann activité ki demann tou ou l’attention; pa avant ki ou prend part dan bann activité religieux; pa pendant grossesse; pa kan ou pé prend certain medecine.

• Kot-sa mo pou boire?

Conseil: Dan enn l’endroit ki respectable; pa en cachiette pou empeche lezot trouve seki ou pé boire; pa devant bann dimoune ki pou soké si zot trouve ou pé boire.

• Avek kisannla mo pou boire?

Conseil: Avek bann camarade ek bann membre la famille ki kapav ena enn bon l’influence lor ou; pa avek bann dimoune ki ena enn probleme avek lalkol.

[L’encadré page 10]

Parole Bondié aide enn ancien soulard

Supot ki reste Thaïlande, ti enn grand buveur lalkol. Au commencement, li ti boire zis a soir. Mais tigit-tigit, li ti commence boire dan gramatin ek apré pendant ler dejeuner aussi. Souvent li ti boire zis pou li sou. Mais apré sa li ti commence etudié la Bible avek bann Témoins de Jéhovah. Kan li ti aprann ki Jéhovah condamne boire ziska sou, Supot ti arrete boire. Mais selman, apré inpé le temps li ti reprend so bann vié l’habitude pou boire. So famille ti bien decouragé.

Mais selman, Supot ti encore content Jéhovah ek li ti envie adore Li dan fason ki bizin. Bann camarade Supot, ti contigne aide li ek ti encourage so famille pou passe plus le temps avek li ek pou pa baisse lé-bras. Dan sa moment-la, bann parole bien direct ki trouve dan 1 Corinthiens 6:10, ki dire ki ‘bann soulard pa pou herite royaume Bondié’ ti aide Supot pou trouvé comié so situation ti grave. Li ti realisé ki li ti bizin faire tou seki li kapav pou li surmonte so probleme lalkol.

Sa fois-la, Supot ti bien decidé pou arrete boire lalkol net. Finalement, avek la force l’esprit saint Bondié, bann conseil ki ena dan Parole Bondié, ek l’aide so famille ek la congregation, Supot ti gagne la force spirituel ki bizin ek li ti surmonte so desir pou lalkol. So famille ti bien content kan li ti prend bapteme pou montré ki li’nn voué so la vie ar Bondié. Azordi Supot ena enn bon relation avek Bondié couma touletan li ti envie, ek li servi so le temps pou aide lezot lor plan spirituel.