“Contigne domine le mal” kan nou controle nou colere

“Pa tire vengeance zot-mem, mo bann frere ki mo bien content, . . . mais contigne domine le mal par le bien.”—ROM. 12:19, 21.

1, 2. Ki bon l’exemple certain Témoin ki ti pé voyagé ti donné?

E NN groupe 34 Témoins de Jéhovah ti pé voyagé pou al l’inauguration enn Béthel kan zot avion ti faire enn retard a cause enn probleme mecanik. Zot ti supposé faire enn escale zis enn heure temps pou mette l’essence, dan enn ti l’aeroport. Mais au lieu sa, zot ti reste 44 heure dan sa l’aeroport-la, zot pa ti ena assez mangé ek de l’eau, ni enn bon toilette. Beaucoup passager ti commence en colere ek ti menace bann dimoune ki ti travail dan sa l’aeroport-la. Mais nou bann frere ek soeur ti garde zot calme.

² Finalement, bann Témoins-la ti reussi arrive l’inauguration ek zot ti assisté dernier partie programme. Mem si zot ti bien fatigué, zot ti resté apré pou profite compagnie zot bann frere ek soeur local. Plitar, zot ti aprann ki lezot ti remark zot patience ek zot calme. Enn missié ki ti parmi bann passager ti dire compagnie sa avion-la: “Si pa ti ena sa 34 chretien-la parmi bann passager, ti pou ena enn emeute dan l’aeroport.”

Nou pé vive dan enn le monde en colere

3, 4. (a) Couma ek depuis kan bann dimoune agir avek violence parski zot en colere? (b) Eski Caïn ti kapav controle so colere? Expliké.

³ Bann pression ki ena dan sa le monde mauvais kot nou pé vive-la, kapav faire bann dimoune en colere. (Eccl. 7:7) Souvent, sa colere-la faire bann dimoune ena la haine ek vinn violent. Ena bann la guerre entre bann pays ek aussi entre bann dimoune dan enn mem pays. A cause bann pression dan la famille, ena la guerre dan beaucoup lakaz. La colere ek la violence finn commencé depuis bien longtemps dan l’Histoire. Caïn, premier garson Adam ek Ève ti touye so pli jeune frere Abel, parski li ti jaloux li. Caïn ti faire sa crime-la mem si Jéhovah ti conseil li pou controle so bann l’emotion. Jéhovah ti promette ki Li pou beni li si li faire sa.—Lire Genèse 4:6-8.

⁴ Malgré l’imperfection ki li ti herité, Caïn ti ena enn choix. Li ti kapav controle so colere, mais li pa finn faire sa. A cause sa, li ti porte tou responsabilité pou sa action violent ki li ti faire-la. Li pareil aussi pou nou, a cause nou l’imperfection, li pli difficile pou evite mette nou-mem en colere ek faire bann kitsoz par colere. Ena encore lezot probleme grave ki faire nou plus stressé dan sa “lepok critik” kot nou pé vive-la. (2 Tim. 3:1) Par exemple, bann probleme economik kapav mette pression lor nou ek stress nou. La police ek bann l’organisation ki aide bann famille dire ki ena enn lien entre crise financier ek l’augmentation bann crise colere ek violence dan la famille.

5, 6. Ki l’attitude ki encouragé par le monde concernant la colere, kapav influence nou?

⁵ En plus, beaucoup dimoune ki nou joinde, zot “content zot-mem,” zot “ena l’orgueil,” ek zot “pena okenn pitié.” Li bien facile pou ki bann mauvais maniere coumsa deteint lor nou ek faire nou ena tendance pou en colere. (2 Tim. 3:2-5) En realité, bann film ek bann programme television souvent montré ki li bon nou tire vengeance, ek zot presente la violence couma enn solution naturel ek acceptable pou reglé bann probleme. Souvent, zistoire sa bann film-la amenn bann dimoune pou attann avek impatience kan bandit-la pou “gagne seki li merité”—ki acteur-la touye bandit-la dan enn fason violent.

⁶ Sa qualité publicité-la pa encourage bann dimoune pou vive dapré bann principe Bondié, mais li encourage pou ena “l’esprit le monde” ek so chef ki en colere, Satan. (1 Cor. 2:12; Éph. 2:2; Rév. 12:12) Sa l’attitude-la encourage bann dimoune pou satisfaire zot bann mauvais desir ek li kont l’esprit saint Bondié net ek fruit ki sa l’esprit-la produire. Oui, enn l’enseignement fondamental vrai religion chretien c’est: pa tire vengeance kan bann dimoune provok nou. (Lire Matthieu 5:39, 44, 45.) Alors, couma eski nou kapav applik pli bien bann l’enseignement Jésus?

