Couma trouve bonheur familiale
Koz ar ou bann zenfant lor sexe
Alicia,a enn adolescent, dire: “Parfois mo zis envie konn kitsoz lor sexe, mais mo pensé ki si mo pose bann question mo parent, zot pou pensé ki mo pé faire enn mauvais kitsoz.”
Inez, mama Alicia, dire: “Mo ti pou bien content assize ar mo tifi pou koz lor sexe avek li, mais li tellement occupé avek so prop la vie. Li difficile pou trouve le temps pou koz ar li kan li libre.”
ZORDI, partout ena bann zimage ek bann renseignement lor sexe—dan television, dan bann film, ek dan bann publicité. Li parette ki sel place kot sa sujet-la encore delicat pou kozé c’est dan bann conversation entre parent ek zenfant. Michael, enn adolescent ki reste Canada, dire: “Mo ti pou content ki bann parent koné ki quantité nou stressé ek nou embarrassé pou koz lor sexe avek zot. Li pli facile pou koz sa avek enn camarade.”
Souvent, pareil couma zot bann zenfant, bann parent hesité pou commence enn conversation lor sexe. Dan so livre Au-delà de la grande discussion (en anglais), Debra W. Haffner, enn professeur dan domaine la santé, dire: “Beaucoup parent ti dire moi ki zot ti acheté enn livre lor sexe ou-soit lor croissance pou zot zenfant ki pankor vinn adolescent, zot ti laisse livre-la dan la chambre zot zenfant, ek jamais zot ti koz lor la encore.” Madame Haffner dire ki sa message ki zot laisse zot zenfant-la li clair: “Nou envie ki zot konn zot lekor ek [zot gagne enn connaissance] lor sexualité; c’est zis ki nou pa envie koz sa avek zot.”
Si ou enn parent, ou bizin ena enn lot l’attitude. Oui, li bien important ki personnellement ou koz avek ou bann zenfant lor sexe. Examine trois raison kifer:
1. Fason ki bann dimoune considere sexe finn changé. James, enn jeune ki ena 20 an, dire: “Bann dimoune nepli considere sexe zis couma bann relation sexuel entre enn mari ek so femme. Asterla, ena sexe oral, sodomie, sexe par Internet, ek mem bann ‘sextos,’ setadir envoye bann message ek bann zimage lor portable, ki ena enn rapport avek sexe.”
2. Ou bann zenfant surement pou tann bann fausse renseignement depuis zot bien jeune. Enn mama ki appel Sheila, dire: “Zot pou tann koz lor sexe couma zot rente lekol ek zot pa pou gagne fason pensée ki ou ti pou envie zot gagné.”
3. Ou bann zenfant ena bann question lor sexe mais zot hesité pou commence enn conversation avek ou. Ana, ki ena 15 an ek ki reste Brésil, dire: “Pou dire franc, mo vrai-mem pa koné couma pou commence enn conversation lor sexe avek mo bann parent.”
Oui, koz lor sexe avek ou bann zenfant forme partie dan responsabilité ki Bondié inn donne ou en tant ki parent. (Éphésiens 6:4) Li vrai, kitfois sa kapav embarrassant pou ou ek pou ou bann zenfant toulé-deux. Mais seki positif ladan, c’est ki beaucoup jeune d’accord avek Danielle ki ena 14 an, ki dire: “Nou envie aprann lor sexe avek nou bann parent, pa avek enn professeur ou-soit par enn programme television.” Alors, mem si nou reconette ki c’est enn sujet embarrassant, couma ou kapav koz avek ou bann zenfant lor sa sujet important-la?b
Dapré zot l’age
A moins ki zot isolé net, bann zenfant commence tann koz lor sexe depuis zot bien jeune. Seki faire plus tracassé, c’est ki dan “bann dernier jour” kot nou pé vive, bann mauvais dimoune finn vinn “pli pire.” (2 Timothée 3:1, 13) Malheureusement, bann adulte pé exploite beaucoup zenfant lor plan sexuel.
