Jeune—Ki ou pou faire ar ou la vie?

“Fason ki mo pé dirige mo bann coup, li pa dan enn fason kot mo pé batte l’air.”—1 COR. 9:26.

1, 2. Pou ki ou kapav reussi ou la vie a mesure ki ou pé grandi pou vinn enn adulte, ki ou bizin ena?

FAIRE coumadir ou enn voyageur ek ou pé al dan enn l’endroit ki ou pa koné. Surement ou ti pou content prend avek ou enn map ek enn boussole, pa vrai? Map-la pou aide ou pou koné ki coté ou été ek pou faire enn plan pou koné ki chemin ou bizin prend. Boussole-la pou aide ou pou reste dan bon chemin. Selman, ni map-la ni boussole-la pa pou servi nanyin si ou pa koné kot ou pé allé. Pou ki ou evite tourne en rond, ou pou bizin koné exactement kot sa ou pé allé.

² Ou dan mem situation a mesure ki ou pé grandi pou vinn enn adulte. Ou ena toulé-deux, enn map ek enn boussole lor ki ou kapav compté. La Bible pareil couma enn map ki kapav aide ou pou koné ki chemin pou choisir. (Prov. 3:5, 6) Si ou conscience inn formé couma bizin, li kapav enn grand l’aide pou ki ou reste dan bon chemin. (Rom. 2:15) Ou kapav servi li couma enn boussole. Mais, pou ou reussi ou la vie, ou bizin koné aussi kot sa ou pé allé exactement. Ou bizin ena bann l’objectif bien precis.

3. Dapré seki Paul dire dan 1 Corinthiens 9:26, ki bann bienfait nou gagné kan nou ena bann l’objectif ?

³ L’apotre Paul ti faire enn resumé lor bann bienfait ki nou gagné pou fixé bann l’objectif ek pou faire zeffort pou realise zot. Li ti ecrire: “Fason ki mo pé galopé, mo pa pé galopé sans koné kot mo pé allé; fason ki mo pé dirige mo bann coup, li pa dan enn fason kot mo pé batte l’air.” (1 Cor. 9:26) Si ou ena bann l’objectif, ou pou galope avek l’assurance. Bientot, ou pou ena bann decision important pou prend, par exemple en rapport avek ou l’adoration, travail, mariage ek la famille. Parfois, ou kapav ena l’impression ki ou pé faire face ar bann choix compliké. Mais si ou koné ki chemin ou pou prend a l’avance parski ou base ou bann decision lor bann verité ek bann principe ki trouve dan Parole Bondié, ou pa pou tenté pou prend enn mauvais chemin.—2 Tim. 4:4, 5.

4, 5. (a) Ki kapav arrivé si ou pa fixé bann l’objectif pou ou-mem? (b) Kifer bann choix ki ou faire dan ou la vie bizin influencé par ou desir pou faire Bondié plaisir?

⁴ Si ou pa fixé bann l’objectif pou ou-mem, ou bann camarade ek ou bann professeur pou surement influence ou pou faire seki zot pensé bon pou ou. Bien sur, mem si ou ena bann l’objectif precis kitfois certain pou kan-mem donne ou zot l’opinion. Kan ou ecoute zot suggestion, pose ou-mem sa bann question-la: ‘Eski sa bann l’objectif ki zot pé mentionné-la pou aide moi pou rappel mo Createur pendant ki mo jeune, ou-soit eski zot pou empeche moi faire sa?’—Lire Ecclésiaste 12:1.

⁵ Kifer bann choix ki ou faire dan ou la vie bizin influencé par ou desir pou faire Bondié plaisir? Enn raison c’est parski Jéhovah finn donne nou, tou bann bon kitsoz ki nou ena. (Jacq. 1:17) En realité, tou dimoune bizin ena reconnaissance pou Jéhovah. (Rév. 4:11) Pense Jéhovah kan ou fixé bann l’objectif, pena enn pli bon fason ki sa pou montré ou reconnaissance, pa vrai? Anou examine bann l’objectif ki vaut la peine ou realisé ek seki ou bizin faire pou realise zot.

Ki bann l’objectif ou kapav fixé?

6. Ki l’objectif bien important ou kapav fixé, ek kifer?

⁶ Pareil couma lartik avant ti mentionné, enn l’objectif bien important ki ou kapav fixé c’est verifié par ou-mem ki seki la Bible dire li vrai. (Rom. 12:2; 2 Cor. 13:5) Kitfois ou bann camarade croire dan l’evolution ou-soit dan l’enseignement bann fausse religion parski finn dire zot ki c’est sa ki zot bizin croire. Mais ou, ou pa bizin croire dan enn kitsoz zis parski lezot envie ki ou croire sa. Rappel ki Jéhovah envie ki ou servi Li avek tou ou l’esprit. (Lire Matthieu 22:36, 37.) Nou Papa ki dan le ciel envie ki ou base ou la foi lor bann verité ki trouve dan la Bible.—Héb. 11:1.