Bann bon ek bann mauvais l’exemple

7. Ki ti arrivé kan Siméon ek Lévi pa ti controle zot colere?

⁷ La Bible conseil nou plusieurs fois pou controle nou colere. Dan la Bible ena aussi bann l’exemple pratik lor seki kapav arrivé kan nou faire sa ek kan nou pa faire sa. Guette seki ti arrivé kan Siméon ek Lévi, bann garson Jacob, ti tire vengeance lor Shekèm parski li ti viole zot soeur, Dina. Zot “ti senti-zot offensé ek zot ti bien en colere.” (Gen. 34:7) Apré sa, bann lezot garson Jacob ti attak la ville Shekèm, ti prend tou zot di-bien ek zot ti amenn bann femme ek bann zenfant couma prisonnier. Zot ti faire tousala pa zis a cause Dina, mais kitfois aussi a cause zot l’orgueil, zot pa ti envie perdi la face. Pou zot, Shekèm ti offense zot ek zot papa, Jacob. Mais ki Jacob li, li ti pensé lor zot conduite?

8. Ki kitsoz recit lor Siméon ek Lévi montré-nou lor vengeance?

⁸ Seki ti arrive Dina ti surement faire Jacob beaucoup la peine; pourtant li ti condamne seki so bann garson ti faire par vengeance. Siméon ek Lévi ti essaye montré ki zot ti ena raison. Zot ti dire: “Eski bizin traite nou soeur couma enn prostitué?” (Gen. 34:31) Mais sa pa ti fini la-mem, parski Jéhovah pa ti content seki ti’nn arrivé. Plusieurs l’année apré, Jacob ti annoncé ki, parski Siméon ek Lévi ti agir avek violence ek colere, zot bann descendant ti pou fané partout-partout parmi bann tribu en Israël. (Lire Genèse 49:5-7.) Oui, parski zot pa ti kapav controle zot colere, zot ti perdi faveur Bondié ek faveur zot papa toulé-deux.

9. Kan eski David ti manké sap lor cale?

⁹ David ti agir dan enn fason different. Li ti gagne plusieurs l’occasion pou tire vengeance, mais li pa ti faire li. (1 Sam. 24:3-7) Mais enn fois, li ti manké sap lor cale. Enn zom riche ki ti appel Nabal ti insulté bann zom David, mem si bannla ti protege so bann troupeau ek so bann berger. Kitfois David ti senti-li offensé surtout pou so bann zom, ek li ti pré pou al tire vengeance avek violence. Pendant ki David ek so bann zom ti pé allé pou attak Nabal ek bann membre so lakaz, enn jeune homme ti faire Abigaïl koné seki ti arrivé ek ti suppliye li pou faire kitsoz. Abigaïl, femme Nabal, ti enn femme ki ti ena bon sens. Desuite li ti rassemblé enn quantité kitsoz ek kan li ti al joinde David, li ti donne li sa en cadeau. Avek humilité, li ti demann David excuse parski so mari ti mank respé envers zot ek li ti suppliye David parski li ti koné David ena la crainte pou Jéhovah. David ti calmé so colere ek ti dire: “Mo beni toi parski zordi to’nn empeche moi faire enn grand crime.”—1 Sam. 25:2-35.

L’attitude ki bann chretien ena

10. Ki l’attitude bann chretien bizin ena concernant la vengeance?

¹⁰ Seki ti arrivé avek Siméon ek Lévi ek entre David ek Abigaïl, montré bien ki Jéhovah kont enn colere ki nou pa controlé ek Li kont la violence, mais ki Li beni bann zeffort pou faire la paix. L’apotre Paul ti ecrire: “Si possible, autant ki sa depann lor zot, vive en paix avek tou dimoune. Pa tire vengeance zot-mem, mo bann frere ki mo bien content, mais laisse place pou colere; parski finn ecrire: ‘Jéhovah dire: Vengeance pou moi; moi ki pou faire zot payé.’ Mais ‘si to l’ennemi faim, donne li mangé; si li soif, donne li boire; parski kan to faire sa, to pou mette enn tas la braise difé lor so la tête.’ Pa laisse le mal domine toi, mais contigne domine le mal par le bien.”—Rom. 12:18-21.a

