Content la justice avek tou ou leker

“To finn content la justice.”—PS. 45:7.

1. Ki pou aide nou pou marche lor “bann chemin la justice”?

PAR so Parole ek so l’esprit saint, Jéhovah pé dirige so peuple lor “bann chemin la justice.” (Ps. 23:3) Selman, parski nou imparfait, nou ena tendance pou sorti lor sa chemin-la. Pou nou retourné ek ré-commence faire seki juste, sa demann bann grand zeffort. Ki pou aide nou pou faire sa? Pareil couma Jésus, nou bizin content pou faire seki juste.—Lire Psaume 45:7.

2. Ki “bann chemin la justice” representé?

² Ki sa “bann chemin la justice[-la]” representé? Zot represente enn conduite ki guidé par bann principe juste ki Bondié inn etabli. En hébreu ek en grec, “la justice” faire reference ar seki “droite,” ek sa vedir ki nou bizin obeir dan enn fason strict bann principe moral. Parski Jéhovah Li-mem Li “enn place kot la justice resté,” so bann adorateur content pou tourne-zot vers Li pou koné ki bon chemin zot bizin suive lor plan moral.—Jér. 50:7.

3. Couma nou kapav aprann plus lor la justice Bondié?

³ C’est zis kan nou faire bann grand zeffort avek tou nou leker pou vive en accord avek bann principe juste ki Bondié inn etabli ki nou pou vrai-mem faire Li plaisir. (Deut. 32:4) Pou nou kapav faire sa, nou bizin commence aprann tou seki nou kapav lor Jéhovah dan so Parole la Bible. Plus nou aprann lor Li ek vinn pli proche ar Li chaque jour, plus nou pou content so justice. (Jacq. 4:8) Nou bizin aussi laisse Parole ki Bondié inn inspiré, guide nou kan nou bizin prend bann decision important dan nou la vie.

Rod la justice Bondié

4. Ki sa impliké pou rod la justice Bondié?

⁴ Lire Matthieu 6:33. Rod la justice Bondié c’est pa zis passe le temps pou preche la bonne nouvelle lor Royaume Bondié. Pou ki Jéhovah accepté nou service sacré, conduite ki nou ena toulé-jour bizin en accord avek so bann principe elevé. Ki tou bann ki pé rod la justice Jéhovah bizin faire? Zot bizin “mette lor zot nouveau personnalité ki finn crée dapré volonté Bondié, dan enn justice ek enn fidelité ki vrai.”—Éph. 4:24.

5. Ki pou aide nou pou surmonte decouragement?

⁵ Alors ki nou pé faire zeffort pou vive en accord avek la justice Bondié, li kapav arrivé ki parfois nou senti-nou decouragé a cause nou bann defaut. Ki kapav aide nou pou surmonte bann decouragement ek pou aprann pou content ek pratik la justice? (Prov. 24:10) Nou bizin prié Jéhovah regulierement “avek enn leker sincere, avek enn l’assurance total dan la foi.” (Héb. 10:19-22) Ki nou bann chretien oint ou-soit ki nou ena l’esperance pou vive lor la terre, nou ena la foi dan sacrifice Jésus Christ ek dan service ki li faire en tant ki nou Grand Pretre. (Rom. 5:8; Héb. 4:14-16) Di-sang ki Jésus inn versé ena enn grand pouvoir. C’est seki enn lartik dan premier numero sa periodik-la ti montré. (1 Jean 1:6, 7) Sa lartik-la ti dire: “Kan nou guette enn objet ki enn rouge vif a travers enn vitre rouge dan la lumiere, sa l’objet-la parette blanc; alors, mem si nou bann peché zot enn rouge vif, kan nou guette zot dan mem fason ki Bondié guette zot, a travers di-sang Christ, zot parette blanc.” (Juillet 1879, p. 6, en anglais) C’est vrai-mem enn disposition extraordinaire ki Jéhovah inn prend dan nou faveur kan Li’nn donne so Garson ki Li bien content, couma enn ranson!—Is. 1:18.

