Chante pou Jéhovah!

“Mo pou chanté ek mo pou joué la musik pou mo Bondié tant ki mo existé.”—PS. 146:2.

1. Ki ti pousse David pou compose certain so bann psaume?

KAN li ti jeune, David ti passe beaucoup le temps dan bann karo pré ar Bethléhem, pou veille bann troupeau so papa. Letan li ti pé veille bann mouton, David ti kapav observe tou bann kitsoz extraordinaire ki Jéhovah inn crée: le ciel rempli ar zetoile, “bann zanimo la campagne,” ek “bann zoiseau ki dan le ciel.” Seki li ti trouvé ti tellement touche li ki li ti senti-li poussé pou compose bann cantik bien touchant pou loué so Createur. Dan livre Psaume nou kapav trouve beaucoup cantik ki David ti composé.a—Lire Psaume 8:3, 4, 7-9.

2. (a) Ki l’effet la musik kapav ena lor enn dimoune? Donne enn l’exemple. (b) Kan nou lire Psaume 34:7, 8 ek Psaume 139:2-8, ki nou kapav aprann lor relation ki David ti ena avek Jéhovah?

² Li parette ki c’est pendant sa moment-la ki David ti ameliore encore plus so bann capacité en tant ki musicien. En realité, li ti tellement konn joué la musik ki li ti gagne l’invitation pou al joué la harpe pou le roi Saül. (Prov. 22:29) Ki l’effet, la musik ki David ti joué, ti ena lor sa le roi ki ti troublé-la? Sa ti calmé li, pareil couma zordi certain la musik souvent calmé bann dimoune. A chaque fois ki David ti joué la musik, “sa ti soulage Saül ek li ti senti-li bien.” (1 Sam. 16:23) Bann cantik ki sa musicien ek sa compositeur ki ti ena la crainte pou Bondié-la ti joué, encore ena mem valeur zordi. Mazinn enn coup! Zordi, plus ki 3,000 an apré la mort David, plusieurs million dimoune ki vive dan different condition, dan quatre coin la terre, lire regulierement bann psaume ki David finn ecrire, pou gagne soulagement ek l’espoir.—2 Chron. 7:6; lire Psaume 34:7, 8; 139:2-8; Amos 6:5.

La musik ena enn place bien important dan vrai l’adoration

3, 4. Dan lepok David, ki disposition ti prend pou ki la musik forme partie dan vrai l’adoration?

³ David ti ena talent, ek li ti servi sa dan pli bon fason ki kapav, setadir pou glorifié Jéhovah. Apré ki li ti vinn le roi en Israël, David ti prend disposition pou ki bann joli la musik forme partie dan bann service ki ti ena dan tabernacle. Ti choisir plus ki enn dixieme parmi tou bann Lévite ki ti servi dan temple—environ 4,000 parmi zot—pou “loué Jéhovah.” Parmi ti ena 288 ki ti “formé pou chante pou Jéhovah, zot tou ti bann expert.”—1 Chron. 23:3, 5; 25:7.

⁴ David li-mem ti compose beaucoup parmi bann cantik ki bann Lévite ti joué ek ti chanté. Bann Israélite ki ti gagne privilege pou present kan bann Lévite ti pé chante bann psaume David, surement ti’nn bien touché par seki zot ti tendé. Plitar, kan ti amenn l’arche de l’alliance dan Jérusalem, “David ti dire bann chef Lévite pou place zot bann frere ki ti bann chanteur, avek bann instrument la musik, bann instrument ki ena la corde, bann la harpe ek bann cymbale; zot ti bizin joué fort pou faire enn son joyeux levé.”—1 Chron. 15:16.

5, 6. (a) Kifer eski dan lepok David, ti donne la musik sa quantité l’importance-la? (b) Couma nou koné ki dan Israël, la musik ti ena enn place important dan vrai l’adoration?

⁵ Kifer eski dan lepok David, ti donne la musik sa quantité l’importance-la? Eski c’est zis parski le roi ti enn musicien? Non, ti ena enn lot raison. C’est plusieurs siecle plitar, kan bon le roi Hizqiya ti remette en place bann service dan temple, ki finn decouvert sa raison-la. Dan 2 Chroniques 29:25, nou lire: “Li [setadir Hizqiya] ti’nn place bann Lévite dan lakaz Jéhovah, avek bann cymbale, bann instrument ki ena la corde ek bann la harpe, dapré l’ordre David ek Gad, ki ti gagne bann vision pou le roi, ek prophete Nathân, parski c’est la main Jéhovah ki ti donne sa l’ordre-la, par moyen so bann prophete.”

