Couma trouve bonheur familial

Loida,a enn mama ki reste dan Mexique, dire: “Dan lekol distribué bann preservatif, alors bann adolescent pensé ki pena nanyin de mal pou gagne bann relation sexuel​—tant ki zot gagne bann relation ki ‘protegé.’”

Nobuko, enn mama ki reste dan Japon, dire: “Mo ti demann mo garson ki li ti pou faire si li ek so ti copine ti tousel. Li ti reponn moi: ‘Mo pa koné.’”

KAN ou garson ou-soit ou tifi ti encore tipti, eski ou ti faire ou lakaz vinn enn place kot ou zenfant ti pou en securité? Kitfois, ou ti isole bann prise courant, cachiette bann objet ki ti kapav coupe li, ek barre bann l’escalier. Ou ti faire tou sa bann zeffort-la pou protege ou zenfant.

Si selman li ti toujours aussi facile pou garde ou adolescent en securité! Asterla ou ena bann pli gros tracas, couma par exemple: ‘Eski mo garson pé gagne accès ar pornographie?’ ‘Eski mo tifi pé envoye bann “sexto”​—bann photo indecent lor li-mem a travers telephone portable?’ Ek ena sa question ki faire peur-la: ‘Eski mo zenfant ki adolescent pé gagne bann relation sexuel?’

Veille ou zenfant touletan, sa li pa marché

Certain parent essaye surveille zot adolescent 24 heure lor 24. Zot reste touletan pré ar zot zenfant ek veille chaque mouvement ki zot faire. Plitar, beaucoup parmi sa bann parent-la decouvert ki kan zot veille zot zenfant dan sa fason-la, sa pousse zot adolescent pou cachiette seki li pé faire. Zot zenfant vinn bann expert dan cachiette bann conduite ki zot parent pa ti envie ki zot ena.

Li clair ki kan ou veille chaque mouvement ki ou zenfant faire, sa li pa enn bon solution. Bondié, Jéhovah, Li-mem Li pa servi sa methode-la pou gagne l’obeissance so bann creature, alors fodé pa ki ou en tant ki enn parent ou faire sa. (Deutéronome 30:19) Alors, couma eski ou kapav aide ou adolescent pou prend bann bon decision lor plan moral?​—Proverbes 27:11.

Enn premier kitsoz ki ou bizin faire c’est pou touletan ena bann conversation avek ou bann zenfant ek pou commence faire sa kan zot encore tipti.b (Proverbes 22:6) Apré, kan zot arrive dan l’adolescence, contigne ena bann conversation avek zot. En tant ki parent, c’est avek ou en premier ki ou bann adolescent bizin gagne bann l’information ki sur. Alicia, enn tifi ki ena 17 an ek ki reste en Angleterre, dire: “Beaucoup dimoune pensé ki nou prefere koz lor sexualité avek nou bann camarade, mais sa li pa vrai. Nou apprecié kan c’est nou bann parent ki donne nou sa l’information-la. Nou ena confiance dan seki zot ena pou dire nou.”

L’importance pou ena bann bon principe

A mesure ki bann zenfant grandi, zot bizin konn plus lor la sexualité, pa zis koné couma enn zenfant formé dan ventre ek vinn lor la terre. Zot bizin ena aussi “bann capacité mental ki finn entrainé pou faire difference entre seki bon ek seki mauvais.” (Hébreux 5:14) En deux-trois mot, zot bizin bann principe moral bien etabli concernant bann conduite sexuel ki acceptable ek zot bizin vive en accord avek sa bann principe-la. Couma ou kapav grave bann bon principe dan leker ou bann adolescent?

Commence par guette ou bann prop principe moral. Par exemple, kitfois ou pena okenn doute ki fornication​—relation sexuel entre deux dimoune ki pa marié​—li enn kitsoz ki pa bon. (1 Thessaloniciens 4:3) Kitfois ou bann zenfant konn ou l’opinion lor sa sujet-la; kitfois zot mem kapav cite bann verset la Bible ki soutenir ou bann croyance. Kan pose zot bann question, kitfois zot pa pou hesité pou dire ki bann relation sexuel avant mariage li enn kitsoz ki pa bon.