Verifié ou l’equipement la guerre spirituel

6. Kifer li bien important ki nou verifié nou l’equipement la guerre spirituel?

⁶ Touletan, nou bizin ena “cuirasse la justice” lor nou parski c’est enn partie bien important dan nou l’equipement la guerre spirituel ki Bondié inn donne nou. (Éph. 6:11, 14) Ki nou finn fek prend bapteme ou-soit sa faire plusieurs dizaine l’année ki nou pé servi Jéhovah, li bien important ki nou verifié nou l’equipement la guerre spirituel toulé-jour. Kifer? Parski finn jette Satan le Diable ek so bann demon dan voisinage la terre. (Rév. 12:7-12) Satan bien en colere ek li koné ki so le temps bien limité. Alors, li finn augmente so bann l’attak lor peuple Bondié. Eski nou trouve l’importance pou ena “cuirasse la justice” lor nou?

7. Couma nou pou agir si nou trouve l’importance pou ena nou “cuirasse la justice”?

⁷ Enn cuirasse protege leker physik. A cause nou imparfait, nou leker symbolik ena tendance pou agir couma enn traitre ek li bien mauvais. (Jér. 17:9) Parski nou leker ena tendance pou faire seki mauvais, li bien important ki nou forme li ek nou discipline li. (Gen. 8:21) Si nou trouve l’importance pou ena nou “cuirasse la justice,” nou pa pou tire li, mem pou enn ti moment, kan nou choisir bann divertissement ki Bondié detesté; ou-soit kan nou pé mazinn nou-mem pé faire bann mauvais kitsoz. Le temps ena tellement valeur ki nou pa pou gaspille enn quantité le temps pou guette television. Au contraire, nou pou contigne lutté pou faire seki Jéhovah content. Mem si arrivé ki nou faire enn faux pas lor plan spirituel parski pou enn ti moment nou finn ena bann mauvais pensée, avek l’aide Jéhovah nou pou relevé.—Lire Proverbes 24:16.

8. Kifer nou bizin “grand bouclier la foi”?

⁸ Parmi nou l’equipement la guerre spirituel, ena “grand bouclier la foi.” Li permette nou pou “teigne tou bann fleche enflammé ki sa kikenn ki mauvais-la envoyé.” (Éph. 6:16) Oui, kan nou ena la foi ek kan nou content Jéhovah avek tou nou leker, sa aide nou pou pratik la justice ek pou reste lor chemin ki amenn vers la vie eternel. Plus nou aprann pou content Jéhovah, plus nou pou apprecié so justice. Mais ki nou kapav dire lor nou conscience? Couma li aide nou dan bann zeffort ki nou faire pou content la justice?

Garde enn bon conscience

9. Ki bienfait nou gagné kan nou garde enn bon conscience?

⁹ Kan nou ti prend bapteme, nou ti demann Jéhovah “enn bon conscience.” (1 Pierre 3:21) Parski nou ena la foi dan la ranson, di-sang Jésus couvert nou peché ek lerla Bondié considere nou couma bann dimoune pur devant So lizié. Mais selman, pou reste pur devant Bondié, nou bizin garde enn bon conscience. Si parfois nou conscience lance nou bann avertissement, nou bizin content ki li pé travail couma bizin. C’est enn preuve ki li pa’nn vinn insensible ar bann principe juste Jéhovah. (1 Tim. 4:2) Mais pou bann ki envie content la justice, zot conscience kapav joué enn lot role encore.

10, 11. (a) Raconte enn l’experience ki montré kifer nou bizin prend compte nou conscience ki finn formé par la Bible. (Ou kapav aussi raconte enn lot l’experience.) (b) Kifer l’amour pou la justice kapav faire nou gagne enn grand la joie?

¹⁰ Kan nou faire seki mauvais, nou conscience kapav condamne nou ou-soit troublé nou. Enn jeune ti eloigne-li ar “bann chemin la justice.” Li ti vinn esclave pornographie ek li ti commence fume marijuana. Li ti senti-li coupable kan li ti al reunion ek li ti senti-li couma enn hypocrite kan li ti sorti predication. Alors, li ti arrete preché ek li ti arrete al reunion. Li ti dire: “Mais, mo pa ti pensé ki mo conscience ti pou contigne accuse moi pou seki mo ti pé faire.” Li ti ajouté: “Mo ti amenn sa mauvais la vie-la pendant apepré quatre an.” Apré sa, li ti commence reflechi pou retourne dan la verité. Mem si li ti pensé ki Jéhovah pa ti pou ecoute so la priere, li ti prié kan-mem, ek li ti demann Jéhovah pardon. Moins ki dix minute plitar, so mama ti vinn kot li ek ti encourage li pou ré-commence assisté reunion. Li ti al la Salle du Royaume ek li ti demann enn ancien pou faire so l’etude. Avek le temps, li ti prend bapteme, ek li bien reconnaissant ki Jéhovah inn sauve so la vie.