⁶ Oui, a travers so bann prophete, Jéhovah ti invite so bann serviteur pou loué Li par bann cantik. Bann chanteur dan tribu Lévi ti nepli bizin rempli responsabilité ki normalement tou lezot Lévite ti ena. Coumsa sa bann chanteur-la ti kapav donne tou zot le temps pou compose la musik ek, sans okenn doute, pou faire bann repetition.—1 Chron. 9:33.

7, 8. Kan nou chanté, ki pli important ki talent?

⁷ Mais, surement ou kapav dire: “Pena doute ki moi, jamais mo ti pou kapav forme partie parmi sa bann expert ki ti chanté dan tabernacle-la!” Mais pa tou bann musicien dan tribu Lévi ki ti bann expert. Dapré 1 Chroniques 25:8, ti ena aussi bann “zeleve.” Li interessant aussi pou remarké ki surement ti ena bann musicien ek bann chanteur bien doué parmi bann lezot tribu Israël. Mais Jéhovah ti confié bann Lévite tou seki concerne la musik. Alors, ena enn kitsoz nou kapav sur: ki zot ti ‘bann expert’ ou-soit ‘bann zeleve,’ tou bann Lévite fidele ti mette tou zot leker dan travail ki zot ti’nn gagné.

⁸ David ti content la musik ek li ti bien doué. Mais eski c’est zis talent ki compté pou Bondié? Dan Psaume 33:3, David ti ecrire: “Joué lor bann instrument ki ena la corde pli bien ki zot kapav ek chante bien fort avek la joie.” Message-la li clair: seki compté c’est ki kan nou loué Jéhovah nou faire li ‘pli bien ki nou kapav.’

Role ki la musik finn ena apré lepok David

9. Decrire seki ou ti pou’nn kapav trouvé ek tendé si ou ti’nn assisté l’inauguration temple pendant regne Salomon.

⁹ Pendant regne Salomon, la musik ti ena enn role bien important dan vrai l’adoration. Pendant l’inauguration temple, ti ena enn l’orchestre complet. Dan section bann instrument en cuivre ti ena 120 trompette. (Lire 2 Chroniques 5:12.) La Bible dire nou ki “bann ki ti joué trompette [zot tou ti bann pretre] ek bann chanteur ti coumadir enn sel, kan zot ti faire tann enn sel son pou loué ek remercié Jéhovah, . . . ‘parski Li bon, parski so l’amour fidele li pou touletan.’ ” Desuite couma sa joli la musik-la ti commencé, “lakaz-la ti rempli avek enn nuage,” seki montré ki Jéhovah ti accepté sa. Surement sa ti extraordinaire ek impressionnant pou tann tou sa bann trompette-la joué ek sa bann millier chanteur-la chanté ensam coumadir enn sel!—2 Chron. 5:13.

10, 11. Couma nou koné ki bann premier chretien ti servi la musik dan zot l’adoration?

¹⁰ Bann premier chretien aussi ti servi la musik dan zot l’adoration. Bien sur, bann chretien dan premier siecle ti faire bann reunion dan bann lakaz, pa dan temple. Mem si zot ti gagne persecution ek zot ti gagne bann difficulté, zot ti contigne chante bann cantik pou loué Bondié.

¹¹ L’apotre Paul ti conseil so bann frere dan Colosses pou “contigne . . . averti sakenn zot camarade par bann psaume, bann louange pou Bondié, bann chanté spirituel ki faire plaisir pou tendé.” (Col. 3:16) Kan ti jette Paul ek Silas dan prison, zot ti commence “prié ek loué Bondié par bann chanté,” mem si zot pa ti ena okenn livre cantik pou suive. (Actes 16:25) Si jamais jette ou dan prison, comié cantik ou pou kapav chanté par coeur?

