Kifer nou bizin laisse-nou guidé par l’esprit Bondié?

“To mo Bondié. To l’esprit li bon; faire ki li conduire moi.”​—PS. 143:10.

1. Expliké couma enn la force invisible kapav guide enn dimoune.

ESKI ou finn deja servi enn boussole pou trouve ou chemin? Enn boussole li enn l’instrument bien simple ki ena enn zaiguille en lema ki touletan montré direction le nord. A cause enn la force invisible ki appel magnétisme, zaiguille enn boussole touletan al dan mem direction avek champ magnétique ki ena autour la terre, entre pole nord ek pole sud. Pendant plusieurs siecle, bann dimoune ki faire recherche ek bann voyageur finn servi enn boussole pou guide zot lor la terre ek lor la mer.

2, 3. (a) Ki la force puissant, Jéhovah ti servi bien-bien longtemps dan le passé? (b) Kifer nou bizin attann ki la force actif Bondié ki invisible, guide nou la vie zordi?

² Ena enn lot la force invisible ki pli important, ki nou bizin pou guide nou. Ki sa la force-la sa? C’est la force ki finn decrire dan bann premier verset la Bible. Kan li ti pé koz lor seki Jéhovah ti accompli bien-bien longtemps dan le passé, livre Genèse dire: “Au commencement Bondié ti crée le ciel ek la terre.” Kan Bondié ti faire sa, Li ti envoye enn la force ki puissant, parski recit lor creation ajouté: “La force actif Bondié ti pé allé-vini.” (Gen. 1:1, 2) Ki la force ki ti pé agir? C’est l’esprit saint​—la force actif ki Bondié ti servi pou crée. Si zordi nou la, c’est parski Jéhovah finn servi sa l’esprit-la pou crée tou kitsoz.​—Job 33:4; Ps. 104:30.

³ En tant ki bann dimoune ki vivant ek ki respiré, eski nou bizin attann ki la force actif Bondié encore ena l’effet lor nou la vie? Jésus, Garson Bondié, ti koné ki nou bizin attann sa, parski li ti dire so bann disciple: “L’esprit . . . pou guide zot dan la verité.” (Jean 16:13) Couma nou kapav comprend ki été sa l’esprit-la, ek kifer nou bizin envie ki sa l’esprit-la guide nou?

Ki été l’esprit saint?

4, 5. (a) Ki bann ki croire dan Trinité pensé lor l’esprit saint? (b) Ki été vrai-mem l’esprit saint?

⁴ Li possible ki certain dimoune ki ou joinde dan predication croire dan seki la Bible du roi Jacques ek certain lezot traduction la Bible appel Saint-Esprit. Bann dimoune ki croire dan Trinité, ena tort kan zot pensé ki c’est enn creature spirituel ki egal ar Dieu le Père. (1 Cor. 8:6) La Bible Webster, c’est enn traduction la Bible ki’nn faire bann ti changement dan la Bible du roi Jacques ki ti publié premier fois en 1833. Nou remarké ki partout dan La Bible Webster, Noah Webster, enn expert américain ki ti faire bann dictionnaire, ti remplace “Saint-Esprit” par “Esprit Saint.” Noah Webster ti faire sa parski li ti koné ki dan bann l’Ecriture, sa l’expression-la pa ti vedir “enn apparition.”a

⁵ Alors, ki été vrai-mem l’esprit saint? Dan Les Saintes Écritures — Traduction du monde nouveau — avec notes et références, enn note dan Genèse 1:2 dire: “Mot hébreu rouaḥ pa finn zis traduire par ‘l’esprit,’ mais finn aussi traduire sa par ‘di-vent,’ ek par bann lezot mot ki vedir enn la force actif invisible.” (Compare avek bann note ki trouve dan Genèse 3:8; 8:1.) Pareil couma di-vent li invisible mais li ena enn l’effet, l’esprit saint​—enn la force ki pena okenn forme ek okenn personnalité​—li aussi li invisible ek li produire bann l’effet. Sa l’esprit-la c’est l’energie ki sorti kot Bondié ek ki Li donne bann dimoune ou-soit bann kitsoz, ek ki agir lor zot pou zot faire so volonté. Eski li difficile pou croire ki enn la force ki extraordinaire coumsa sorti kot sa Bondié ki saint ek Tout-Puissant-la? Non!​—Lire Isaïe 40:12, 13.

