Bann parole gentil favorise bann bon relation
“Fodé ki zot parole faire toujours plaisir pou tendé.”—COL. 4:6.
1, 2. Ki bon resultat enn frere ti gagné parski li ti ena bann parole gentil?
“PENDANT ki mo ti pé preche de porte en porte, mo ti joinde enn missié ki ti tellement en colere ki so la levre ek tou so lekor ti commence tremblé,” c’est seki enn frere ti raconté. “Avek calme, mo ti essaye raisonne avek li a partir la Bible, mais sa inn faire li plus en colere encore. Kan so madame ek so bann zenfant ti commence criye ar moi zot aussi, mo ti koné ki ti’nn arrive ler pou mo allé. Mo ti rassure sa famille-la ki mo’nn vinn en paix ek ki mo ti pou content al en paix. Mo ti montré zot Galates 5:22 ek 23, ki mentionne l’amour, douceur, maitrise de soi ek la paix. Apré sa, mo ti quitte zot.
2 “Plitar, kan mo ti pé visite bann lezot lakaz lot coté chemin, mo ti trouve famille-la pé assizé devant, lor zot perron. Zot ti appel moi. Mo ti demann mo-mem: ‘Ki zot pou dire moi encore-la?’ Missié-la ti ena enn broc de l’eau glacé dan so la main ek ti offert moi enn verre de l’eau. Li ti excuse-li parski li ti koz brite avek moi ek ti felicite moi pou mo la foi solide. Nou ti quitte nou camarade en paix.”
3. Kifer fodé pa nou laisse lezot faire nou en colere?
3 Zordi, dan sa le monde ki rempli ar pression-la, nou pa kapav evite joinde bann dimoune ki en colere, mem dan nou ministere. Kan arrive sa, li bien important ki nou manifesté “douceur ek enn grand respé.” (1 Pierre 3:15) Si sa frere-la ti laisse la rage sa missié-la ek so mauvais maniere faire li aussi en colere, l’attitude missié-la pa ti pou changé; kitfois li ti pou plus en colere encore. Parski frere-la ti controle li-mem ek ti ena bann parole gentil, sa ti fini bien.
Ki aide nou pou ena bann parole gentil?
4. Kifer li important ki nou ena bann parole ki faire plaisir pou tendé?
4 Ki nou pé koz ar bann dimoune en dehors congregation ou-soit ki dan congregation, ou-soit mem avek bann membre nou famille, li bien important ki nou suive sa conseil l’apotre Paul-la: “Fodé ki zot parole faire toujours plaisir pou tendé, assaisonné ar di-sel.” (Col. 4:6) Pou ki ena enn bon communication ek la paix, li necessaire ki nou dire bann parole ki faire plaisir pou tendé.
5. Ki enn bon communication pa vedir? Donne enn l’exemple.
5 Enn bon communication pa vedir ki nou kapav dire tou seki nou pensé ek seki nou ressenti n’importe kan, surtout si nou en colere. La Bible montré ki si nou dire bann kitsoz avek colere sans okenn controle, c’est enn signe faiblesse, pa la force. (Lire Proverbes 25:28; 29:11.) Enn fois, Moïse—ki ti “beaucoup pli humble” ki tou bann dimoune ki ti vivant dan sa lepok-la—ti laisse rebellion nation Israël faire li sap lor cale ek li pa ti donne la gloire Bondié. Moïse ti dire franc seki li ti pensé, mais Jéhovah pa ti content. Apré ki li ti conduire bann Israélite pendant 40 an, Moïse pa ti gagne privilege pou amenn zot dan la Terre promise.—Nomb. 12:3; 20:10, 12; Ps. 106:32.
6. Ki sa vedir faire bien attention kan nou kozé?
6 La Bible koz en bien lor capacité pou controle nou ek pou faire bien attention kan nou kozé. “Kan enn kikenn koz beaucoup, li pa pou manké commette enn faute, mais enn kikenn ki faire attention, tini so la langue.” (Prov. 10:19; 17:27) Selman, faire bien attention kan nou kozé pa vedir ki nou bizin touletan reste trankil. Au contraire nou bizin koz dan enn fason ki “faire toujours plaisir pou tendé,” servi nou la langue pou gueri pa pou blessé.—Lire Proverbes 12:18; 18:21.
