Faire bann grand zeffort pou gagne benediction Jéhovah
“[Bondié] vinn sa kikenn ki recompense bann ki faire grand zeffort pou rod Li.”—HÉB. 11:6.
1, 2. (a) Couma beaucoup dimoune rod benediction Bondié? (b) Kifer nou bizin surtout interessé pou gagne benediction Jéhovah?
“BONDIÉ beni toi!” Dan certain pays, kan enn dimoune terné, souvent li tann bann dimoune ki pourtant li pa koné, dire sa. Nou kapav trouve bann chef religieux dan beaucoup religion, beni bann dimoune, bann zanimo, ek bann kitsoz ki pena la vie. Kitfois bann dimoune voyagé pou al dan certain l’endroit ki zot considere couma saint, dan l’espoir ki zot pou gagne enn benediction. Bann politicien souvent demann benediction Bondié lor zot nation. Eski ou pensé ki li bon ki bann dimoune demann sa qualité benediction-la Bondié? Eski Bondié vrai-mem beni zot? Kisannla ki vrai-mem gagne benediction Bondié, ek kifer?
2 Jéhovah ti annoncé ki dan dernier jour, Li pou ena enn peuple ki pur, ki vive en paix, ek ki sorti dan tou nation, ek sa peuple-la pou preche la bonne nouvelle lor so Royaume ziska dan boute la terre malgré la haine ek l’opposition. (Is. 2:2-4; Mat. 24:14; Rév. 7:9, 14) Bann ki parmi nou, ki finn accepté sa responsabilité pou forme partie dan sa peuple-la, nou envie gagne benediction Bondié. Nou bizin sa benediction-la, sinon, li pa possible ki nou reussi vive en accord avek bann principe ki Bondié inn etabli. (Ps. 127:1) Mais couma nou kapav gagne benediction Bondié?
Benediction Jéhovah pou vinn lor bann dimoune obeissant
3. Si bann Israélite ti obeir, ki resultat zot ti pou gagné?
3 Lire Proverbes 10:6, 7. Zis avant ki nation Israël ti rente dan la Terre promise, Jéhovah ti dire ki zot pou gagne enn prosperité ek enn protection extraordinaire si zot obeir so la voix. (Deut. 28:1, 2) Benediction Jéhovah ti pou vinn lor so peuple. Oui, bann dimoune obeissant ti cent pour cent sur ki zot ti pou gagne benediction Jéhovah.
4. Ki vrai l’obeissance impliké?
4 Avek ki l’attitude bann Israélite ti bizin obeir? La loi Bondié ti dire ki sa pa ti pou faire Bondié plaisir si so peuple pa ti servi Li avek “la joie ek contentement.” (Lire Deutéronome 28:45-47.) Kan Jéhovah donne nou bann instruction precis, Li merite plus ki nou zis obeir Li par devoir ou-soit par obligation. Sa qualité l’obeissance-la, mem bann zanimo ou-soit bann demon kapav montré sa. (Marc 1:27; Jacq. 3:3) Kan nou manifesté enn l’obeissance sincere envers Bondié, sa montré nou l’amour. C’est enn l’obeissance ki faire nou gagne la joie parski nou ena la foi ki bann commandement Jéhovah zot pa lourd pou suive ek ki “Li vinn sa kikenn ki recompense bann ki faire grand zeffort pou rod Li.”—Héb. 11:6; 1 Jean 5:3.
5. Couma, si enn Israélite ti ena confiance dan promesse Jéhovah, sa ti pou aide li pou obeir la loi ki trouve dan Deutéronome 15:7, 8?
5 Guetté couma bann Israélite ti’nn kapav manifesté sa qualité l’obeissance-la kan zot ti pé suive la loi ki trouve dan Deutéronome 15:7, 8. (Lire.) Si enn Israélite ti obeir sa la loi-la a cause ki a faire alors ki li pa ti envie, li possible ki sa ti pou soulage enn tipé bann pauvre. Mais eski sa ti pou favorise bann bon relation ek enn bon l’ambiance parmi bann serviteur Bondié? Ek seki ti pli important, eski sa ti pou montré ki li ti ena la foi dan capacité Jéhovah pou donne so bann serviteur seki zot bizin? Eski sa ti pou montré so reconnaissance pou l’occasion ki li ti ena pou reflete generosité Jéhovah? Non! Bondié ti remark condition leker enn kikenn ki ti vrai-mem genereux ek Li ti promette pou beni li dan tou seki li ti faire ek dan tou so projet. (Deut. 15:10) La foi dan sa promesse-la ti pou pousse bann serviteur Jéhovah pou agir, ek sa ti pou faire zot gagne beaucoup benediction.—Prov. 28:20.