7, 8. (a) Pou aide ou pou fortifié ou la foi, ki bann ti l’objectif ou kapav fixé? (b) Ki ou pou gagné a mesure ki ou realise certain parmi bann ti l’objectif ki ou finn fixé?

⁷ Pou aide ou pou fortifié ou la foi, kifer ou pa fixé bann ti l’objectif ki ou kapav realisé dan enn tigit le temps? Kitfois enn l’objectif c’est faire la priere toulé-jour. Pou aide ou garde ou bann la priere precis ek pa repete touletan mem kitsoz, ou kapav rappel ou-soit ecrire bann l’evenement precis ki finn arrivé dan la journée ki ou envie mentionné dan ou la priere. Faire sur ki ou pa mentionne zis bann difficulté ki ou finn gagné, mais aussi bann kitsoz ki ou finn apprecié. (Phil. 4:6) Enn lot l’objectif c’est lire la Bible toulé-jour. Eski ou koné ki si ou lire apepré quatre page par jour, ou pou lire la Bible net dan enn an?a Psaume 1:1, 2 dire: “Heureux sa kikenn . . . [ki] so plaisir [trouve] dan la loi Jéhovah, ek dan so la loi, li lire doucement la-nuit li-jour.”

⁸ Enn troisieme ti l’objectif ki ou kapav fixé c’est prepare enn reponse pou chaque reunion. Kitfois, au commencement, ou pou envie lire reponse-la ou-soit enn verset la Bible. Plitar, ou kapav fixé l’objectif pou reponn dan ou prop mot. En realité, chaque fois ki ou reponn, ou pé offert Jéhovah enn don. (Héb. 13:15) Enn fois ki ou finn realise certain parmi sa bann l’objectif-la, ou pou ena plus l’assurance ek reconnaissance pou Jéhovah. Lerla, ou pou pré pou fixé bann pli grand l’objectif ki ou pou kapav realisé lor enn pli longue periode le temps.

9. Si ou pankor vinn enn proclamateur, ki bann pli grand l’objectif ou kapav fixé pou ou-mem?

⁹ Ki bann pli grand l’objectif ou kapav fixé pou ou-mem? Si ou pankor commence preche la bonne nouvelle en publik, kitfois ou l’objectif c’est pou vinn enn proclamateur. Enn fois ki ou finn reussi realise sa bon l’objectif-la, ou pou envie participe regulierement dan predication ek faire sa dan enn fason efficace, sans ki ou laisse enn mois passé sans preché. Ou pou envie aussi aprann servi la Bible dan ou ministere. A mesure ki ou faire sa, ou pou surement remarké ki ou pou plus content predication. Lerla, ou pou kapav augmente le temps ki ou passé dan predication porte en porte ou-soit mem faire zeffort pou conduire enn l’etude la Bible. En tant ki enn proclamateur non-baptisé, ki pli bon l’objectif ou kapav ena, ki rempli bann condition pou prend bapteme ek vinn enn Témoin de Jéhovah ki voué ek baptisé?

10, 11. Ki bann grand l’objectif bann jeune ki baptisé kapav fixé pou zot-mem?

¹⁰ Anou guette certain grand l’objectif ki ou kapav realisé si ou finn fini prend bapteme. Kitfois, de temps en temps, ou pou envie aide bann congregation pou preche dan bann territoire kot pa souvent preché. Ou kapav aussi decidé pou servi ou la force ek profité ki ou ena enn bon la santé pou faire pionnier auxiliaire ou-soit permanent. Plusieurs dizaine millier pionnier ki heureux pou dire ou ki service a plein temps c’est enn bon fason pou rappel ou Createur pendant ou jeunesse. Sa c’est bann l’objectif ki ou kapav realisé pendant ki ou pé reste kot ou bann parent. Ou congregation aussi pou gagne bann bienfait kan ou pou realise sa bann l’objectif-la.

¹¹ Lezot grand l’objectif kapav permette ou servi dan bann lezot congregation. Par exemple, ou kapav decidé pou servi dan enn lot l’endroit ou-soit dan enn lot pays kot bizin plus proclamateur. Kitfois ou pou envie aidé lor construction bann la salle du Royaume ou-soit bann batiment la societé dan lezot pays. Ou kapav mem gagne possibilité pou servi dan Béthel ou-soit pou vinn enn missionnaire. Avant ki ou kapav fixé la plupart parmi bann grand l’objectif ki finn mentionné ici, ena enn l’objectif bien important ki ou pou bizin realisé. Sa l’objectif-la c’est prend bapteme. Si ou pankor prend bapteme, reflechi lor bann kitsoz ki sa impliké pou realise sa l’objectif important-la dan ou la vie.