“Enn le temps pou reste trankil ek enn le temps pou kozé”
7. Ki qualité kitsoz fodé pa sorti dan nou la bouche, ek kifer?
7 Pareil couma nou bizin pese bien nou bann mot ek ena bann parole gentil avek nou bann collegue travail ou-soit avek bann etranger dan predication, nou bizin aussi koz dan mem fason avek bann membre congregation ou-soit nou famille. Si nou tire nou colere lor lezot sans ki nou reflechi lor bann consequence, sa kapav faire nou ek lezot beaucoup di-tort lor plan spirituel, affectif, ek physik. (Prov. 18:6, 7) Nou bizin controle nou rancune—enn signe nou l’imperfection. Insulté dimoune, bouffonne zot, meprise zot ek ena enn colere ki rempli ar la haine, tousala bien mauvais. (Col. 3:8; Jacq. 1:20) Zot kapav detruire bann bon relation avek lezot dimoune ek avek Jéhovah. Jésus ti dire: “N’importe kisannla ki contigne en colere ar so frere pou rann compte devant la cour; mais enn kikenn ki dire enn parole kont so frere pou montré ki li ena mepris pou li, pou bizin rann compte devant la cour Supreme; alors ki enn kikenn ki dire: ‘Mauvais Fou!’ pou merite géhenne difé.”—Mat. 5:22.
8. Kan eski nou bizin dire seki nou ressenti, mais dan ki fason?
8 Mais kitfois nou pou pensé ki dan certain cas nou pou bizin kozé. Si enn frere ou-soit enn soeur inn dire ou enn kitsoz ki finn tellement bouleverse ou ki ou pa kapav passe lor la, pa laisse la haine developpé dan ou leker. (Prov. 19:11) Si enn kikenn inn faire ou en colere, controle ou bann sentiment ek apré, prend bann disposition pou reglé probleme-la. Paul ti ecrire: “Pa laisse soleil couché alors ki zot encore en colere.” Parski sa probleme-la pé contigne fatigue ou, koz sa avek calme ek dan enn bon moment ar sa dimoune-la. (Lire Éphésiens 4:26, 27, 31, 32.) Koz ar ou frere ou-soit ou soeur lor la, avek franchise mais avek gentillesse, avek l’objectif pou faire la paix avek li.—Lév. 19:17; Mat. 18:15.
9. Kifer li bon ki nou controle nou bann sentiment avant ki nou al koz ar nou frere?
9 Bien sur, ou bizin choisir enn bon moment. Ena “enn le temps pou reste trankil ek enn le temps pou kozé.” (Eccl. 3:1, 7) En plus, “leker enn dimoune juste, medité pou li kapav reponn.” (Prov. 15:28) Sa vedir ki li bon nou attann avant nou koz lor nou probleme. Si nou rod reglé enn probleme alors ki nou encore bien en colere, sa kapav faire situation-la vinn pli pire; mais selman, li pa bon aussi ki nou attann trop longtemps.
Bann bon action favorise bann bon relation
10. Couma bann bon action kapav ameliore bann relation?
10 Kan nou ena bann parole gentil ek enn bon communication, sa permette pou reste en paix avek lezot. En realité, kan nou faire tou seki nou kapav pou ameliore nou relation avek lezot, sa kapav ameliore nou communication avek zot. Kan nou prend l’initiative pou faire bann bon kitsoz pou lezot, par exemple rod bann l’occasion pou aide zot, donne zot enn cadeau avek enn bon l’intention ek invite zot, sa kapav favorise enn communication franc. Sa kapav mem “mette enn tas la braise difé” lor la tête enn dimoune ek faire li montré so bann bon qualité. Lerla, li pou pli facile pou reglé nou probleme avek li.—Rom. 12:20, 21.
11. Ki l’initiative Jacob ti prend pou repare so relation avek Esaü, ek ki resultat li ti gagné?
11 Jacob ti comprend sa. So frere jumeau, Esaü, ti tellement en colere avek li, ki Jacob ti bizin sauvé pou Esaü pa touye li. Apré plusieurs l’année, Jacob ti retourne kot li. Esaü ti al joinde li avek 400 zom. Jacob ti prié pou gagne l’aide Jéhovah. Apré sa, li ti envoye enn grand quantité zanimo en cadeau pou Esaü. Sa cadeau-la ti ena l’effet ki ti bizin. Kan zot ti joinde, l’attitude Esaü ti changé, ek li ti galopé pou maye Jacob dan so lé-bras.—Gen. 27:41-44; 32:6, 11, 13-15; 33:4, 10.
Encourage lezot avek bann parole gentil
12. Kifer nou bizin servi bann parole gentil avek nou bann frere?
12 Bann chretien servi Bondié, pa lezot dimoune. Mais kan-mem, li normal ki nou envie gagne faveur lezot. Nou bann parole gentil kapav faire fardeau nou bann frere ek soeur vinn pli leger. Mais si nou critik zot dan enn fason bien dur, sa kapav faire zot fardeau vinn pli lourd ek kapav mem amenn certain pou demann zot-mem si zot pa’nn perdi faveur Jéhovah. Alors, anou dire bann parole sincere ki pou encourage lezot, “tou parole ki bon pou batir kan necessaire, pou ki bann ki pé ecouté kapav gagne kitsoz ki bon.”—Éph. 4:29.
