Bann Nouvo Kantik pou Nou Ador Jéhovah!
1 Sak lane Watch Tower Bible and Tract Society of Pennsylvania fer so renion. Dan dernie renion ki ti fer le 4 Oktob 2014, ti anonse ki pou reviz liv kantik ki nou pe servi asterla. Sa ti enn nouvel vremem extraordiner! Ti rapel tou dimounn ki ti prezan dan lasistans, ki nou bann kantik ena enn rol bien inportan dan nou ladorasion.—Ps. 96:2
2 Kitfwa ou demann oumem: ‘Kifer eski bizin reviz liv kantik?’ Ena plizir rezon. Dabor, fason ki nou konpran Labib pe kontigne ameliore, ek sa kapav ena enn lefe lor bann parol ki ena dan nou bann kantik. (Prov. 4:18) Enn lot rezon pou reviz liv kantik: Boukou lexpresion ek fraz ki’nn servi dan nou kantik sorti dan ansien Traduction du monde nouveau, an Angle. Akoz sa, bizin sanz bann parol pou fer zot koresponn avek version revize Traduction du monde nouveau, an Angle. Ena boukou travay ki bizin fer pou met bann parol ki ena dan liv kantik a-zour, alor finn deside pou azout de-trwa nouvo kantik dan nou liv kantik.
3 Eski nou pou bizin atann ki enn nouvo liv kantik inprime avan ki nou kapav sant sa bann nouvo kantik-la? Non. Nou bien kontan pou anons ou ki, dan bann mwa ki pe vini, pou ena bann nouvo kantik ki pou sorti lor nou sit Internet jw.org. Kan enn nouvo kantik sorti, pou azout sa lor program dan Nou Minister ek pou sant sa alafin Renion Servis. Lor sa program-la pou ekrir “nouvo kantik.”
4 Kouma pou Aprann Bann Nouvo Kantik?: Li kapav difisil pou aprann enn nouvo kantik. Me kanmem, parey kouma enn ekrivin Psaume, nou anvi sante pandan bann renion ek pa “res trankil.” (Ps. 30:12) Pou aprann enn nouvo kantik, swiv sa bann letap bien sinp la:
Ekout plizir fwa lanrezistreman lor piano ki pou disponib lor nou sit Internet. Plis ou ekout lamizik-la, plis li pou fasil pou ou rapel li.
Etidie bann parol-la, ek esey aprann li par-ker.
Sant avek lamizik. Fer sa ziska ki ou konn bien kantik-la.
Repet sa bann nouvo kantik-la plizir fwa pandan ou Ladorasion an Fami ziska ki ou fami konn sa bann kantik-la bien.
5 Dan bann mwa ki pe vini, kan inn prevwar pou sant enn nouvo kantik alafin Renion Servis, lasistans pou ekout enn fwa lanrezistreman lamizik lor piano. Apre sa, zot pou sant kantik-la avek lanrezistreman lamizik lor piano, parey kouma nou abitie fer pou lezot kantik.
6 Kan nou reflesi bien, sant bann kantik dan bann renion fer nou zwenn nou lavwa ansam avek nou bann frer ek ser pou loue Jéhovah dan lazwa. Alor, fode pa nou pran labitid pou kit nou plas pou nanye kan pe koumans sant kantik dan renion.
7 Ena enn lot fason ki nou kapav montre nou respe pou nou bann lamizik sakre. Pandan bann lasanble, ena enn ti peryod letan kot zwe lamizik avan sak sesion. De fwa par an, bann frer ek ser bien devwe, ki sorti partou lor later, vwayaze lor zot prop fre, pou al Patterson, New York, pou konpoz bann zoli lamizik ki nou servi dan nou ladorasion. Alor, kan prezidan lasanble invit nou pou asize ek pou ekout seki sa lorkes-la finn prepare, nou bizin fer li. Kan nou fer sa, sa pou ed nou prepar nou leker pou seki nou pou aprann apre.—Ezra 7:10.
8 Zordi, alafin renion, nou pou sant enn nouvo kantik. So tit: “Rwayom Bondie Inn Etabli—Li Pe Vini!” Sa kantik-la ti zwe pandan dernie renion aniel, ek finn konpoz sa kantik-la sirtou parski sa lane-la, sa fer 100 an depi ki Rwayom Bondie pe regne.
9 Sa bann nouvo kantik-la zot vremem “bann bon kitsoz” ki Jéhovah donn nou. (Mat. 12:35a) Anou determine pou aprann sa bann kantik-la ek sant zot avek tou nou leker, pou donn louanz ek loner nou Bondie!—Ps. 147:1.