Marche par l’esprit ek vive en accord avek ou voeu
“Contigne marche par l’esprit ek zot pa pou pratik okenn desir la chair.”—GAL. 5:16.
1. Ki deux bapteme ti ena jour la Pentecôte?
KAN bann disciple Jésus ti koz en langue jour la Pentecôte l’an 33 nou lepok, sa ti passé apré ki zot ti’nn baptisé avek l’esprit saint. Grace a enn mirak, zot ti kapav manifesté enn don l’esprit saint. (1 Cor. 12:4-10) Ki l’effet sa don l’esprit-la ek discours l’apotre Pierre ti ena? “Leker [beaucoup dimoune] ti dechiré.” Zot ti faire seki Pierre ti conseil zot: zot ti repenti ek zot ti prend bapteme. La Bible dire: “Bann ki ti accepté so parole avek tou zot leker ti prend bapteme, ek sa jour-la preské trois mille nâme ti’nn ajouté.” (Actes 2:22, 36-41) Pareil couma Jésus ti donne l’ordre, zot ti bizin baptisé dan de l’eau au nom du Père, du Fils ek l’esprit saint.—Mat. 28:19.
2, 3. (a) Explik difference ki ena entre baptisé avek l’esprit saint ek baptisé au nom l’esprit saint. (b) Kifer tou bann ki vinn bann vrai chretien zordi bizin baptisé dan de l’eau?
2 Mais eski ena enn difference entre baptisé avek l’esprit saint ek baptisé au nom l’esprit saint? Oui. Bann ki baptisé avek l’esprit saint zot né encore enn fois couma bann garson ki Bondié finn oint ar so l’esprit. (Jean 3:3) Zot oint pou vinn bann le roi ki associé avek Jésus ek bann sous-pretre dan Royaume Bondié ki dan le ciel ek zot forme partie dan lekor spirituel Christ. (1 Cor. 12:13; Gal. 3:27; Rév. 20:6) Alors, sa bapteme-la—baptisé avek l’esprit saint—c’est seki Jéhovah ti faire kan, jour la Pentecôte ek apré, Li ti choisir bann dimoune pou vinn bann coheritier avek Christ. (Rom. 8:15-17) Mais ki nou kapav dire concernant bapteme dan de l’eau au nom l’esprit saint, enn kitsoz ki souvent ena pendant bann l’assemblée bann serviteur Jéhovah zordi?
3 Bann vrai chretien baptisé dan de l’eau pou montré ki zot finn voué zot la vie sans okenn condition ar Jéhovah. C’est seki bann ki gagne l’appel pou al vive dan le ciel, faire. Mais dan nou lepok, baptisé dan de l’eau, c’est aussi enn kitsoz bien important ki plusieurs million zom ek femme ki zordi ena l’esperance pou vive touletan lor la terre bizin faire. N’importe ki l’esperance enn dimoune ena, pou ki li gagne faveur Bondié, li bizin baptisé dan de l’eau au nom du Père, du Fils ek l’esprit saint. Tou chretien ki prend sa bapteme-la bizin “contigne marche par l’esprit.” (Lire Galates 5:16.) Eski ou pé marche par l’esprit pou ou kapav vive en accord avek voeu ki ou finn faire?
Ki sa vedir “marche par l’esprit”?
4. Ki sa vedir “marche par l’esprit”?
4 “Marche par l’esprit” implik ki nou accepté l’action l’esprit saint lor nou, nou laisse l’esprit saint influence nou. Sa vedir ki nou laisse l’esprit saint dirige nou dan seki nou faire toulé-jour. Galates chapitre 5 montré difference ki ena kan l’esprit saint influence nou ek kan nou laisse la chair, setadir nou bann desir egoïste, influence nou.—Lire Galates 5:17, 18.
5. Kan ou laisse l’esprit saint influence ou, ki bann mauvais kitsoz ou pou rejeté?
5 Si ou laisse l’esprit saint influence ou, ou pou faire zeffort pou rejette bann oeuvres de la chair. Parmi sa bann mauvais kitsoz-la ena “fornication, l’impureté, conduite devergondé, l’idolatrie, pratik spiritisme, la haine, bagarre, jalousie, crise colere, bann dispute, division, secte, envié lezot, bann paryaz boire, bann fête kot pena okenn controle.” (Gal. 5:19-21) Dan enn certain sens, “par l’esprit, [ou pé] detruire bann pratik [ou] lekor.” (Rom. 8:5, 13) Sa pou aide ou pou fixé ou l’esprit lor bann kitsoz ki en accord avek l’esprit saint ek vive en accord avek direction ki li donne ou, au lieu ki ou laisse bann desir egoïste controle ou.