¹¹ Eski nou pa finn remarké ki nou ena enn grand la joie kan nou faire seki juste? Plus nou aprann pou content la justice ek pou mette li en pratik dan nou la vie, plus nou pou ena la joie pou faire plaisir nou Papa ki dan le ciel. Ek maziné ki enn jour pou arrivé kot conscience tou bann dimoune pou faire zot ressenti zis la joie; zot pou reflete bann qualité Bondié dan enn fason parfait. Alors, anou developpe dan pli profond nou leker, l’amour pou la justice ek faire Jéhovah plaisir.—Prov. 23:15, 16.

12, 13. Couma nou kapav forme nou conscience?

¹² Ki nou kapav faire pou forme nou conscience? Kan nou etudié la Bible ek bann publication ki basé lor la Bible, li important ki nou rappel ki “leker enn dimoune juste, medité pou li kapav reponn.” (Prov. 15:28) Anou guetté couma sa aide nou kan nou bizin prend bann decision concernant enn travail. Kan li bien clair ki enn certain travail li kont bann principe la Bible, la plupart parmi nou, sans hesité nou suive direction ki nou gagné ar l’esclave fidele et avisé. Mais kan nou pa trop sur si enn travail li acceptable pou enn chretien ou-soit non, nou bizin rod bann principe la Bible ki impliké ek reflechi lor la dan la priere.a Parmi sa bann principe-la, ena principe ki concerne l’importance pou pa blesse conscience lezot. (1 Cor. 10:31-33) Mais surtout, nou bizin prend compte bann principe ki ena enn rapport avek nou relation avek Bondié. Si Jéhovah Li réel pou nou, nou pou d’abord demann nou-mem: ‘Si mo faire sa travail-la, eski sa pou offense Jéhovah ek faire Li la peine?’—Ps. 78:40, 41.

¹³ Kan nou pé prepare nou l’etude La Tour de Garde ou-soit l’etude biblik la congregation, li bon ki nou garde dan nou l’esprit l’importance pou medite lor seki nou pé etudié. Eski nou remarké ki souvent nou ena tendance pou prepare nou l’etude vite-vite, nou zis souligne bann reponse ek passe lor prochain paragraphe? Si nou etudié dan sa fason-la, sa pa pou faire nou l’amour pou la justice vinn profond, ek nou pa pou developpe enn conscience sensible. Si nou envie content la justice, nou bizin etudié avek serieux ek medite lor seki nou lire dan Parole Bondié. Pena okenn chemin coupé ki nou kapav prend pou aprann content la justice avek tou nou leker!

Faim ek soif la justice

14. Ki sentiment Jéhovah ek Jésus Christ envie nou ena en rapport avek nou service sacré?

¹⁴ Jéhovah ek Jésus Christ envie ki nou heureux kan nou pé accompli nou service sacré. Ki pou faire nou heureux? C’est nou l’amour pou la justice! Dan so Sermon lor montagne, Jésus ti dire: “Heureux bann ki faim ek soif la justice, parski zot pou rassasié.” (Mat. 5:6) Ki sa bann parole-la vedir pou bann ki envie content la justice?

15, 16. Couma Bondié pou satisfaire la faim ek la soif spirituel bann dimoune?

¹⁵ Nou pé vive dan enn le monde ki dirigé par sa kikenn ki mauvais-la. (1 Jean 5:19) Si nou prend enn la gazette dan n’importe ki pays, nou pou trouve bann crime ek bann violence ki pé arrivé dan enn fason ki jamais ti ena avant. Bann dimoune inn vinn cruel envers zot prochain, ek kan enn dimoune juste trouve sa, sa troublé li beaucoup. (Eccl. 8:9) Nou ki content Jéhovah, nou koné ki zis Li tousel ki kapav satisfaire la faim ek la soif spirituel bann dimoune ki envie aprann la justice. Bientot Bondié pou detruire bann mauvais dimoune. Bann ki content la justice pou nepli konn bann malheur ki zot gagné a cause mauvais action bann dimoune ki desobeir la loi. (2 Pierre 2:7, 8) Sa pou vrai-mem enn grand soulagement, pa vrai?

