Couma Jéhovah servi l’esprit saint pou realise so projet

“Mo parole . . . ki sorti dan mo la bouche . . . pou reussi accompli seki mo’nn envoye li faire.”—IS. 55:11.

1. Montré par enn l’exemple difference ki ena entre enn plan ek enn projet.

FAIRE coumadir deux missié pé prepare-zot pou faire enn voyage dan l’auto. Enn ladan trace enn chemin bien precis ek bien detaillé pou arrive dan l’endroit kot li pé allé. Lot-la li, dan so l’esprit li koné exactement kot li pou allé, mais li konn aussi plusieurs lezot chemin kot li kapav passé. Li paré pou change chemin si jamais arrive bann kitsoz ki li pa attann. Dan enn certain sens, sa deux methode ki sa deux missié-la servi, montré difference ki ena entre enn plan ek enn projet. Nou kapav compare enn plan ar enn ti map bien precis ki nou finn dessiné, alors ki enn projet kapav implik ki nou ena enn but dan nou la tête mais nou pena necessairement enn fason precis pou realise li.

2, 3. (a) Ki projet Jéhovah impliké? (b) Couma Jéhovah ti faire face ar situation ki ti arrivé kan Adam ek Ève ti faire peché? (c) Kifer nou bizin amenn enn la vie ki en accord avek projet Jéhovah?

² Pou Li accompli so volonté, Jéhovah pena enn plan bien precis ki pa kapav changé, mais Li ena enn projet ki pou realisé lor enn periode le temps. (Éph. 3:11) Sa projet-la implik seki Li ti ena l’intention pou faire au commencement pou bann dimoune ek pou la terre—ki la terre vinn enn paradis kot bann dimoune parfait kapav vive dan la paix ek heureux pou touletan. (Gen. 1:28) Kan Adam ek Ève ti faire peché, desuite Jéhovah ti reagir ek Li ti prend bann disposition pou faire sur ki so projet realisé. (Lire Genèse 3:15.) Jéhovah ti decidé ki so femme symbolik ti pou gagne enn “descendance,” setadir enn Garson, ki finalement ti pou detruire Satan, ki veritable responsable bann malheur, ek repare tou bann degat ki li finn amené.—Héb. 2:14; 1 Jean 3:8.

³ Okenn pouvoir dan le ciel ni lor la terre pa kapav empeche Bondié realise seki Li ti dire Li pou faire. (Is. 46:9-11) Kifer nou kapav dire sa? Parski ena l’esprit saint Jéhovah ki impliké. Sa la force bien puissant-la pou faire sur ki projet Bondié “reussi.” (Is. 55:10, 11) Nou bizin faire tou seki nou kapav pou garde dan nou l’esprit projet Bondié ek amenn enn la vie ki en accord avek sa projet-la. Nou l’avenir depann lor so realisation. En plus, sa permette nou la foi vinn pli fort kan nou trouvé couma Jéhovah servi so l’esprit saint. Alors, anou examine role l’esprit saint dan realisation projet Jéhovah—dan le passé, dan nou lepok ek dan l’avenir.

Role l’esprit saint dan le passé

4. Couma Jéhovah ti faire konn so projet tigit par tigit?

⁴ Dan lepok biblik, tigit par tigit Jéhovah ti faire konn so projet. Au commencement, l’identité Descendance ki Bondié ti promette ti “enn saint secret.” (1 Cor. 2:7) C’est selman 2,000 an plitar ki Jéhovah ti refaire reference ar enn descendance. (Lire Genèse 12:7; 22:15-18.) Promesse ki Jéhovah ti faire ar Abraham, ti donne beaucoup plus renseignement concernant l’identité sa Descendance-la. Kan Li ti dire “par moyen to descendance” sa ti montré bien ki sa Descendance-la ti pou enn dimoune, enn descendant Abraham. Nou kapav sur ki Satan ti pé observe bien kan Jéhovah ti faire konn sa detail-la. Pena doute ki sa grand adversaire Bondié-la ti zis envie detruire ou-soit contamine bann descendant Abraham pou empeche projet Bondié realisé. Mais sa ti pou impossible, parski l’esprit saint Bondié ki invisible, ti pé travail. Dan ki fason?

