Bann vision concernant le monde bann l’esprit

OBSERVE le ciel quantité le temps ki ou’lé, ou pa pou trouve okenn creature spirituel. Ecouté quantité ki ou’lé, ou pa pou tann personne. Mais, ou kapav sur ki bann creature spirituel existé. Sa bann creature spirituel-la zot bien intelligent ek zot ena beaucoup pouvoir. Sakenn ena so prop nom ek so prop personnalité. Ena ki envie aide nou; lezot envie faire nou di-tort. Mais zot tou interessé ar nou.

Vrai Bondié Li-mem, Li enn l’Esprit. (Jean 4:24) Li ena enn nom ki zis Li tousel ena ek sa nom-la rann Li different ar beaucoup lezot fausse bondié. So nom c’est Jéhovah. (Psaume 83:18) Enn psalmiste ti ecrire: “Jéhovah Li grand ek nou bizin loué Li. Li faire nou ena la crainte plus ki tou lezot bondié. Parski tou bondié bann peuple, zot bann bondié ki pena valeur; mais Li, Li finn faire le ciel. Devant Li ena dignité ek la gloire; dan so temple ena la force ek beauté.”—Psaume 96:4-6.

Bann vision concernant vrai Bondié

La Bible dire nou ki “okenn zom jamais pa finn trouve Bondié.” (Jean 1:18) Pareil couma enn dimoune ki’nn né aveugle pa kapav comprend bann couleur, Bondié so l’apparence ek so la gloire depasse seki nou kapav comprend. Mais, pareil couma enn bon professeur pou servi bann mot bien simple kan li explik enn sujet compliké so bann zeleve, Bondié aussi dan so Parole, la Bible, servi bann kitsoz ki nou kapav trouvé pou explik bann kitsoz ki nou pa kapav trouvé. Par bann vision inspiré ki Li ti donne bann serviteur fidele dan le passé, Jéhovah aide nou pou essaye maziné couma le ciel été ek pou comprend nou relation avek bann ki habite la-haut.

Par exemple, enn vision ki prophete Ézékiel ti gagné ti associé la gloire Jéhovah avek difé, clarté, enn pierre saphir, ek enn l’arc-en-ciel. Dan enn lot vision, l’apotre Jean ti trouve Jéhovah lor so trone ek ti dire ki Bondié “pareil couma enn pierre jaspe ek enn pierre couleur rouge.” Li ti ajouté ki “tout autour trone ena enn l’arc-en-ciel ki couma enn emeraude.” Sa qualité description-la faire nou comprend ki presence Jéhovah li ena enn beauté, enn charme, ek enn tranquillité ki rare ek ki extraordinaire.—Révélation 4:2, 3; Ézékiel 1:26-28.

Prophete Daniel aussi ti gagne enn vision concernant Jéhovah. Dan sa vision-la li ti trouve “dix mille fois dix mille [ange ki] ti pé deboute devant [Jéhovah].” (Daniel 7:10) Seki li ti trouvé ti vrai-mem extraordinaire! Pou trouve enn ange, mem dan enn vision, li extraordinaire, asterla essaye maziné ki nou trouve bann million ange parfait!

La Bible faire mention bann ange preské 400 fois, ek parmi ena bann séraphin ek bann chérubin. Dan la Bible bann mot grec ek hébreux ki’nn traduire par “ange,” toulé-deux vedir “messager.” Sa vedir ki bann ange kapav communiké entre zot, ek dan le passé zot finn communik avek bann dimoune. Bann ange zot pa bann dimoune ki avant ti vive lor la terre. Jéhovah ti crée sa bann creature spirituel-la bien avant ki Li ti crée bann dimoune.—Job 38:4-7.

Dan vision ki Daniel ti gagné, li ti trouve enn grand quantité ange ki ti rassemblé ek zot ti temoin enn grand l’evenement. Apré sa, Daniel ti trouve “enn kikenn ki ressemblé garson enn zom” vinn devant trone Jéhovah pou ki donne li “domination, grandeur, ek enn royaume, pou ki bann peuple, bann nation ek bann langue, zot tou servi li.” (Daniel 7:13, 14) Jésus Christ ki’nn ressuscité c’est li-mem “garson enn zom” ki ena enn position bien important dan le ciel. C’est li ki finn gagne domination lor la terre entier. Bientot so Royaume pou remplace tou bann gouvernement humain ek pou tire maladie, chagrin, bann dimoune ki faire dominere, la misere, ek mem la mort.—Daniel 2:44.

Surement, kan Jésus ti vinn le Roi sa finn faire sa grand quantité ange ki fidele-la ena enn grand la joie, ek sa bann ange-la envie seki pli bon pou l’humanité. Mais, malheureusement pa tou creature spirituel ki ti ena mem sentiment.