6. Ki supplication David ti faire ar Jéhovah?

⁶ Eski Jéhovah kapav contigne servi so l’esprit pou guide nou dan la vie? Li ti promette David, ki ti enn psalmiste: “Mo pou donne toi capacité pou comprend ek mo pou montré toi dan ki chemin to bizin marché.” (Ps. 32:8) Eski c’est seki David ti envie? Oui, parski li ti suppliye Jéhovah par sa bann parole-la: “Enseigne moi pou faire to volonté, parski to mo Bondié. To l’esprit li bon; ki li conduire moi.” (Ps. 143:10) Nou bizin ena mem desir ek nou bizin bien disposé pou laisse-nou guidé par l’esprit Bondié. Kifer? Anou examine quatre raison.

Nou pa kapav guide nou par nou-mem

7, 8. (a) Kifer nou pa kapav guide nou par nou-mem, sans Bondié? (b) Donne enn l’exemple pou montré kifer fodé pa nou essaye trouve nou chemin par nou-mem dan sa mauvais le monde-la.

⁷ Premierement, nou bizin envie laisse l’esprit Bondié guide nou parski nou pa kapav guide nou par nou-mem. “Guidé” vedir “dirige enn kikenn ek montré li ki chemin li bizin suive.” Selman, Jéhovah pa finn crée nou avek capacité pou dirige nou par nou-mem, surtout ki nou bann dimoune imparfait. Prophete Jérémie ti ecrire: “O Seigneur, mo conscient ki chemin enn dimoune pa trouve dan li-mem: enn dimoune pena pouvoir pou dirige so bann pas.” (Jér. 10:23, The Bible in Basic English) Kifer? Jérémie ti tann Bondié expliké kifer nou pena capacité pou dirige nou par nou-mem. Concernant seki nou été au fond nou-mem, Jéhovah ti dire: “Leker pli traitre ki n’importe ki lezot kitsoz ek li bien mauvais. Kisannla kapav konn li?”​—Jér. 17:9; Mat. 15:19.

⁸ Si enn dimoune ki pena l’experience al marché li tousel dan enn bois ki li pa koné, sans enn bon guide, ni enn boussole, eski li pa pou montré ki li pé rod probleme? Si li pa koné couma pou faire face ar bann condition difficile ki ena dan enn bois, ek si li pena l’experience pou prend enn chemin ki pou faire li arrive bien kot li pé allé, li pou mette so la vie en danger. Alors, si enn dimoune pensé ki li kapav dirige so la vie dan sa mauvais le monde-la sans ki li laisse Bondié montré li enn bon chemin, li aussi li pou mette so la vie en danger. Sel fason pou nou reussi traverse bann difficulté ki ena dan sa le monde-la, c’est kan nou faire mem la priere ki David ti faire ar Jéhovah: “Faire ki mo bann pas suive to bann la piste, lor sa bann la piste-la, jamais mo lipié pou glissé.” (Ps. 17:5; 23:3) Couma nou kapav gagne sa direction-la?

9. Pareil couma nou trouvé lor page 19, couma l’esprit saint kapav vinn enn bon guide pou nou?

⁹ Si nou humble ek nou disposé pou depann lor Jéhovah, Li pou donne nou so l’esprit saint ki pou couma enn bon guide pou dirige nou bann pas. Couma sa la force actif-la pou aide nou? Jésus ti explik so bann disciple: “L’assistant, l’esprit saint, ki mo Papa pou envoye lor mo nom, li, li pou enseigne zot tou kitsoz ek li pou faire zot rappel tou bann kitsoz ki mo finn dire zot.” (Jean 14:26) Kan regulierement ek avek l’aide la priere, nou etudié Parole Bondié ek tou seki Jésus ti dire ladan, l’esprit saint pou faire nou comprend pli bien grand sagesse Jéhovah, pou ki nou kapav faire So volonté. (1 Cor. 2:10) En plus, si arrive enn l’evenement ki nou pa ti attann dan nou la vie, l’esprit saint pou montré nou ki chemin nou bizin prend. Li pou faire nou rappel bann principe biblik ki nou finn deja aprann ek li pou aide nou pou comprend couma pou applik zot dan bann decision ki nou pou prend.

L’esprit Bondié ti guide Jésus

10, 11. En rapport avek l’esprit saint, ki Jésus ti pé attann, ek ki l’experience li ti faire?

¹⁰ Enn deuxieme raison kifer nou bizin laisse l’esprit saint guide nou c’est parski Bondié ti guide so Garson par so l’esprit. Avant li vinn lor la terre, sa Garson ki Bondié ti crée direct-la, ti konn sa prophetie-la: “L’esprit Jéhovah pou repose lor li, l’esprit sagesse ek l’intelligence, l’esprit ki faire li servi so bon jugement ek la force, l’esprit la connaissance ek la crainte pou Jéhovah.” (Is. 11:2) Maziné ki quantité Jésus ti content pou gagne l’aide l’esprit Bondié kan li ti bizin faire face ar bann different situation lor la terre!

