“Enn sel ki zot Guide, le Christ”

“Pa faire personne appel zot ‘guide,’ parski ena enn sel ki zot Guide, le Christ.”—MAT. 23:9, 10.

1. Kisannla, bann Témoins de Jéhovah considere couma zot Guide, ek kifer?

BANN l’Eglise la chretienté ena bann chef ou-soit bann guide humain, couma par exemple le Pape, ek lezot chef dan lezot religion chretien. Bann Témoins de Jéhovah zot, zot pa considere okenn humain couma zot chef ou-soit zot guide. Zot pa bann disciple enn dimoune. Sa li en accord avek parole prophetik ki Jéhovah ti prononcé concernant so Garson. Li ti dire: “Guetté! Mo finn etabli li couma enn temoin pou bann peuple, couma enn guide ek enn commandant pou bann peuple.” (Is. 55:4) Congregation international bann chretien oint ek zot bann compagnon, “bann lezot brebis,” pa oulé okenn lot Guide a part Guide ki Jéhovah Li-mem inn donne zot. (Jean 10:16) Zot d’accord avek sa bann parole ki Jésus ti dire-la: “Enn sel ki zot Guide, le Christ.”—Mat. 23:10.

Prince spirituel Israël

2, 3. Ki role Garson Bondié ti ena dan bann evenement ki ti arrivé en Israël?

² Plusieurs siecle avant ki congregation chretien ti fondé, Jéhovah ti donne enn ange enn mission: li ti bizin guide so peuple Israël. Apré ki Li ti faire bann Israélite sorti dan l’Égypte, Jéhovah ti dire zot: “Mo pé envoye enn ange devant toi pou veille toi lor la route ek pou faire toi rente dan l’endroit ki mo’nn preparé. Faire attention a cause li ek obeir so la voix. Pa montré toi rebelle envers li, li pa pou pardonne zot erreur, parski mo nom en li.” (Ex. 23:20, 21) Li raisonnable pou pensé ki sa ange ki ti ena nom ‘Jéhovah en li-la,’ ti garson premier-né Bondié.

³ Kitfois, Garson Bondié ti appel Mikaël avant ki li vinn lor la terre en tant ki enn humain. Dan livre Daniel, la Bible appel Mikaël “zot prince,” setadir prince peuple Daniel, nation Israël. (Dan. 10:21) Disciple Jude faire nou koné ki Mikaël ti impliké dan bann l’evenement ki ti arrivé en Israël bien avant lepok Daniel. Apré la mort Moïse, li possible ki Satan ti ena l’intention pou servi so lekor dan enn certain fason, pou so prop l’avantage, kitfois pou pousse nation Israël pou pratik l’idolatrie. Mais Mikaël ti empeche sa. Jude ecrire: “Kan Mikaël l’archange ti gagne enn desaccord avek Satan le Diable ek ki li ti pé discuté concernant lekor Moïse, li pa ti osé juge li par bann parole ki insulté li, mais li ti dire: ‘Ki Jéhovah corrige toi dan enn fason severe.’ ” (Jude 9) Inpé plitar, avant ki bann Israélite ti entoure la ville Jéricho pou attak li, “prince l’armée Jéhovah,” surement Mikaël, ti apparette ar Josué pou donne li l’assurance ki Bondié ti avek li. (Lire Josué 5:13-15.) Kan enn demon bien puissant ti essaye empeche enn ange pou delivré enn message important ar prophete Daniel, archange Mikaël ti vinn aide sa ange-la.—Dan. 10:5-7, 12-14.

Guide ki ti annoncé, vini

4. Ki prophetie, ange Gabriel ti donné concernant le Messie?

⁴ Avant sa l’evenement-la, Jéhovah ti’nn envoye so ange Gabriel pou donne prophete Daniel enn prophetie ki ti pou faire li koné kan “Messie le Guide” ti pou vini. (Dan. 9:21-25)a Exactement couma sa prophetie-la ti annoncé, Jean ti baptise Jésus vers l’automne l’an 29 nou lepok. Bondié ti envoye so l’esprit saint lor Jésus, ek coumsa li ti vinn sa Kikenn ki’nn oint-la—Christ, le Messie. (Mat. 3:13-17; Jean 1:29-34; Gal. 4:4) En tant ki Messie li ti pou vinn enn Guide ek pa ti pou ena personne couma li.

