La Bible li vrai-mem Bondié so Parole inspiré

KI L’APOTRE Paul ti pé rod dire exactement kan li ti dire ki la Bible li “inspiré par Bondié”? (2 Timothée 3:16) Paul, ki ti pé ecrire en grec, ti servi enn mot ki litteralement vedir “soufflé par Bondié.” Par sa, Paul ti pé dire ki Bondié ti servi so l’esprit saint pou guide bann ecrivain la Bible pou ecrire zis seki Li, Li ti envie zot ecrire.

L’apotre Pierre ti dire ki sa bann ecrivain la Bible-la “grace a l’esprit saint ki’nn pousse zot, . . . inn dire seki Bondié ti ena pou dire.” (2 Pierre 1:21) A cause sa, l’apotre Paul aussi ti kapav decrire bann livre la Bible couma “bann l’ecriture sacré, ki kapav faire [ou] vinn sage pou [ou] gagne la vie sauve grace a la foi concernant Jésus Christ.”—2 Timothée 3:15.

Beaucoup dimoune pa daccord ditou ki c’est Bondié ki finn faire ecrire la Bible. Bann critik attak dan enn fason dangeureux l’integrité la Bible, ek souvent zot faire sa avek seki archeologue Sir Charles Maston decrire couma “enn grand mepris pou bann recit la Bible.” Certain considere li pa plus ki “enn vié collection bann mythe ek bann zistoire pou zenfant.”

Guette bann preuve

Alors, eski nou kapav faire la Bible confiance? Li important ki ou ena ou prop l’opinion lor sa question-la. Kifer? Parski si dan la Bible ena bann renseignement ki sorti kot Bondié Li-mem, li pou bete—ou-soit sa kapav mem amenn la mort si ou pa prend compte so bann renseignement. Si ou considere la Bible couma parole bann dimoune au lieu couma Parole Bondié, l’influence ki li pou ena lor ou bann action ek ou bann croyance pou bien diminué.—1 Thessaloniciens 2:13.

Couma ou kapav decidé si ou kapav faire la Bible confiance? Prend enn l’exemple! Couma ou pou decidé si ou pou faire confiance bann dimoune ki ou joinde? Seki nou sur, c’est ki li bien difficile pou ena confiance ar enn kikenn lor ki nou konn bien tigit kitsoz. C’est zis kan ou aprann konn bann dimoune bien ki ou pou koné avek le temps si zot vrai-mem honnete ek si kapav faire zot confiance. Ou kapav aprann konn la Bible dan mem fason. Fodé pa ki ou zis accepté bann theorie ki pa fondé ou-soit ki basé lor bann prejugé ki empeche bann dimoune ena confiance dan la Bible. Plutot, prend le temps pou examine bann preuve ki soutenir l’idée ki la Bible li “inspiré par Bondié.”

“Bann camarade” mette la Bible en doute

Pa laisse ou destabilisé kan ou trouve mem bann ki dire ki zot “bann camarade” la Bible, mette en doute la Bible; zot dire ki li pa dire la verité ek ki pa kapav faire li confiance. New Dictionary of Theology dire ki azordi, la plupart bann commentateur la Bible, mem si zot pretann ki zot chretien, “pou koz lor bann l’Ecriture zis couma enn livre ki’nn ecrire par bann dimoune.”

Beaucoup dimoune ki etudié la religion finn souleve bann question lor kisannla ki vrai-mem finn ecrire bann livre ki ena dan la Bible. Par exemple, certain dire ki prophete Isaïe pa ti ecrire livre Isaïe. Zot dire ki finn ecrire sa livre-la bien longtemps apré lepok Isaïe. Lowthe Clarke, dan so livre Concise Bible Commentary, soutenir ki livre Isaïe finn “ecrire par plusieurs dimoune ki finn vive dan different lepok.” Mais bann ki faire bann declaration coumsa, zot pa considere seki Jésus Christ ek so bann disciple plusieurs fois ti dire, ki c’est Isaïe ki ti ecrire sa livre-la.—Matthieu 3:3; 15:7; Luc 4:17; Jean 12:38-41; Romains 9:27, 29.

Ena inn faire pire. Par exemple, J. R. Dummelow, enn commentateur, dire ki bann prophetie ki trouve dan livre Daniel “zot zis bann zistoire ki’nn fini arrivé dan le passé, mais ki ecrivain-la faire croire ki c’est bann prophetie.” Encore enn fois, par zot bann parole, zot pa prend compte temoignage Jésus Christ li-mem. Jésus ti donne enn l’avertissement concernant seki li ti appel “sa kitsoz degoutant ki faire bann degat-la, lor ki prophete Daniel ti kozé, deboute dan enn place ki saint.” (Matthieu 24:15) Eski li pou raisonnable pou enn chretien pensé ki Jésus Christ li-mem ti pou’nn prend part dan enn tromperie coumsa—ki li ti pou soutenir bann zistoire ki’nn faire passe pou bann prophetie? Impossible.

