Ki été l’esprit saint?

ENN fois Jésus ti demann so bann disciple: “Ki papa parmi zot, si so garson demann li enn poisson, kitfois pou donne li enn serpent au lieu enn poisson? Ou-soit si li demann enn dizef, pou donne li enn scorpion?” (Luc 11:11, 12) Bann zenfant ki ti reste dan Galilée ti content mange poisson ek dizef ek c’est a cause sa ki zot ti faire tou pou gagne sa avek zot papa.

Jésus ti dire ki nou bizin contigne demandé pou gagne l’esprit saint, pareil couma enn zenfant ki faim pé demann mangé. (Luc 11:9, 13) Si nou comprend ki été l’esprit saint sa pou permette nou bien comprend l’influence ki li kapav ena dan nou la vie. Alors, pou commencé, anou guetté ki la Bible dire nou concernant l’esprit saint.

“Puissance sa Kikenn ki Pli Grand-la”

Bann l’Ecriture montré bien ki l’esprit saint li enn la force ki Bondié servi pou accompli so volonté. Kan ange Gabriel ti dire Marie ki li ti pou gagne enn garson alors ki li ti encore vierge, sa ange-la ti dire li: “L’esprit saint pou vinn lor toi, ek puissance sa Kikenn ki Pli Grand-la pou couvert toi avek so l’ombrage. C’est a cause sa aussi, ki pou appel sa kikenn ki pou né-la saint, Garson Bondié.” (Luc 1:35) Dapré bann parole Gabriel, ena enn lien entre l’esprit saint ek “puissance sa Kikenn ki Pli Grand-la.”

Sa mem l’idée-la apparette lezot place dan la Bible. Prophete Mika ti dire: “Moi . . . mo finn rempli ar la force, avek l’esprit Jéhovah.” (Mika 3:8) Jésus ti promette so bann disciple: “Zot pou gagne pouvoir kan l’esprit saint pou vinn lor zot.” (Actes 1:8) Ek l’apotre Paul ti koz lor “puissance l’esprit saint.”—Romains 15:13, 19.

Alors, ki conclusion nou kapav tiré avek seki nou’nn fek trouvé? Ena enn lien bien proche entre l’esprit saint ek puissance Bondié. C’est par moyen l’esprit saint ki Jéhovah montré so pouvoir. Alors, nou kapav dire ki l’esprit saint c’est la force actif Bondié. Enn la force extraordinaire! Li bien difficile pou nou imaginé ki quantité pouvoir finn bizin pou crée l’univers en entier. A travers prophete Isaïe, Jéhovah ti encourage nou pou medite lor sa bann pensé-la: “Leve zot lizié la-haut ek guetté. Kisannla ki finn crée sa bann kitsoz-la? C’est sa Kikenn ki faire zot l’armée sorti dapré zot quantité; Li appel zot tou par zot nom. A cause l’abondance l’energie actif, parski Li puissant par la force, pena enn parmi zot ki manké.”—Isaïe 40:26.

Alors la Bible montré nou ki l’ordre ek l’harmonie ki ena dan l’univers li existé grace a “l’energie actif,” ou-soit la force Bondié Tout-Puissant. Li clair, ki la force actif Bondié li bien-bien grand, ek nou la vie depann lor la.—Guette l’encadré “L’esprit saint en action.”

Jéhovah kapav servi so l’esprit saint couma dan creation l’univers. Mais li kapav aussi servi sa en faveur bann dimoune. La Bible rempli avek bann l’exemple ki montré couma la force actif Bondié ti donne so bann serviteur la force.

“L’esprit Jéhovah lor moi”

Ministere Jésus, donne nou enn l’idée couma l’esprit saint Bondié kapav donne la force so bann serviteur. Jésus ti dire bann dimoune dan Nazareth: “L’esprit Jéhovah lor moi”. (Luc 4:18) Ki Jésus ti accompli avek ‘puissance sa l’esprit-la’? (Luc 4:14) Li ti gueri tou sorte qualité maladie, li ti calmé enn tempete lor la mer, li ti nourri bann millier dimoune avek deux-trois di pain ek deux-trois poisson, ek li ti mem ressuscite bann mort. L’apotre Pierre ti decrire Jésus couma “enn zom ki Bondié finn montré . . . en publik a travers bann mirak ek bann prediction ek bann signe ki Bondié ti faire a travers li.”—Actes 2:22.

Azordi l’esprit saint nepli faire sa bann qualité mirak-la. Malgré-sa, li kapav faire bann kitsoz extraordinaire pou nou. Pareil couma Jésus ti donne so bann disciple l’assurance, Jéhovah disposé pou donne so l’esprit saint so bann serviteur. (Luc 11:13) A cause sa l’apotre Paul ti kapav dire: “Pou tou kitsoz mo ena courage grace a celui ki donne moi la force.” (Philippiens 4:13) Eski l’esprit saint kapav ena enn bon l’influence coumsa dan ou la vie? Lartik ki suive pou reponn sa question-la.

[L’encadré page 5]

Kifer l’esprit saint li pa enn personne

La Bible compare l’esprit saint ar de l’eau. Kan Bondié ti promette pou donne so peuple bann benediction dan l’avenir, Li ti dire: “Mo pou verse de l’eau lor sa kikenn ki soif-la, ek bann tipti la riviere lor bann l’endroit ki sec. Mo pou verse mo l’esprit lor to descendance, ek mo benediction lor to bann descendant.”—Isaïe 44:3.

Kan Bondié donne so bann serviteur so l’esprit, zot “rempli ar l’esprit saint.” Jésus, Jean Baptiste, Pierre, Paul ek Barnabas ti rempli ar l’esprit saint. Bann disciple ki ti rassemblé ensam jour la Pentecôte 33 nou lepok, zot aussi zot ti rempli ar l’esprit saint.—Luc 1:15; 4:1; Actes 4:8; 9:17; 11:22, 24; 13:9.

Reflechi lor la: Eski kapav “verse” enn dimoune lor plusieurs dimoune? Eski ou pou dire ki enn dimoune pou kapav ‘rempli’ enn groupe dimoune en entier? Sa, li pa logik ditou. Li vrai ki la Bible faire mention bann dimoune ki finn rempli avek sagesse, l’intelligence, ou-soit mem connaissance exact, mais jamais li’nn decrire enn dimoune coumadir pé rempli avek enn lot dimoune.—Exode 28:3; 1 Rois 7:14; Luc 2:40; Colossiens 1:9.

Mot grec ki servi pou traduire “l’esprit” c’est pneuma, ki donne l’idée enn la force invisible. Dapré dictionnaire Expository Dictionary of New Testament Words par W. Vine, mot pneuma “normalement vedir di vent . . . ou-soit souffle; ek, dan enn sens limité, l’esprit, ki couma di vent, li invisible, li pena okenn forme ek li puissant.”

Alors, li clair ki l’esprit saint li pa enn personne.a

[Note]

[Remerciement photo page 5]

Photodisc/SuperStock