Realise l’objectif pou prend bapteme

12. (a) Cite bann raison kifer certain prend bapteme. (b) Kifer fodé pa nou arrete-nou zis lor sa bann raison-la?

¹² Dapré ou, kifer bizin prend bapteme? Certain kapav pensé ki sa pou protege zot, zot pa pou cedé kan zot pou tenté pou faire peché. Lezot kapav ena sentiment ki zot bizin prend bapteme parski zot bann camarade inn prend bapteme. Lezot jeune kitfois envie faire plaisir zot parent. Selman, bapteme pa pou empeche ou faire bann mauvais kitsoz ki ou envie faire en secret; fodé pa aussi ki ou prend bapteme parski enn dimoune pé mette pression lor ou pou faire sa. Ou kapav prend bapteme kan ou bien comprend seki sa impliké pou vinn enn Témoin de Jéhovah ek kan ou sur ki ou pré ek disposé pou prend sa responsabilité-la.—Eccl. 5:4, 5.

13. Ki bizin pousse ou pou prend bapteme?

¹³ Enn raison ki bizin pousse nou pou prend bapteme c’est parski Jésus ti donne l’ordre pou “faire bann disciple . . . , [pou] baptise zot.” Li ti aussi donne l’exemple kan li ti prend bapteme. (Lire Matthieu 28:19, 20; Marc 1:9.) En plus, bapteme c’est enn pas important pou bann ki envie gagne la vie sauve. Apré ki l’apotre Pierre ti koz lor l’arche ki Noé ti construire ek ki ti permette li ek so famille gagne la vie sauve pendant deluge, Pierre ti dire: “Seki corresponn avek sa, sauve zot aussi asterla, setadir bapteme, . . . grace a resurrection Jésus Christ.” (1 Pierre 3:20, 21) Sa pa vedir ki bapteme li couma en l’assurance ki couvert ou en cas arrive ou enn malheur. Au contraire, ou prend bapteme parski ou content Jéhovah ek ou envie servi Li avek tou ou leker, tou ou nâme, tou ou l’esprit ek tou ou la force.—Marc 12:29, 30.

14. Kifer li possible ki certain hesité pou prend bapteme, mais ki ou kapav sur?

¹⁴ Kitfois certain hesité pou prend bapteme parski zot peur pangar zot exclu plitar. Eski ou ena sa la peur-la? Si oui, sa la peur-la li pa necessairement mauvais en li-mem. Sa kapav montré ki ou comprend ki, vinn enn Témoin de Jéhovah, c’est enn responsabilité bien serieux. Eski kapav ena aussi enn lot raison? Kitfois, ou pankor sur ki vive en accord avek bann principe Bondié, c’est pli bon la vie ki kapav ena. Dan sa cas-la, si ou reflechi lor bann consequence ki bann dimoune gagné parski zot pa suive bann principe biblik, sa kapav aide ou pou prend enn decision. De lot coté, li possible ki ou content bann principe Bondié mais ou pena confiance en ou-mem ki ou pou kapav vive en accord avek sa bann principe-la. En realité, sa kapav enn bon signe, parski sa montré ki ou ena l’humilité. Apré tou, la Bible dire ki tou bann dimoune imparfait, zot leker traitre. (Jér. 17:9) Mais, ou kapav reussi si ou touletan ‘reste lor ou garde dapré parole Bondié.’ (Lire Psaume 119:9.) N’importe ki raison ki faire ou hesité pou prend bapteme, ou bizin reglé sa bann question-la.b

15, 16. Couma ou kapav koné si ou’nn paré pou prend bapteme?

¹⁵ Mais couma ou kapav koné si ou’nn paré pou prend bapteme? Enn moyen c’est demann ou-mem bann question coumsa: ‘Eski mo kapav explik lezot bann l’enseignement de base ki ena dan la Bible? Eski mo sorti dan predication mem dan bann jour ki mo bann parent pa sorti? Eski mo faire zeffort pou assisté tou bann reunion? Eski mo rappel bann moment precis kot mo finn resisté ar pression mo bann camarade? Eski mo pou contigne servi Jéhovah mem si mo bann parent ek mo bann camarade arrete faire sa? Eski mo finn dire Jéhovah dan la priere ki quantité mo relation avek Li bien important? Ek eski mo finn voué-moi sans okenn condition ar Jéhovah dan la priere?’

