Couma to kapav realise to bann l’objectif spirituel
1. Ki bann l’objectif spirituel beaucoup jeune chrétien ena?
1 En tant ki enn jeune chrétien, pena doute ki to l’amour pou Jéhovah ek conseil ki Jésus ti donné pou ‘rod le royaume avant tou kitsoz,’ influence bann l’objectif ki to fixé dan to la-vie. (Mat. 6:33) Kitfois to l’objectif c’est faire plus dan to ministere setadir faire service pionnier, ou-soit servi là kot bizin plus proclamateur. Certain kapav pense service construction international, Béthel, ou-soit service missionnaire. Sa c’est bann bon l’objectif ki donne vrai satisfaction!
2. Ki kapav aide toi pou realise to bann l’objectif spirituel?
2 Enn kitsoz ki kapav aide toi pou realise to bann l’objectif spirituel c’est faire enn la-liste to bann l’objectif. La Tour de Garde 15 juillet 2004 dire: “Bann l’idée ki enn tipé flou vinn pli clair kan ou exprime li par bann mot. Alors kitfois [to] pou envie ecrire [to] bann l’objectif lor enn papier ek seki [to] bizin faire pou [to] realise zot.” En plus, si to fixé bann lezot ti-l’objectif entre, sa pou permette toi guetté ki quantité to’nn progressé ek garde to lizié fixé lor bann grand l’objectif.
3. Cite bann l’objectif ki pou aide enn kikenn progressé ziska li prend bapteme.
3 Bann ti-l’objectif ki to kapav fixé avant: Si to pankor baptisé, reflechi ki to bizin faire pou to realise sa l’objectif-la. Kitfois to bizin ameliore to connaissance lor bann l’enseignement ki ena dan la Bible. Dan sa cas-la, fixé l’objectif pou etudié livre Ki la Bible enseigné? a fond ek verifié tou bann verset la Bible. (1 Tim. 4:15) Fixé aussi l’objectif pou lire la Bible en entier depuis Genèse ziska Révélation, pareil couma tou bann Béthélite ek bann ki al lekol Guiléad bizin faire. Apré sa, faire enn program pou lire la Bible toulé-jour ek suive sa program-la. (Ps. 1:2, 3) Mazinn ki quantité sa pou aide toi pou progressé lor plan spirituel! Chaque fois ki to lire ou-soit etudié la Bible, faire la priere avant ek apré, ek faire zeffort pou mette en pratik seki to aprann.—Jacq. 1:25.
4. Si enn chrétien ena l’objectif pou vinn Béthélite ou-soit faire service missionnaire, ki bann ti-l’objectif li kapav fixé avant?
4 Si to deja baptisé, ki lezot l’objectif to kapav fixé? Eski to bizin ameliore to fason preché? Par exemple, eski to kapav fixé l’objectif pou servi Parole Bondié dan enn fason pli efficace? (2 Tim. 2:15) Couma to kapav faire plus dan to ministere? Fixé bann ti-l’objectif specifik, ki adapté ar to l’age ek to situation. Sa pou aide toi pou realise to bann grand l’objectif.
5. Couma, grace a bann l’objectif ki li’nn fixé avant, enn frere finn kapav realise so grand l’objectif pou vinn Béthélite?
5 Li’nn realise so l’objectif: Tony ti ena 19 an kan li ti visite enn filiale bann Témoins de Jéhovah. Sa ti pousse li pou envie servi dan Béthel. Mais, li pa ti content ecouté, ek li pa ti encore mem baptisé. Tony ti’nn decide pou change so la-vie ek suive bann principe ki Jéhovah finn etabli. Li ti’nn fixé aussi l’objectif pou prend bapteme. Apré ki li’nn reussi realise sa l’objectif-la, li’nn fixé l’objectif pou faire pionnier auxiliaire ek apré, pionnier permanent, ek li ti mark lor so calendrier, date ki li ti envie realise sa bann l’objectif-la. Mazinn so la-joie kan, apré ki li’nn faire service pionnier pendant enn tipé lé-temps, li’nn gagne l’invitation pou vinn Béthel!
6. Ki kapav aide toi pou realise to bann l’objectif spirituel?
6 Toi aussi to kapav realise to bann l’objectif spirituel si to mette bann l’interet Royaume Bondié en premier. Oui, contigne koz lor ‘to bann projet’ ar Jéhovah dan la priere ek faire bann zeffort pou realise zot!—Prov. 16:3; 21:5.