Seki Jésus ti enseigné lor Bondié

“Personne pa konn le Père, zis Garson [Bondié]. Mais sa Garson-la envie montré lezot le Père, pou ki zot aussi zot konn Li.”—LUC 10:22, PAROLE DE VIE.

AVANT ki li ti existé couma enn dimoune, Garson premier-né Bondié ti passe enn longue periode le temps ensam avek so Papa. (Colossiens 1:15) C’est coumsa-mem ki Garson Bondié finn konn bann pensée, bann sentiment, ek bann fason agir so Papa. Kan plitar Jésus ti vinn lor la terre en tant ki enn zom, li ti ena enn grand desir pou enseigne la verité lor so Papa. Nou kapav aprann beaucoup lor Bondié kan nou ecoute seki sa Garson-la ti ena pou dire.

Nom Bondié Nom Bondié, Jéhovah, ti ena enn grand l’importance pou Jésus. Sa Garson ki Bondié ti bien content-la ti envie ki lezot konn nom so Papa ek servi sa nom-la. Nom Jésus li-mem vedir “Jéhovah Li delivrance.” La nuit avant so la mort, dan enn la priere ki li ti faire Jéhovah Jésus ti kapav dire: “Mo’nn faire . . . konn to nom.” (Jean 17:26) Sa pa etonne nou ki Jésus ti servi nom Bondié ek ti faire lezot konn sa nom-la. Apré tou, couma bann ki ti pé ecoute Jésus ti pou kapav comprend la verité concernant Jéhovah si zot pa ti konn So nom ek signification sa nom-la?a

Grand l’amour Bondié Enn jour dan enn la priere, Jésus ti dire Bondié: “Papa, . . . to finn content moi avant fondation le monde.” (Jean 17:24) Jésus ti trouve l’amour ki Bondié ti manifesté envers li dan le ciel. Alors, kan li ti lor la terre, li ti faire tou pou faire lezot konn sa l’amour-la dan tou so bann different l’aspect.

Jésus ti montré ki l’amour Jéhovah pena limite. Jésus ti dire: “Bondié finn tellement content le monde ki Li finn donne so sel Garson ki Li finn crée direct, pou ki tou seki ena la foi en li pa detruire, mais gagne la vie pou touletan.” (Jean 3:16) Mot grec ki finn servi pou traduire “monde” pa vedir “la terre.” Dan sa verset-la, li pé faire reference ar bann dimoune—oui, ar tou bann dimoune. L’amour ki Bondié ena pou tou bann humain li tellement grand ki Li’nn donne garson ki ena plus valeur pou Li, pou ki bann dimoune fidele kapav liberé ar peché ek la mort ki coumadir pé serre zot bien fort, ek ena possibilité pou vive pou touletan. Li impossible pou mesure largeur ek profondeur enn l’amour ki aussi grand ki sa.—Romains 8:38, 39.

Jésus ti dire enn verité ki rassure nou: Jéhovah ena enn grand l’amour pou sakenn so bann serviteur. Jésus ti enseigné ki Jéhovah li couma enn berger ek ki parmi so bann mouton pena enn ki pareil couma lezot ek pourtant chaque mouton ena valeur pou Li. (Matthieu 18:12-14) Jésus ti dire ki pa mem enn sel moineau pou tombé sans ki Jéhovah koné. Jésus ti dire aussi: “Li finn mem compte tou bann cheveux lor zot, zot la tête.” (Matthieu 10:29-31) Si Jéhovah ena capacité pou remarké ki enn moineau manké dan enn nik, comié plus encore Li observe ek Li interessé ar sakenn so bann serviteur humain! Si Jéhovah finn kapav remark ek compte chaque cheveux lor nou la tête, alors eski ena enn detail concernant nou la vie—concernant seki nou bizin, nou bann difficulté, ek nou bann tracas—ki Li pa kapav koné?

Papa ki dan le ciel Couma nou ti trouvé dan lartik avant, Jésus li sel Garson ki Bondié inn crée direct. Sa pa etonne nou ki kan sa Garson ki Bondié ti bien content-la ti koz ar Jéhovah ek ti koz lor Li, li ti appel Li “Papa.” Kan la Bible mentionne bann premier parole Jésus, dan temple kan li ti ena 12 an, li dire nou ki li ti appel Jéhovah “mo Papa.” (Luc 2:49) Sa l’expression “Papa[-la]” apparette apepré 190 fois dan bann l’Evangile. Jésus ti appel Jéhovah “zot Papa,” “nou Papa,”ek “mo Papa.” (Matthieu 5:16; 6:9; 7:21) Souvent Jésus ti servi sa titre “Papa[-la]” pou decrire Jéhovah. Sa montré ki li possible pou bann dimoune ki faire peché ek imparfait developpe bann relation bien proche avek Jéhovah, enn relation ki basé lor confiance ki nou ena en Li.

Ena misericorde ek pré pou pardonné Jésus ti koné ki bann dimoune imparfait bizin grand misericorde Jéhovah. Dan so l’exemple fils prodigue, Jésus ti compare Jéhovah ar enn papa ki ena compassion, ki pré pou pardonné ek ki ouvert so lé-bras bien grand pou accueillir enn garson ki’nn repenti. (Luc 15:11-32) Sa bann parole Jésus-la donne nou l’assurance ki Jéhovah rod dan leker enn dimoune ki faire peché tou ti changement ki kapav pousse Li pou montré so misericorde. Jéhovah ena enn grand desir pou pardonne enn dimoune ki’nn faire peché ek ki repenti. Jésus ti dire: “Mo dire zot, c’est coumsa-mem ki pou ena plus la joie dan le ciel pou enn sel pecheur ki repenti ki pou quatre-vingt-dix-neuf juste ki pa bizin repentance.” (Luc 15:7) Kisannla pa pou senti-li attiré vers enn Bondié ki ena enn grand misericorde coumsa?

Li ecoute bann la priere Dan le ciel, avant ki li vinn lor la terre, Jésus ti kapav trouvé ki Jéhovah “ecoute la priere” ek ki Li prend plaisir dan la priere so bann serviteur fidele. (Psaume 65:2) Pou sa raison-la, pendant so ministere, Jésus ti enseigne bann dimoune ki ti ecoute li couma zot bizin prié ek pou ki kitsoz zot bizin prié. Li ti donne sa conseil-la: “Pa repete toujours bann mem kitsoz.” Li ti encourage bann ki ti ecoute li pou prié pou ki volonté Bondié “faire lor la terre pareil couma dan le ciel.” Nou kapav aussi prié pou nou gagne nou mangé pou chaque jour, pou gagne pardon pou nou bann peché, ek pou resisté kont tentation. (Matthieu 6:5-13) Jésus ti enseigné ki Jéhovah, pareil couma enn papa, reponn la priere so bann fidele serviteur kan Li exauce zot bann la priere sincere ki zot faire avek la foi.—Matthieu 7:7-11.

Pena doute, Jésus ti faire tou pou enseigne la verité lor Jéhovah ek ki qualité Bondié Li été. Mais ti ena enn lot kitsoz concernant Jéhovah ki Jésus ti bien envie partagé: moyen ki Jéhovah pou servi pou amenn bann changement dan le monde entier pou realise So projet pou la terre ek pou bann dimoune ki reste lor la. En realité, sa sujet-la ti theme message ki Jésus ti preché.

[Note]