5. Couma eski Christ ti agir couma enn Guide pendant so ministere lor la terre?

⁵ Desuite couma li’nn commence so ministere lor la terre, Jésus finn montré ki li-mem “Messie le Guide.” Dan zis deux-trois jour, li ti rassemblé bann disciple ek li ti faire so premier mirak. (Jean 1:35–2:11) Li ti al partout en Israël pou preche la bonne nouvelle lor Royaume Bondié, ek so bann disciple ti suive li. (Luc 8:1) Li ti forme so bann disciple dan l’activité predication ek li ti prend la tête dan l’activité pou preché ek pou enseigné, coumsa li’nn laisse enn bon l’exemple. (Luc 9:1-6) Bann ancien zordi bizin imite li dan sa domaine-la.

6. Couma Jésus ti montré ki li enn Berger ek enn Guide?

⁶ Jésus ti mette l’accent lor enn lot l’aspect concernant so role en tant ki Guide, kan li ti compare li-mem ar enn berger ki ena beaucoup l’amour. Dan so livre La terre et le Livre (en anglais), W.M. Thomson expliké couma bann berger en Orient ti pé guide zot bann troupeau. Li ti ecrire: “Berger-la al devant pa zis pou montré chemin, mais aussi pou guetté si chemin la li bon ek ki pena okenn danger. . . . Avek [so] baton li dirige so troupeau, li guide zot vers bann la plaine bien vert ek li protege zot kont zot bann l’ennemi.” Pou montré ki li enn vrai Berger ek enn vrai Guide, Jésus ti dire: “Mo-mem l’excellent berger; l’excellent berger donne so nâme pou so bann mouton. Mo bann brebis ecoute mo la voix ek mo konn zot bien, ek zot suive moi.” (Jean 10:11, 27) Jésus ti respecté so parole: li ti donne so la vie en sacrifice pou so bann brebis, mais Jéhovah “ti eleve li en tant ki Chef ek Sauveur.”—Actes 5:31, Osty; Héb. 13:20.

Surveillant congregation chretien

7. Par ki moyen Jésus dirige congregation chretien?

⁷ Enn tipé avant ki li ti monte dan le ciel, apré so resurrection, Jésus ti dire so bann disciple: “Mo’nn gagne tou pouvoir dan le ciel ek lor la terre.” (Mat. 28:18) A travers Jésus, Jéhovah ti envoye so l’esprit saint pou ki bann disciple Jésus reste solide dan la verité. (Jean 15:26) Jésus ti envoye sa l’esprit-la lor bann premier chretien pendant jour la Pentecôte l’an 33 nou lepok. (Actes 2:33) C’est coumsa ki congregation chretien ti fondé. Jéhovah ti donne so Garson responsabilité pou dirige congregation depuis le ciel. (Lire Éphésiens 1:22; Colossiens 1:13, 18.) Par moyen l’esprit saint Jéhovah, Jésus dirige congregation chretien, ek pou aide li, ena bann ange ki ‘Bondié ti faire soumette ar li.’—1 Pierre 3:22.

8. Kisannla Christ ti servi lor la terre dan premier siecle pou dirige so bann disciple, ek kisannla li pé servi zordi?

⁸ Enn lot kitsoz ki Christ inn faire par moyen l’esprit saint c’est ki li’nn donne “bann zom couma bann don,” certain “couma bann berger ek enseignant,” dan congregation. (Éph. 4:8, 11) L’apotre Paul ti suppliye bann ancien: “Veille bien lor zot-mem ek lor tou troupeau Bondié, parski l’esprit saint finn etabli zot couma bann surveillant parmi sa troupeau-la pou ki zot prend soin congregation Bondié.” (Actes 20:28) Kan congregation chretien ti fondé, tou bann ancien ti bann chretien oint. Bann zapotre ek bann ancien dan congregation Jérusalem ti agir en tant ki college central. Christ ti servi sa college central-la pou dirige tou so “bann frere” oint lor la terre. (Héb. 2:11; Actes 16:4, 5) Zordi, dan lepok la fin, Christ finn confié “tou so bann di-bien,” setadir tou bann l’interet Royaume Bondié lor la terre, ar so l’esclave fidele et avisé ek so representant, College central, enn groupe frere ki oint. (Mat. 24:45-47) Bann chretien oint ek zot compagnon bann lezot brebis reconette ki, kan zot pé suive direction College central dan nou lepok, en realité c’est Christ, zot Guide, ki zot pé suive.