Mais sa li pa assez. Livre La sexualité intelligente (en anglais), expliké ki certain jeune faire semblant ki zot d’accord avek seki zot parent pensé lor sexualité. Sa livre-la dire: “Zot trop mank l’assurance pou ena zot prop l’opinion. Kan zot faire face ar enn situation ki zot pa attann ek kot zot bizin decidé vite-vite ‘si enn conduite li acceptable ou-soit non,’ zot nepli koné ki pou faire ek zot retrouve-zot dan bann grand probleme.” Ala kifer bann principe moral zot bien important. Couma ou kapav aide ou adolescent pou ena sa bann principe-la?

Faire konn ou bann principe. Eski ou croire ki zis bann dimoune marié ki ena droit gagne bann relation sexuel? Alors, souvent dire sa ou adolescent dan enn fason clair. Dapré livre Au-delà de la grande discussion (en anglais), bann recherche inn montré ki “dan bann famille kot bann parent finn explik zot bann adolescent dan enn fason clair ki zot pa content kan bann adolescent ena bann relation sexuel, sa bann adolescent-la ena tendance pou attann pli longtemps avant ki zot gagne zot premier relation sexuel.”

Bien sur, pareil couma nou ti dire avant, si ou zis faire konn ou bann principe, sa pa pou enn garantie ki ou garson ou-soit ou tifi pou choisir pou suive sa. Selman, si ou famille ena bann bon principe, sa pou enn base kot ou bann zenfant pou kapav construire zot prop principe lor la. Ek bann l’etude inn montré ki beaucoup jeune inn finalement adopté bann principe zot parent, mem si li parette ki pendant zot l’adolescence zot pa ti pé suive sa bann principe-la.

ESSAYE SA: Servi enn nouvelle ki ou’nn tendé dan l’information pou commence enn conversation ek pou dire ou bann principe. Par exemple, si pé koz lor enn viol, ou kapav dire: “Mo soké par fason ki certain zom abuse bann madame. Kot to pensé zot gagne sa bann l’idée-la?”

Enseigne tou la verité lor sexualité. Li necessaire ki donne bann l’avertissement. (1 Corinthiens 6:18; Jacques 1:14, 15) Mais selman, la Bible koz lor sexe avant tou couma enn cadeau ki Bondié inn donné, pa couma enn piege ki Satan servi. (Proverbes 5:18, 19; Chant de Salomon 1:2) Si ou koz avek ou bann adolescent zis lor bann danger ki bann relation sexuel kapav amené, sa kapav faire zot ena enn mauvais l’opinion ki pa en accord avek la Bible lor sa sujet-la. Enn jeune femme, ki reste la France ek ki appel Corinne, dire: “Mo bann parent ti mette beaucoup l’accent lor l’immoralité sexuel ek sa ti faire moi gagne enn mauvais l’opinion lor bann relation sexuel.”

Faire sur ki ou bann zenfant konn tou la verité lor sexualité. Enn mama ki reste dan Mexique ek ki appel Nadia, dire: “Mo finn touletan essaye faire mo bann zenfant comprend ki gagne relation sexuel c’est enn kitsoz ki agreable ek ki normal. Jéhovah inn donne bann dimoune sa [cadeau-la] pou ki zot profité. Mais so place c’est zis dan mariage. Li kapav faire nou gagne la joie ou-soit faire nou souffert, mais sa depann couma nou servi li.”

ESSAYE SA: Prochaine fois ki ou koz lor sexualité avek ou bann adolescent, fini ou conversation lor enn point positif. Pa hesité pou decrire sa couma enn cadeau extraordinaire ki Bondié inn donné ek ki li pou kapav profité dan l’avenir si li marié. Faire ou adolescent gagne confiance ki li pou kapav applik bann principe Bondié ziska ki sa moment-la vini.