5, 6. Couma Jéhovah ti servi so l’esprit pou protege bann dimoune dan lignée Abraham kot so Descendance ti pou parette?

⁵ Jéhovah ti servi so l’esprit pou protege bann dimoune dan lignée kot sa Descendance-la ti pou sorti. Jéhovah ti dire Abram (Abraham): “Mo enn bouclier pou toi.” (Gen. 15:1) Sa bann parole-la pa ti bann parole dan vide. Anou prend par exemple seki ti arrivé vers 1919 avant nou lepok, kan Abraham ek Sara ti reste dan enn fason temporaire dan Guérar. Abimélek, le roi Guérar, pa ti koné ki Sara ti femme Abraham ek li ti prend li avek l’intention pou faire li vinn so femme. Eski Satan ti pé manipule sa situation-la sans ki zot koné, pou empeche Sara porte descendance Abraham? La Bible pa dire nanyin lor la. Mais li faire nou koné ki Jéhovah ti faire kitsoz dan sa situation-la. Dan enn rêve, Li ti averti Abimélek pou li pa touche Sara.—Gen. 20:1-18.

⁶ C’est pa zis enn sel fois ki Jéhovah ti protege zot. Plusieurs fois Jéhovah ti protege Abraham ek so famille. (Gen. 12:14-20; 14:13-20; 26:26-29) A cause sa, enn psalmiste ti kapav dire concernant Abraham ek so bann descendant: “Li [Jéhovah] pa ti laisse okenn dimoune kokin tou seki zot ena, mais a cause zot Li ti corrige bann le roi, kan Li ti dire: ‘Pa touche mo bann oint ek pa faire mo bann prophete okenn di-tort.’ ”—Ps. 105:14, 15.

7. Dan ki fason Jéhovah ti protege nation Israël?

⁷ Par so l’esprit saint, Jéhovah ti protege nation Israël ki ti existé dan le passé, kot Descendance ki Bondié ti promette, ti pou né. Par so l’esprit saint, Jéhovah ti donne nation Israël so la Loi. Sa ti garde vrai l’adoration pur ek ti protege bann Juif ar contamination spirituel, moral ek physik. (Ex. 31:18; 2 Cor. 3:3) Dan lepok bann Juge, Jéhovah ti donne certain zom so l’esprit ek sa ti donne zot la force pou delivré bann Israélite ar zot bann l’ennemi. (Juges 3:9, 10) Pendant bann siecle avant naissance Jésus, ki ti membre principal descendance Abraham, surement l’esprit saint ti impliké pou protege Jérusalem, Bethléhem, ek temple Jéhovah—bann l’endroit ki ti impliké dan realisation bann prophetie lor Jésus.

8. Couma l’esprit saint ti impliké directement dan la vie ek ministere Garson Bondié?

⁸ L’esprit saint ti impliké directement dan la vie ek ministere Jésus. L’esprit saint ti agir lor Marie, ki ti vierge, ek li ti faire enn kitsoz ki jamais pa’nn arrivé avant ek ki jamais pou arrivé encore. Li ti faire enn femme imparfait tombe enceinte ek donne naissance enn Garson parfait, ki pa ti condamné a mort a cause l’imperfection. (Luc 1:26-31, 34, 35) Plitar, kan Jésus ti enn tibaba, l’esprit saint ti protege li pou empeche certain dimoune touye li avant ler. (Mat. 2:7, 8, 12, 13) Kan Jésus ti ena apepré 30 an, Bondié ti oint li avek so l’esprit saint. Par sa action-la, Bondié ti choisir li pou vinn heritier le roi David ek ti donne li mission pou al preché. (Luc 1:32, 33; 4:16-21) Grace a l’esprit saint, Jésus ti ena pouvoir pou faire bann mirak, parmi li ti gueri bann malade, nourri bann la foule, ek ressuscite bann mort. Sa bann kitsoz extraordinaire-la ti montré bann benediction ki nou pou gagné kan Jésus pou regné.