12. Couma nou kapav montré ki nou apprecié nou bann cantik?

¹² Tousala montré ki la musik ena enn place bien important dan nou l’adoration. Alors li bon ki nou demann nou-mem: ‘Eski mo montré ki mo donne li valeur ki li merité? Eski mo faire tou pou arrive a ler pou bann reunion ek bann l’assemblée pou chante premier cantik ensam avek mo bann frere ek soeur, ek eski mo chante avek tou mo leker?’ Entre Lekol ministere theocratik ek reunion service ek entre discours publik ek l’etude La Tour de Garde ena enn cantik. ‘Eski mo encourage mo bann zenfant pou pa considere sa bann cantik-la couma enn break kot zot kapav quitte zot place pou nanyin, kitfois pou al degourdi inpé zot la jambe?’ Chanté forme partie dan nou l’adoration. Alors, ki nou ‘bann expert’ ou-soit ‘bann zeleve,’ nou tou nou kapav—ek nou bizin—joinde nou la voix ensam pou loué Jéhovah.—Compare avek 2 Corinthiens 8:12.

Lepok changé, besoin aussi changé

13, 14. Kifer li important ki nou chante avek tou nou leker pendant bann reunion? Donne enn l’exemple.

¹³ Ena plus ki 100 an, Le Phare de la Tour de Sion ti explik enn parmi bann raison kifer nou bann cantik zot important sa quantité-la. Nou lire: “Kan bann serviteur Bondié chante la verité c’est enn bon moyen pou faire sa rente dan zot l’esprit ek dan zot leker.” La plupart parmi bann parole ki trouve dan nou bann cantik zot basé lor bann verset la Bible. Alors, kan nou aprann au moins certain parmi sa bann cantik-la, sa kapav enn bon moyen pou faire la verité desann dan nou leker. Bien souvent, bann ki assisté nou bann reunion premier fois zot bien touché par bann cantik ki zot tou dan congregation chanté avek tou zot leker.

¹⁴ Enn soir, en 1869, Charles Taze Russell ti pé sorti travail, li ti pé retourne kot li kan li ti tann bann dimoune pé chanté dan enn la salle ki ti trouve dan enn sous-sol. Sa lepok-la, li ti sur ki jamais li ti pou trouve la verité lor Bondié. Alors li ti’nn decidé pou consacré-li dan so commerce. Li ti pensé ki si li ti gagne beaucoup kass, li ti pou kapav, au moins, aide bann dimoune lor plan materiel mem si li pa ti kapav aide zot lor plan spirituel. Frere Russell ti rente dan sa la salle bien sombre kot ti ena la poussiere-la ek li ti trouve bann dimoune pé assisté enn reunion religieux. Li ti assizé ek li ti ecouté. Plitar li ti ecrire ki seki li ti tendé sa la nuit-la “ti assez, avek l’aide Bondié, pou fortifié so la foi ki ti affaibli dan la Bible ki inspiré par Bondié.” Remarké ki en premier, c’est sa bann cantik-la ki ti attire frere Russell pou al dan sa reunion-la.

15. Kifer finn bizin remette nou livre cantik a-jour?

¹⁵ A mesure ki le temps finn passé, nou finn gagne bann eclaircissement lor fason ki nou comprend bann l’Ecriture. Proverbes 4:18 dire: “Chemin bann dimoune droite li pareil couma la lumiere ki eclairé ek ki brille pli fort, ziska ki’nn faire grand li-jour.” Parski la lumiere finn augmenté, sa finn amenn bann changement dan fason ki nou ‘chante la verité.’ Pendant sa 25 an ki’nn passé-la, bann Témoins de Jéhovah dan beaucoup pays finn bien content pou servi livre cantik Louons Jéhovah par nos chants.b Depuis ki sa livre-la finn publié pou premier fois, la lumiere finn brillé pli fort lor plusieurs sujet ek zordi nou nepli servi certain expression ki trouve dan sa livre-la. Par exemple asterla en français, nou nepli dire “ nouvel ordre, ” mais “ monde nouveau. ” Ek asterla nou dire ki nou bizin cultive “ le fruit de l’esprit, ” nou pa dire “ les fruits de l’esprit. ” Li clair ki, par rapport avek bann eclaircissement dan bann l’enseignement la Bible, finn bizin remette nou livre cantik a-jour.

