Couma pou enseigne bann zenfant?​—Ki bann methode ki pli efficace?

“Sa bann commandement ki mo pé donne toi zordi-la, bizin lor to leker; to bizin contigne repete sa ar to garson pou faire sa rente dan so la tête ek koz sa kan to assizé dan to lakaz, kan to marché lor chemin, kan to allongé ek kan to levé.”​—DEUTÉRONOME 6:6, 7.

LI POSSIBLE ki parfois bann parent ena l’impression ki responsabilité pou forme zot zenfant, trop lourd pou zot. Selman kan zot rod conseil, sa quantité different conseil ki zot tendé ek lire lor sa sujet-la kapav mette zot encore plus dan confusion. Souvent bann membre la famille ek bann camarade pressé pou donne zot l’idée. Bann livre, bann magazine, ek bann site Internet donne bann parent enn quantité conseil kot parfois ena bann contradiction.

De lot coté, la Bible pa zis donne bann parent bann bon conseil en rapport avek seki zot bizin enseigne zot zenfant, mais aussi li donne zot enn direction pratik couma pou enseigne zot. Pareil couma sa deux verset la Bible ki’nn cité la-haut-la montré, bann parent bizin trouve enn moyen toulé-jour pou koz lor Bondié ar zot zenfant. Dan bann prochain paragraphe, nou pou examine quatre suggestion ki basé lor la Bible ki finn aide plusieurs millier parent pou enseigne zot zenfant lor Bondié.

1. Tire bann leson lor creation. L’apotre Paul ti ecrire: “Nou trouve bann qualité invisible [Bondié] dan enn fason clair depuis creation le monde, parski nou kapav trouve zot a travers bann kitsoz ki Li’nn faire, mem, so puissance eternel ek so nature en tant ki Bondié.” (Romains 1:20) Bann parent kapav faire beaucoup pou aide zot zenfant considere Bondié couma enn Personne réel. Zot kapav attire l’attention zot bann zenfant lor bann kitsoz ki Bondié inn crée ek aide zot pou comprend couma la creation faire zot trouve bann qualité ki Bondié ena.

Jésus ti servi sa methode-la kan li ti enseigne so bann disciple. Par exemple, li ti dire: “Observe bien bann zoiseau dan le ciel, parski zot pa planté ni recolté, ni ramasse dan bann grenier; pourtant zot Papa ki dan le ciel nourri zot. Eski zot pa vaut plus ki sa bann zoiseau-la?” (Matthieu 6:26) Ici, Jésus ti attire l’attention lor deux qualité ki Jéhovah ena: l’amour ek compassion. Mais li ti faire plus ki sa. Li ti aide so bann disciple pou raisonne lor fason ki Bondié ti montré sa bann qualité-la envers So bann zenfant.

Le roi Salomon, ki ti sage, ti koz lor sagesse ki bann fourmi ena grace a zot l’instinct ki Bondié inn donne zot. Salomon ti servi sa bann ti bebete-la pou mette l’accent lor enn leson bien important. Li ti ecrire: “Al guette enn fourmi, toi ki paresse; guette seki li faire ek vinn sage. Mem si li pena ni commandant, ni kikenn pou veille li, ni chef, li prepare so mangé pendant l’été; li’nn ramasse so mangé pendant lepok recolte.” (Proverbes 6:6-8) C’est vrai-mem enn bon fason pou enseigne l’importance pou fixé bann l’objectif ki vaut la peine ek pou servi la force ki Bondié inn donne nou pou realise sa bann l’objectif-la!

Bann parent kapav imite sa methode l’enseignement efficace ki Jésus ek Salomon ti servi-la kan zot suive sa bann conseil-la: (1) Demann zot zenfant ki plante ek ki zanimo ki interesse zot. (2) Aprann plus lor sa bann plante ek sa bann zanimo-la. (3) Tire bann leson lor Bondié grace a sa bann creation-la.

2. Imite l’attitude Jésus envers bann ki li ti enseigné. Parmi tou bann dimoune ki finn existé, Jésus ti ena bann kitsoz pli important pou dire. Pourtant, li ti passe enn bon partie so le temps pou pose question. Li ti bien interessé ar pensée ek sentiment bann dimoune ki li ti enseigné. (Matthieu 17:24, 25; Marc 8:27-29) Li pareil pou bann parent, zot ena beaucoup leson important pou enseigne zot zenfant. Mais pou zot vinn efficace, zot bizin imite Jésus ek encourage zot zenfant pou dire seki zot pensé, sans hesité.

Mais ki zot pou faire si zot zenfant manifesté enn mauvais l’attitude ou-soit prend beaucoup le temps pou aprann certain leson important? Guette fason ki Jésus ti agir avek so bann zapotre. Parfois, zot ti ena bann grand desaccord entre zot ek zot ti prend le temps pou aprann bann bienfait ki zot ti pou kapav gagné si zot ti ena l’humilité. Pourtant, Jésus ti garde so patience ek ti contigne repete l’importance pou ena l’humilité. (Marc 9:33, 34; Luc 9:46-48; 22:24, 25) Bann parent ki imite Jésus pou ena patience kan zot corrige zot zenfant ek, si necessaire, pou repete mem leson ziska ki bann zenfant-la bien comprend so l’importance.

3. Enseigne par l’exemple. Li bon ki bann parent ecoute conseil ki l’apotre Paul ti donne bann chretien ki ti vive dan la ville Rome. Li ti dire zot: “Mais, toi ki enseigne enn lot dimoune, eski to pa enseigne to-mem? Toi, ki preché: ’Fodé pa kokin,’ eski to-mem to kokin?”​—Romains 2:21.

Sa conseil-la bien approprié parski seki bann parent faire ena beaucoup plus l’effet lor zot zenfant ki seki zot dire. En realité, bann parent ki mette en pratik seki zot dire ena plus chance pou ena bann zenfant ki ecoute seki zot enseigné.

4. Commencé kan zenfant-la encore tipti. Timothée, enn missionnaire ki ti accompagne l’apotre Paul, ti ena enn bon reputation dan so l’endroit. (Actes 16:1, 2) Enn raison c’est parski “depuis bien tipti” so grand-mere ek so mama ti enseigne li “bann l’ecriture sacré.” Zot pa ti zis lire bann parole dan l’Ecriture avek li, mais aussi zot ti aide li pou raisonne lor bann verité ki ena dan sa bann l’Ecriture-la.​—2 Timothée 1:5; 3:14, 15.

Kot-sa ou kapav gagne l’aide

Bann Témoins de Jéhovah publié plusieurs publication surtout pou aide bann parent enseigne zot zenfant la verité lor Bondié. Certain finn ecrire pou bann jeune zenfant. Lezot publication kapav aide bann parent ek zot bann adolescent pou garde enn bon communication entre zot.a

Bien sur, avant ki bann parent kapav enseigne zot zenfant lor Bondié, zot bizin konn reponse certain question difficile ki bann zenfant kapav posé. Par exemple, couma ou pou reponn sa bann question-la: Kifer Bondié laisse dimoune souffert? Ki projet Bondié ena pou la terre? Kot bann dimoune mort été? Bann Témoins de Jéhovah pou content pou aide ou pou konn reponse sa bann question-la ek lezot question encore pou ki ou ek ou famille kapav vinn proche ar Bondié.​—Jacques 4:8.

[Note]