Bann l’ennemi Bondié ek bann dimoune

Kan Bondié ti mette bann dimoune lor la terre, enn parmi bann ange ti developpe enn desir pou gagne l’adoration. Li ti tourne lé-dos ar Jéhovah ek ti faire li-mem vinn Satan, ki vedir “Opposant.” Satan, ki pli mauvais creature ki existé, oppose-li net ar Jéhovah, pli bon personnage ki existé. Bann lezot ange ti joinde Satan dan so rebellion. La Bible appel zot bann demon. Pareil couma Satan, sa bann demon-la finn vinn l’ennemi bann dimoune, bann l’ennemi bien cruel. Ki consequence zot l’influence finn ena? C’est surtout a cause zot ki ena la souffrance, l’injustice, maladie, la misere ek la guerre lor la terre.

Zordi dan beaucoup religion c’est enn kitsoz demodé pou koz concernant Satan. Mais livre la Bible Job, faire nou comprend ki qualité creature sa ange rebelle-la été ek ki so l’intention. Li dire: “Jour ti arrivé kot bann garson vrai Bondié ti rentré pou place zot devant Jéhovah, ek Satan aussi ti nek rente au milieu zot.” Dan conversation ki ti ena apré, Satan finn dire, sans okenn respé, ki Job ti servi Bondié zis pou seki li ti gagné en retour. Pou essaye prouvé ki so l’accusation vrai, Satan ti faire Job gagne beaucoup probleme. Satan ti touye so bann troupeau ek tou so dix zenfant. Apré sa, li ti faire Job gagne bann gros-gros coulou lor so lekor en entier. Tou bann l’attak Satan pa ti reussi prouve sa l’accusation-la.—Job 1:6-19; 2:7.

Ena bann bon raison kifer Jéhovah finn tolere Satan tou sa le temps-la, mais Li pa pou faire sa pou touletan. Bientot Satan le Diable pou disparette. Ena bann disposition ki finn fini prend ek livre Révélation explik sa dan enn fason clair. Sa livre-la faire nou konn enn lot l’evenement important ki finn arrivé dan le ciel, enn l’evenement ki, si pa ti explik sa dan livre Révélation jamais nou ti pou koné. Nou lire: “Finn ena enn la guerre dan le ciel. Mikaël [Jésus ki finn ressuscité] ek so bann ange ti laguerre kont dragon [Satan], ek dragon-la ek so bann ange ti laguerre, mais li pa ti pli fort, ek ti nepli ena okenn place pou zot dan le ciel. Ek finn jette sa grand dragon-la dehors, sa serpent originel-la, ki appel Diable ek Satan, ki pé mette tou bann dimoune lor la terre entier dan l’erreur. Finn jette li lor la terre, li ensam avek so bann ange.”—Révélation 12:7-9.

Remarké ki la Bible dire ki Satan “pé mette tou dimoune lor la terre entier dan l’erreur.” Li mette bann dimoune dan l’erreur kan li fann bann mensonge religieux pou ki bann dimoune tourne lé-dos ar Jéhovah ek So Parole. Enn parmi sa bann mensonge-la c’est ki, kan enn dimoune mort li al dan le monde bann l’esprit. Ena different l’idée lor sa croyance-la. Par exemple, dan l’Afrique ek l’Asie, beaucoup dimoune croire ki kan enn dimoune mort, li al dan le monde bann l’esprit kot zot bann ancetre resté. Bann l’enseignement lor purgatoire ek l’enfer aussi basé lor croyance ki enn dimoune contigne vive apré la mort.

Eski ena enn la vie dan le ciel apré la mort?

Mais ki nou kapav dire concernant croyance, ki tou bann bon dimoune al dan le ciel? Bann million dimoune dan le monde croire sa. Li vrai ki certain bon dimoune al dan le ciel, mais quantité ki zot été li bien tigit comparé ar tou sa milliard dimoune ki’nn mort-la. La Bible faire nou koné ki pou ena 144,000 dimoune ki pou “acheté depuis lor la terre” ek zot pou servi couma “bann pretre” ek “bann le roi ki dirige la terre.” (Révélation 5:9, 10; 14:1, 3) Ensam avek Fils de l’homme, Jésus Christ, zot pou forme enn gouvernement dan le ciel, setadir Royaume Bondié. Sa gouvernement-la pou detruire Satan ek so bann demon, ek pou faire la terre vinn enn paradis. La plupart parmi bann dimoune ki’nn mort pou ré-gagne la vie avek l’esperance pou vive pou touletan dan sa Paradis-la lor la terre.—Luc 23:43.

Alors, pou faire enn resumé, ena beaucoup creature spirituel ki reste dan le ciel. Pli Grand parmi zot c’est Bondié, Jéhovah, Createur tou la vie. Ena bann milliard ange ki pé servi Li avek fidelité. Lezot ange, ki dirigé par Satan, finn tourne lé-dos ar Jéhovah ek zot pé faire tou pou mette bann dimoune dan l’erreur. En plus, ena enn groupe dimoune ki finn “acheté,” ou-soit choisir, depuis lor la terre pou prend bann responsabilité special dan le ciel. Asterla ki nou finn konn sa bann kitsoz-la anou guetté ar kisannla nou kapav rente en contact dan le ciel ek couma nou bizin faire sa.