¹⁶ Nou ki servi Jéhovah ek ki bann disciple Jésus Christ, nou koné ki tou bann ki faim ek soif la justice “pou rassasié.” Tou zot bann desir pou satisfait grace a nouveau le ciel ek nouveau la terre ki Bondié pou faire ek “kot pou ena la justice.” (2 Pierre 3:13) Alors, pa laisse-nou decouragé ou-soit pa bizin nou etonné kan nou trouvé ki dan le monde Satan nepli ena la justice a cause la violence ek bann dimoune pé faire dominere ar zot camarade. (Eccl. 5:8) Jéhovah, sa kikenn ki Pli Grand-la, koné seki pé passé ek bientot Li pou delivré bann dimoune ki content la justice.

Gagne bann bienfait grace a l’amour la justice

17. Ki bann bienfait nou gagné parski nou content la justice?

¹⁷ Psaume 146:8 mette l’accent lor bienfait extraordinaire ki nou gagné kan nou marche lor chemin la justice. Sa psalmiste-la ti chanté: “Jéhovah content bann dimoune juste.” Mazinn enn coup! Souverain l’univers content nou parski nou content la justice! Parski Jéhovah content nou, nou sur ki Li pou donne nou seki nou bizin lor plan materiel tant ki nou mette bann l’interet so Royaume en premier dan nou la vie. (Lire Psaume 37:25; Proverbes 10:3.) Finalement, la terre entier pou vinn pou bann dimoune ki content la justice. (Prov. 13:22) Pou la plupart serviteur Bondié, recompense ki zot pou gagné parski zot finn pratik la justice c’est enn la joie extraordinaire ek la vie eternel dan enn joli paradis lor la terre. Depuis asterla-mem, Bondié pé recompense bann ki content so justice kan Li donne zot la paix au fond zot-mem ki permette zot vive heureux dan zot famille ek dan zot congregation.—Phil. 4:6, 7.

18. Ki nou bizin contigne faire pendant ki nou pé attann jour Jéhovah?

¹⁸ Pendant ki nou pé attann ki grand jour Jéhovah vini, nou bizin contigne rod so justice. (Tseph. 2:2, 3) Alors, anou manifesté enn vrai l’amour pou bann principe juste ki Jéhovah inn etabli. Sa implik ki nou garde nou “cuirasse la justice” bien dan so place pou ki sa protege nou leker symbolik. Nou bizin aussi garde enn bon conscience—enn conscience ki pou faire nou heureux ek ki pou faire leker nou Bondié content.—Prov. 27:11.

19. Ki nou bizin bien decidé pou faire, ek ki nou pou examiné dan prochain lartik?

¹⁹ “Lizié [Jéhovah] pé guette partout lor la terre pou montré so la force en faveur bann dimoune ki ena enn leker complet envers Li.” (2 Chron. 16:9) Sa bann parole-la vrai-mem encourage nou beaucoup alors ki nou pé faire seki juste dan enn le monde troublé ki pé vinn plus instable, ek kot la violence ek mechanceté pé augmenté! Li vrai ki parski nou pé suive bann principe juste, sa kapav etonne bann dimoune ki eloigné ar Bondié. Mais kan nou vive en accord avek la justice Jéhovah, nou gagne bann grand bienfait. (Is. 48:17; 1 Pierre 4:4) Alors, anou bien decidé pou contigne content la justice avek tou nou leker ek pou mette li en pratik. Sa pou faire nou gagne enn grand la joie. Selman, ena enn leker “complet” implik aussi ena la haine pou tou seki kapav faire nou desobeir la loi. Prochain lartik pou montré nou seki sa vedir.

[Note]

Couma ou pou reponn?

• Kifer li important ki nou reconette valeur la ranson pou nou kapav content la justice?

• Kifer li bien important ki nou mette “cuirasse la justice” lor nou?

• Couma nou kapav forme nou conscience?

[Zimage page 26]

Enn conscience bien formé aide nou pou reglé bann question ki concerne travail