Christ dirige l’activité predication

9, 10. Couma eski Christ ti dirige bann l’evenement pou ki la bonne nouvelle lor Royaume Bondié preché partout?

⁹ Depuis commencement, Jésus personnellement ti dirige l’activité predication ek l’enseignement. Li ti etabli dan ki l’ordre la bonne nouvelle lor Royaume Bondié ti pou bizin preché lor la terre entier. Pendant so ministere, li ti donne so bann zapotre sa l’instruction-la: “Pa al lor chemin bann nation, ek pa rente dan enn la ville samaritain; mais, contigne al vers bann brebis ki’nn perdi dan lakaz Israël. Kan zot allé, preché, ek dire: ‘Royaume ki dan le ciel finn approché.’ ” (Mat. 10:5-7) So bann zapotre ti obeir ek zot ti preche avek zele ar bann Juif ek bann prosélyte, surtout apré la Pentecôte l’an 33 nou lepok.—Actes 2:4, 5, 10, 11; 5:42; 6:7.

¹⁰ Plitar, par moyen l’esprit saint, Jésus ti dirige so bann disciple pou zot preche aussi avek bann Samaritain ek apré, avek bann lezot non-Juif. (Actes 8:5, 6, 14-17; 10:19-22, 44, 45) Avek l’intention ki la bonne nouvelle preché partout parmi bann nation, Jésus personnellement ti pousse Saul de Tarse pou vinn enn chretien. Jésus ti donne Ananias, so disciple, sa instruction-la: “Levé, ek al lor chemin ki appel Droite, ek dan lakaz Judas, rod enn missié ki appel Saul, ki sorti Tarse. . . . Allé, parski sa zom-la li-mem vase ki mo’nn choisir pou porte mo nom devant bann nation ek aussi devant bann le roi ek bann Israélite.” (Actes 9:3-6, 10, 11, 15) “Sa zom-la” ti vinn l’apotre Paul.—1 Tim. 2:7.

11. Couma eski Christ par moyen l’esprit saint ti dirige l’activité predication?

¹¹ Kan ti’nn arrive ler pou preche avek bann nation non-juif, l’esprit saint ti dirige Paul dan so bann voyage missionnaire dan l’ouest l’Asie ek dan l’Europe. Dan livre Actes, Luc ecrire: “Alors ki [bann prophete ek bann enseignant dan congregation Antioche de Syrie] ti pé servi Jéhovah en publik ek ti pé garde careme, l’esprit saint ti dire: ‘Parmi tou bann dimoune, mette Barnabas ek Saul a part pou moi, pou travail ki mo finn appel zot pou faire.’ Lerla zot ti garde careme ek zot ti prié, zot ti pose la main lor bannla ek ti laisse zot allé.” (Actes 13:2, 3) Jésus personnellement ti’nn appel Saul de Tarse pou vinn so ‘vase ki li’nn choisir’ pou porte So nom ar tou bann nation. Alors nou kapav dire ki c’est Jésus, Chef la congregation ki ti donne enn nouveau l’elan travail predication. Kan nou examine deuxieme voyage missionnaire Paul, nou kapav trouvé dan enn fason bien clair ki Jésus ti servi l’esprit saint pou dirige la predication. Sa recit-la dire ki “l’esprit Jésus,” setadir ki Jésus par moyen l’esprit saint, ti guide Paul ek so bann compagnon kan zot ti bizin decidé kan ek kot-sa zot ti pou allé, ek dan enn vision zot ti gagne l’ordre pou al en Europe.—Lire Actes 16:6-10.

Jésus guide so congregation

12, 13. Couma livre Révélation montré ki Christ veille bien tou seki pé passé dan chaque congregation?