6. Ki l’assurance nou gagné dan Hébreux 11:6?
6 En plus ki nou bizin ena la foi ki Jéhovah Li vinn sa Bondié ki recompense so bann serviteur, Hébreux 11:6 montré enn lot qualité ki nou bizin ena pou gagne benediction Bondié. Remarké ki Jéhovah recompense bann ki “faire grand zeffort pou rod Li.” Sa verset-la vrai-mem donne nou l’assurance ki si nou faire bann grand zeffort, nou pou gagne bann benediction! Kifer? Parski Jéhovah, vrai Bondié, “pa kapav koz menti.” (Tite 1:2) Li finn montré a travers plusieurs millier l’année ki kapav faire enn confiance total dan so bann promesse. So bann parole jamais pa manké pou realisé. (Is. 55:11) Alors, nou kapav ena full confiance ki si nou manifesté enn vrai la foi, Li pou recompense nou aussi.
7. Couma nou kapav faire sur ki nou pou gagne benediction Bondié par moyen “descendance” Abraham?
7 Jésus Christ ti montré ki li partie principal “descendance” Abraham. Bann chretien oint forme partie secondaire sa ‘descendance-la.’ Zot finn gagne mission pou “annonce bann grand qualité sa kikenn ki finn appel zot pou tire zot dan noirté-la ek finn faire zot vinn dan so la lumiere extraordinaire.” (Gal. 3:7-9, 14, 16, 26-29; 1 Pierre 2:9) Nou pa kapav attann pou developpe bann bon relation avek Jéhovah si nou rejette bann dimoune ki Jésus finn etabli pou prend soin so bann di-bien. Sans l’aide “l’esclave fidele et avisé,” nou pa ti pou comprend bien tou seki nou lire dan Parole Bondié ek nou pa ti pou koné couma pou applik sa aussi. (Mat. 24:45-47) Kan nou mette en pratik bann kitsoz ki nou aprann dan la Bible, nou pé faire sur ki nou pou gagne benediction Bondié.
Fixé nou l’esprit lor volonté Bondié
8, 9. Couma Jacob ti faire bann grand zeffort en accord avek promesse Bondié?
8 L’idée pou faire bann grand zeffort pou gagne benediction Bondié kapav faire nou pense l’exemple Jacob. Li pa ti koné couma promesse ki Bondié ti faire avek Abraham ti pou realisé. Mais li ti sur ki Jéhovah ti pou multiplié bann descendant so grand-pere, ek ti pou faire zot vinn enn vinn enn grand nation. Alors, en 1781 avant nou lepok, Jacob ti al Harân pou rod enn madame. Li pa ti zis interessé pou trouve enn bon compagne; au contraire, li ti rod enn madame ki ti bien spirituel, ki ti adore Jéhovah ek ki ti pou vinn enn bon mama pou so bann zenfant.
9 Nou koné ki Jacob ti joinde Rachel, ki ti famille avek li. Li ti content Rachel ek li ti d’accord pou travail pou so papa, Labân, pou sept an pou li kapav marié ar Rachel. Sa zistoire-la pa zis enn simple zistoire d’amour, ki bien joli. Jacob ti surement konn promesse ki Bondié Tout-Puissant ti faire ar so grand-pere Abraham ek ki Jéhovah ti repete ar Isaac, so papa. (Gen. 18:18; 22:17, 18; 26:3-5, 24, 25) Isaac aussi ti rappel sa so garson Jacob: “Bondié Tout-Puissant pou beni toi ek pou faire toi gagne beaucoup zenfant ek pou multiplié toi, ek vrai-mem to pou vinn enn l’assemblée bann peuple. Ek Li pou donne toi benediction Abraham, toi ek to descendance avek toi, pou ki to prend pou toi pays kot to ti pé resté couma enn etranger, ki Bondié ti donne Abraham.” (Gen. 28:3, 4) Sa vedir ki bann zeffort ki Jacob ti faire pou trouve enn bon madame ek pou gagne enn famille, ti montré ki li ti ena confiance dan bann parole Jéhovah.
10. Kifer Jéhovah ti content pou beni Jacob en accord avek seki li ti demandé?
10 Jacob pa ti rod la richesse pou so famille. Li ti fixé so l’esprit lor promesse Jéhovah concernant so bann descendant ek lor realisation volonté Jéhovah. Jacob ti bien decidé pou faire tou seki ti possible pou gagne benediction Bondié malgré bann difficulté. Li ti garde mem l’attitude kan li ti vinn vié, ek Jéhovah ti beni li pou sa.—Lire Genèse 32:24-29.