Alors, li important ki ou commence enseigne ou bann zenfant kan zot encore assez jeune. Renate, enn mama ki reste l’Allemagne, dire: “Si ou attann kan zot pré pou vinn adolescent, kitfois zot pa pou oulé koz sa franc avek ou a cause bann blocage ki ena kan zot faire croissance.” Solution-la c’est donne ou bann zenfant bann renseignement ki adapté ar zot l’age.
Pou bann zenfant ki pankor al lekol: Enseigne zot zenfant vrai nom bann organe sexuel ek faire zot bien comprend ki fodé pa ki personne touche sa. Julia, enn mama ki reste Mexique, dire: “Mo ti commence enseigne mo garson kan li ti ena trois an. Mo ti koné ki bann professeur, bann baby-sitter, ou-soit bann pli grand zenfant kitfois ti kapav faire li di-mal. Zis sa pensée-la ti tracasse moi beaucoup. Li ti bizin koné couma pou protege li-mem kont bann dimoune ki li pa koné.”
ESSAYE SA: Forme ou zenfant pou reagir dan enn fason ferme si n’importe kisannla essaye joué avek so bann organe sexuel. Par exemple, ou kapav enseigne ou zenfant pou dire: “Arreté! Mo pou rapporte toi!” Rassure ou zenfant ki li toujours bon ki li raconte seki’nn arrivé—mem si dimoune-la promette pou donne li bann cadeau ou-soit menace li.c
Pou bann zenfant ki al lekol primaire: Servi sa bann l’année-la couma enn l’occasion pou augmente tigit par tigit connaissance ou zenfant. Enn papa ki appel Peter donne sa conseil-la: “Testé terrain avant ou gagne enn conversation avek ou [zenfant]. Guetté ki zot deja koné ek si zot envie konn plus. Pa force zot pou kozé. Kitfois ou pou kapav koz lor sa sujet-la sans okenn probleme si regulierement ou passe le temps avek ou bann zenfant.”
ESSAYE SA: Gagne bann ti conversation souvent avek zot, au lieu ki enn sel longue conversation lor tou seki ou pensé zot bizin koné. (Deutéronome 6:6-9) Coumsa ou pa pou touffe ou bann zenfant. En plus, a mesure ki zot grandi, zot pou gagne bann renseignement ki zot bizin dapré seki zot kapav comprend.
Pou bann adolescent: Asterla c’est ler pou faire sur ki ou zenfant ena assez connaissance lor plan physik, affectif ek moral en rapport avek sexe. Ana, ki ena 15 an ek ki nou ti mentionné avant, dire: “Bann garson ek bann tifi dan mo lekol pé deja gagne bann relation sexuel sans ki zot ena okenn l’attachement sentimental ou-soit enn l’engagement avek zot partenaire. Mo pensé ki en tant ki enn chretien, mo bizin gagne assez connaissance lor sa sujet-la. Mem si li bien embarrassant pou koz lor sexe, c’est enn kitsoz ki mo bizin koné.”d
Attention: Bann adolescent kapav hesité pou pose question parski zot peur pangar zot parent croire ki zot ena enn mauvais conduite. C’est seki enn papa ki appel Steven ti remarké. Li dire: “Nou garson ti hesité pou koz lor sexe. Mais apré nou finn decouvert ki li ti pensé ki nou ti ena bann doute lor so conduite. Nou ti faire li bien comprend ki nou pa ti pé koz lor sa bann sujet-la parski nou ti ena bann doute lor li; nou ti zis envie faire sur ki li ti bien equipé pou faire face ar bann mauvais l’influence ki ena autour li.”
ESSAYE SA: Au lieu ki ou pose ou zenfant adolescent bann question direct lor enn sujet precis concernant sexe, demann li ki so bann camarade lekol pensé lor sa sujet-la. Par exemple, ou kapav dire: “Beaucoup dimoune zordi pensé ki sexe oral c’est pa vrai-mem gagne bann relation sexuel. Eski to bann camarade lekol aussi pense coumsa?” Bann question indirect coumsa kitfois pou plus encourage ou adolescent pou senti-li pli a l’aise pou koz lor sa sujet-la, ek pou dire seki li, li pensé.
