La verité lor peché

ESKI enn zom malade kapav prouvé ki li pena la fievre kan li casse so thermometre? Pa ditou! Dan mem fason, c’est pa parski beaucoup rejette seki Bondié pensé concernant peché, ki sa vedir peché pa existé. So Parole, la Bible, aprann nou beaucoup lor sa sujet-la. Ki li enseigne nou exactement concernant peché?

Nou tou nou faire peché

Finn gagne apepré deux mille an, l’apotre Paul ti exprime so deception concernant enn realité: ‘bon kitsoz ki li ti envie faire, li pa ti faire, mais mauvais kitsoz ki li pa ti envie faire, sa-mem ki li ti faire.’ (Romains 7:19) Si nou honnete, nou bizin admette ki lor plan personnel, nou aussi, nou dan mem situation. Kitfois nou envie vive en accord avek bann dix commandement ou-soit lezot principe moral, mais, ki nou content, ki nou pa content, nou pa reussi faire li. Par expré nou pa choisir pou desobeir enn la loi, mais nou faire sa parski nou faible. Kifer sa? Paul li-mem donne nou so reponse: “Alors, si seki mo pa envie faire, c’est sa-mem ki mo faire, c’est pa moi ki pé faire sa, mais peché ki ena en moi.”—Romains 7:20.

Pareil couma Paul, l’humanité en entier pé souffert a cause bann faiblesse ki li ena, ek sa c’est enn preuve ki nou finn herite peché ek l’imperfection. L’apotre Paul ti dire: “Tou dimoune inn faire peché ek zot pa reussi arrive ziska la gloire Bondié.” Ki finn mette zot dan sa situation-la? Paul dire aussi: “Par enn sel zom [Adam], peché finn rente dan le monde ek peché finn amenn la mort, ek coumsa tou dimoune passe par la mort parski zot tou ti’nn faire peché.”—Romains 3:23; 5:12.

Zordi beaucoup rejette l’idée ki peché nou premier parent finn eloigne nou ar Bondié ek inn faire nou perdi la vie parfait ki ti ena au commencement. En realité, la Bible enseigne sa. Kan Jésus ti cite bann premier chapitre Genèse, li ti montré ki li ti croire dan recit concernant Adam ek Ève.—Genèse 1:27; 2:24; 5:2; Matthieu 19:1-5.

Enn parmi bann l’enseignement de base ki ena dan la Bible, c’est ki Jésus ti vinn lor la terre pou delivré bann ki ena la foi en li, ar peché. (Jean 3:16) Nou l’espoir pou l’avenir depann lor si nou accepté moyen ki Jéhovah inn servi pou sauve bann dimoune reconnaissant dan enn mauvais situation lor ki zot pena controle. Mais selman, si nou pa comprend ki été peché devant lizié Bondié, nou pa kapav apprecié disposition ki Li finn etabli pou sauve nou ar peché.

Sacrifice Jésus ek kifer ti bizin sa

Jéhovah ti donne premier zom l’esperance pou vive pou touletan. C’est zis si li ti rebelle kont Bondié ki Adam ti pou perdi sa l’esperance extraordinaire-la. Malheureusement, Adam vrai-mem ti rebellé, ek kan li ti faire sa, li ti vinn enn kikenn ki faire peché. (Genèse 2:15-17; 3:6) Adam ti agir dan enn fason ki ti contraire ar volonté Bondié, li pa ti reussi reste parfait, ek li ti gate so relation avek Bondié. Letan li ti desobeir la loi Bondié, Adam ti faire enn peché. A cause sa li ti commence vinn vié ek finalement li ti mort. Malheureusement, tou bann descendant Adam—parmi ena nou aussi—ti né dan peché, ek nou’nn condamné pou mort a cause peché. Kifer sa?

Raison-la li simple. Bann parent imparfait pa kapav gagne bann zenfant parfait. Tou bann descendant Adam ti né avek peché, ek couma l’apotre Paul dire: “Salaire ki peché payé, c’est la mort.” (Romains 6:23) Pourtant, deuxieme partie sa verset-la donne nou enn l’espoir: “Mais don ki Bondié donné, c’est la vie eternel par Christ Jésus nou Seigneur.” Sa vedir ki parski Jésus finn donne so la vie en sacrifice, sa permette bann dimoune ki obeissant ek ki reconnaissant liberé ar bann consequence peché Adam.a (Matthieu 20:28; 1 Pierre 1:18, 19) Ki sentiment sa bizin pousse ou pou ena?

L’amour Christ “mette enn l’obligation lor nou”

Par inspiration, l’apotre Paul, ti donne reponse Bondié pou sa question ki finn posé-la. Li ti ecrire: “L’amour ki Christ ena, mette enn l’obligation lor nou, parski nou finn comprend ki enn sel zom finn mort pou tou dimoune; . . . ek li’nn mort pou tou, pou ki bann ki vive nepli vive pou zot-mem, mais pou celui ki’nn mort pou zot ek ki’nn relevé.” (2 Corinthiens 5:14, 15) Si enn dimoune realisé ki sacrifice Jésus kapav libere li ar bann consequence peché—ek li envie montré so reconnaissance pou sa disposition-la—li bizin faire zeffort pou vive en accord avek seki Bondié demann li. Sa implik, gagne enn connaissance lor seki Bondié demann li faire, forme so conscience dapré bann principe la Bible, ek apré vive en accord avek sa bann principe-la.—Jean 17:3, 17.