Eski sa faire enn difference?

Ou kapav demandé: “Mais eski sa vrai-mem faire enn difference pou koné kisannla finn ecrire bann livre la Bible?” Oui, sa faire enn grand difference. Eski ou pou ena confiance dan enn document kot ou, ou ti pensé ena dernier volonté ou camarade, mais ou al aprann ki en realité pa li ki finn ecrire sa? Supposé ki bann expert ti dire ou ki sa ti enn fausse document—ki bann associé ou camarade ki ti ena bann bon l’intention finn ecrire seki zot ti croire ti dernier volonté ou camarade. Eski sa li pa pou faire sa document-la perdi so valeur devant ou lizié? Eski ou pou ena confiance ki sa document-la pé dire vrai-mem bann dernier volonté ou camarade?

Sa-mem ki finn arrivé avek la Bible. Alors, nou comprend bien kifer tou sa dimoune-la—mem bann ki dire ki zot chretien—senti-zot libre pou ignore seki la Bible dire lor bann sujet couma l’honneteté, moralité sexuel, ek lezot sujet encore. Comié fois ou finn tann bann dimoune sans okenn respé dire bann kitsoz couma: “Ah, mais sa li dan Ancien Testament!”—coumadir sa partie la Bible-la ena enn tigit valeur-mem. Zot dire sa malgré ki l’apotre Paul decrire seki bann dimoune appel Ancien Testament couma “l’ecriture sacré” ki ti “inspiré par Bondié.”

Mais ou kapav dire: “Ou pa kapav simplement pa prend compte bann preuve ki tou sa bann archeologue ek bann bibliste-la donné.” Ou ena raison! Nou ena enn grand reconnaissance, par exemple, envers bann bibliste honnete ki finn faire bann grand travail ki finn aide nou reconette texte original la Bible. Li vrai ki bann ti erreur finn rente dan bann texte la Bible a mesure ki ti pé copié ek recopié li toute longue bann siecle. Mais selman nou bizin rappel ki ena enn grand difference entre reconette ki bann ti erreur finn rente dan bann texte la Bible ki ti recopié ek dire ki la Bible en entier zis parole bann dimoune.

Contigne ena la foi dan “l’Ecriture Sacré”

Zis avant ki li dire ki la Bible finn inspiré par Bondié, Paul ti dire Timothée kifer sa livre ki finn inspiré-la li bien important. Li ti dire: “Dan bann dernier jour, . . . bann dimoune mauvais ek bann faussaire pou vinn pli pire, zot embete lezot ek zot embete zot-mem.” (2 Timothée 3:1, 13) Deja dan lepok Paul bann zom ki ti pé passe pou ‘bann sage ek intelligent’ ti pé servi “bann raisonnement ki convaink lezot” pou trompe bann dimoune ek pou diminué zot la foi dan Jésus Christ. (1 Corinthiens 1:18, 19; Colossiens 2:4, 8) Pou protege Timothée kont sa l’influence-la, l’apotre Paul ti encourage li pou ‘pa abandonne bann kitsoz ki li’nn aprann depuis bien tipti, dan bann l’ecriture sacré’ ki sorti kot Bondié.—2 Timothée 3:14, 15.

Sa bann parole-la ena mem l’importance pou nou dan sa “bann dernier jour[-la].” Pa laisse ou embeté par bann “raisonnement ki [souvent] convaink lezot,” ki certain dimoune finn faire croire. Oui, pa sous-estime sa danger-la. Au contraire, pareil couma bann chretien premier siecle, protege ou-mem ek mette enn confiance total lor seki ou aprann dan la Bible, ki vrai-mem Bondié so Parole inspiré.

Bann Témoins de Jéhovah pou content pou aide ou pou ena la foi dan la Bible. Par exemple, zot kapav montré ou couma a travers l’Histoire bann dimoune finn toujours kapav compte lor bann principe la Bible; couma la Bible li en accord avek la science kan li koz lor bann question scientifik; couma li en harmonie avek li-mem depuis commencement ziska la fin; couma so bann prophetie inn realisé exactement couma ti annoncé—ek lezot preuve encore. Si ou souhaité, pa hesité pou ecrire bann ki’nn publié sa magazine-la pou gagne bann renseignement ki finn aide bann million dimoune sincere pou trouvé ki la Bible li vrai-mem Parole Bondié.

[L’encadré page 5]

Couma ou pou decidé si ou pou faire confiance bann dimoune ki ou joinde?

[L’encadré page 6]

Nou reconnaissant envers bann bibliste honnete ki finn aidé pou retablir texte original la Bible