¹¹ Bann parole Jéhovah ti realisé. Bann l’Evangile dire ki ti arrivé desuite apré bapteme Jésus: “Asterla Jésus ki ti rempli ar l’esprit saint, ti quitte Jourdain, ek l’esprit saint ti amenn li dan desert.” (Luc 4:1) La-bas, kan Jésus ti pé garde careme, ti pé prié ek ti pé medité, kitfois Jéhovah ti donne li bann instruction ek ti faire li koné seki ti pé attann li. La force actif Bondié ti agir lor l’esprit Jésus ek lor so leker pou guide so bann pensée ek so bann decision. Lerla, Jésus ti koné ki pou faire dan chaque situation, ek li ti faire exactement seki so Papa ti envie li faire.

12. Kifer li important ki nou demann Bondié so l’esprit saint pou guide nou?

¹² Jésus ti koné ki bon l’effet l’esprit saint ti ena dan so prop la vie. C’est a cause sa ki li ti montré so bann disciple l’importance pou demann Bondié l’esprit saint ek pou laisse sa la force-la guide zot. (Lire Luc 11:9-13.) Kifer li important ki nou aussi nou demann l’esprit saint? Parski li kapav change nou bann pensée pou ki zot ressemblé pensée Christ. (Rom. 12:2; 1 Cor. 2:16) Kan nou laisse l’esprit saint guide nou la vie, nou kapav pense pareil couma Christ ek imite so l’exemple.​—1 Pierre 2:21.

L’esprit le monde pou faire nou prend enn mauvais chemin

13. Ki été l’esprit le monde ek ki li pousse bann dimoune pou faire?

¹³ Enn troisieme raison kifer nou envie ki l’esprit Bondié guide nou, c’est parski ena enn l’esprit impur ki pé agir dan la vie beaucoup dimoune zordi. Sans l’esprit Bondié, sa l’esprit impur-la kapav pousse nou pou prend enn mauvais chemin. Le monde ena so prop la force bien puissant, ki pousse nou pou amenn enn la vie ki contraire ar seki l’esprit saint kapav faire nou developpé. Au lieu ki l’esprit le monde encourage bann dimoune pou ena pensée Christ, li faire zot pense ek agir pareil couma chef sa le monde-la, Satan le Diable. (Lire Éphésiens 2:1-3; Tite 3:3.) Kan enn dimoune cedé devant l’esprit sa le monde-la ek commence pratik seki la chair produire, sa faire li gagne bann consequence bien grave ki pou empeche li gagne Royaume Bondié.​—Gal. 5:19-21.

14, 15. Couma nou kapav reussi resisté kont l’esprit le monde?

¹⁴ Jéhovah inn donne nou seki nou bizin pou ki nou resisté kont l’esprit le monde. L’apotre Paul ti dire: “Contigne rod la puissance ar nou Seigneur ek ar puissance so la force . . . pou ki zot kapav resisté dan mauvais jour.” (Éph. 6:10, 13) Par so l’esprit, Jéhovah fortifié nou pou nou kapav resisté kont bann zeffort ki Satan pé faire pou detourne nou. (Rév. 12:9) L’esprit le monde li fort, ek nou pa kapav evite li net. Selman, nou bizin pa laisse li ena enn mauvais l’influence lor nou. L’esprit saint li beaucoup pli fort ek li pou aide nou!

¹⁵ Concernant bann ki ti abandonne congregation chretien dan premier siecle, l’apotre Pierre ti dire: “Zot finn abandonne sa chemin ki droite-la, zot finn perdi zot chemin.” (2 Pierre 2:15) Vrai-mem, nou kapav ena enn grand reconnaissance ki nou “pa finn recevoir l’esprit le monde, mais l’esprit ki sorti kot Bondié”! (1 Cor. 2:12) Grace a l’influence l’esprit saint, ek kan nou profite bien tou bann disposition ki Jéhovah inn prend pou garde nou dan enn bon chemin lor plan spirituel, nou kapav reussi resisté kont l’esprit satanik ki ena dan sa le monde-la.​—Gal. 5:16.