Kan nou faire seki mauvais, sa gate nou relation avek Bondié, Jéhovah. Kan le roi David ti rann li compte ki l’adultere ki li ti commette avek Bath-Shéba ek kan li ti faire touye mari Bath-Shéba, ti bann peché bien grave, pena doute ki li ti bien honté. Mais seki ti plus tracasse li—ek li ti ena raison pou sa—c’est ki so peché ti’nn offense Bondié. Avek regret li ti dire Jéhovah: “Kont toi, kont to tousel ki mo’nn faire peché, ek mo’nn faire seki mauvais devant to lizié.” (Psaume 51:4) Pareil, kan Joseph ti tenté pou commette l’adultere, so conscience ti pousse li pou demandé: “Couma mo kapav faire enn mauvais kitsoz coumsa ek vrai-mem faire peché kont Bondié?”—Genèse 39:9.

Alors, peché c’est pa zis ki nou senti-nou coupable parski finn trap nou pé faire enn kitsoz mauvais. C’est pa zis aussi enn situation kot nou bizin rann compte ar la societé parski kitfois nou pa’nn faire seki lezot ti pé attann nou faire. Kan nou desobeir la loi Bondié par rapport ar sexualité, l’honneteté, respé, l’adoration, ek lezot kitsoz encore, sa gate nou relation avek Bondié. Si nou pratik peché volontairement, nou pé faire nou-mem vinn l’ennemi Bondié. Ala enn verité lor ki nou bizin bien reflechi.—1 Jean 3:4, 8.

Alors, ki finn arrive peché? En realité, peché pa finn changé. Bann dimoune finn zis commence appel li par lezot nom, avek l’espoir ki li pou parette moins grave. Beaucoup dimoune soit inn deforme zot conscience ou-soit zot pa’nn ecoute li. Tou bann ki envie gagne faveur Bondié bizin lutte kont enn tendance coumsa. Couma nou finn trouvé, salaire ki peché payé, li pa zis ki nou l’amour-prop inn blessé ou-soit nou’nn senti-nou embarrassé, mais c’est la mort. Peché li enn question la vie ou-soit la mort.

Mais seki reconforte nou, c’est ki grace a valeur sacrifice Jésus, li possible ki nou gagne pardon nou peché, si nou repenti ek nou arrete faire sa bann peché-la. Paul ti ecrire: “Heureux bann dimoune ki zot bann action ki kont la loi finn pardonné ek ki zot bann peché finn couvert; heureux sa zom ki Jéhovah pa pou prend compte so peché dan okenn fason.”—Romains 4:7, 8.

[Note]

[L’encadré page 10]

Enn l’enseignement l’Eglise changé net

La plupart bann catholique jamais finn bien comprend croyance lor bann Limbes. Sa bann dernier dizaine l’année-la, li finn perdi so valeur tigit-tigit—ziska ki zot inn tire li net dan catechisme. En 2007, dan enn document ki appel International Theological Commission, l’Eglise catholique, inn montré ki li’nn arrete doctrine lor bann Limbes. Li ti cite bann raison basé lor certain l’enseignement ki donne enn l’espoir ki bann tibaba ki mort sans prend bapteme kapav gagne la vie sauve ek rente dan enn bonheur eternel.

Kifer sa changement-la? Avant tou, sa ti permette l’Eglise pou libere li ar seki enn journaliste français, Henri Tincq, appel “enn l’heritage bien lourd, ki enn l’Eglise manipulateur ti defann depuis Moyen Âge ziska 20^eme siecle, [l’Eglise] ti trop content servi l’enseignement lor bann Limbes couma enn menace pou pousse bann parent baptise zot bann zenfant pli vite possible.” Mais sa changement ki finn ena concernant l’enseignement bann Limbes-la finn aussi souleve lezot question.

Basé lor tradition ou-soit lor la Bible? Dapré l’Histoire, croyance dan bann Limbes ti commencé a partir 12^eme siecle kan ti ena bann debat lor la religion concernant purgatoire. L’Eglise catholique ti enseigné ki nâme contigne vive apré la mort, alors, li ti bizin expliké ki ti pou arrive nâme bann tibaba ki pa ti pou kapav al dan le ciel parski zot pa ti baptisé mais en mem temps ki pa ti merite al dan l’enfer. Ala couma finn gagne l’enseignement concernant bann Limbes.

Mais selman, la Bible pa enseigné ki nâme contigne vive apré la mort. Au contraire, li explik dan enn fason clair ki nâme enn dimoune li pa immortel, mais, ki nâme ki faire peché kapav “detruire net” ek zot “pou mort.” (Actes 3:23; Ézékiel 18:4, Douay-Rheims Version.) Si nâme mort, enn place couma bann Limbes pa kapav existé. En plus, la Bible decrire la mort couma enn l’etat kot nou pa konn nanyin, li couma enn sommeil.—Ecclésiaste 9:5, 10; Jean 11:11-14.

La Bible montré ki Bondié considere bann jeune zenfant bann parent chretien couma saint. (1 Corinthiens 7:14) Sa bann parole-la pa ti pou ena okenn sens, si bapteme bann tibaba ti necessaire pou zot gagne la vie sauve.

L’enseignement lor bann Limbes ti vrai-mem enn offense kont Bondié. Sa ti presente Li couma enn dirigeant cruel ki puni bann innocent, au lieu couma enn Papa ki juste ek ena l’amour. (Deutéronome 32:4; Matthieu 5:45; 1 Jean 4:8) Alors, aster nou comprend kifer bann chretien sincere touletan finn considere sa l’enseignement-la couma enn l’enseignement ki pena okenn sens.

[Zimage page 9]

Kan nou vive en accord avek Parole Bondié, sa permette nou ena enn bon relation avek Bondié ek bann dimoune