Eski Bondié demann confesse bann peché?

Confesse bann peché personnel dan zoreille enn pretre ou-soit enn pasteur encore faire partie dan bann pratik religieux ek dan l’adoration beaucoup l’eglise. Mais, azordi dan nou societé ki accepté tou qualité comportement, eski li important ou-soit mem necessaire pou confesse bann peché?

BANN dimoune ena different l’opinion lor sa sujet-la. Par exemple, National Post, enn journal dan Canada, faire enn commentaire lor parole enn dimoune ki reconette ki mem si li difficile pou devoile ou bann erreur ar enn lot dimoune, “sa faire enn grand di-bien kan ena enn kikenn ki ecoute ou, ki prié ensam avek ou, ek ki dire ou seki ou bizin faire pou corrige sa situation-la.” Parkont, livre Bless Me, Father, for I Have Sinned cite seki enn missié ti dire: “Confession li enn parmi bann pratik ki l’Église encouragé, ki faire bann dimoune plus di-tort lor plan emotionnel. Li pousse bann dimoune pou tracassé dan enn fason exageré.” Ki la Bible dire lor sa sujet-la?

Seki la Bible dire

Dan la Loi ki Bondié ti donne nation Israël, nou trouve bann l’instruction bien precis lor seki ti bizin faire kan enn kikenn ti faire peché. Par exemple, si enn dimoune ti faire enn peché kont enn lot dimoune ou-soit ti desobeir enn la loi Bondié, li ti bizin confesse sa ar enn pretre ki ti’nn etabli par Bondié ek ki ti sorti dan tribu Lévi. Pou couvert peché sa dimoune-la, sa pretre-la ti bizin offert Bondié enn sacrifice pou pardonne so peché.—Lévitique 5:1-6.

Plusieurs siecle plitar, prophete Nathân ti reprend le roi David pou so bann peché. Couma David ti reagir? Desuite li ti reconette: “Mo finn faire peché kont Jéhovah.” (2 Samuel 12:13) Dan so la priere li ti aussi suppliyé Bondié pou donne li So faveur. Ki resultat sa finn ena? Plitar David ti ecrire: “Mo peché, mo’nn finalement confesse li ar toi, ek mo pa finn cachiette mo erreur. Mo ti dire: ‘Mo pou confesse mo bann peché ar Jéhovah.’ Ek toi, to ti pardonne erreur mo bann peché.”—Psaume 32:5; 51:1-4.

Dan premier siecle nou lepok, bann chretien dan congregation ti bizin zot aussi confesse zot peché; sa ti toujours enn kitsoz ki Bondié ti demann so bann serviteur pou faire. Jacques, demi-frere Jésus, ki ti aussi enn parmi bann zom ki ti prend la tête dan congregation Jérusalem, ti donne sa l’encouragement-la so bann compagnon chretien: “Confesse zot peché sakenn ar so camarade ek prié sakenn pou so camarade, pou ki zot gueri.” (Jacques 5:16) Mais, ki bann kitsoz bann chretien bizin confessé, ek ar kisannla zot bizin faire sa?

Ki kitsoz nou bizin confessé?

Parski nou bann dimoune imparfait, toulé-jour nou ena tendance pou faire bann kitsoz sans reflechi ou-soit pou mal servi nou la langue, ek a cause sa, nou faire peché sakenn envers nou camarade. (Romains 3:23) Eski sa vedir ki nou bizin confesse tou sa bann peché-la ar certain dimoune ki ena enn l’autorité ou-soit ar enn lot dimoune ki finn etabli?

Mem si devant lizié Bondié tou peché li enn offense, dan so misericorde Li prend en consideration ki, si nou faire peché, c’est parski nou finn herite l’imperfection. C’est seki enn psalmiste ti reconette: “Si to ti veille tou bann peché, o Yah, o Jéhovah, kisannla ti pou kapav tini devant toi? Parski kot toi kapav gagne vrai pardon pou ki bann dimoune ena la crainte pou toi.” (Psaume 130:3, 4) Alors, ki nou bizin faire kan kitfois, sans faire expré, nou faire erreur ek nou faire enn peché kont lezot? Rappel ki dan la priere modele ki Jésus ti enseigne so bann disciple ti ena aussi sa demande-la: “Pardonne-nou nou bann peché, parski nou aussi nou pardonne tou bann ki doit nou.” (Luc 11:4) Oui, si nou tourne-nou vers Bondié ek nou demann Li pardon au nom Jésus Christ, Bondié pou pardonne nou.—Jean 14:13, 14.

Remarké ki Jésus ti ajoute enn condition: ki nou aussi nou pardonne bann “ki doit nou.” L’apotre Paul ti rappel so bann compagnon chretien: “Vinn bon sakenn envers so prochain, ena enn grand compassion, sakenn bizin pardonne so prochain avek tou so leker pareil couma Bondié aussi finn pardonne zot avek tou so leker par Christ.” (Éphésiens 4:32) Kan nou pardonne lezot zot faute, nou pou ena bann bon raison pou attann ki Bondié aussi pou pardonne nou, nou bann faute.

Mais, ki nou kapav dire concernant bann peché grave couma kokin, koz menti par expré, commette l’immoralité sexuel, boire ziska sou, ek lezot peché encore? Enn kikenn ki pé faire sa bann peché-la li pé desobeir bann la loi Bondié ek lerla li pé faire peché kont Bondié. Eski li bizin confesse sa bann peché-la?

Ar kisannla nou bizin confesse nou bann peché?