11. Ki bann zeffort nou bizin faire en accord avek volonté ki Bondié inn faire nou koné dan so Parole?
11 Pareil couma Jacob, nou pa konn tou bann detail en rapport avek realisation projet Jéhovah. Selman, kan nou etudié Parole Bondié, nou kapav gagne enn l’idée general lor seki pé attann nou concernant “jour Jéhovah.” (2 Pierre 3:10, 17) Par exemple, nou pa koné exactement kan sa jour-la pou arrivé, mais nou koné ki li pré. Nou croire dan Parole Bondié kan li dire ki, si nou donne enn temoignage a fond dan sa tigit le temps ki resté-la, nou pou sauve nou-mem ek bann dimoune ki ecoute nou.—1 Tim. 4:16.
12. Ki kitsoz nou kapav sur?
12 Nou koné ki la fin kapav vini n’importe kan; Jéhovah pa bizin attann ki chaque dimoune lor la terre gagne enn temoignage personnel. (Mat. 10:23) En plus, nou gagne bann bon conseil ki montré nou couma nou bizin preche dan enn fason efficace. Avek la foi, nou faire tou seki nou kapav ek nou servi tou seki nou ena pou participe dan sa travail-la. Eski beaucoup dimoune dan nou territoire pou accepté message ki nou preché? En realité, nou pa kapav konn sa en avance. (Lire Ecclésiaste 11:5, 6.) Nou travail c’est pou preché, ek nou ena confiance ki Jéhovah pou beni nou. (1 Cor. 3:6, 7) Nou kapav sur ki Jéhovah trouve bann grand zeffort ki nou faire, ek par so l’esprit saint, Li pou donne nou direction ki nou bizin.—Ps. 32:8.
Rod l’esprit saint
13, 14. Ki bann l’exemple montré nou ki l’esprit saint finn permette bann serviteur Bondié pou developpe zot capacité?
13 Ki nou pou faire si nou pensé ki nou pena capacité pou assume enn responsabilité ou-soit pou preché? Nou bizin demann Jéhovah pou donne nou so l’esprit saint pou ameliore n’importe ki capacité ki nou ena pou servi Li. (Lire Luc 11:13.) L’esprit Bondié kapav qualifié enn dimoune pou enn travail ou-soit pou enn privilege n’importe ki situation ou-soit l’experience ki li ti ena avant. Par exemple, zis apré ki zot ti sorti l’Égypte, l’esprit Bondié ti permette bann berger ek bann esclave pou vaink zot l’ennemi, mem si zot pa ti ena l’experience dan la guerre. (Ex. 17:8-13) Enn tipé apré, sa mem l’esprit-la ti qualifié Betsalel ek Oholiab pou faire enn joli tabernacle pou Jéhovah dapré bann plan ki zot ti gagné par inspiration.—Ex. 31:2-6; 35:30-35.
14 Sa l’esprit bien puissant-la ti qualifié bann serviteur Jéhovah dan lepok moderne pou prend soin l’organisation, kan zot ti bizin commence servi zot prop l’imprimerie. Dan enn lettre, frere R. J. Martin, surveillant l’imprimerie dan sa lepok-la, ti expliké seki zot ti reussi faire en 1927. “Dan bon moment, le Seigneur ti ouvert enn la porte; ek sa gros machine pou imprimé-la (enn la presse rotative) ti vinn dan nou la main, dan la main bann ki pa ti konn nanyin lor so fabrication ek lor fason ki li ti fonctionné. Mais le Seigneur koné couma pou faire l’esprit bann ki finn consacré zot la vie pou Li, travail pli vite . . . Dan deux-trois semaine, nou ti kapav faire sa la presse-la tourne bien couma bizin; ek li encore pé tourné, li pé faire enn travail ki mem so bann fabricant, jamais pa ti koné li kapav faire.” Jéhovah finn contigne beni bann zeffort sincere coumsa, ziska zordi.