Si ou embarrassé—ou kapav surmonte sa
Li vrai ki koz ar ou bann zenfant lor sexe, c’est enn parmi bann responsabilité ki kitfois pli embarrassant ki bann parent ena. Mais li vaut la peine faire sa zeffort-la. Enn mama ki appel Diane dire: “Avek le temps, li pou moins embarrassant pou gagne sa qualité conversation-la, ek koz avek ou bann zenfant lor sexe kapav mem vinn enn l’occasion pou renforci zot relation.” Steven, ki nou ti cité avant, d’accord avek sa, li dire: “Li vinn pli facile pou koz lor bann sujet embarrassant couma sexe si ou faire sa vinn enn l’habitude pou koz franc lor n’importe ki kitsoz ki arrivé dan la famille.” Li ajouté: “Sa sentiment embarrassant-la jamais pa disparette net, mais enn communication franc li bien important pou la santé [spirituel] enn famille chretien.”
[Notes]
a Nou finn change bann nom dan sa lartik-la.
b Sa lartik-la pou montré l’importance pou koz ar ou bann zenfant lor sexe. Enn lot lartik ki pou sorti dan sa serie-la pou examiné couma ou kapav enseigne bann valeur moral pendant sa bann conversation-la.
c Dapré livre Écoute le grand Enseignant, page 171, publié par bann Témoins de Jéhovah.
d Servi chapitre 1-5, 28, 29, ek 33 dan livre Les jeunes s’interrogent — Réponses pratiques, volume 2, publié par bann Témoins de Jéhovah, pou gagne bann conversation avek ou zenfant adolescent lor sexe.
[L’encadré page 14]
DEMANN OU-MEM . . .
Lire bann commentaire ki ena enba, ki nou finn gagné ar bann jeune a travers le monde, ek demann ou-mem sa bann question-la.
• “Mo bann parent dire moi lire bann lartik ki koz lor sexe ek vinn guette zot si mo ena kit question. Mais mo ti pou content ki zot koz ar moi plus lor la.”—Ana, Brésil.
Kifer, ou pensé, ki li important ki ou pa zis donne ou zenfant bann lartik ek bann livre ki kapav enseigne zot bann kitsoz lor sexe?
• “Mo konn tellement beaucoup mauvais pratik sexuel ki bann dimoune faire—mo pensé ki mo papa pa konn nanyin lor sa bann pratik-la. Li ti pou soké si mo ti pose-li question lor la.”—Ken, Canada.
Si ou zenfant ena pou koz ar ou lor seki tracasse-li, ki la crainte li kapav ena?
• “Kan finalement mo ti ena courage pou pose mo bann parent enn question lor sexe, zot ti reponn moi coumadir zot ti pé accuse moi. Zot ti demann moi: ‘Kifer to pé demann sa? Eski’nn arrive enn kitsoz?’”—Masami, Japon.
Kan ou zenfant demann ou enn question lor sexe, couma fason ki ou reagir kapav soit ouvert enn la porte pou zot gagne plus conversation, soit ferme la porte-la?
• “Sa ti pou aide moi si mo bann parent ti rassure-moi ki zot aussi zot ti pose sa bann mem question-la kan zot ti ena mem l’age ki moi, ek ki li normal ki mo pose sa bann question-la moi aussi.”—Lisette, France.
Couma ou kapav mette ou zenfant a l’aise pou ki sa pli facile pou li pou koz lor sexe avek ou?
• “Mo mama ti pose-moi bann question lor sexe, mais ton so la voix ti agreable. Mo pensé ki sa li important pou ki enn zenfant pena sentiment ki pé juge li.”—Gérald, France.
Couma ton ou la voix été kan ou koz ar ou zenfant lor sexe? Eski ou bizin faire kit changement?