Bondié pa donne bann zom permission pou pardonne bann peché ki faire kont Li; zis Li tousel ki kapav faire sa. La Bible dire nou dan enn fason clair: “Si nou confesse nou bann peché, [Bondié] fidele ek juste pou pardonne nou bann peché ek pou purifié nou ar tou l’injustice.” (1 Jean 1:9) Mais selman, ar kisannla nou bizin confesse sa bann peché-la?

Nou bizin confesse nou bann peché ar Bondié, parski c’est selman Li tousel ki kapav pardonne nou. Pareil couma nou finn trouvé, c’est seki David ti faire. Mais, lor ki base eski Bondié pou donne nou so pardon? La Bible dire: “Alors, repenti ek retourné, pou ki zot bann peché kapav effacé, ek pou ki bann lepok ki rafraichi sorti kot Jéhovah.” (Actes 3:19) Oui, pou ki enn kikenn gagne pardon so peché, fodé pa ki li zis reconette ek confesse sa peché-la, mais fodé aussi ki li disposé pou arrete faire sa peché-la. Ek souvent sa troisieme l’etape-la li difficile. Mais nou kapav gagne l’aide.

Rappel bann parole disciple Jacques ki nou ti guetté enn tipé pli avant: “Alors, confesse zot peché sakenn ar so camarade ek prié sakenn pou so camarade, pou ki zot gueri.” Jacques ti ajouté: “Supplication enn dimoune juste ena beaucoup la force, kan Bondié tann li.” (Jacques 5:16) Sa ‘dimoune juste-la’ kapav enn parmi “bann ancien dan congregation,” ki Jacques ti mentionné dan verset 14. Dan congregation, ena “bann ancien,” bann zom mur lor plan spirituel ki’nn nommé pou aide bann ki envie gagne pardon Bondié. Sa “bann ancien[-la]” pa kapav pardonne bann peché, parski okenn dimoune pa finn gagne permission pou pardonne peché ki enn lot dimoune inn faire kont Bondié.a Mais selman, zot qualifié lor plan spirituel pou corrige ek redresse enn dimoune ki’nn faire enn peché grave. Zot aide sa dimoune-la pou trouvé ki quantité so peché grave ek kifer li important ki li repenti.—Galates 6:1.

Kifer bizin confesse bann peché?

Ki enn peché li grave ou-soit non, sa dimoune ki finn faire sa peché-la finn gate so relation avek lezot dimoune ek avek Bondié. A cause sa, li kapav senti-li troublé ou-soit mal a l’aise. C’est so conscience, enn capacité ki nou Createur inn donne bann dimoune, ki pousse li pou ena sa bann sentiment-la. (Romains 2:14, 15) Ki li kapav faire?

Si nou ré-guette livre Jacques, nou trouve sa bann parole encourageant-la: “Eski ena enn kikenn parmi zot ki malade [lor plan spirituel]? Ki li appel bann ancien dan congregation, ek ki zot prié pou li ek mette de l’huile lor li au nom Jéhovah. Ek la priere ki zot faire avek la foi pou faire malade-la bien, ek Jéhovah pou releve li. En plus, si li’nn faire peché, Jéhovah pou pardonne li.”—Jacques 5:14, 15.

Ici aussi, nou trouvé ki bizin appel bann ancien pou zot donne troupeau Bondié seki li bizin. Couma zot faire sa? Pa zis kan zot ecoute enn confession. Parski ena enn dimoune ki malade lor plan spirituel, sa bann ancien-la bizin faire kitsoz pou “faire malade-la bien.” Jacques ti mentionne deux kitsoz ki kapav faire.

Premier kitsoz, c’est “mette de l’huile lor li.” Sa faire reference ar pouvoir ki Parole Bondié ena pou gueri enn dimoune. L’apotre Paul ti expliké ki “parole Bondié, li vivant ek li puissant, . . . ek li kapav decouvert bann pensée ek bann l’intention ki ena dan leker,” li touche pli profond nou l’esprit ek nou leker. (Hébreux 4:12) Kan zot bien servi la Bible, bann ancien kapav aide sa kikenn ki malade lor plan spirituel-la pou trouvé kifer li ena sa probleme-la ek pou aide li faire bann zeffort necessaire pou corrige-sa devant Bondié.

Ena aussi enn deuxieme kitsoz: ‘faire la priere avek la foi.’ Mem si la priere bann ancien pa pou change justice ki Bondié pou appliké, sa bann la priere-la zot important pou Bondié, ki ena enn grand desir pou pardonne bann peché lor base sacrifice Christ. (1 Jean 2:2) Bondié disposé pou aide n’importe ki dimoune ki’nn faire peché, ki pé montré ki li pé repenti avek tou so leker ek pé faire “bann action ki montré ki [li] finn repenti.”—Actes 26:20.

Raison principal kifer nou bizin confesse enn peché—ki nou’nn faire kont enn lot dimoune ou-soit kont Bondié—c’est pou gagne l’approbation Bondié. Jésus Christ ti montré nou ki nou bizin d’abord reglé n’importe ki probleme ki nou ena avek nou prochain ek faire la paix avek zot avant ki nou kapav adore Bondié avek enn bon conscience. (Matthieu 5:23, 24) Proverbes 28:13 dire: “Kikenn ki cachiette so bann peché pa pou reussi, mais si li confesse ek arrete faire sa bann peché-la, li pou gagne misericorde.” Kan nou humilié nou-mem devant Jéhovah ek nou demann Li pardon, nou pou gagne so faveur ek Li pou eleve nou kan ler pou arrivé.—1 Pierre 5:6.

[Note]

[L’encadré page 30]

Bondié pou passe lor nou bann peché ek pou pardonne nou, si nou tourne-nou vers Li ek demann Li pardon au nom Jésus Christ

[Zimage page 31]

Raison principal kifer nou bizin confesse enn peché c’est pou gagne l’approbation Bondié