Aide ou adolescent pou reflechi lor bann consequence. Pou prend bann bon decision dan la vie, bann adolescent bizin koné couma pou identifié bann choix ki zot ena ek lerla compare bann l’avantage ek bann desavantage chaque choix. Pa pensé ki li assez ki zot zis konn seki bon ek seki mauvais. Emma, enn chretienne ki reste l’Australie, dire: “Kan mo pense lor bann erreur ki mo’nn faire dan mo jeunesse, mo kapav dire ki, konn bann principe Bondié pa vedir ki ou accepté sa bann principe-la. Li bien important ki ou konn bann bienfait ki ou pou gagné si ou suive sa bann principe-la​—ek zot bann consequence si ou desobeir zot.”

La Bible kapav aide ou, parski souvent kan li mentionne bann commandement, li servi bann phrase ki explik nou ki bann consequence nou pou gagné si nou faire bann mauvais kitsoz. Par exemple, Proverbes 5:8, 9 encourage bann jeune homme pou reste loin ar fornication “pangar [zot] donne lezot [zot] dignité.” Pareil couma sa bann verset-la montré, kan enn jeune gagne relation sexuel avant mariage, sa affecté so principe moral, empeche li vinn complet dan so service pou Bondié, ek faire li perdi respé pou li-mem. En plus, sa faire li parette moins attirant pou enn kikenn ki ena sa bann qualité-la ek ki ti pou envie marié avek li. Kan ou adolescent reflechi lor bann danger physik, emotionnel, ek spirituel ki li kapav gagné kan li desobeir la loi Bondié, sa kapav encourage li pou applik sa bann principe moral-la.c

ESSAYE SA: Servi bann l’exemple pou aide ou adolescent pou trouve sagesse ki ena dan bann principe Bondié. Par exemple, ou kapav dire: “Enn difé pou cuit mangé, li enn bon kitsoz, mais enn difé dan la foret, li pa bon. Ki difference ena entre sa deux-la, ek couma to kapav applik to reponse ar bann limite ki Bondié inn fixé concernant sexualité?” Servi recit ki trouve dan Proverbes 5:3-14 pou aide ou adolescent pou comprend bann mauvais consequence ki li kapav gagné si li commette fornication.

Takao, enn japonais ki ena 18 an, dire: “Mo koné ki mo bizin faire seki droite, mais touletan mo pé bizin lutte kont bann desir la chair.” Bann jeune ki ena sa sentiment-la kapav rassure-zot ar enn realité: zot pa tousel dan sa situation-la. Mem l’apotre Paul​—enn chretien fidele​—ti reconette: “Kan mo envie faire seki bon, c’est plutot seki mauvais ki mo faire.”​—Romains 7:21.

Li bon ki bann adolescent koné ki enn la lutte coumsa li pa toujours mauvais. Sa kapav pousse zot pou decidé ki qualité dimoune zot envie vini. Sa kapav aide zot pou medite lor sa question-la: ‘Eski mo envie prend mo responsabilité ek vinn enn kikenn ki ena bann bon principe moral ek complet dan mo service pou Bondié? Ou-soit, eski mo envie gagne reputation enn kikenn ki nek suive la foule​—enn dimoune ki par faiblesse cedé devant so bann desir?’ Si ou zenfant ena bann bon principe moral sa pou aide li pou reponn sa bann question-la avek sagesse.

[Notes]

DEMANN-OU-MEM . . .

▪ Ki kitsoz ki montré moi ki mo zenfant ena bann bon principe moral?

▪ Kan mo koz sexe avek mo zenfant, eski avant tou mo koz lor la couma enn cadeau ki Bondié inn donné ou-soit couma enn piege ki Satan servi?

[L’encadré page 21]

La Bible finn faire so preuve toute longue bann siecle ek mem zordi

“Bann instruction biblik en rapport avek conduite sexuel finn faire zot preuve toute longue bann siecle. Azordi, pli allé bann jeune pé recolté bann consequence bien grave lor plan emotionnel parski zot gagne bann relation sexuel trop boner. Ki sa bann consequence-la sa? C’est bann grossesse en dehors mariage, sida ek lezot maladie ki transmette par relation sexuel. Alors, conseil ki la Bible donné pou gagne relation zis dan mariage . . . li bien approprié, li sel relation sexuel ki ‘protegé,’ ek ki efficace.”​—Élever des adolescents avec amour et logique (en anglais).