9, 10. (a) Ki kitsoz ti montré ki bann disciple Jésus dan premier siecle ti gagne l’esprit saint? (b) Dan premier siecle nou lepok, ki changement ti ena dan fason ki Jéhovah realise so projet?

⁹ A partir la Pentecôte l’an 33 nou lepok, Jéhovah ti servi so l’esprit saint pou oint bann membre partie secondaire descendance Abraham, beaucoup parmi pa ti bann descendant Abraham. (Rom. 8:15-17; Gal. 3:29) Li ti clair ki bann disciple Jésus dan premier siecle ti gagne l’esprit saint, parski sa ti permette zot pou preche avek zele ek grace a sa, zot ti ena pouvoir pou faire bann mirak. (Actes 1:8; 2:1-4; 1 Cor. 12:7-11) Kan bann disciple ti gagne sa bann don-la par mirak, l’esprit saint ti revele enn kitsoz nouveau lor fason ki Jéhovah ti pou realise so projet. Jéhovah ti nepli accepté disposition ki Li ti prend pou adore Li, ki ti existé pendant plusieurs siecle ek ki ti centré lor temple Jérusalem. C’est congregation chretien ki ti fek formé, ki ti gagne so faveur. Depuis sa, Jéhovah finn servi sa congregation oint-la pou realise so projet.

¹⁰ Protegé, donne pouvoir, ek oint certain dimoune—c’est zis deux-trois fason ki Jéhovah ti servi so l’esprit saint dan lepok biblik pou faire sur ki so projet realisé. Ki nou kapav dire lor nou lepok? Couma Jéhovah pé servi so l’esprit zordi pou realise so projet? Nou bizin konn sa parski nou envie agir en accord avek sa l’esprit-la. Alors, anou examine quatre fason ki Jéhovah pé servi so l’esprit zordi.

Role l’esprit saint dan nou lepok

11. (a) Ki montré nou ki l’esprit saint aide peuple Bondié pou reste pur? (b) Couma nou kapav montré ki nou laisse l’esprit saint influence nou la vie?

¹¹ Premierement, l’esprit saint aide peuple Bondié pou reste pur. Bann serviteur Jéhovah ki servi Li en accord avek so volonté ek ki pou profite bann bienfait ki so projet pou amené, bizin reste pur lor plan moral. (Lire 1 Corinthiens 6:9-11.) Certain ki ti vinn bann vrai chretien, avant ti pé pratik bann kitsoz immoral couma fornication, l’adultere, ek l’homosexualité. Bann desir ki pousse bann dimoune pou faire peché kapav bien enraciné. (Jacq. 1:14, 15) Malgré sa, sa bann chretien-la finn “purifié[-zot],” sa montré ki zot finn faire bann changement necessaire dan zot la vie pou faire Bondié plaisir. Ki donne enn dimoune ki content Bondié la force pou pa cedé ar so bann desir pou faire peché? Dan 1 Corinthiens 6:11 Paul dire: “L’esprit nou Bondié.” Kan nou amenn enn la vie pur, nou montré ki nou pé laisse l’esprit saint influence nou la vie.

12. (a) Dapré vision Ézékiel, couma Jéhovah pé dirige so l’organisation? (b) Couma nou kapav montré ki nou pé agir en accord avek sa l’esprit-la?