¹⁶ Bapteme c’est enn pas important ki change ou la vie ek c’est enn decision ki ou bizin prend avek serieux. Eski ou assez mur pou examine sa decision-la avek serieux? Enn dimoune mur c’est pa zis enn kikenn ki kapav faire bann bon discours lor l’estrade ou-soit ki donne bann joli commentaire dan reunion. Mais c’est enn dimoune ki bien comprend bann principe biblik ek ki prend bann decision ki basé lor la. (Lire Hébreux 5:14.) Si ou finn arrive enn point dan ou la vie kot ou kapav faire sa, alors, ena enn grand privilege ki pé attann ou—privilege pou servi Jéhovah avek tou ou leker ek vive dan enn fason ki montré ki ou finn vrai-mem voué-ou ar Li.

17. Ki pou aide ou pou faire face ar bann l’epreuve ki ou kapav gagné apré ou bapteme?

¹⁷ Desuite apré bapteme, ou kapav ena enn grand l’enthousiasme pou servi Bondié. Mais kitfois enn tipé apré ou bapteme ou pou faire face ar bann l’epreuve ki pou testé ou la foi ek ou l’endurance. (2 Tim. 3:12) Kan ou pé faire face ar sa bann l’epreuve-la, fodé pa ki ou senti-ou tousel. Rod conseil ar ou bann parent. Demann l’aide bann chretien mur dan congregation. Reste camarade avek bann ki pou soutenir ou. Jamais pa blié ki Jéhovah interessé ar ou, ek ki Li pou donne ou la force necessaire pou faire face ar n’importe ki situation ki kapav arrivé.—1 Pierre 5:6, 7.

Couma ou kapav realise ou bann l’objectif

18, 19. Ki bienfait ou kapav gagné kan ou examine ou bann priorité?

¹⁸ Malgré ou bann bon l’intention, eski li parette ki jamais ou ena assez le temps pou faire seki ou envie ek seki ou bizin faire? Si oui, ou bizin examine ou bann priorité. Anou guette enn l’exemple: prend en séau plastik ek mette bann gros roche ladan. Apré sa, rempli séau-la ar di-sable. Ou pou ena enn séau ki rempli ar roche ek di-sable. Devide séau-la mais garde so di-sable ek so bann roche. Asterla, ré-rempli séau-la, mais mette di-sable-la avant ek apré essaye mette bann roche-la ladan. Pena assez place pou bann roche, pa vrai? C’est parski ou finn mette di-sable-la avant.

¹⁹ Ou gagne mem difficulté kan ou organise ou le temps. Si ou mette bann kitsoz couma bann detente en premier, ou pou ena l’impression ki jamais ou ena assez le temps dan ou la vie pou bann kitsoz ki pli important—bann kitsoz spirituel. Mais si ou suive sa principe la Bible pou “verifié bien bann kitsoz ki pli important,” ou pou trouvé ki ou pou ena le temps pou servi Bondié ek pou inpé detente, toulé-deux.—Phil. 1:10.

20. Si ou peur ek ou ena bann doute a mesure ki ou faire zeffort pou realise ou bann l’objectif, ki ou bizin faire?

²⁰ A mesure ki ou faire zeffort pou realise ou bann l’objectif, parmi ena l’objectif pou prend bapteme, parfois li pou arrivé ki ou pou peur ek ou pou ena bann doute. Kan arrive sa, “jette [ou] fardeau lor Jéhovah Li-mem, ek Li-mem Li pou soutenir [ou].” (Ps. 55:22) Asterla, ou ena possibilité pou participe dan enn travail pli interessant ek pli important dan l’Histoire l’humanité, enn travail predication ek l’enseignement ki pé faire partout lor la terre. (Actes 1:8) Ou kapav choisir pou vinn enn spectateur ek guette lezot faire sa travail-la. Ou-soit, ou kapav participe ladan dan enn fason actif. Pa hesité pou servi ou bann capacité pou favorise l’interet Royaume Bondié. Jamais ou pou regretté ki ou finn servi ou “Createur pendant ki [ou] jeune.”—Eccl. 12:1, Parole de Vie.

[Notes]

Couma ou pou reponn?

• Kifer ou bizin fixé bann l’objectif?

• Ki certain l’objectif vaut la peine ou realisé?

• Ki sa impliké pou realise l’objectif pou prend bapteme?

• Couma, kan ou examine ou bann priorité, sa kapav aide ou pou realise ou bann l’objectif?

[Zimage page 23]

Eski ou ena enn l’objectif pou lire la Bible toulé-jour?

[Zimage page 24]

Ki leson ou aprann ar sa l’exemple-la?