¹² Dan premier siecle nou lepok, Jésus ti veille bien tou seki ti pé passé dan congregation bann chretien oint. Li ti konn bien condition spirituel chaque congregation. Nou trouve sa bien kan nou lire Révélation chapitre 2 ek 3. Li ti cite nom sept congregation ki ti trouve dan l’ouest l’Asie. (Rév. 1:11) Nou ena tou bann raison pou croire ki li ti konn bien aussi condition spirituel bann lezot congregation ki ti ena lor la terre dan sa lepok-la.—Lire Révélation 2:23.

¹³ Jésus ti felicite certain congregation pou zot l’endurance, zot fidelité dan bann l’epreuve, zot l’attachement envers so parole, ek aussi parski zot ti rejette bann ki ti vinn bann apostat. (Rév. 2:2, 9, 13, 19; 3:8) De lot coté, li ti donne bann conseil bien ferme plusieurs congregation parski zot l’amour pou li ti’nn refroidi, en plus zot ti pé tolere l’idolatrie, fornication ek bann secte. (Rév. 2:4, 14, 15, 20; 3:15, 16) En tant ki enn surveillant spirituel ki ena beaucoup l’amour, mem ar bann ki li ti donne sa bann conseil bien severe-la, Jésus ti dire: “Tou bann pou ki mo ena l’affection, mo corrige zot ek mo discipline zot. Alors, ena zele ek repenti.” (Rév. 3:19) Mem si li ti dan le ciel, Jésus ti pé dirige bann congregation lor la terre par moyen l’esprit saint. A la fin so bann message pou bann congregation, li ti dire: “Ki sa kikenn ki ena zoreille-la tann seki l’esprit pé dire bann congregation.”—Rév. 3:22.

14-16. (a) Couma eski Jésus finn montré ki li enn Guide ki ena courage, pou peuple Jéhovah lor la terre? (b) Ki resultat sa finn ena parski Jésus finn “avek” so bann disciple “toulé-jour ziska la fin sa systeme-la”? (c) Ki nou pou examiné dan prochain lartik?

¹⁴ Nou finn trouvé ki archange Mikaël, Jésus, finn prouvé ki li enn Guide bien puissant ki ti guide Israël. Plitar, Jésus finn montré ki li ti enn Guide ki ti ena courage ek enn Berger rempli ar l’amour envers so bann premier disciple. Pendant so ministere lor la terre, li ti prend la tête dan l’activité predication, ek apré so resurrection, li ti veille bien ki la bonne nouvelle preché partout.

¹⁵ Grace a l’esprit saint, Jésus ti pou faire en sorte ki l’activité predication faire partout lor la terre. Avant ki li ti monte dan le ciel, Jésus ti dire so bann disciple: “Zot pou gagne pouvoir kan l’esprit saint pou vinn lor zot, ek zot pou vinn mo bann temoin dan Jérusalem, partout dan Judée ek Samarie, ek ziska dan region pli loin lor la terre.” (Actes 1:8; lire 1 Pierre 1:12.) Enba direction Christ, so bann disciple ti rann enn grand temoignage dan premier siecle.—Col. 1:23.

¹⁶ Mais Jésus li-mem ti dire ki sa travail-la ti pou contigné ziska lepok la fin. Apré ki li ti donne so bann disciple l’ordre pou preché ek faire bann disciple parmi tou bann nation, Jésus ti faire zot sa promesse-la: “Mo avek zot toulé-jour ziska la fin sa systeme-la.” (Mat. 28:19, 20) Depuis ki li’nn vinn le roi en 1914, Christ encore plus “avek” so bann disciple ek li pé dirige zot en tant ki zot Guide. Dan prochain lartik nou pou examine grand travail ki li’nn faire depuis 1914.

[Note]

Revision

• Couma eski Garson Bondié ti montré ki li ti enn Guide actif en Israël?

• Par ki moyen Christ dirige so congregation lor la terre?

• Couma eski Christ ti faire en sorte ki predication faire partout lor la terre?

• Ki montré ki Christ veille bien lor condition spirituel chaque congregation?

[Zimage page 24]

“Mo pé envoye enn ange devant toi”

[Zimage page 26]

Pareil couma dan le passé, Christ servi “bann zom couma bann don” pou dirige so troupeau