11. Couma enn soeur ti aprann pou controle so colere?

¹¹ Nou kapav applik sa conseil-la. Par exemple, enn soeur ti plaigne so nouveau manager ar enn ancien. Li ti dire ancien-la ki sa madame-la injuste ek mauvais. Soeur-la ti bien en colere ek li ti envie quitte so travail. Ancien-la ti conseil li pou pa agir trop vite. Li ti’nn comprend ki situation soeur-la ti’nn vinn pli pire parski li ti reagir avek colere ar fason ki so manager ti traite li. (Tite 3:1-3) Ancien-la ti dire li ki mem si li reussi trouve enn lot travail, li pou bizin kan-mem change so l’attitude kan bann dimoune agir dan enn mauvais fason avek li. Li ti conseil li pou traite so manager mem fason ki li ti pou content ki lezot traite li, pareil couma Jésus ti enseigne nou. (Lire Luc 6:31.) Soeur-la ti d’accord pou essayé. Ki resultat li ti gagné? Apré enn certain temps, manager-la ti vinn pli bon, ek li ti mem remercié soeur-la pou so travail.

12. Kifer bann difficulté entre chretien kapav bien faire nou souffert?

¹² Kitfois sa pa etonne nou kan nou gagne sa qualité probleme-la avek bann dimoune ki pa forme partie dan congregation. Nou koné ki la vie souvent injuste dan le monde Satan ek ki nou bizin lutté pou ki nou pa laisse bann mauvais dimoune faire nou en colere. (Ps. 37:1-11; Eccl. 8:12, 13; 12:13, 14) Selman, kan nou gagne probleme avek enn frere ou-soit enn soeur dan congregation, sa kapav faire nou plus souffert. Enn soeur raconté: “Pli grand difficulté ki mo ti gagné kan mo ti vinn dan la verité c’est pou accepté ki bann serviteur Jéhovah zot pa parfait.” Nou’nn sorti dan enn le monde kot bann dimoune pena l’amour ek pa prend compte zot camarade ek nou’nn vinn dan la verité. La, nou attann ki zot tou dan congregation traite zot camarade avek bonté. Alors, si enn chretien, surtout enn kikenn ki ena bann responsabilité, pena consideration ou-soit ena enn conduite ki pa digne pou enn chretien, sa kapav blesse nou beaucoup ek faire nou en colere. Lerla nou kapav demandé: ‘Couma enn kitsoz coumsa kapav arrivé parmi bann serviteur Jéhovah?’ En realité, bann kitsoz coumsa finn arrivé mem parmi bann chretien oint dan lepok bann zapotre. (Gal. 2:11-14; 5:15; Jacq. 3:14, 15) Couma nou bizin reagir kan enn dimoune blesse nou?

13. Kifer nou bizin faire zeffort pou reglé bann probleme ek couma nou pou faire sa?

¹³ Sa soeur ki nou finn fek mentionné-la dire: “Mo finn aprann pou prié pou n’importe kisannla ki blesse moi. Sa touletan aide moi.” Couma nou finn deja trouvé, Jésus ti enseigne nou pou prié pou bann ki persecute nou. (Mat. 5:44) Alors, eski li pa pli important encore ki nou prié pou nou bann frere ek soeur spirituel? Pareil couma enn papa envie ki so bann zenfant content sakenn so camarade, Jéhovah aussi envie ki so bann serviteur ena bann bon relation entre zot. Nou pé attann avek impatience pou vive ensam dan la paix ek heureux pou touletan, ek Jéhovah pé enseigne nou pou commence faire sa depuis asterla-mem. Li envie ki nou cooperé pou faire so grand travail. Alors, anou reglé nou bann probleme ou-soit “passe” lor faute nou bann frere, ek nou contigne nou chemin dan l’unité. (Lire Proverbes 19:11.) Au lieu ki nou eloigne-nou ar nou bann frere kan nou gagne probleme avek zot, nou bizin aide sakenn nou camarade pou reste parmi peuple Bondié, en securité dan “lé-bras eternel” Jéhovah.—Deut. 33:27, Bible de Darby.

Kan nou ena la douceur envers zot tou, sa amenn bann bon resultat

14. Couma nou kapav lutté kont l’influence Satan ki rod divise nou?

¹⁴ Pou empeche nou preche la bonne nouvelle partout, Satan ek so bann demon pé faire tou seki zot kapav pou bouleverse la paix ki ena dan la famille ek dan congregation. Zot essaye faire division parski zot koné ki si nou divisé entre nou-mem, sa kapav detruire nou. (Mat. 12:25) Kan nou combatte kont zot mauvais l’influence, li bon ki nou suive sa conseil Paul-la: “Fodé pa ki enn esclave nou Seigneur laguerre; mais li bizin ena la douceur envers tou dimoune.” (2 Tim. 2:24) Nou bizin rappel ki nou pa ‘pé lutté kont di-sang ek la chair, mais kont bann mauvais l’esprit.’ Pou nou reussi dan sa la guerre-la, nou bizin mette nou l’equipement la guerre spirituel, parmi ena “l’equipement la bonne nouvelle lor la paix.”—Éph. 6:12-18.