6. Donne enn l’exemple pou montré seki necessaire pou produire fruit l’esprit saint.
6 A mesure ki l’esprit saint agir lor ou, ou pou manifesté bann qualité spirituel ki forme partie dan “fruit l’esprit.” (Gal. 5:22, 23) Mais ou rann-ou compte ki ou pou bizin faire zeffort pou sa. Anou prend l’exemple enn planteur ki travail la terre. Bien sur, soleil ek de l’eau zot bien important; sans sa, li pa pou kapav attann pou recolté kitsoz. Nou kapav compare l’esprit saint ar la lumiere soleil. Nou bizin l’esprit saint pou manifesté fruit l’esprit. Pourtant, ki planteur-la pou recolté si li pa travail dur? (Prov. 10:4) Oui, fason ki ou pé cultive ou leker, ki comparé ar la terre, ena enn l’influence lor qualité ek quantité fruit ki l’esprit saint pou produire en ou. Alors, demann ou-mem: ‘Eski par bann zeffort ki mo pé faire, mo pé laisse l’esprit saint produire so fruit en moi?’
7. Kifer l’etude ek meditation zot bien important si ou envie developpe fruit l’esprit saint?
7 Pou gagne enn bon recolte, bann planteur bizin aussi arrose zot bann plante. Pou ou kapav developpe fruit l’esprit saint, ou bizin de l’eau la verité ki trouve dan la Bible ek ki ou kapav gagné zordi dan congregation. (Is. 55:1) Surement ou finn dire beaucoup dimoune ki la Bible c’est enn produit l’esprit saint. (2 Tim. 3:16) Ek zordi, l’esclave fidele et avisé donne nou l’explication ki nou bizin pou comprend bann verité ki ena dan la Bible, bann verité ki nou kapav compare avek enn de l’eau ki pur. (Mat. 24:45-47) Alors, nou comprend bien ki, pou nou kapav laisse l’esprit saint influence nou, nou bizin lire Parole Bondié ek medite lor la. Si ou pé faire sa, ou pé imite bon l’exemple bann prophete ki ti “contigne faire bann l’enquete bien serieux ek bann recherche profond” lor bann renseignement ki zot ti ena. Li bien interessant ki mem bann ange finn montré enn grand l’interet pou bann verité spirituel ki concerne Descendance ki Bondié ti promette ek concernant congregation bann chretien oint.—Lire 1 Pierre 1:10-12.
Couma nou kapav laisse l’esprit saint influence nou?
8. Kifer li bien important ki ou demann Jéhovah so l’esprit saint?
8 Li pa assez ki nou zis etudié la Bible ek nou medite lor la. Ou bizin contigne demann Jéhovah so l’aide ek so direction. Li kapav “faire beaucoup-beaucoup plus ki bann kitsoz ki nou demandé ou-soit pensé.” (Éph. 3:20; Luc 11:13) Mais ki ou pou reponn si enn dimoune demandé: “Kifer mo bizin contigne demann Bondié si Li deja koné ‘ki bann kitsoz ki mo bizin avant-mem ki mo demann Li’?” (Mat. 6:8) Enn raison c’est parski kan ou prié pou gagne l’esprit saint, ou pé montré ki ou reconette ki ou bizin Jéhovah. Par exemple, si enn kikenn vinn guette ou pou aide li, ou pou faire tou seki ou kapav pou aide li. Kifer? Enn raison c’est parski li finn demann ou pou donne li enn coude main ek li’nn montré ki li ena confiance en ou. (Compare avek Proverbes 3:27.) Li pareil aussi kan ou prié Jéhovah, Li content ki ou demann Li so l’esprit saint, ek Li pou donne ou sa l’esprit-la.—Prov. 15:8.
9. Couma kan ou assisté bann reunion, sa kapav permette l’esprit Bondié pou influence ou?
9 Surement ou koné aussi ki enn lot fason pou laisse l’esprit Bondié influence nou la vie, c’est par nou bann reunion ek bann l’assemblée. Li bien important ki nou faire zeffort pou assisté ek pou ecoute bien programme ki nou gagné la-bas. Kan nou faire sa, sa pou aide nou pou comprend “bann kitsoz profond ki concerne Bondié.” (1 Cor. 2:10) Ou pou gagne aussi bann bienfait si souvent ou faire bann commentaire pendant reunion. Mazinn bann reunion ki ou finn assisté sa quatre dernier semaine-la. Comié fois ou finn leve ou la main pou reponn, pou exprime ou la foi? Eski ou pensé ou kapav ameliore ou dan sa domaine-la? Si oui, decidé ki ou pou faire dan bann semaine ki pou vini. Jéhovah pou trouvé ki ou bien disposé pou participé ek Li pou donne ou so l’esprit saint ki pou aide ou pou tire encore plus bienfait dan bann reunion ki ou assisté.