L’esprit saint faire nou developpe enn bon fruit

16. Ki fruit, l’esprit saint kapav faire nou developpé?

¹⁶ Enn quatrieme raison kifer nou envie ki l’esprit saint ena enn bon l’influence lor nou, c’est parski li faire bann ki laisse-zot guidé par li, developpe enn bon fruit. (Lire Galates 5:22, 23.) Kisannla parmi nou pa ti pou content manifesté plus l’amour, la joie, ek la paix? Kisannla parmi nou pa ti pou content ena patience, bienveillance ek bonté en abondance? Kisannla parmi nou pa pou gagne bann bienfait si li developpe enn pli grand la foi, douceur, ek maitrise de soi? L’esprit Bondié faire nou developpe bann bon qualité ki faire nou gagne bann bienfait. Sa faire bann dimoune avek ki nou vive ek bann dimoune ki servi Jéhovah ensam avek nou, gagne bann bienfait zot aussi. Nou bizin ek nou kapav contigne developpe sa fruit-la, parski bann qualité ki sa l’esprit-la produire en nou, pena okenn limite.

17. Couma nou kapav developpe pli bien enn qualité dan fruit l’esprit?

¹⁷ Nou pou agir avek sagesse si nou examine nou-mem pou faire sur ki nou bann parole ek nou bann action montré ki l’esprit saint pé guide nou ek pé faire nou developpe so fruit. (2 Cor. 13:5a; Gal. 5:25) Si nou trouvé ki nou bizin developpe certain qualité dan fruit l’esprit, nou kapav coopere plus encore avek l’esprit saint pou nou developpe sa bann qualité-la. Nou faire sa kan nou etudié seki la Bible ek bann publication biblik faire nou koné lor chaque qualité sa fruit-la, ek kan nou guetté couma nou bizin manifesté fruit l’esprit dan nou la vie toulé-jour ek apré, faire zeffort pou developpe li pli bien.b A mesure ki nou trouve l’effet ki l’esprit Bondié ena dan nou la vie, ek aussi dan la vie lezot chretien, nou comprend bien kifer nou bizin laisse-nou guidé par sa l’esprit-la.

Eski ou pé soumette ar l’esprit Bondié?

18. Couma eski Jésus inn laisse nou enn modele dan fason ki li’nn laisse l’esprit saint guide li?

¹⁸ Kan Bondié ti crée l’univers physik, Jésus ti so “zouvrier qualifié.” Alors, Jésus ti konn tou concernant champ magnétique ki entoure la terre, ki bann dimoune servi pou voyagé lor la terre. (Prov. 8:30; Jean 1:3) Selman, dan okenn place, la Bible pa dire ki Jésus ti servi sa la force-la pou guide so chemin kan li ti lor la terre. Mais, la Bible dire ki en tant ki enn humain, li ti faire l’experience ki l’esprit Bondié ti ena enn grand pouvoir dan so la vie. Li ti laisse l’esprit saint influence li, ek kan sa l’esprit-la ti pousse li pou faire enn kitsoz, li ti soumette ek li ti agir en accord avek sa l’esprit-la. (Marc 1:12, 13; Luc 4:14) Eski ou aussi ou coumsa?

19. Ki nou bizin faire pou ki l’esprit saint vinn enn la force ki guide nou dan nou la vie?

¹⁹ La force actif Bondié encore pé agir lor l’esprit ek leker bann dimoune ki disposé pou laisse sa la force-la motive zot ek guide zot. Couma ou kapav laisse li agir lor ou pou ki li guide ou dan enn bon direction? Contigne prié Jéhovah pou ki Li donne ou so l’esprit ek pou Li aide ou pou soumette ar l’influence sa l’esprit-la. (Lire Éphésiens 3:14-16.) Agir en accord avek ou la priere ek rod bann conseil ki finn ecrire dan la Bible, Parole Bondié​—enn livre ki finn ecrire grace a l’esprit saint. (2 Tim. 3:16, 17) Suive bann instruction bien sage ki ena ladan ek apré, pa hesité pou laisse l’esprit saint guide ou. Montré ki ou ena la foi dan capacité ki Jéhovah ena pou bien guide ou dan sa mauvais le monde-la.

[Notes]

Eski ou’nn comprend bann point important?

• Couma l’esprit saint kapav influence nou la vie?

• Cite quatre raison kifer nou bizin envie ki l’esprit Bondié guide nou.

• Kan l’esprit saint guide nou, couma nou kapav faire nou part pou gagne bann bienfait?

[Zimage page 17]

L’esprit Bondié ti enn la force ki ti pousse Jésus pou agir

[Zimage page 19]

L’esprit Bondié agir lor l’esprit ek leker bann dimoune pou motive zot ek pou guide zot