Jésus​—Kifer li ti mort

“Fils de l’homme finn vini . . . pou li donne so nâme [ou-soit so la vie] couma enn ranson en echange pou beaucoup.”​—MARC 10:45.

JÉSUS ti koné ki ti pé attann li. Li ti comprend ki li pa ti pou konn enn la vie trankil. Au contraire, li ti koné ki li ti pou perdi la vie enn sel coup dan enn fason bien triste alors ki li ti pou ena enn tipé plus ki trente an, ek li ti bien prepare-li pou faire face ar so la mort.

La Bible donne enn grand l’importance la mort Jésus. Enn livre reference dire ki bann l’Écriture grecques chrétiennes, ou-soit Nouveau Testament, mentionne la mort Jésus dan enn fason direct, preské 175 fois. Mais kifer eski Jésus finn bizin souffert ek mort? Nou bizin konn sa, parski la mort Jésus kapav ena enn grand l’influence lor nou la vie.

▪ Seki Jésus ti pé attann pou arrive li Pendant so dernier l’année lor la terre, plusieurs fois Jésus ti donne so bann disciple bann renseignement concernant souffrance ek la mort ki ti pé attann li. Alors ki li ti pé al Jérusalem pou celebré so dernier Pâque, li ti dire so 12 zapotre: “Bann dimoune pou livré Fils de l’homme ar bann chef parmi bann pretre ek bann scribe, ek zot pou condamne li a mort ek zot pou livré li ar bann dimoune dan bann nation, pou bouffonne li, pou crache lor li, pou fouette li, ek pou touye li.”a (Marc 10:33, 34) Kifer Jésus ti tellement sur ki sa bann kitsoz-la ti pou arrive li?

Jésus ti bien konn tou bann prophetie dan bann l’Écritures hébraïques ki ti annoncé couma li ti pou mort. (Luc 18:31-33) Anou examine certain sa bann prophetie-la ensam avek bann verset la Bible ki expliké couma zot finn realisé.

Ki ti pou arrive le Messie?

▪ Ti pou vann li pou 30 piece l’argent.​—ZEKARIA 11:12; MATTHIEU 26:14-16.

▪ Bann dimoune ti pou batte li ek ti pou crache lor li.​—ISAÏE 50:6; MATTHIEU 26:67; 27:26, 30.

▪ Zot ti pou attache li lor enn poteau.​—PSAUME 22:16, note; MARC 15:24, 25.

▪ Bann dimoune ti insulté li alors ki li ti lor poteau.​—PSAUME 22:7, 8; MATTHIEU 27:39-43.

▪ Zot ti touye li sans ki zot ti casse enn so bann lezo.​—PSAUME 34:20; JEAN 19:33, 36.

Jésus ti realise sa bann prophetie-la ek beaucoup lezot prophetie encore. Jamais li pa ti pou kapav faire sa par li-mem. Parski Jésus finn realise tou sa bann prophetie-la, sa prouvé ki vrai-mem c’est Bondié ki finn envoye li.b

Mais, kifer li ti necessaire ki Jésus souffert ek mort?

▪ Jésus ti mort pou kapav reglé bann question bien important Jésus ti konn bien bann question ki ti soulevé dan jardin Éden, bann question ki ti ena enn grand l’importance ek ki ti concerne zot tou dan l’univers. Influencé par enn creature spirituel ki rebelle, Adam ek Ève ti choisir pou desobeir Bondié. Zot rebellion ti mette en doute droit ki Bondié ena pou dirigé ou-soit fason ki Li dirigé. Zot peché ti souleve enn question: eski bann dimoune pou reste fidele ar Bondié si zot passe par bann l’epreuve?​—Genèse 3:1-6; Job 2:1-5.

Par rapport avek sa deux sujet-la​—souveraineté Jéhovah ek fidelité bann dimoune​—Jésus ti donne enn reponse ki personne pa kapav dementi. Par so l’obeissance parfait “ziska la mort . . . lor enn poteau souffrance,” Jésus ti soutenir souveraineté Bondié. (Philippiens 2:8) Jésus ti aussi prouvé ki enn zom parfait kapav garde enn fidelité parfait envers Jéhovah malgré bann pli pire l’epreuve ki li kapav gagné.

▪ Jésus ti mort pou libere bann dimoune ar peché Concernant bann souffrance ek la mort Messie ki ti promette, prophete Isaïe ti annoncé ki sa ti pou couvert ek efface peché bann dimoune. (Isaïe 53:5, 10) Jésus ti bien comprend sa, ek li ti disposé pou donne “so nâme couma enn ranson en echange pou beaucoup.” (Matthieu 20:28) So la mort en sacrifice ti permette bann dimoune imparfait pou ena enn bon relation avek Jéhovah ek gagne delivrance ar peché ek la mort. La mort Jésus ti donne bann dimoune possibilité pou ré-gagne seki Adam ek Ève ti perdi​—l’espoir pou vive pou touletan dan bann condition parfait lor la terre.c​—Révélation 21:3, 4.

▪ Ki ou kapav faire Dan sa serie lartik-la, nou finn examine seki la Bible dire lor Jésus​—kot-sa li ti sorti, dan ki fason li ti vive, ek kifer li ti mort. Kan nou konn sa bann verité-la lor Jésus, sa pa zis elimine bann fausse l’idée ki nou ena lor li. Kan nou agir en accord avek sa bann verité-la, sa kapav faire nou gagne bann benediction​—enn pli bon la vie asterla ek la vie pou touletan dan l’avenir. La Bible dire nou seki nou bizin faire si nou envie gagne sa bann benediction-la.

▪ Aprann plus lor Jésus Christ ek lor so role dan projet Jéhovah.​—JEAN 17:3.

▪ Ena la foi en Jésus, ek coumsa, par ou fason vive, montré ki ou accepté li couma ou Sauveur.​—JEAN 3:36; ACTES 5:31.

Bann Témoins de Jéhovah pou bien content pou aide ou pou konn plus lor Jésus Christ, “sel Garson ki [Bondié] finn crée direct,” grace a ki nou kapav gagne “la vie pou touletan.”​—Jean 3:16.

[Notes]