10. Kan nou marche par l’esprit, ki l’invitation nou bizin donne lezot?
10 Marche par l’esprit vedir aussi reponn l’invitation ki ena dan Révélation 22:17 ki dire: “L’esprit ek la marié contigne dire: ‘Vini!’ Ki tou seki tendé, dire: ‘Vini!’ Ki tou seki soif, vini; ki tou seki envie, prend de l’eau la vie sans payé.” L’esprit, ki agir par moyen la marié, setadir bann chretien oint, pé donne sa l’invitation ki concerne de l’eau la vie-la. Si ou finn accepté l’invitation pou “vini!” eski ou bien decidé ou aussi pou dire “Vini!”? C’est vrai-mem enn grand privilege pou participe dan sa l’activité ki sauve la vie bann dimoune-la!
11, 12. Ki role l’esprit saint joué dan l’activité predication?
11 Dan nou lepok, c’est l’esprit saint ki pé dirige sa travail important ki nou pé faire-la. Nou kapav lire dan la Bible couma dan premier siecle, l’esprit saint ti impliké pou ouvert bann nouveau territoire pou bann missionnaire. “L’esprit saint ti defann [l’apotre Paul ek so bann compagnon pou] dire la parole dan district l’Asie”; li ti empeche zot aussi pou al dan Bithynie. Nou pa koné exactement couma l’esprit saint ti empeche zot pou al dan sa bann l’endroit-la, mais li clair ki l’esprit saint ti dirige Paul en Europe ki ti enn grand territoire. Li ti gagne vision enn Macédonien ki ti suppliye li pou vinn aide zot.—Actes 16:6-10.
12 Dan nou lepok aussi, Jéhovah pé dirige l’activité predication ki pé faire dan le monde entier par so l’esprit. Jéhovah pa pé donne okenn vision par bann mirak pou dirige so bann serviteur pou faire zot koné ki direction zot bizin prend, mais Li pé guide bann chretien oint par so l’esprit saint. Ek l’esprit saint pousse bann frere ek soeur pou faire tou seki zot kapav pou preché ek enseigné. Surement ou participe dan sa travail ki bien important-la. Eski ou kapav augmente ou la joie dan sa travail bien interessant-la?
13. Couma ou kapav soumette-ou ar direction l’esprit saint? Donne enn l’exemple.
13 Ou kapav soumette-ou ar direction l’esprit saint kan ou applik bann l’instruction ki bann serviteur Bondié gagné. Anou prend l’exemple enn jeune soeur ki appel Mihoko, ki reste Japon. Li ti enn nouveau pionnier ek li pa ti senti-li qualifié pou faire bann nouvelle visite; li ti ena l’impression ki li pa koné couma pou capté l’interet bann dimoune. Sa lepok-la, dan Ministere du Royaume ti ena bann suggestion pratik ki ti montré couma kapav faire bann nouvelle visite bien courte. Apré sa, brochure Une vie pleinement satisfaisante : Comment ? ti sorti. Sa brochure-la ti surtout bien efficace dan territoire japonais. Mihoko ti mette en pratik bann suggestion lor fason pou servi sa brochure-la, surtout couma pou faire bann nouvelle visite bien courte. Li pa ti tardé pou commence bann l’etude la Bible avek bann dimoune ki avant, ti refuse enn l’etude. Li dire: “Mo ti ena tellement beaucoup l’etude—ziska 12 l’etude pendant enn lepok—ki mo ti bizin mette certain lor enn la liste d’attente!” Oui, kan ou marche par l’esprit, ek ou applik bann l’instruction ki bann serviteur Jéhovah gagné, ou kapav recolté beaucoup.
Compte lor l’esprit saint
14, 15. (a) Couma li possible pou bann dimoune imparfait pou vive en accord avek zot voeu? (b) Couma ou kapav trouve bann pli bon camarade ki kapav ena?
14 En tant ki ministre Bondié, ou ena enn ministere pou faire. (Rom. 10:14) Kitfois ou pa senti-ou qualifié pou rempli sa responsabilité-la. Mais, pareil couma pou bann chretien oint, c’est Bondié ki donne ou, ou capacité. (Lire 2 Corinthiens 3:5.) Ou kapav vive en accord avek ou voeu kan ou faire tou seki ou kapav ek ou compte lor l’esprit saint Bondié.