¹² Deuxiemement, Jéhovah servi so l’esprit saint pou dirige so l’organisation kot Li envie li allé. Dan vision Ézékiel, partie l’organisation Jéhovah ki dan le ciel li comparé ar enn char celeste ki pé avancé pou realise projet Jéhovah, ek nanyin pa kapav arrete li. Ki pousse sa char-la pou avance dan enn certain direction? L’esprit saint. (Ézék. 1:20, 21) Fodé pa nou blié ki l’organisation Jéhovah ena deux partie, enn dan le ciel, ek lot-la lor la terre. Si partie ki dan le ciel-la li dirigé par l’esprit saint, alors seki lor la terre-la aussi bizin pareil. Kan nou obeir ek nou reste fidele ar direction ki nou gagné ar l’organisation Jéhovah ki lor la terre, nou montré ki nou pé avance ensam avek char celeste Jéhovah ek ki nou pé agir en accord avek so l’esprit saint.—Héb. 13:17.

13, 14. (a) Kisannla “sa generation” ki Jésus ti mentionné-la? (b) Donne enn l’exemple ki montré ki l’esprit saint pé aide nou pou comprend bann verité biblik. (Guette l’encadré “Eski ou a jour avek bann l’eclaircissement biblik?”)

¹³ Troisiemement, Jéhovah servi so l’esprit saint pou aide nou pou comprend bann verité ki ena dan la Bible. (Prov. 4:18) Depuis plusieurs l’année, “l’esclave fidele et avisé” finn servi sa periodik-la couma enn moyen principal pou faire konn bann verité biblik tigit par tigit. (Mat. 24:45) Prend par exemple l’explication ki nou ena lor l’expression “sa generation-la,” ki Jésus ti mentionné. (Lire Matthieu 24:32-34.) Ki generation Jésus ti pé kozé? Lartik “Presence Christ—Ki sa representé pou ou?” ti expliké ki Jésus pa ti pé koz lor bann mauvais dimoune, mais lor so bann disciple, ki bientot ti pou oint ar l’esprit saint.a C’est bann disciple oint Jésus, dan premier siecle ek dan nou lepok toulé-deux, ki ti pou trouve signe ki li ti donné ek ti pou kapav comprend so signification, setadir ki Jésus li “pré, li derriere la porte.”

¹⁴ Ki sa l’explication-la vedir pou nou? Mem si nou pa kapav koné exactement ki quantité le temps “sa generation-la” li duré, li bon ki nou rappel plusieurs kitsoz lor mot “generation.” Souvent mot “generation” applik ar bann dimoune different l’age ki vive dan mem lepok pendant enn certain le temps; c’est pa enn periode ki trop longue; ek li ena enn la fin. (Ex. 1:6) Alors, couma nou bizin comprend seki Jésus ti dire lor “sa generation-la”? Nou comprend ki li ti pé rod dire ki so bann disciple oint ki ti trouve signe la fin commencé en 1914, pou vive pendant enn certain temps avek bann lezot chretien oint ki pou trouve commencement la grande tribulation. Sa generation-la inn ena enn commencement, ek pena doute ki li pou ena enn la fin. Realisation plusieurs l’evenement ki forme partie dan sa signe-la montré dan enn fason bien clair ki sa tribulation-la bizin pré. Kan nou garde dan nou l’esprit ki pa reste beaucoup le temps, ek kan nou contigne veillé, nou montré ki nou pé prend compte bann l’eclaircissement spirituel, ek ki nou pé suive direction l’esprit saint.—Marc 13:37.

15. Ki montré ki c’est l’esprit saint ki donne nou la force pou preche la bonne nouvelle?

¹⁵ Quatriemement, grace a so l’esprit saint Jéhovah donne nou la force pou preche la bonne nouvelle. (Actes 1:8) Sans l’esprit saint, jamais nou pa ti pou kapav preche la bonne nouvelle partout lor la terre. Reflechi lor la. Kitfois ou ti tellement timide ou-soit peur, ki ou ti dire: ‘Moi jamais mo pa pou kapav al preché devant la porte bann dimoune!’ Pourtant, zordi ou enn proclamateur bien zelé.b Beaucoup Témoins de Jéhovah ki fidele finn contigne preché malgré l’opposition ou-soit persecution. Zis l’esprit saint Bondié ki kapav aide nou pou faire face ar bann difficulté ki kapav decourage nou ek pou faire bann kitsoz ki, par nou-mem, jamais nou ti pou kapav faire. (Mika 3:8; Mat. 17:20) Kan ou participe dan predication a fond, ou montré ki ou pé coopere avek sa l’esprit-la.