13. Ki bann ancien bizin rappel (a) kan zot donne bann conseil? (b) kan zot ecrire bann lettre?
13 Bann ancien surtout bizin manifesté la “douceur” ek traite troupeau Bondié avek tendresse. (1 Thess. 2:7, 8) Kan bann ancien bizin donne bann conseil, zot bizin ena l’objectif pou faire sa “avek douceur,” mem si zot koz avek bann dimoune ki “pa bien disposé pou ecouté.” (2 Tim. 2:24, 25) Kan zot bizin ecrire bann lettre enn lot college ancien ou-soit filiale, bann ancien bizin toujours exprime-zot avek gentillesse. Zot bizin bon ek ena tact, en accord avek seki nou lire dan Matthieu 7:12.
Koz avek gentillesse avek bann membre nou famille
14. Ki conseil Paul donne bann mari, ek kifer?
14 Nou bann parole, fason ki nou faire nou figure, ek bann geste ki nou faire, ena enn l’effet lor bann dimoune, ek kitfois nou pa rann-nou compte l’effet ki sa kapav ena. Par exemple, certain missié kitfois pa bien conscient ki quantité zot bann parole kapav affecté bann madame. Enn soeur ti dire: “Sa faire moi peur kan mo mari criye fort ar moi.” Bann parole dur kapav ena enn pli grand l’effet lor enn femme plus ki lor enn zom ek enn femme pou rappel sa pli longtemps. (Luc 2:19) Sa li vrai surtout kan sa bann parole-la sorti dan la bouche enn dimoune ki femme-la content ek envie respecté. Paul ti donne sa conseil-la bann mari: “Contigne content zot femme ek pa vinn amer ar zot.”—Col. 3:19.
15. Donne enn l’exemple ki montré kifer enn mari bizin traite so femme avek gentillesse.
15 En rapport avek sa, enn frere marié ki ena l’experience donne enn l’exemple pou montré kifer enn mari bizin traite so femme avek gentillesse, couma “enn recipient pli fragile.” Li ti dire: “Kan ou trap enn vase ki ena valeur ek ki fragile, fodé pa ki ou pese li trop fort, sinon li kapav felé. Mem si ou repare li, bann mark felé-la kapav contigne parette. Si enn mari servi bann mot ki trop dur avek so femme, li kapav blesse li. Sa kapav coumadir crée bann mark felé ki dure longtemps, dan zot relation.”—Lire 1 Pierre 3:7.
16. Couma enn femme kapav construire so famille?
16 Bann zom aussi kapav encouragé ou-soit decouragé par bann parole lezot dimoune, parmi ena bann parole zot femme. “Enn femme ki ena bon jugement” ek ki so mari kapav vrai-mem faire “confiance,” pou ena consideration pou bann sentiment so mari, pareil couma li envie ki so mari ena consideration pou li. (Prov. 19:14; 31:11) Oui, enn femme kapav ena enn grand l’influence dan so famille, en bien ou-soit en mal. “Enn femme ki vrai-mem sage inn construire so lakaz, mais enn femme ki bete crase li ar so prop la main.”—Prov. 14:1.
17. (a) Couma bann jeune bizin koz ar zot parent? (b) Couma bann adulte bizin koz ar bann jeune, ek kifer?
17 Bann parent ek bann zenfant aussi bizin koz avek gentillesse sakenn avek zot camarade. (Mat. 15:4) Si nou ena consideration kan nou koz avek bann jeune, sa pou aide nou pou pa “enerve” zot ou-soit ‘excite zot colere.’ (Col. 3:21; Éph. 6:4, note.) Bann parent ek bann ancien bizin koz avek respé ar bann zenfant, mem kan bizin discipline zot. Coumsa, li pou pli facile pou bann jeune corrige zot conduite ek garde bann bon relation avek Bondié. Li pli bon pou agir coumsa, au lieu ki ou donne zot l’impression ki zot enn cas desesperé. Sinon, sa bann jeune-la aussi pou ena sa sentiment-la lor zot. Li possible ki bann jeune pa pou rappel tou bann conseil ki zot gagné, mais seki zot pou rappel, c’est couma lezot finn koz ar zot.