15 Li vrai ki li pa facile pou bann dimoune imparfait couma nou pou vive en accord avek voeu ki nou’nn faire ar nou Bondié ki parfait, Jéhovah. Enn difficulté ki ou kapav gagné c’est ki certain ki ou ti frequenté avant, kapav etonné ar ou nouveau fason vive, ek zot ‘koz en mal lor ou.’ (1 Pierre 4:4) Selman, pa blié ki depuis sa, ou finn ena bann nouveau camarade, parmi ena Jéhovah ek Jésus Christ, bann pli bon camarade ki kapav ena. (Lire Jacques 2:21-23.) Li aussi bien important ki ou aprann konn ou bann frere ek soeur dan ou congregation, ki forme partie dan “toute la famille nou bann frere” a travers le monde. (1 Pierre 2:17; Prov. 17:17) Par so l’esprit saint, Jéhovah pou aide ou pou ena bann camarade ki pou contigne ena enn bon l’influence lor ou.
16. Kifer pareil couma Paul, ou kapav “supporte avek plaisir bann faiblesse”?
16 Mem si ou ena bann camarade dan congregation ki pré pou aide ou, kitfois ou trouve sa kan-mem difficile pou faire face ar bann difficulté ki ou gagné toulé-jour. Li possible ki bann probleme ki ou gagné decourage ou tellement ki ou ena l’impression ki jamais zot pou fini. C’est surtout dan sa moment-la ki ou bizin tourne vers Jéhovah dan la priere pou demann Li so l’esprit saint. L’apotre Paul ti ecrire: “Kan mo faible, c’est lerla-mem ki mo puissant.” (Lire 2 Corinthiens 4:7-10; 12:10.) Paul ti koné ki, parski li ti limité a cause so bann faiblesse, l’esprit Bondié ti pou kapav donne li la force ki li ti manké. Alors, la force actif Bondié kapav fortifié ou n’importe kan ou senti-ou faible ek bizin l’aide. Paul ti ecrire ki li ti kapav “supporte avek plaisir bann faiblesse.” C’est kan li ti faible ki li ti senti l’esprit saint agir lor li. Ou aussi ou kapav ena mem sentiment!—Rom. 15:13.
17. Couma l’esprit saint kapav aide ou pou arrive kot ou pé allé?
17 Nou bizin l’esprit Bondié pou nou kapav amenn enn la vie ki consacré net pou servi Li. Ou l’objectif c’est pou servi Jéhovah touletan. Maziné ki ou capitaine enn bateau. L’esprit saint li coumadir sa di-vent ki ou bizin prend-la pou ki ou kapav arrive kot ou pé allé sans okenn probleme. Ou pa envie ki l’esprit le monde Satan sarié ou partout-partout. (1 Cor. 2:12) Alors, sa vedir ki ou bizin coumadir rod sa bon di-vent ki represente l’esprit-la ek laisse li sarié ou. L’esprit saint pou pousse ou dan bon direction a travers la Bible ek l’organisation Bondié ki Li dirigé par so l’esprit.
18. Ki determination ou ena asterla, ek kifer?
18 Si ou pé etudié avek bann Témoins de Jéhovah ek ou pé assisté zot reunion, mais ki ou pankor voué ou la vie ek prend bapteme, demann ou-mem: ‘Kifer mo pé hesité?’ Si ou comprend ki l’esprit saint pé joué enn role pou accompli volonté Jéhovah zordi ek ou accepté so direction, alors mette en pratik seki ou finn aprann ek ki ou koné bon. Jéhovah pou beni ou beaucoup. Li pou donne ou so l’esprit saint avek generosité. Si sa faire plusieurs l’année ki ou finn prend bapteme, surement ou finn trouvé couma l’esprit saint inn aide ou dan ou la vie. Ou finn trouvé ek ou finn senti couma Bondié kapav fortifié ou grace a so l’esprit. Ou kapav contigne profite sa—oui, pou touletan dan l’avenir. Alors, prend determination pou contigne marche par l’esprit saint.
Eski ou rappel?
• Ki sa vedir “marche par l’esprit”?
• Ki kapav aide ou pou “contigne marche par l’esprit”?
• Couma ou kapav vive en accord avek ou voeu?
[Zimage page 17]
Sa demann beaucoup zeffort pou travail ou leker, ki nou kapav compare ar la terre
[Zimage page 18, 19]
Eski l’esprit Bondié influence ou?