15. Couma nou bizin reagir ar bann attak ki nou gagné en dehors congregation?

¹⁵ En dehors congregation, bann l’ennemi Jéhovah pé attak sans okenn pitié bann serviteur Bondié ki vive en paix. Certain sa bann l’ennemi-la, attak bann Témoins de Jéhovah lor plan physik. Ena lezot ki koz en mal lor nou dan la gazette ou-soit devant bann tribunal, pou faire nou di-tort ek gate nou reputation. Jésus ti dire so bann disciple ki zot bizin attann sa. (Mat. 5:11, 12) Couma nou bizin reagir? Fodé jamais ki nou “rann . . . le mal pou le mal” par nou parole ou-soit par nou action.—Rom. 12:17; lire 1 Pierre 3:16.

16, 17. Ki situation difficile enn congregation ti koné?

¹⁶ N’importe ki kitsoz Satan faire nou, nou kapav donne enn bon temoignage kan nou “domine le mal par le bien.” Par exemple, enn congregation lor enn l’île Pacifik ti loué enn la salle pou Mémorial. Kan bann responsable enn l’eglise ti tann sa, zot ti demann bann membre zot l’eglise pou rassemblé dan sa la salle-la pou enn la messe, mem ler ki Mémorial. Mais, chef la police ti donne l’ordre bann responsable sa l’eglise-la pou libere la salle-la pou ki bann Témoin gagne li a ler. Mais, kan ler ti’nn arrivé, la salle-la ti rempli ar bann membre sa l’eglise-la ek zot ti commence zot la messe.

¹⁷ Pendant ki la police ti pé preparé pou tire bann membre sa l’eglise-la par force, president sa l’eglise-la ti vinn guette enn ancien ek ti dire li: “Eski zot ti prevoir pou faire enn kitsoz special tantot?” Frere-la ti dire li ki ena Mémorial, ek missié-la ti reponn: “Ayo, mo pa ti koné!” Kan li ti dire sa, policier-la ti etonné ek ti dire li: “Mais nou ti dire zot sa gramatin!” Pretre-la ti tourne ar frere-la ek avek enn sourire ek lor enn ton sarcastik, li ti dire li: “Ki zot pou faire asterla? Nou ena enn la salle ki rempli ar dimoune. Eski zot pou faire la police pousse nou?” Avek bann mauvais l’intention, li ti fini calculé ki li ti pou faire bann Témoins passe pou bann dimoune ki persecute lezot! Couma nou bann frere ti pou reagir?

18. Couma bann frere ti reagir kan certain ti provok zot, ek ki resultat zot ti gagné?

¹⁸ Bann Témoins ti laisse bann membre sa l’eglise-la faire zot la messe pendant trente minute, apré sa, zot ti pou commence Mémorial. Mais bannla ti prend plus le temps, ek kan zot tou ti quitte la salle-la, lerla bann frere ti kapav commence Mémorial. Lendemain, gouvernement ti forme enn board pou faire enn l’enquete. Apré ki zot ti examine seki ti’nn passé, board ki ti reuni-la ti oblige sa l’eglise-la pou annoncé en publik ki responsable sa probleme-la c’est pa bann Témoins, mais president zot l’eglise. Board ki ti reuni-la ti aussi remercié bann Témoins de Jéhovah parski zot ti garde zot patience devant sa situation-la. Zeffort ki bann Témoins ti faire pou “vive en paix avek tou dimoune” ti produire bann bon resultat.

19. Ki kitsoz encore kapav favorise la paix avek lezot?

¹⁹ Enn lot fason pou garde la paix avek lezot c’est kan nou ena bann parole gentil. Prochain lartik pou examiné ki sa vedir ena bann parole gentil ek couma nou kapav developpe sa ek prend l’habitude pou faire sa.

[Note]

Eski ou kapav expliké?

• Kifer bann dimoune dan le monde en colere zordi?

• Ki bann l’exemple biblik ki montré consequence ki nou gagné kan nou controle ou-soit kan nou pa controle nou colere?

• Couma nou bizin reagir kan enn chretien blesse nou?

• Couma nou bizin reagir kan bann dimoune en dehors congregation attak nou?

[Zimage page 18]

Kan nou bon envers lezot, sa kapav change zot l’attitude