Dire bann bon parole ki sorti dan nou leker
18. Couma nou kapav elimine nou bann mauvais pensée ek bann mauvais sentiment?
18 Controle nou colere c’est pa zis montré ki nou calme. Nou l’objectif, c’est pa zis pou controle nou bann sentiment bien fort pou zot pa eclaté. Si nou essaye parette calme mais ki endan nou pé bouilli ar colere, sa pou faire nou stressé. C’est coumadir nou pé appuye lor frein enn l’auto ek accelerateur en mem temps. Nou force l’auto-la ek nou kapav abime so moteur. Alors, pa garde nou colere endan ek laisse li explosé plitar. Prié pou ki Jéhovah aide ou pou tire dan ou leker bann mauvais sentiment. Laisse l’esprit Jéhovah transforme ou l’esprit ek ou leker pou ki ou kapav agir en accord avek so volonté.—Lire Romains 12:2; Éphésiens 4:23, 24.
19. Ki kapav aide ou pou evite bann situation kot ou pou discute avek colere?
19 Faire bann kitsoz pratik pou ki ou kapav controle ou bann sentiment. Si ou trouve ou-mem dan enn situation critik ek ou pé commence bouilli ar colere, kitfois li pou bon ki ou quitte sa place kot ou été-la, lerla ou pou ena le temps pou controle ou bann sentiment. (Prov. 17:14) Si sa dimoune avek ki ou pé kozé-la commence en colere, faire plus zeffort pou ena bann parole gentil. Rappel bien: “Enn reponse, kan li douce, li faire la colere disparette, mais enn parole blessant faire la colere monté.” (Prov. 15:1) Si ou faire enn remark blessant ou-soit enn remark ki pou pik dimoune-la, c’est coumadir ou pé mette de l’huile lor difé, mem si ou dire sa lor enn ton calme. (Prov. 26:21) Alors, si ou dan enn situation kot enn dimoune provok ou, “pa pressé pou kozé ek pa en colere vite.” Prié Jéhovah pou donne ou so l’esprit pou aide ou pou dire bann bon parole, pa bann mauvais parole.—Jacq. 1:19.
Pardonné avek tou ou leker
20, 21. Ki kapav aide nou pou pardonne lezot, ek kifer nou bizin faire sa?
20 Malheureusement, personne parmi nou pa kapav controle so la langue dan enn fason parfait. (Jacq. 3:2) Malgré tou zot zeffort, mem bann membre nou famille ek nou bann frere ek soeur spirituel ki nou bien content, kapav parfois faire nou enn remark sans reflechi ki blesse nou. Au lieu ki nou offense vite, anou examine avek patience kifer zot inn dire nou sa bann parole-la. (Lire Ecclésiaste 7:8, 9.) Eski ti ena pression lor zot, zot ti pé gagne peur, zot pa ti senti-zot bien, ou-soit zot ti pé lutté ar bann probleme ki ou pa koné?
21 Li vrai ki sa bann kitsoz-la pa permette nou pou explosé ar colere. Mais si nou arrivé comprend kifer zot finn agir tel ou tel fason, sa kapav aide nou pou comprend kifer parfois certain dire ou-soit faire bann kitsoz ki zot pa ti bizin faire. Lerla, sa kapav pousse nou pou pardonne zot. Nou tou nou finn deja dire ou-soit faire bann kitsoz ki finn blesse lezot, ek nou souhaité ki zot pardonne nou avek bonté. (Eccl. 7:21, 22) Jésus ti dire ki si nou envie ki Bondié pardonne nou, nou bizin pardonne lezot. (Mat. 6:14, 15; 18:21, 22, 35) Alors, nou bizin demann excuse ek pardonné sans tardé. Lerla, nou pou garde l’amour—sa “kitsoz parfait ki soude nou tou ensam”—dan nou famille ek dan congregation.—Col. 3:14.
22. Kifer li vaut la peine nou faire zeffort pou ena bann parole gentil?
22 Alors ki sa le monde kot ena beaucoup colere-la pré pou fini, li possible ki nou pou gagne plus difficulté pou garde nou la joie ek nou l’unité. Si nou applik bann principe pratik ki ena dan Parole Bondié, sa pou aide nou pou servi nou la langue pou faire seki bon, pa seki mauvais. Nou pou ena bann pli bon relation dan congregation ek dan nou famille, ek nou l’exemple pou donne lezot enn bon temoignage lor nou “Bondié heureux,” Jéhovah.—1 Tim. 1:11.
Eski ou kapav expliké?
• Kifer li important ki ou choisir enn bon moment pou koz lor bann probleme?
• Kifer bann membre enn famille bizin toujours koz sakenn ar so camarade “dan enn fason ki faire plaisir pou tendé”?
• Couma nou kapav evite dire bann kitsoz ki blesse lezot?
• Ki kapav aide nou pou pardonné?