Eski la Bible li Parole Bondié?
“Tou l’Ecriture li inspiré par Bondié, ek li utile pou enseigné, pou corrigé, pou mette bann kitsoz en ordre, pou discipliné dan la justice, pou ki dimoune ki servi Bondié kapav bien qualifié, bien equipé pou tou bon travail.”—2 TIMOTHÉE 3:16, 17.
ALA bann parole bien fort ki l’apotre Paul inn servi pou montré grand valeur ki la Bible ena! Bien sur, li ti pé surtout faire reference ar bann livre la Bible ki li ti ena dan so lepok, ki bann dimoune souvent appel Ancient Testament. Mais en general, so bann parole li applik avek mem la force ar tou bann 66 livre la Bible, parmi ena aussi bann livre ki bann fidele disciple Jésus finn ecrire dan premier siecle nou lepok.
Eski ou ena enn grand l’estime pou la Bible pareil couma Paul ti ena? Eski ou pensé ki bann ecrivain la Bible ti vrai-mem inspiré par Bondié? Bann chretien premier siecle ti croire sa. Ek pendant bann siecle ki finn suive, bann vrai chretien finn touletan ena sa croyance-la. Par exemple, John Wycliffe, enn anglais ki ti etudié la religion, ek ki ti vive dan quatorzieme siecle, ti considere la Bible couma “enn reference sur en rapport avek la verité.” The New Bible Dictionary, faire enn commentaire lor bann parole ki Paul ti cité dan commencement sa lartik-la, ek li dire ki parski la Bible li inspiré par Bondié, sa li enn garanti ki tou seki la Bible dire li la verité.
Changement l’attitude envers la Bible
Mais selman, pendant sa bann dernier l’année-la, beaucoup dimoune finn tigit-tigit perdi confiance dan l’autorité ki la Bible ena. Livre The World’s Religions, dire: “En theorie, tou bann chretien [encore] accepté la Bible couma enn l’autorité pou guide zot dan seki zot faire ek pou forme zot croyance toulé-deux.” Mais selman en pratik, li nepli coumsa. Zordi, beaucoup dimoune considere la Bible couma enn livre kot ena zis bann “tradition humain ki pa kapav faire confiance.” Mem si zot daccord ki bann ecrivain la Bible ti bann zom ki ti ena enn grand la foi, zot considere sa bann ecrivain-la zis couma bann zom ki ti faire erreur, ki ti essaye explik bann verité spirituel profond, mais ki ti mank la connaissance ek l’eclaircissement ki nou ena zordi.
En realité, azordi bien tigit dimoune vrai-mem laisse la Bible guide zot bann pensée ek zot bann action. Comié fois, par exemple, ou tann bann dimoune dire ki bann principe la Bible lor moralité zot inn demodé ek nepli pratik pou nou lepok? Beaucoup permette zot donne enn tigit l’importance bann la loi ek bann principe la Bible, ou-soit mem ignore zot net kan sa li dan zot l’avantage. Certain soi-disant chretien pa casse la tête ditou ar seki la Bible dire lor fornication, l’adultere, agir dan enn fason malhonnete, ek boire ziska sou.—1 Corinthiens 6:9, 10.
Kifer sa? Vers commencement 20eme siecle, Sir Charles Marston enn archeologue, ti donne enn raison dan so livre The Bible Is True. Li ti dire ki bann dimoune ti trop rapide pou “accepté sans okenn protestation n’importe ki theorie ki bann ecrivain moderne ti donné” ki ti mette en doute fidelité la Bible. Eski pa pé arrive mem kitsoz zordi aussi? Couma ou bizin considere l’opinion ek theorie bann bibliste ki faire bann dimoune mank confiance dan la Bible? Guetté ki prochain lartik ena pou dire lor la.