Role l’esprit saint dan l’avenir

16. Kifer nou kapav ena confiance ki Jéhovah pou protege so peuple pendant la grande tribulation?

¹⁶ Dan l’avenir, Jéhovah pou servi so l’esprit saint dan bann fason extraordinaire pou realise so projet, par exemple, pou protege so bann serviteur. Couma nou finn trouvé, dan le passé Jéhovah ti servi so l’esprit saint pou protege bann dimoune ek pou protege nation Israël en entier. Sa vedir ki nou ena bann bon raison pou croire ki Li pou servi sa mem l’esprit bien puissant-la pou protege so peuple pendant la grande tribulation ki pé kosté. Li pa necessaire ki nou rod koné exactement couma Jéhovah pou prend nou soin dan sa moment-la. Au contraire, nou kapav guette l’avenir avek confiance, parski nou koné ki touletan Jéhovah pou veille lor so bann serviteur ek pena nanyin ki kapav empeche zot gagne so l’esprit saint.—2 Chron. 16:9; Ps. 139:7-12.

17. Couma Jéhovah pou servi so l’esprit saint dan le monde nouveau?

¹⁷ Couma Jéhovah pou servi so l’esprit saint dan le monde nouveau? C’est grace a sa l’esprit-la ki pou kapav produire bann nouveau rouleau ki pou ouvert dan sa lepok-la. (Rév. 20:12) Ki pou ena ladan? Surement bann instruction detaillé ki Jéhovah pou demann nou pou suive pendant mille an. Eski ou pé attann avek impatience pou examine seki pou ena dan sa bann rouleau-la? Nou pé attann avek tou nou leker pou vive dan sa le monde nouveau-la. Li difficile pou mazinn exactement couma sa pou été pou vive dan sa lepok beni-la kan Jéhovah pou servi so l’esprit saint pou realise so projet pou la terre ek pou so bann habitant.

18. Ki determination ou ena?

¹⁸ Alors, fodé jamais nou blié ki, parski Jéhovah servi so l’esprit saint—la force pli puissant dan l’univers—so projet pou reussi sans faute. Sa projet-la concerne ou. Alors, prend determination pou suppliye Jéhovah pou donne ou so l’esprit saint ek pou agir en accord avek so direction. (Luc 11:13) Coumsa ou pou kapav attann pou vive couma Jéhovah ti envie ki bann dimoune vive au commencement—pou touletan dan enn paradis lor la terre.

[Notes]

Eski ou rappel?

• Dan lepok biblik, dan ki different fason Jéhovah ti servi so l’esprit saint pou contigne realise so projet?

• Couma Jéhovah pé servi so l’esprit saint dan nou lepok?

• Couma Jéhovah pou servi so l’esprit saint dan l’avenir pou realise so projet?

[L’encadré page 22]

Eski ou a jour avek bann l’eclaircissement biblik?

Jéhovah contigne donne so peuple bann l’eclaircissement biblik. Ki certain l’eclaircissement ki nou finn gagné dan La Tour de Garde?

▪ L’exemple ki Jésus ti donné lor levain montré ki kitsoz positif lor progré ki enn dimoune faire dan domaine spirituel? (Mat. 13:33)—1^er juillet 2008, page 27-28, en créole.

▪ Kan eski bann chretien pou arrete gagne l’appel pou al dan le ciel?—1^er mai 2007, page 30-31, en français.

▪ Ki sa vedir adore Jéhovah “avek l’esprit”? (Jean 4:24)—1^er août 2002, page 12, en créole.

▪ Dan ki la cour la grande foule pé servi Jéhovah? (Rév. 7:15)—1^er mai 2002, page 30-31, en français.

▪ Kan eski ena separation entre bann mouton ek bann cabri? (Mat. 25:31-33)—15 octobre 1995, page 18-28, en français.