15. Couma Romains 8:11 kapav encourage bann dimoune ki pé faire face ar tentation?
15 L’esprit Jéhovah agir dan different fason. Tou serviteur Jéhovah kapav gagne sa l’esprit-la, ek li aide zot pou faire face ar bann grand l’epreuve. Ki nou pou faire si nou senti ki nou pré pou cedé ar enn tentation? Nou kapav gagne la force necessaire kan nou lire bann parole Paul ki trouve dan Romains 7:21, 25 ek 8:11. Oui, “sa l’esprit ki finn releve Jésus parmi bann mort-la” kapav travail dan nou faveur ek donne nou la force pou reussi vaink bann desir nou lekor. L’apotre Paul ti ecrire sa texte-la pou bann chretien oint, mais principe ki ena ladan applik ar tou bann serviteur Bondié. Nou tou nou kapav gagne la vie si nou ena la foi en Christ, nou faire zeffort pou rejette bann mauvais desir, ek nou vive en accord avek direction l’esprit saint.
16. Ki nou bizin faire pou gagne l’esprit saint Bondié?
16 Eski nou kapav attann ki Bondié donne nou so la force actif, setadir so l’esprit saint, sans ki nou faire okenn zeffort? Non. A part ki nou bizin prié pou gagne sa l’esprit-la, nou bizin etudié avek serieux Parole ki Bondié inn inspiré. (Prov. 2:1-6) L’esprit Bondié agir lor congregation. Kan nou assisté reunion regulierement, sa montré nou desir pou “tann seki l’esprit dire bann congregation.” (Rév. 3:6) En plus, nou bizin accepté avek humilité seki nou aprann. Proverbes 1:23 donne nou sa conseil-la: “Retourné ek prend compte mo discipline. Lerla, pou zot, mo pou faire mo l’esprit sorti.” Oui, Bondié donne so l’esprit saint “bann ki obeir Li couma enn chef.”—Actes 5:32.
17. Ar ki kitsoz nou kapav compare l’effet benediction Bondié lor nou bann zeffort?
17 Li vrai ki nou bizin faire bann grand zeffort pou gagne benediction Bondié. Mais nou bizin aussi rappel ki c’est pa zis grace a bann travail dur ki nou faire ki nou gagne bann bon kitsoz ki Jéhovah inn donne en abondance. Nou kapav compare l’effet so benediction lor nou bann zeffort, ar fason ki nou lekor tire profit ar bann mangé ki bien nourrissant. Bondié inn faire nou lekor dan enn fason ki nou apprecié seki nou mangé ek nou lekor gagne seki li bizin. C’est Li aussi ki donne nou sa mangé-la. Nou pa vrai-mem koné exactement couma nou mangé gagne tou so bann vitamine, ek la plupart parmi nou pa kapav expliké couma nou lekor produire l’energie ar seki nou mangé. Nou zis koné ki sa marché ek nou faire nou part kan nou mangé. Si nou choisir pou mange bann mangé ki nourrissant, nou pou gagne encore pli bon resultat. Li pareil pou Jéhovah, Li fixé bann condition pou nou gagne la vie eternel, ek Li donne nou l’aide ki nou bizin pou rempli sa bann condition-la. En realité, c’est Li ki faire pli gros travail, ek Li merité ki nou loué Li pou sa. Kan-mem, nou bizin coopere avek Li, setadir agir en accord avek so volonté, pou gagne bann benediction.—Hag. 2:18, 19.
18. Ki ou bien decidé pou faire, ek kifer?
18 Alors, faire bann zeffort sincere pou rempli ou bann responsabilité pli bien ki ou kapav. Rod toujours direction Jéhovah pou ou kapav reussi. (Marc 11:23, 24) A mesure ki ou faire sa, ou kapav sur ki “n’importe kisannla ki rodé, trouvé.” (Mat. 7:8) Bann chretien oint pou gagne benediction Jéhovah kan Li pou donne zot “couronne la vie” dan le ciel. (Jacq. 1:12) Bann “lezot brebis” ki pé faire zeffort pou gagne enn benediction pou zot-mem grace a descendance Abraham, pou bien content pou tann Christ dire: “Vini, zot ki finn beni par mo Papa, herite royaume ki finn preparé pou zot depuis fondation le monde.” (Jean 10:16; Mat. 25:34) Oui, “bann ki [Bondié] pou beni, pou possede la terre, . . . ek zot pou reste lor la pou touletan.”—Ps. 37:22, 29.
Eski ou kapav expliké?
• Ki vrai l’obeissance impliké?
• Ki nou bizin faire pou gagne benediction Bondié?
• Couma nou kapav gagne l’esprit saint Bondié, ek couma li kapav agir dan nou faveur?
[Zimage page 12]
Jacob ti lutte avek enn ange pou gagne benediction Jéhovah.
Eski ou aussi ou pé faire bann grand zeffort pou gagne benediction?
[Zimage page 13]
L’esprit saint Bondié ti qualifié Betsalel ek Oholiab pou depasse zot capacité