16. Couma eski nou nouveau livre cantik pou aide nou suive conseil Paul ki trouve dan Éphésiens 5:19?

¹⁶ Pou sa raison-la ek lezot encore, College central finn d’accord pou publié enn nouveau livre cantik ki appel Chantons à Jéhovah. Dan sa nouveau livre-la ena zis 135 cantik. Parski ena moins cantik pou aprann, nou bizin kapav rappel au moins certain sa bann nouveau cantik-la. Sa li en accord avek conseil Paul ki trouve dan Éphésiens 5:19.—Lire.

Ou kapav montré ki quantité ou apprecié bann cantik

17. Si nou embarrassé pou chanté, ki pensée kapav aide nou surmonte sa?

¹⁷ Li kapav arrivé ki nou senti-nou embarrassé pou chanté dan bann reunion. Eski nou bizin laisse sa la peur-la empeche nou chanté? Anou reflechi lor sa point-la: Kan nou kozé, eski li pa vrai ki “nou tou, souvent nou faire erreur”? (Jacq. 3:2) Pourtant, nou pa laisse sa bann erreur-la empeche nou pou loué Jéhovah kan nou preché devant la porte bann dimoune. Alors, kifer eski nou bizin laisse bann erreur ki nou faire kan nou chanté empeche nou loué Bondié? Jéhovah, ki “finn donne dimoune enn la bouche,” content kan Li tann nou servi nou la voix pou chanté pou loué Li.—Ex. 4:11.

18. Donne bann suggestion pou aprann parole bann cantik.

¹⁸ Chantons à Jéhovah — Version chantée lor CD, li disponible dan plusieurs langue. Lor sa CD-la nou kapav tann certain sa bann nouveau cantik-la joué par enn l’orchestre ek enn choral. Sa bann la musik-la faire plaisir pou tendé. Ecoute zot souvent; coumsa bien vite ou pou aprann au moins certain sa bann nouveau cantik-la. Beaucoup sa bann cantik-la finn composé dan enn fason ki kan ou chante enn la ligne, ou pou kapav koné apepré ki pé vini apré. Alors, kan ou joué sa CD-la, kifer ou pa essaye chanté en mem temps? Si, kot ou, ou prend l’habitude pou aprann sa bann parole-la ek ecoute sa bann la musik-la, pena doute ki, dan la Salle du Royaume ou pou ena plus l’assurance pou chanté.

19. Ki bann l’etape ki impliké kan pé prepare bann la musik pou bann l’assemblée?

¹⁹ Li bien facile pou considere la musik ki joué pendant nou bann l’assemblée couma enn kitsoz banal. Ena beaucoup preparation derriere sa. Apré ki finn choisir la musik ki pou joué, bizin bien prepare bann partition pou sakenn parmi sa 64 musicien ki forme partie dan l’orchestre Watchtower-la. Sa bann musicien-la passe beaucoup le temps pou pratik seki zot pou joué avant ki zot faire bann repetition ek finalement zot enregistré sa dan nou bann studio dan Patterson, New York. Dix parmi sa bann frere ek soeur-la pa reste dan États-Unis. Zot tou considere sa couma enn privilege pou faire zot part pou produire bann joli la musik ki ena pendant nou bann l’evenement theocratik. Nou kapav montré ki nou apprecié zot bann zeffort sincere. Kan president l’assemblée invite nou pou prend nou place, anou faire li desuite, ek sans faire tapage, anou ecoute la musik ki finn preparé avek beaucoup l’amour.

20. Ki ou determiné pou faire?

²⁰ Jéhovah ecoute nou avek beaucoup l’attention kan nou pé chanté pou loué Li. Sa bann cantik-la zot bien important pou Li. Nou kapav faire so leker content kan nou chante avek tou nou leker n’importe kan nou joinde pou adore Bondié. Oui, ki nou bann expert ou-soit bann zeleve, anou “chante pou Jéhovah”!—Ps. 104:33.

[Note]

Ki ou pensé?

• Ki bann l’exemple dan le passé, montré ki la musik ti ena enn role bien important dan nou l’adoration?

• Ki lien ena entre obeir commandement Jésus dan Matthieu 22:37 ek chante bann cantik avek tou ou leker?

• Cite certain fason kot ou kapav montré ki ou apprecié bann cantik.

[Zimage page 31]

Eski ou decourage ou bann zenfant pou quitte zot place pou nanyin pendant bann cantik?